UTJHEJILE na ukuthi abantu abanengi bafuna ukuphathwa ngendlela ekhethekileko ukudlula abanye? Kunganandaba ukuthi banezinto ezinengi kangangani, bakholelwa ukuthi bafanelwe ngokungeziweko. Abantwaba bazicabangela bona babodwa begodu abathokozi. Ngilokho iBhayibheli elathi abantu bazokuba ngikho emalangeni wokuphela.—2 Tim. 3:2.

Abantu abazicabangela bona abathomi ukuba khona nje. U-Adamu no-Eva bakhetha ukuziquntela bona ukuthi khuyini elungileko nengakalungi, lokho kwaba nemiphumela emimbi khulu. Esinye isibonelo ngeseKosi yakwaJuda u-Uziya, yacabanga bona kufuze ivunyelwe ukuthi itjhise ipepho ethempelini. Kodwana bekungakafuzi yenze njalo, beyibethe phasi. (2 Kron. 26:​18, 19) AbaFarisi nabaSadusi nabo bebakholelwa ukuthi bebafanelwe mumusa kaZimu, ngebanga lokuthi u-Abrahama bekangukhokhwabo.—Mat. 3:9.

Siphila nabantu abazicabangela babodwa begodu lokho kungasenza sigcine sesifana nabo. (Gal. 5:26) Singathoma ukucabanga ukuthi sifanelwe kufumana amalungelo athileko namkha ukuphathwa ngendlela ekhethekileko. Khuyini engasisiza singacabangi njengabo? Kokuthoma, kuzwisisa ukuthi uJehova uzizwa njani ngendaba le. Kuneenkambiso zeBhayibheli ezimbili ezingasisiza.

UJehova usikhethela okusifaneleko. Akhesicabange ngeembonelo ezilandelako.

• Elungiselelweni lomndeni, indoda itlhoga ukuhlonitjhwa mkayo begodu umfazi utlhoga  ukuthandwa yindodakhe. (Efe. 5:33) Abatjhadikazi banelungelo lokulindela ithando ebalinganini babo. (1 Kor. 7:3) Ababelethi banelungelo lokulindela ukuhlonitjhwa bantwana babo, nabantwana kufuze bathandwe bebasekelwe babelethi babo.—2 Kor. 12:14; Efe. 6:2.

• UJehova uthi kufuze sihloniphe abadala bebandleni ngebanga lokusebenza kwabo budisi. (1 Thes. 5:12) Nanyana kunjalo, abanalungelo lokulawula lokho okwenziwa bafowethu nabodadwethu.—1 Pit. 5:​2, 3.

• UZimu unikele aborhulumende ilungelo lokufuna umthelo ebantwini abangaphasi kwabo.—Rom. 13:​1, 6, 7.

Ngebanga lokuthi uyasithanda, uJehova usiphe okunengi okudlula lokho okusifaneleko. Ngebanga lokuthi sizizoni, sifanelwe kukufa. (Rom. 6:23) Kodwana uJehova usasipha iimbusiso ezinengi ngebanga lethando elithembekileko analo ngathi. (Rhu. 103:​10, 11) Usiphe zoke iimbusiswezi ingasi ngombana zisifanele kodwana kungebanga lokuthi uyasithanda begodu unomusa omkhulu ongakasifaneli.—Rom. 12:​6-8; Efe. 2:8.

Tjheja bona ungacabangi njengabantu bephaseli. Nasingakatjheji, singathoma ukucabanga ukuthi sifanelwe zizinto ezinengi ukudlula abanye. UJesu watjengisa ukuthi lokhu kungenzeka lula kangangani emfanekiswenakhe weensebenzi ezabhadelwa udenariyu. Ezinye iinsebenzi zathoma ekuseni khulu zasebenza ilanga loke kutjhisa, ezinye zasebenza i-iri linye kwaphela. Iinsebenzi ezathoma ukusebenza ekuseni zacabanga ukuthi zifanelwe mrholo omnengi ngebanga lomsebenzi omkhulu eziwenzileko. (Mat. 20:​1-16) Ngokwenza umfanekiso lo, uJesu bekatjengisa abalandeli bakhe bona baneliseke ngalokho uZimu abenzela khona.

Yiba mumuntu othokozako, ingasi olindela izinto kwabanye. (1 Thes. 5:18) Lingisa umpostoli uPowula ongakhenge alindele bona abafowabo bamuphe izinto azitlhogako, ngitjho nanyana bekanelungelo lokwenza njalo. (1 Kor. 9:​11-14) Kufuze sithabele iimbusiso esizifumanako begodu sibalekele ukulindela ukufumana izinto kwabanye.

 Lwela ukuthobeka. Umuntu othoma ukuzibona angcono kunabanye, uzibona afanelwe zizinto ezinengi ukudlula lezo anazo. Ukuba babantu abathobekileko kuzosisiza sibalekele ukuba babantu abanjalo.

Umphorofidi uDanyela wabeka isibonelo esihle sokuthobeka. Bekavela emndenini oqakathekileko, amuhle, ahlakaniphile begodu anamakghono amanengi. Zoke izintwezi bezingamenza acabange ukuthi ufanelwe kuphathwa ngendlela ekhethekileko. (Dan. 1:​3, 4, 19, 20) Kodwana uDanyela wahlala athobekile, ubuntobu bamenza waba ligugu kuJehova.—Dan. 2:30; 10:​11, 12.

Asikubalekeleni ukuba babantu abazicabangela babodwa njengombana iphaseli likhuthaza ukuziphatha okunjalo. Kunalokho, asirageleni phambili sithatjiswa ziimbusiso esizifumana kuJehova ngomusakhe ongakasifaneli.