1-3. Ngimaphi amanye amabanga enze bona abantu abasekonzweni yesikhathi esizeleko batjhugulule izabelo zabo?

UROBERT NOMARY JO bathi, “Ngemva kweminyaka ema-21 sisesabelweni sethu sokuba ziinthunywa zevangeli, ababelethi bethu bobane besele bakhulile nepilwabo ibuthakathaka. Sakwamukela ukubatlhogomela. Nanyana kunjalo, sezwa ubuhlungu obukhulu ngokutjhiya isabelo sethu ebesisithanda.”

² UWilliam noTerrie bathi, “Nasizwa ukuthi ubujamo bepilwethu angekhe busasivumela bona sibuyele esabelweni sethu, salila. Saphela njalo-ke isifiso sethu sokulotjha uJehova kwenye inarha.”

³ U-Aleksey uthi, “Besazi ukuthi abantu abasihlunguphazako bebafuna ukuvala i-ofisi legatja ebesikhonza kilo. Kodwana sezwa ubuhlungu nakuvalwa iBethel begodu kwafuze sikhambe.”

4. Ngimiphi imibuzo esizokucoca ngayo esihlokwenesi?

⁴ Iinceku ezinengi ezisekonzweni yesikhathi esizeleko, kuhlanganise nalezo eziseBethel, zafumana izabelo ezitjha. * Abafowethu nabodade abathembekilekwaba bangakufumana kubudisi ukutjhiya isabelo sabo abasithanda khulu. Khuyini engabasiza bona baqalane namatjhuguluko? Ungabasiza njani? Iimpendulo zemibuzo le zingasisiza ukuthi sikwazi ukuzivumelanisa namatjhuguluko ekuphileni kwethu.

5. Amatjhuguluko angasithinta njani?

⁵ Kungakhathaliseki ukuthi sisesimini namkha siseBethel, kufuze  sifunde ukuthanda abantu nendawo esabelwe kiyo. Nakungenzeka sikhambe endaweni leyo ngesizathu esithileko, sizwa ubuhlungu. Nange kufuze sikhambe ngebanga lokuhlunguphazwa, siyabakhumbula abantu esibatjhiye emva begodu siyatshwenyeka ngabo. (Mat. 10:23; 2 Kor. 11:28, 29) Ngaphezu kwalokho, kungaba budisi khulu ukuyokuhlala endaweni ehlukileko ngombana lokho kuzokutjho bona kufuze sijayele amasiko wendawo leyo, singazizwa ngendlela efanako nalapho kufuze sibuyele ekhaya. URobert noMary Jo bathi, “Besele siwakhohliwe amasiko wendaweni yekhethu ngitjho nokutjhumayela ngelimi esalimunyako. Sazibona singasesebabantu bendawo leyo.” Abanye abaqalana namatjhuguluko bangazifumana baneendleko ebebangakazilindeli. Bangazizwa bangakaphephi begodu badanile. Khuyini engabasiza?

6. Singahlala njani siseduze noJehova?

⁶ Hlala useduze noJehova. (Jak. 4:8) Singakwenza njani lokho? Ngokuthi sithembele kuye njengombana ‘amumuzwi wemithandazo.’ (Rhu. 65:3) IRhubo 62:9 lithi, “thululani iinhliziyo zenu phambi kwakhe.” UJehova ‘angakghona ukwenza ngokuphuphumako ngaphezu kwazo zoke izinto esizibawako namkha esizicabangako.’ (Efe. 3:20) Akasinikeli lokho esikubawako kwaphela. Angenza ebesingakakulindeli ngokuthi asirarululele imirarwethu ngendlela ebesingakayicabangi.

7. (a) Khuyini engasisiza bona sihlale sitjhidelene noJehova? (b) NgokwamaHebheru 6:10-12, khuyini esizoyifumana nasiragela phambili silotjha uJehova ngokuthembeka?

⁷ Bona uhlale useduze noJehova, funda imiTlolo qobe begodu uzindle ngezinto ozifundileko. Omunye obekasithunywa sevangeli uthi: “Namathela ehlelweni lakho lokukhulekela komndeni nokulungiselela imihlangano njengombana bewenza ngaphambili esabelweni esidlulileko.” Ragela phambili umajadu emsebenzini wokutjhumayela iindaba ezimnandi ebandleni elitjha owabelwe kilo. UJehova uyabakhumbula boke abaragela phambili abamlotjha ngokuthembeka, ngitjho nanyana bangasakghoni ukwenza lokho ebebakghona ukukwenza ngaphambilini.—Funda amaHebheru 6:10-12.

8. Amezwi akweyoku-1 kaJwanisi 2:15-17 angakusiza njani uphile ukuphila okulula?

⁸ Phila ukuphila okulula. Ungavumeli amatshwenyeko wephasi lakaSathaneli “akuminyanise”  ekulotjheni uJehova. (Mat. 13:22) Ungabalaleli abantu abangamlotjhiko uJehova okuhlanganisa abangani neenhlobo ezikufunela ukuphila okungcono njengokukutholela umsebenzi ephasini elimbi lakaSathaneli. (Funda yoku-1 kaJwanisi 2:15-17.) Thembela kuJehova ngombana usithembisa ukusisekela ngazo zoke izinto esizitlhogako. Lokho kuhlanganisa ubuhlobo obuhle naye nokusinikela koke “ngesikhathi esifaneleko.”—Heb. 4:16; 13:5, 6.

9. NgokwezAga 22:3, 7, kubayini kuqakathekile ukubalekela iindleko ezingatlhogekiko, begodu khuyini engasisiza bona senze iinqunto ezihlakaniphileko?

⁹ Balekela iindleko ezingatlhogekiko. (Funda izAga 22:3, 7.) Ukuthuthela kwenye indawo kungabiza khulu begodu kubulula ukungena eenkolodweni. Bona sibalekele iindleko, kufuze singathomi sithenge ngesikolodo izinto esingazitlhogiko. Nasigandelelekileko mhlamunye ngebanga lokutlhogomela ilunga lomndeni eligulako, kungaba budisi ukubona ukuthi ingangani imali ekufuze siyiboleke bona sitlhogomele ilunga eligulakwelo. Nasiqalene nobujamobo, kufuze sikhumbule ukuthi ‘ukuthandaza nokubawa’ kungasisiza bona senze iinqunto ezihlakaniphileko. UJehova angaphendula imithandazwethu ngokusinikela ukuthula okudlula koke ukuzwisisa ‘okuzokuvikela iinhliziyo zethu nemicabangwethu,’ kuzosisiza sicabangisise kuhle begodu sazi nokuthi khuyini ekufuze siyenze.—Flp. 4:6, 7; 1 Pit. 5:7.

10. Singabakha njani ubungani?

¹⁰ Yakha ubungani nabantu abasikhuthazo. Coca nabangani otjhidelene nabo ngendlela ozizwa ngayo nangobudisi oqalene nabo, khulukhulu labo ekungenzeka khebaba sebujamweni okibo. Ukwenza njalo kungakusiza uzizwe ngcono. (UMtj. 4:9, 10) Abangani bebandla osuka kilo bazokuhlala babangani bakho. Njengombana usesabelweni esitjha kufuze ube nabangani abatjha. Khumbula ukuthi nawuzakuba nabangani, kufuze ube nobungani. Ungabafumana njani abangani abatjha? Coca ngezinto ezihle uJehova akwenzele zona begodu ubenze babone ukuthi lokho kukuthabisa kangangani. Ngitjho nanyana abanye ebandleni bangekhe bazwisise ukuthi kubayini uyithanda kangaka ikonzo yesikhathi esizeleko, abanye bangafuna ukwazi okungeziweko begodu lokho kuzobenza bafune ukuba bangani bakho. Yelela bona ungabi siqeda mlozi ngezinto ozifezileko ekonzweni begodu ungenzi abanye babe nombono ongakafaneli.

11. Ningahlala njani nithabile emtjhadweni?

¹¹ Nakungatlhogeka utjhiye isabelo sakho ngebanga lokugula komlinganakho, ungambeki umlandu ngalokho. Ngakelinye ihlangothi, nakungenzeka kube nguwe ogulako, ungazibeki umlandu, uzwe ngasuthi udanise umlinganakho.  Khumbula ukuthi ‘niyinyama yinye’ begodu nithembise uJehova ukuthi nizokutlhogomelana nanyana kungenzekani. (Mat. 19:5, 6) Nangabe natjhiya isabelo senu ngebanga lokuba nomntwana ningakahleli, qinisekani bona umntwanenu uyazi ukuthi uqakathekile ukudlula isabelo senu. Tjelani umntwanenu qobe ukuthi ‘umvuzo’ ovela kuZimu. (Rhu. 127:3-5) Ngesikhathi esifanako, mtjeleni ngezinto ezihle nemiphumela enayithabelako esabelweni senu. Ukwenza njalo kuzokusiza umntwanenu bona alotjhe uJehova isikhathi esizeleko alandela isibonelo senu.

12. (a) Singabasiza njani abasekonzweni yesikhathi esizeleko bona bahlale ezabelweni zabo? (b) Singabasiza njani bona bazijayele msinyana izabelo zabo ezitjha?

¹² Kuyathabisa ukuthi emabandleni amanengi abafowethu nabodadwethu basiza labo abasekonzweni yesikhathi esizeleko bona bahlale ezabelweni zabo. Lokhu bakwenza ngokubakhuthaza, babasize ngezinto eziphathekako ekungenzeka bayazitlhoga namkha babasize ngokutlhogomela imindenabo abayitjhiye emakhaya. (Gal. 6:2) Nangabe labo abasekonzweni yesikhathi esizeleko bathunyelwa ebandleni okilo, ungacabangi bona akhenge bawenze kuhle umsebenzabo namkha kunokuthileko abakwenzileko okungakafaneli. * Kunalokho, basize bajayele msinyana. Bamukeleni ngethando begodu nibabuke ngomsebenzi omuhle abawenzileko ngitjho nanyana bangekhe basakghona ukwenza okungeziweko ngebanga lepilo ebogabogako. Linga ukubazi ngcono. Funda kokuhlangabezanwe nakho kwabo okuhle, elwazini labo nebandulweni abakunikela lona.

13. Singabasiza njani labo abafumene izabelo ezitjha?

 ¹³ Labo abafumene izabelo ezitjha bazokutlhoga isizo lakho malungana nendawo yokuhlala, izinto zokukhamba, umsebenzi kunye nezinye izinto. Bangatlhoga godu isizo lakho nakuziwa endabeni yokujayela indawo nokhunye okuhlanganisa ukubhadela umthelo nokufumana i-intjhorensi. Okuqakatheke khulu, kukhumbula ukuthi abatlhogi ukuzwelwa, kodwana batlhoga bona sizwisise ubujamo babo. Kungenzeka baqalene nobudisi namkha ilunga lomndenabo liqalene nemiraro yepilo. Kungenzeka basezwa ubuhlungu ngebanga lokuhlongakalelwa. * Kungenzeka godu bezwa ubuhlungu ngemsitheleni ngebanga lokuhlukana nabantu ebesele babajayele babaqala njengomndeni esabelweni abasuka kiso. Kuthatha isikhathi bona kuphele amazizo lawo.

14. Abafowethu nabodadwethu bamsiza njani umrhuweleli omutjha bona ayijayele msinyana isimu?

¹⁴ Okhunye esingakwenza, kutjhumayela nabo sibakhuthaze ngendlela esenza ngayo izinto, lokho kungabasiza bajayele msinyana. Udadwethu osele aneminyaka eminengi asebenza isimu yakwenye inarha uthi, “Bengiraga iimfundo zeBhayibheli qobe lilanga esabelweni sami saphambilini. Esabelweni engikiso nje bekubudisi ukufumana ithuba lokufundela umuntu iBhayibheli esimini namkha ukumtjengisa ividiyo. Abafowethu nabodadwethu bebakhamba nami nabayokuraga iimfundo namkha nabayokwenza amabuyelo. Ukubona abafowethu nabodadwethu basebenza budisi nangokuthembeka bona barage iimfundo zeBhayibheli, kwangenza ngazizwa ngcono khulu ngesimu engikiyo. Ngafunda ukuthoma ingcoco esimini etjha le. Koke lokhu kwangenza ngathaba godu.”

15. Ungaphumelela njani esabelweni sakho esitjha?

¹⁵ Ungaphumelela esabelweni sakho esitjha. Ungacabangi ukuthi akhenge wenze kuhle esabelweni sakho sangaphambili. Cabanga ngeendlela uJehova akusiza ngazo nje begodu uragele phambili utjhumayela. Lingisa amaKrestu  athembekileko wekadeni. Nanyana kukuphi la bewaya khona ‘bewarhatjha iindaba ezimnandi kizo zoke iimfunda.’ (IzE. 8:1, 4) Imizamwakho yokuragela phambili utjhumayela ingakulethela imiphumela emihle. Ngokwesibonelo, amaphayona aqothwa enarheni ethileko, aya enarheni engumakhelwana, nawafika lapho afumana ukuthi kunabantu abakhuluma ilimi labo ekufuze batjhunyayezwe. Eenyangeni ezimbalwa kwathonywa iinqhema zabantu abakhuluma ilimelo.

16. Ungasithabela njani isabelo sakho esitjha?

¹⁶ “Ukwenama enikuphiwa nguSomnini kumamandlenu.” (Nerh. 8:10) Kufuze sithatjiswe buhlobo bethu obuhle noJehova, ingasi izabelo zethu nanyana singazithanda kangangani. Yeke nasifuna ukuthaba kufuze siragele phambili sinamathele kuJehova begodu simthembe. Khumbula ukuthi ibanga elakwenza wathanda isabelo sakho sangaphambilini kukuthi wenza koke okusemandlenakho bona usize abanye. Zidele esabelweni sakho, nawenza njalo uzokubona indlela uJehova azokusiza ngayo bona usithande.—UMtj. 7:10.

17. Khuyini okufuze siyikhumbule ngezabelo esizenza nje?

¹⁷ Kufuze sikhumbule ukuthi uJehova sizomlotjha ngokungapheliko, begodu esimenzela khona nje kungokwesikhatjhana. Ephasini elitjha soke sizokufumana izabelo ezitjha. U-Aleksey odzujulwe ekuthomeni kwesihlokwesi uthi amatjhuguluko enzeka esabelweni sakhe amsiza bona alungele amatjhuguluko azako. Uraga uthi, “bengazi ukuthi uJehova nephasi elitjha kungokwamambala, nanyana kunjalo bengikuqalela kude lokho. Nje ngitjhidelene khulu noJehova begodu ngizwa ngasuthi nephasi elitjha selitjhidele.” (IzE. 2:25) Asirageleni phambili sikhamba noJehova kungakhathaliseki ukuthi senza siphi isabelo. Angeze asitjhiya kodwana sizokufumana ithabo nasenza nanyana yini ekonzwenakhe—kinanyana ngisiphi isabelo.—Isa. 41:13.