1. Ngikuphi esiqiniseka ngakho, begodu kubayini?

 NAWUQALA ubujamo esiphila kibo namhlanjesi, inga-kghani ukuthola kubudisi ukukholelwa ukuthi ubujamo buzakhe bubengcono? Namhlanjesi amalunga womndeni awasathandani ngendlela ebewathandana ngayo phambilini. Abantu abanengi banenturhu, bamarhamaru begodu abacabangelani. Inengi likufumana kubudisi ukuthemba abaseenkhundleni. Izintwezi kufuze zikuqinisekise ngokuthi ubujamo buzokubangcono. Kubayini sitjho njalo? Kungombana namhlanjesi abantu benza lokho iBhayibheli elathi kuzokwenzeka “emihleni yokuphela.” (2 Thim. 3:1-5) Ukuzaliseka kwesiphorofidwesi, kubonakala ngokukhanyako kangangobana umuntu otjhejisisako uyakghona ukukubona okwenzekako, yeke kusinikela ubufakazi bokuthi uJesu Krestu sele athomile ukubusa njengeKosi yomBuso. Isiphorofidwesi sihlangana nezinye ezinengi ezimalungana nomBuso. Kuzosiqinisa ukukholwa ukubuyekeza iimphorofidwezi nezinye esele zizalisekile emnyakeni yamva nje.

2. Khuyini esizokucoca ngayo esihlokwenesi, begodu kubayini? (Khulumela isithombe esingaphandle)

² Esihlokwenesi, sizokucoca (1) ngesiphorofido esisiza sikghone ukubona ukuthi umBuso kaZimu wathoma nini ukubusa, (2) iimphorofido esisiza sibone ukuba khona kukaJesu njengeKosi yomBuso kaZimu okungabonakaliko, begodu (3) nangeemphorofido ezisivezela ukuthi amanaba womBuso kaZimu azokutjhatjalaliswa njani. Njengombana umthungi akghona ukuhlanganisa amatjhila ahlukahlukeneko bese kuvela isambatho esihle, iimphorofido esizokucoca ngazo zizosisiza sizwisise kuhle bona sikuphi nombono kaJehova wezenzakalo.

3. Isiphorofido esifumaneka kuDanyela 7:13, 14 sisinikela siphi isiqinisekiso malungana neKosi yomBuso kaZimu?

³ Isiphorofido esifumaneka kuDanyela 7:13, 14 sisiqinisekisa ngokuthi uJesu Krestu uzokuba Mbusi wamambala womBuso kaZimu. Abantu abavela kizo zoke iintjhaba ‘bazomlotjha,’ begodu ngeze ajanyiselelwa ngomunye umbusi. Esinye isiphorofido encwadini kaDanyela sabikezela ukuthi uJesu uzokufumana umBuso ekupheleni kwesiphorofido esimalungana neenkhathi ezibuyelelwe kalikhomba. Inga-kghani singakghona ukwazi ukuthi isenzakalo esithabisakweso senzeka nini?

4. Hlathulula bona uDanyela 4:10-17 usidosela njani emnyakeni uKrestu athatha ngawo amandla wokubusa emBusweni kaZimu. (Qala umtlolo waphasi.)

⁴ Funda uDanyela 4:10-17. ‘Iinkhathi ezibuyelelwe kalikhomba’ zisikhathi esiminyaka ezii-2 520. Isikhatheso sathoma ngo 607 B.C.E. iBhabhiloni nalisusa ikosi yokugcina emBusweni kaZimu eJerusalema. Isikhatheso saphela ngo-1914 C.E. lokha uJehova nakabeka uJesu, “onelungelo” esihlalweni sobukhosi njengeKosi yomBuso kaZimu. b—Hez. 21:25-27.

5. Ngiyiphi enye indlela esingazuza ngayo esiphorofidweni esimalungana ‘neenkhathi ezibuyelelwe kalikhomba’?

⁵ Isiphorofidwesi singasizuzisa njani? Ukwazi ‘ngeenkhathi ezibuyelelwe kalikhomba’ kuyasiqinisekisa ukuthi uJehova uzalisekisa iinthembiso zakhe ngesikhathi esifaneleko. UJehova waqunta ukuthi uzokwenza uJesu iKosi ngesikhathi esithileko. Isikhatheso nasifikako uJehova wenza njengombana bekaquntile. Yeke singaqiniseka ngokuthi uzokuzalisekisa zoke iimphorofido azithembisileko ngesikhathi aqunte ukuzizalisekisa ngaso. Iye ilanga lakaJehova ‘angeze liriyade!’—Rhab. 2:3.

6. (a) Ngibuphi ubufakazi obubonakalako bokubusa kwakaKrestu ezulwini? (b) Ubufakazobu busiqinisekisa njani isiphorofido esikusAmbulo 6:2-8?

⁶ Nasele kuyokuphela ukuphila kwakhe kwephasini, uJesu wakhuluma ngalokho ebekuzokwenzeka ephasini bona asize abalandeli bakhe bazi ukuthi sele athomile ukubusa ezulwini. Hlangana nezinye izinto, wabala izipi, ukutlhayela kokudla kunye nokusikinyeka kwephasi. Wabikezela nangokuthi bekuzokuba nezifo ezihlukahlukeneko ‘endaweni ngeendawo’—isibonelo salokho yisindabelaphi erhageleko nanje i-COVID-19. Izenzakalwezi ziyingcenye yalokho iBhayibheli elikubiza ngokuthi “ziimbonakaliso” zokuba khona kwakaKrestu. (Mat. 24:3, 7; Luk. 21:7, 10, 11) Iminyaka engaphezu kwema-60 ngemva kokuhlongakala nokubuyela kwakaJesu ezulwini, wanikela umpostoli uJwanisi isiqinisekiso sokuthi izenzakalwezi zizokuba khona. (Funda IsAmbulo 6:2-8) Zoke izenzakalwezi zathoma kusukela uJesu athoma ukubusa emBusweni kaZimu ngo-1914.

7. Kubayini ukubusa kwakaJesu kwabangela ukuthi kube nomaye ephasini?

⁷ Kubayini ubujamo bephasi bubebumbi khulu lokha uJesu nakathoma ukubusa njengeKosi? IsAmbulo 6:2 sisinikela ilwazi eliqakatheke khulu—Umsebenzi kaJesu wokuthoma njengeKosi etja bekukulwa. Bekazokulwa nobani? Bekazokulwa noDeveli namadimonakhe. Ngokwalokho okutjhiwo  yisAmbulo isahluko 12, uSathana wahlulwa, begodu yena namadimonakhe baphoselwa phasi ephasini. Asilingekile, uSathana wathoma ukukhiphela ilaka lakhe ebantwini, umphumela walokho waba ‘ngumaye ngephasi.’—IsAm. 12:7-12.

8. Kusizuzisa njani ukubona iimphorofido zomBuso zizaliseka?

⁸ Zingasizuzisa njani iimphorofidwezi? Izenzakalo zephasi nendlela abantu abaziphatha ngayo izosisiza sikghone ukubona ukuthi uJesu sele ayiKosi. Yeke kunokuthi sidane nasibona izenzo zabantu zokuba marhamaru nezokuba nehloyo, kufuze sikhumbule ukuthi izenzo zabezo zizalisekisa isiphorofido seBhayibheli. UmBuso kaZimu uyabusa! (Rhu. 37:1) Begodu singalindela bona ihlangahlangano esephasini ikhule njengombana i-Arimagedoni itjhidela. (Mar. 13:8; 2 Thim. 3:13) Inga-kghani awumthokozi uBabethu wezulwini ngokusisiza sizwisise bona kubayini kunehlangahlangano engaka ephasini?

9. Isiphorofido esikuDanyela 2:28, 31-35, siwuhlathulula njani umbuso wephasi wamaswaphela nokuthi waba khona njani?

⁹ Funda uDanyela 2:28, 31-35. Siyakubona ukuzaliseka kwesiphorofidwesi namhlanjesi. Ibhudango lakaNebukhadinetsari likhuluma ngalokho ebekuzokwenzeka ‘emalangeni azako’, ngemva kokuthoma kokubusa kwakaKrestu. Amanaba kaJesu wephasini afaka hlangana umBuso wephasi okwabikezelwa ngawo eBhayibhelini, loyo ofanekiselwa ‘ziinyawo zesimbi nomdaka.’ UmBuso wephasi lo kade ukhona. Wabakhona hlangana nePi Yephasi yoku I lokha iBrithani ne-United States zakha ubuhlobo obukhethekileko, okuyihlanganisela ye-Anglo-American. Ibhudango  lakaNebukhadinetsari lesithombe labikezela nangokuthi okungenani kunezinto ezimbili malungana nomBuso wephasi lo ezizowuhlukanisa kweminye imibuso.

10. (a) Isiphorofido sakaDanyela siwuveza njani ngokukhanyako Umbuso we-Anglo-American obumbeneko? (b) Ngiyiphi ingozi ekufuze siyitjheje? (Qala ibhoksi elithi, “ Tjheja Umdaka!”)

¹⁰ Kokuthoma, ngokungafani nemibuso yaphambilini yephasi okukhulunywe ngayo embonweni, i-Anglo-American ayifanekiselwa yisimbi enjenge golide namkha isiliva, kodwana ifanekiselwa yisimbi ehlangene nomdaka. Umdaka ufanekisela abantu abajayelekileko. (Dan. 2:43) Namhlanjesi sikghona ukubona kuhle ukuthi izenzo zabantu nakuziwa emakhethweni, amalungelo wabantu, amajima ahlukahlukeneko, imitjhagalo, iinhlangano zabasebenzi zenza kube budisi ngabadosi phambili bombuso lo bona benze lokho abafuna ukukwenza.

11. Ukuba khona komBuso wePhasi i-Anglo-American kukuqinisa njani ukukholelwa kwakho ukuthi siphila emalangeni wokuphela?

¹¹ Kwesibili, njengombana ifanekiselwa ziinyawo zesithombe esikhulu, i-Anglo-American imbuso wephasi wamaswaphela okukhulunywa ngawo eBhayibhelini. Angeze kwaba nomunye ozowujamiselela. Kunalokho, uzokupheliswa e-Arimagedoni lokha umBuso kaZimu nawutshidlha ababusi babantu. c—IsAm. 16:13, 14, 16; 19:19, 20.

12. Ngiyiphi induduzo nethemba isiphorofido sakaDanyela esisinikela kona?

¹² Isiphorofidwesi singasizuzisa njani? Isiphorofido sakaDanyela sisinikela ubufakazi obungeziweko bokuthi siphila emalangeni wokuphela. Eminyakeni engaphezu kwezii-2 500 edlulileko, uDanyela wabikezela ukuthi ngemva kweBhabhiloni, kuzokuba nemibuso emine yephasi ezokuba nomthelela obonakalako ebantwini bakaZimu. Ngaphezu kwalokho waveza ukuthi umbuso wokugcina kiyo, mbuso wePhasi i-Anglo-American, uzaba ngewamaswaphela emibusweni le. Lokhu kuyasiduduza begodu kusinikela nethemba lokuthi esikhathini esingaphelisi ihliziyo, umBuso kaZimu uzokuqeda yoke imibuso yabantu begodu wona ubuse iphasi loke.—Dan. 2:44.

13. ‘Ikosi yobunane’ kunye ‘namakhosi alitjhumi’ okukhulunywa ngabo kusAmbulo 17:9-12, bafanekisela ini, begodu isiphorofidwesi sizaliseke njani?

¹³ Funda isAmbulo 17:9-12. Ihlangahlangano ebangelwe yiPi yePhasi yoku I yadosela ekuzalisekeni kwesinye godu isiphorofido seBhayibheli malungana namalanga wokuphela. Ababusi bephasi bebafuna ukuqiniseka ukuthi esikhathini esizako ephasini kuzokuba nokuthula. Yeke ngoJanabari 1920, bathoma ihlangano yeentjhaba, eyajanyiselelwa yihlangano yeenTjhaba eziBumbeneko ngo-Oktoba 1945. Ihlangano le ibizwa ngokuthi, ‘yikosi yobunane.’ Kodwana ayisimbuso wephasi. Amandlayo nomthelelayo kusame emandleni wemibuso yepolotiki ayisekelako. IBhayibheli ifanekisa imibuso le ‘namakhosi alitjhumi.’

14-15. (a) IsAmbulo 17:3-5 sivezani ‘ngeBhabhiloni eliKhulu’? (b) Khuyini eyenzekako ebasekelini bekolo yamala?

¹⁴ Funda isAmbulo 17:3-5. Ngaphasi kokuphefumulelwa, umpostoli uJwanisi embonweni wabona ingwadla, “iBhabhiloni eliKhulu,” elifanekiselwa mbuso wekolo yamala. Yini evezwa embonweni lo? Kuvezwa iinhlangano zekolo yamala esele kunesikhathi eside zisebenzelana nemibuso yezepolotiki begodu zayibusisa. Ingasikade uJehova uzokufaka eenhliziweni  zababusi bepolitiki “ukuthi benze ngokomcabango wakhe.” Lokho kuzokuba namuphi umphumela? Ababusi bezepolotiki, “namakhosi alitjhumi,” azokujikela iinhlangano zekolo yamala azibhubhise.—IsAm. 17:1, 2, 16, 17.

¹⁵ Sazi njani bona sele kuseduze bona kupheliswe iBhabhiloni eliKhulu? Bona siphendule umbuzo lo, kuzosisiza ukukhumbula ukuthi idorobha lakade leBhabhiloni belivikelwe mamanzi womlambo i-Ewufrathe. Incwadi yesAmbulo imadanisa iingidi zabasekeli beBhabhiloni eliKhulu “namanzi” alivikelako. (IsAm. 17:15) Iveza nokuthi amanzi la ‘azokoma,’ okutjengisa ukuthi umBuso wephasi wekolo yamala uzokulahlekelwa basekeli abanengi. (IsAm. 16:12) Ekuzalisekeni kwesiphorofidwesi, namhlanjesi isibalo esikhulu sabantu siyilahlile ikolo yamala begodu sithome ukuqala kezinye iindawo bona sifumane iimpendulo eziyitlhogako.

16. Singazuza njani ngokuzwisisa iimporofido ezimalungana nokuba khona kweenTjhaba eziBumbeneko nokuphela kweBhabhiloni Elikhulu?

¹⁶ Iimphorofidwezi zingasizuzisa njani? Ukubakhona kweenTjhaba eziBumbeneko nokuncipha kokusekelwa kwekolo yamala  kubufakazi bokuthi siphila amalangeni wokuphela. Nanyana inengi labantu lingasalisekeli iBhabhiloni eliKhulu, lokho akusikho okuzokuqeda iinhlangano zekolo yamala. Njengombana khekwakhulunywa phambilini, uJehova uzokufaka eenhliziyweni ‘zamakhosi alitjhumi’—imibuso yezepolotiki esekela iinTjhaba eziBumbeneko—bona ‘yenze ngokomcabangwakhe.’ Ukuphela kwekolo yamala ngebanga leentjhabezo kuzokuza bangakalindeli, lokho kuzobamangaza. d (IsAm. 18:8-10) Ukuqedwa kweBhabhiloni eliKhulu kuzokusikinya iphasi begodu kuzokubangela iintjhijilo ezinengi, kodwana abantu bakaZimu bazokuba namabanga amabili wokuthaba. Inaba lakaJehova uZimu esele linesikhathi eside lizokupheliswa lingasabakhona, begodu isindiswethu ephasini elimbeli izokufika!—Luk. 21:28.

17-18. (a) Singaragela phambili njani siqinisa ukukholwa kwethu (b) Khuyini esizokucoca ngakho esihlokweni esilandelako?

¹⁷ UDanyela wabikezela ukuthi ‘ilwazi lizokwanda.’ Kwamambala kube njalo! Sifumane ilwazi elinembileko ngeemphorofido ezimalungana nesikhathi sethu. (Dan. 12:4, 9, 10) Kusitjhiya sibambe ongenzasi nasicabanga ngoJehova neliZwi lakhe eliphefumulelweko. (Isa. 46:10; 55:11) Yeke ragela phambili nokuqinisa ukukholwa kwakho ngokuba mfundi okhutheleko wemiTlolo begodu siza abanye bona babe nobuhlobo obuhle noJehova. Uzobavikela boke abathembela kuye, begodu uzobanikela ‘ukuthula.’—Isa. 26:3.

¹⁸ Esihlokweni esilandelako, sizokudzimelela eemphorofidweni ezikhuluma ngebandla lobuKrestu eenkhathini zokuphela. Njengombana sizokufunda, iimphorofidwezi zingena patsi kilokho iimphorofido ezikutjhoko ngamalanga wokuphela. Sizokubona ngokungeziweko ubufakazi bokuthi uJesu—iKosethu ebusako nje—umajadu ngokuzibandakanya kilokhoabalandeli bakhe abathembekileko abakwenzako.