1-2. Umuntu kufuze enzeni ngaphambi kokubhajadiswa?

 HLANGANA neminyaka emihlanu edlulileko, kunabantu abangaphezu kwesigidi ababhajadisiweko bona babe boFakazi bakaJehova. Abanengi babo, njengomfundi wangekhulu lokuthoma uThimothi, bafundiswa iqiniso ‘basese masana.’ (2 Thim. 3:​14, 15) Abanye bafunde ngoJehova babakhulu, kuthi abanye sele baluphele. Esikhathini esidlulileko, omunye umma wafunda iBhayibheli naboFakazi bakaJehova bewabhajadiswa nakaneminyaka ema-97!

² Nange ufundelwa iBhayibheli namkha ukhuliswa babelethi ababoFakazi, kghani ucabangela ukubhajadiswa? Mnqopho omuhle lowo! Ngaphambi kokubhajadiswa, kufuze uzinikele kuJehova. Isihlokwesi sihlathulula ukuthi kutjho ukuthini ukuzinikela kuJehova. Sizokusiza ubone ukuthi kubayini kufuze ungasabi ukuzinikela kuJehova bewubhajadiswe, nasele ukulungele ukwenza njalo.

KUTJHO UKUTHINI UKUZINIKELA?

3. Nikela iimbonelo eziseBhayibhelini zabantu abazinikela kuJehova.

³ EBhayibhelini, umuntu ozinikele kuJehova bekaba nengcenye ekhethekileko. Ama-Israyeli bekasitjhaba esizinikele kuJehova. Kodwana abanye esitjhabeni bebazinikele kuJehova ngendlela ekhethekileko. Ngokwesibonelo, u-Aroni bekambatha  ‘itshwayo elitjengisa ukuthi uzinikele’—okuyisinjana emanyazelako yegolide ebeyingaphambi kwetjhila elithwalwa ehloko. Isinjana yegolide le beyitjengisa ukuthi ukhethelwe ukulotjha uJehova ngendlela ekhethekileko—njengomphristi ophakemeko wakwa-Israyeli. (Lev. 8:9) AmaNaziri nawo bewazinikele kuJehova ngendlela ekhethekileko. Ibizo elithi, “umNaziri,” livela ebizweni lesiHebheru elithi, nazirʹ, elitjho ukuthi “Ohlukanisiweko,” namkha “Ozinikeleko.” AmaNaziri bekufuze aphile ngokwalokho okutlolwe emThethweni kaMosi.—Num. 6:​2-8.

4. (a) Nawunikela ukuphila kwakho kuJehova, uba nayiphi ingcenye ekhethekileko? (b) Kutjho ukuthini ‘ukungasaziphileli wena’? (Qala nesithombe.)

⁴ Nawuzinikela kuJehova, ukhetha ukuba mfundi kaJesu Krestu nokwenza intando kaJehova ize qangi ekuphileni kwakho. Khuyini elindeleke kuwe nawuzakuba mKrestu ozinikeleko? UJesu wathi: “Nanyana ngubani ofuna ukungilandela, akazidele.” (Mat. 16:24) Umutjho wesiGirigi otjhugululwe ngokuthi “akazidele” ungabuye utjhugululwe ngokuthi “angasaziphilela yena.” Njengombana uzinikele kuJehova, kuzokufuze uzimisele ukungenzi izinto eziphambene nentandwakhe. (2 Kor. 5:​14, 15) Lokho kuhlanganisa ukubalekela “imisebenzi yenyama,” enjengokuziphatha kumbi ngokomseme. (Gal. 5:​19-21; 1 Kor. 6:18) Kghani ukubalekela izintwezi kuzokwenza ukuphila kwakho kube budisi? Awa, ngombana nawuthanda uJehova, uzokuqiniseka ukuthi imithethwakhe ikulungele. (Rhu. 119:97; Isa. 48:​17, 18) Umfowethu u-Nicholas uyibeka ngendlela le: “Ungakhetha ukuqala imithethokambiso kaJehova njengeensimbi zejele ezikukhandela bona wenze ofuna ukukwenza namkha njengeensimbi ezivalele ibhubezi bona zikuvikele engozini.”

5. (a) Ungazinikela njani kuJehova? (b) Ukuphi umehluko hlangana kokuzinikela nokubhajadiswa? (Qala nesithombe.)

 ⁵ Uzinikela njani kuJehova? Uyathandaza, umthembise ukuthi uzokulotjha yena kwaphela nokuthi uzokubeka intandwakhe qangi ekuphileni kwakho. Nawenza njalo, uthembisa uJehova ukuthi uzokuragela phambili umthanda “ngehliziywakho yoke nangomphefumulwakho woke nangomkhumbulwakho woke nangamandlakho woke.” (Mar. 12:30) Ukuzinikela kwakho ukwenza ngemsitheleni, kuphakathi kwakho noJehova. Ngokuhlukileko, ukubhajadiswa kwenziwa tjhatjhalazi ukutjengisa boke ukuthi uzinikele. Ukuzinikela kwakho sithembiso esiqakathekileko begodu umnqophwakho kufuze ube kuzalisa isifungo sakho ngombana noJehova ulindele bona wenze njalo.—UMtj. 5:​4, 5.

KUBAYINI KUFUZE UZINIKELE KUJEHOVA?

6. Khuyini ehlohlozela umuntu azinikele kuJehova?

⁶ Ibanga lokuthoma lokuzinikela kwakho kuJehova kukuthi uyamthanda. Ithando lakho alikadzimeleli endleleni ozizwa ngayo kwaphela. Kunalokho, lidzimelele ‘elwazini elinembileko’ lezinto ozifunde ngoJehova ezikwenze wamthanda khulu. (Kol. 1:9) Ukufunda kwakho imiTlolo kukuqinisekisile ukuthi (1) uJehova ungowamambala, (2) iBhayibheli liliZwi lakhe eliphefumulelweko, (3) nokuthi usebenzisa ihlanganwakhe ukuzalisa umnqophwakhe.

7. Khuyini ekufuze siyenze ngaphambi kokuzinikela kuZimu?

⁷ Labo abazinikele kuJehova kufuze bazi iimfundiso ezisisekelo ezifumaneka eliZwini lakaZimu begodu baphile ngokuvumelana nemithethokambiso eseBhayibhelini. Benza  koke okusemandlenabo bona bacocele abanye ngalokho abakukholelwako. (Mat. 28:​19, 20) Bathanda uJehova khulu begodu bafuna ukulotjha yena kwaphela, ngokusuka ehliziyweni. Kghani nawe uzizwa njalo? Nange uthanda uJehova ngehliziywakho yoke, angeze wazinikela bewabhajadiswa ngombana ufuna ukukara umuntu okufundela iBhayibheli, ababelethi bakho namkha ngebanga lokuthi abangani bakho benza njalo.

8. Ukuthokoza kungadlala yiphi indima nawuzazinikela kuZimu? (Rhu. 116:​12-14)

⁸ Nawucabanga ngazo zoke izinto uJehova akwenzele zona, uzokufuna ukumthabisa bewufune nokunikela ukuphila kwakho kuye. (Funda iRhubo 116:​12-14.) IBhayibheli lithi uJehova uMumuphi ‘wananyana ngiziphi izipho ezihle begodu nanyana ngiziphi izipho ezipheleleko.’ (Jak. 1:17) Isipho esiphuma phambili ukuzidlula zoke kukuthi wanikela ngeNdodanakhe uJesu. Cabanga bona lesi sisipho esihle kangangani! Isihlengo senze kwakghoneka bona utjhidelane noJehova. Ukunikele nethuba lokuphila ngokungapheliko. (1 Jwa. 4:​9, 10, 19) Ukuzinikela kwakho kuJehova yindlela etjengisa ukuthi umthokoza khulu ngendlela atjengise ngayo ukuthi uyakuthanda, kuhlanganise nezinye iimbusiso uJehova akunikele zona. (Dut. 16:17; 2 Kor. 5:15) Ukuthokoza okunjalo kuvezwe esifundweni 46, iphuzu 4, encwadini ethi, Thabela Ukuphila Ngokungapheliko! esikhambisana nevidiyo yemizuzu emithathu ethi, Ukupha UJehova Izipho.

KGHANI SEWUKULUNGELE UKUZINIKELA NOKUBHAJADISWA?

9. Kubayini kufuze umuntu angakatelelwa ukuthi azinikele?

⁹ Ungazizwa ngasuthi awukakulungeli ukuzinikela nokubhajadiswa. Kungenzeka usatlhoga ukwenza amatjhuguluko ekuphileni kwakho bona uvumelane nemithethokambiso kaJehova namkha utlhoga isikhathi sokuqinisa ukukholwa kwakho. (Kol. 2:​6, 7) Abantu abafunda iBhayibheli abathuthuki ngendlela efanako, nabantu abatjha abakulungeli ngesikhathi sinye ukuzinikela nokubhajadiswa. Linga ukuzwisisa amatjhuguluko ekufuze uwenze begodu ungazimadanisi nabanye.—Gal. 6:​4, 5.

10. Khuyini ongayenza nangabe uqunte ukuthi awukakulungeli ukuzinikela nokubhajadiswa? (Funda nebhoksi elithi, “ Abakhuliselwe Eqinisweni.”)

¹⁰ Ngitjho nanyana ulemuka ukuthi awukakulungeli ukuzinikela kuJehova, hlala ukwenza umnqophwakho lokho. Bawa uJehova akusize wenze amatjhuguluko atlhogekako ekuphileni kwakho. (Fil. 2:13; 3:16) Qiniseka ukuthi uzowuzwa umthandazwakho bekakusize.—1 Jwa. 5:14.

KUBAYINI ABANYE BASABA UKUZINIKELA NOKUBHAJADISWA?

11. UJehova uzosisiza njani sihlale sithembekile kuye?

¹¹ Abanye bakulungele ukuzinikela nokubhajadiswa kodwana bayasaba. Basaba ukuthi ngemva kokubhajadiswa, kungenzeka benze isono esimbi bebasuswe. Nange uzizwa njalo, qiniseka ukuthi uJehova uzokunikela koke okutlhogako ukuthi ‘ukhambe ngokufaneleko bona umthabise ngokupheleleko.’ (Kol. 1:10) Uzokupha namandla wokwenza okulungileko. Usize abantu abanengi ukuthi benze okulungileko. (1 Kor. 10:13) Kungebangelo bangasibanengi khulu abasuswako ebandleni lobuKrestu. UJehova usiza abantu bakhe bona bahlale bathembekile.

12. Singakubalekela njani ukwenza isono esimbi?

¹² Woke umuntu uyalingeka ukwenza okungakalungi. (Jak. 1:14) Nanyana kunjalo, kufuze ukhethe ukuthi uzokwenzani  nawulingwako. Iqiniso kukuthi nguwe okufuze ukhethe ukuthi uzokuphila njani. Nanyana abantu bathi angeze walawula indlela ozizwa nowenza ngayo izinto, lokho kumamala ngombana ungakghona. Yeke, nanyana ungalingwa, ungakhetha ukungenzi into embi. Kunezinto ezingakusiza uhlale uthembekile kuJehova, njengokuthandaza qobe langa. Hlala unesifundo somuntu mathupha seliZwi lakaZimu. Iya emihlanganweni yobuKrestu. Tjela abantu ngezinto ozikholelwako. Ukwenza izintwezi qobe kuzokunikela amandla wokuhlala uthembekile kuJehova. Ungakhohlwa ukuthi uJehova uzokusiza wenze njalo.—Gal. 5:16.

13. UJosefa usibekele siphi isibonelo esihle?

¹³ Kuzokuba bulula ukuhlala uthembekile kuJehova nange uqunta ngaphambi kwesikhathi ukuthi uzokwenzani nawulingwako. IBhayibheli lisitjela ngabantu abambadlwana abakwenzileko lokho, ngitjho nanyana bebanesono. Ngokwesibonelo, umkaPothifara walinga ngokubuyelelweko ukuganukeja uJosefa. Kodwana uJosefa besele azi ukuthi khuyini ekufuze ayenze. IBhayibheli lithi “akhenge avume” begodu wathi: “Ngingabenza njani ubumbi obungaka, ngone kuZimu?” (Gen. 39:​8-10) Kuyakhanya bona uJosefa bekazi ukuthi khuyini azoyenza ngaphambi kokuthi umkaPothifara amlinge. Kwaba bulula ukuthi enze okulungileko nakalingwako.

14. Singafunda njani ukwala ukwenza izinto ezimbi?

¹⁴ Ungasilingisa njani isibonelo sakaJosefa nawulingwako? Ungaqunta nje ukuthi uzokwenzani nawulingwako. Zijayeze ukwala msinya izinto uJehova azihloyako bewungacabangi ngazo. (Rhu. 97:10; 119:165) Nawenza njalo, angekhe kube lula ukona nawulingwako. Uzokwazi ukuthi kufuze wenzeni.

15. Umuntu angatjengisa njani ukuthi ‘umfuna ngetjiseko’ uJehova? (Hebheru 11:6)

¹⁵ Kungenzeka ukuthi ulifumene iqiniso nokuthi ufuna ukulotjha uJehova ngehliziywakho yoke kodwana kunento ekukhandela bona uzinikele bewubhajadiswe. Ungalingisa isibonelo seKosi uDavida. Ungabawa uJehova uthi: “Maye! Zimu ngiphenya begodu wazi ihliziywami. Ngihlolisisa begodu wazi okungitshwenyako. Hlola bona ikhona na into elimazako kimi, unginqophise endleleni eya ekuphileni okungapheliko.” (Rhu. 139:​23, 24)  UJehova uyababusisa labo “abamfuna ngetjiseko.” Ukusebenzela kwakho emnqophweni wokuzinikela nokubhajadiswa kuyamtjengisa ukuthi umfuna ngetjiseko.—Funda amaHebheru 11:6.

RAGELA PHAMBILI UTJHIDELA KUJEHOVA

16-17. UJehova ubadosa njani labo abakhuliselwe eqinisweni? (Jwanisi 6:44)

¹⁶ UJesu wathi abafundi bakhe badoswa nguJehova. (Funda uJwanisi 6:44.) Cabanga ukuthi kukarisa kangangani lokho nokuthi kutjho ukuthini kuwe. UJehova ubona okuthileko okuhle emuntwini ngamunye amdosela kuye. Uqala umuntu ngamunye ‘njengomuntu okhethekileko’ namkha “ipahlakhe ekhethekileko.” (Dut. 7:6; ftn.) Nawe ukuqala njalo.

¹⁷ Kungenzeka umumuntu omutjha okhuliswa babelethi ababoFakazi bakaJehova. Ungazizwa ngasuthi ulotjha uJehova ngombana ulandela ababelethi bakho, ingasi ngombana uJehova ukudosela kuye. Nanyana kunjalo, iBhayibheli lithi: “Tjhidelani kuZimu naye uzokutjhidela kini.” (Jak. 4:8; 1 Kron. 28:9) Nawuthatha igadango lokutjhidela kuJehova, naye utjhidela kuwe. UJehova akakuqali njengelunga lesiqhema esithileko kwaphela. Udosa woke umuntu—nalabo abakhuliselwe eqinisweni. Umuntu onjalo nakathatha igadango lokutjhidela kuJehova, umphendula ngokuya ngokwalokho okutlolwe kuJakopo 4:8.—Madanisa neyesi-2 kwebeThesalonika 2:13.

18. Sizokucoca ngani esihlokweni esilandelako? (IRhubo 40:8)

¹⁸ Nawuzinikela kuJehova bewubhajadiswe, utjengisa umkhumbulo ofana newakaJesu. Wazinikela kuBabakhe ngokuzithandela bona enze nanyana yini ambawa yona. (Funda iRhubo 40:8; Heb. 10:7) Esihlokweni esilandelako, sizokucoca ngokuthi khuyini engakusiza uragele phambili ulotjha uJehova ngokuthembeka ngemva kokubhajadiswa.