UKUKHOLWA kusinikela amandla amanengi. Ngokwesibonelo, ngitjho nanyana uSathana alinga ukuqeda itjhebiswano lethu noJehova, ukukholwa kusisiza bona ‘sikghone ukucima yoke imisubela evuthako yomumbi.’ (Efe. 6:16) Nasinokukholwa, singakghona ukukghodlhelela imiraro engangentaba. UJesu watjela abafundi bakhe wathi: “Naningaba nokukholwa okulingana nembewu yemastedi, nizokuthi entabeni le, ‘Suka lapho uye lapha,’ izokusuka.” (Mat. 17:20) Ngebanga lokuthi siyazi ukuthi ukukholwa kungaqinisa itjhebiswano lethu noJehova, kufuze sizibuze imibuzo nasi: Khuyini ukukholwa? Kghani iinhliziyo zethu ziyakuthinta ukukholwa kwethu? Singakuqinisa njani ukukholwa kwethu? Ngubani ekufuze sikholelwe kuye?—Rom. 4:3.

Ukukholwa kutjho okungaphezu kokukholelwa namkha ukwamukela ukuthi lokho okutjhiwo liBhayibheli kuliqiniso, ‘ngombana namadimoni ayakholelwa [ukuthi uZimu ukhona] begodu ayahlengezela.’ (Jak. 2:19) Khuyini ukukholwa?

IBhayibheli lihlathulula ukukholwa ngeendlela ezimbili. Yokuthoma, “ukukholwa kulindelwa okuqinisekisiweko kwalokho esinethemba ngakho.” (Heb. 11:1a) Nawunokukholwa, uyaqiniseka ngokuthi koke uJehova akutjhoko kuliqiniso nokuthi kuzokwenzeka. UJehova watjela ama-Israyeli wathi: “Nange ningephula isivumelwano sami ngemini nangobusuku ukuze imini nobusuku bungasafiki ngesikhathi esibekiweko, khona-ke isivumelwano sami noDavida incekwami, singephuka.” (Jor. 33:20, 21) Kghani uyasaba na ukuthi kungenzeka ilanga lingasaphumi, ngebanga lalokho kungasaba khona imini nobusuku? Nangabe uyayikholelwa imithetho yemvelo eyenza bona iphasi lizombeleze ilanga, kghani kufuze uzaze na ukuthi uMdali wemithetho leyo angabhalelwa kuzalisa iinthembiso zakhe? Awa, akusinjalo!—Isa. 55:10, 11; Mat. 5:18.

Yesibili, ukukholwa “bufakazi obanelisako balokho okungokwamambala okungabonwako.” Yeke ukukholwa ‘bufakazi obanelisako’ namkha ‘kubonakaliswa okukhanyako,’ kwezinto ezingabonwa ngamehlo kodwana ezikhona. (Heb. 11:1b; ftn.) Kwenzeka njani lokho? Akhesithi umntwana uyakubuza ukuthi, ‘Wazi njani bona ummoya ukhona?’ Nanyana ungakhenge uwubone ummoya, ungamtjela ngezinto ezitjengisa ukuthi ummoya ukhona, njengokuphefumula. Nasele umntwana akholelwa bona ummoya ukhona angazwisisa ukuthi kuyakghonakala ukukholelwa entweni engabonakaliko. Ngokufanako, nokukholwa kusekelwe ebufakazini obuqinileko.—Rom. 1:20.

Ngebanga lokuthi ukukholwa kusekelwe ebufakazini, yeke nomuntu nakazakuba nokukholwa kufuze ‘abenelwazi elinembileko leqiniso.’ (1 Thim. 2:4) Kodwana ilwazelo alikaneli. Umpostoli uPowula watlola wathi: “Ngehliziyo umuntu uyakholwa.” (Rom. 10:10) Yeke umuntu akukafuzi bona akholelwe iqiniso kwaphela kunalokho kufuze alithande. Ukwenza njalo, kuzomsiza bona abe nokukholwa bekaphile ngendlela ethabisa uZimu. (Jak. 2:20) Umuntu  ongalithandiko iqiniso angabhala ukulamukela ngebanga lokuthi akafuni ukutjhugulula iinkolelo zakhe namkha ufuna ukwenza izinto ngendlelakhe. (2 Pit. 3:3, 4; Jud. 18) Lokho kwenza sibone ukuthi ngitjho neenkhathini zeBhayibheli, akusibo boke ababa nokukholwa lokha nakwenziwa imikarisomraro. (Num. 14:11; Jwa. 12:37) Ummoya ocwengileko kaZimu unikela abantu abathanda iqiniso ukukholwa.—Gal. 5:22; 2 Thes. 2:10, 11.

IKosi uDavida ibalwa phakathi kwabantu ebebanokukholwa okuqinileko. (Heb. 11:32, 33) Nanyana kunjalo, akusiwo woke umuntu emndenini kaDavida owaba nokukholwa okunjalo. Ngokwesibonelo, kesinye isikhathi u-Eliyabu, umfowabo kaDavida omdala, wakhalima uDavida ngokukwatela kwakhe uGoliyadi ngebanga lokuthi bekafuna ukulwa nama-Israyeli, ngokwenza lokho akhenge abe nokukholwa kuJehova. (1 Sam. 17:26-28) Akekho umuntu obelethwa anokukholwa namkha okuzuza ebabelethini bakhe, uDavida wazakhela ukukholwa ngokuba nobuhlobo obuhle noZimu.

KuRhubo 27, uDavida uveza indlela akwakha ngayo ukukholwa okuqinileko. (Vs. 1) Wazindla ngezinto aqalana nazo esikhathini esidlulileko nangendlela uJehova amsiza ngayo bona aqalane neentjhijilo. (Vss. 2, 3) Wamthokoza khulu ngelungiselelo lokumlotjha. (Vs. 4) UDavida walotjha uZimu anamanye amakholwa ethaberinakeleni. (Vs. 6) Wathandaza kuJehova ngokusuka ehliziyweni. (Vss. 7, 8) UDavida wafuna ukufundiswa nguZimu. (Vs. 11) Ukukholwa bekuqakatheke khulu kuDavida kangangobana wazibuza wathi: “Ngabe ngikuphi ngathana akhenge ngibe nokukholwa?”—Vs. 13, NW.

Ungaba nokukholwa okufana nokwakaDavida nange ulingisa indlelakhe yokucabanga nemikghwakhe emihle ekukhulunywa ngayo kuRhubo 27. Njengombana ukukholwa kusekelwe elwazini leqiniso, nawuragela phambili ufunda iliZwi lakaZimu neencwadi ezisekelwe kilo, ummoya ocwengileko uzokusiza uthuthukise ukukholwa kwakho. (Rhu. 1:2, 3) Nawufundako, ziphe isikhathi sokuzindla. Nawuzindla ngalokho okufundako, uzokukghona ukuthokoza uJehova ngezinto akwenzela zona. Njengombana ukhula ekwazini kwakho uJehova, nesifiso sakho sokuba khona esifundweni, nokutjhumayeza abanye sizokukhula. (Heb. 10:23-25) Ngaphezu kwalokho, nasinokukholwa sizokuragela phambili ‘sithandaza, singapheli amandla.’ (Luk. 18:1-8) Yeke, “thandazani qobe” kuJehova, niqiniseke ukuthi “unendaba nani.” (1 Thes. 5:17; 1 Pit. 5:7) Ukukholwa kwenza senze okulungileko begodu nasikwenzako, ukukholwa kwethu kuzokuqina.—Jak. 2:22.

Ngobusuku bangaphambi kokufa kwakhe, uJesu watjela abafundi bakhe wathi: “Kholwani kuZimu; kholwani nakimi.” (Jwa. 14:1) Kufuze sikholelwe kuJehova nakuJesu. Ungakholelwa njani kuJesu? Akhesicoce ngeendlela ezintathu.

Yokuthoma, cabanga ngesipho sesihlengo uZimu akuphe sona. Umpostoli uPowula wathi: ‘Ngiphila ngokukholelwa eNdodaneni kaZimu, eyangithanda, yazinikela ngebanga lami.’ (Gal. 2:20) Nawukholelwa kuJesu, uyaqiniseka ukuthi isihlengo siyasebenza kuwe ngombana sisisekelo sokulitjalelwa kwezono zakho, sikunikela ithemba lokuphila ngokungapheliko begodu sikunikela ubufakazi bokuthi uZimu uyakuthanda. (Rom. 8:32, 38, 39; Efe. 1:7) Nawukholelwa ukuthi isihlengo singakusiza, angekhe uzizwe umlandu namkha uzinyaze ngezinto owazenzako.—2 Thes. 2:16, 17.

Yesibili, thandaza ukhulume noJehova usebenzisa umhlatjelo kaJesu. Isihlengo senza sikghone ukuthandaza kuJehova “ngetjhaphuluko yokukhuluma bona sifumane isirhawu nomusa omkhulu bona usisize ngesikhathi esifaneleko.” (Heb. 4:15, 16; 10:19-22) Umthandazo uyasiqinisa, wenza sizimisele ukujamelana neenlingo zokwenza isono.—Luk. 22:40.

Yesithathu, lalela uJesu. Umpostoli uJwanisi wathi: “Loyo otjengisa ukukholwa eNdodaneni unokuphila okungapheliko; loyo ongalaleli iNdodana angekhe akubona ukuphila, kodwana ilaka lakaZimu lizokuhlala liphezu kwakhe.” (Jwa. 3:36) Tjheja ukuthi uJwanisi wathi ukukholwa kuhlukile kunokungalaleli. Yeke sisuke sikholelwa kuJesu nasimlalelako. Silalela uJesu nasilandela “umthetho kaKrestu,” okutjho ukwenza koke akufundisako nasiyalela bona sikwenze. (Gal. 6:2) Silalela uJesu nangokulandela iinqophiso asinikela zona ‘ngenceku ethembekileko nehlakaniphileko.’ (Mat. 24:45) Nasilalela uJesu, sizokuba namandla wokukghodlhelela imiraro ebonakala iyingozi begodu inamandla njengesiwuruwuru.—Luk. 6:47, 48.

Ngesinye isikhathi, indoda ethileko yalila kuJesu yathi: “Ngiyakholwa! Ngisiza lapha ngitlhoga khona ukukholwa!” (Mar. 9:24) Iye, indoda le beyinakho ukukholwa begodu beyithobekile, nanyana kunjalo beyazi ukuthi itlhoga ukukholwa okungeziweko. Njengendoda le, nathi ngezinye iinkhathi kuzokutlhogeka bona sibe nokukholwa okungeziweko. Nje kufuze siqinise ukukholwa kwethu. Njengombana sibonile, sizokuqinisa ukukholwa kwethu nasifunda iliZwi lakaZimu begodu sizindle ngalo, lokho kuzokuqinisa ithando lethu ngoJehova. Ukukholwa kwethu kuzokuqina nalokha nasidumisa uJehova tjhatjhalazi sikunye nesikholwa nabo begodu sitjela abanye ngethemba lethu besiphikelele nemthandazweni. Ngaphezu kwalokho, nasiqinisa ukukholwa kwethu, sizokufumana umvuzo omkhulu kunayo yoke. IliZwi lakaZimu lisikhuthaza lithi: “Nina bathandekako, zakheni ekukholweni kwenu okucwengeke khulu . . . ukuze niqiniseke bona nihlala nithandwa nguZimu.”—Jud. 20, 21.