1. Khuyini esiyifundileko emhlanganweni waqobe mnyaka ka-2023?

 EMHLANGANWENI waqobe mnyaka ka-2023, a safumana amatjhuguluko amalungana nezinye izinto ebesizikholelwa besafumana nezaziso ezithabisako ngomsebenzethu wokutjhumayela. Ngokwesibonelo, sifunde ukuthi abanye bangafumana ithuba lokuba sehlangothini labantu bakaJehova ngitjho nangemva kokutjhatjalaliswa kweBhabhiloni eliKhulu. Safumana nokuthi kusukela ngoNovemba 2023, abatjhumayeli bomBuso akusatlhogeki babike koke abakwenze nabatjhumayelako. Kghani amatjhuguluko la enza ukuthi umsebenzethu wokutjhumayela ungasaqakatheki kangako? Awa, akusinjalo.

2. Kubayini umsebenzethu wokutjhumayela urhabeke khulu kunangaphambili? (Markosi 13:10)

² Qobe langa, umsebenzethu wokutjhumayela uba ngorhabeke khulu ukudlula nini ngaphambili. Kubayini? Ngombana isikhathi siyaphela. Cabanga ngalokho uJesu akubikezelako ngomsebenzi wokutjhumayela emalangeni wokuphela. (Funda uMarkosi 13:10.) Ngokuya ngoMatewu, uJesu wathi iindaba ezimnandi zizokutjhunyayelwa kilo loke iphasi ngaphambi kobana kufike “isiphelo.” (Mat. 24:14) Amezwi la atjho ukuphela kwephasi elimbi lakaSathana. UJehova ubeke  “ilanga ne-iri” ukuthi kuzokwenzekani ingasi kade. (Mat. 24:36; 25:13; IzE. 1:7) Qobe langa sitjhidela elangenelo. (Rom. 13:11) Okwanje, kufuze siragele phambili sitjhumayela bekufike isiphelo.

3. Khuyini esikhuthaza bona sitjhumayele?

³ Naku umbuzo oqakathekileko soke ekufuze sicabange ngawo: Kubayini sitjhumayela iindaba ezimnandi? Kungebanga lethando. Esikwenza emsebenzinethu wokutjhumayela kutjengisa ithando ngeendaba ezimnandi, ngabantu begodu okungaphezu kwalokho, ithando lethu ngoJehova negama lakhe. Akhesicoce ngeengcenyezi.

SIYATJHUMAYELA NGOMBANA SITHANDA IINDABA EZIMNANDI

4. Sizizwa njani nasifumana iindaba ezimnandi?

⁴ Cabanga ngendlela owazizwa ngayo nawuzwa iindaba ezimnandi, mhlamunye ilunga lomndeni liba nomntwana namkha kunomuntu okunikele umsebenzi owutlhogako. Siyaqiniseka ukuthi bewuthabe khulu begodu ufuna ukutjela umndenakho nabangani. Kghani wazizwa ngendlela efanako nawuzwa iindaba eziphuma phambili ukuzidlula zoke, iindaba ezimnandi zomBuso zakaZimu?

5. Wazizwa njani nawuthoma ukufunda iqiniso eliZwini lakaZimu? (Qala nesithombe.)

⁵ Cabanga ukuthi wazizwa njani nawuthoma ukufunda iqiniso eliZwini lakaZimu. Wafunda ukuthi uBabakho wezulwini uyakuthanda, ufuna ube lilunga lomndenakhe omlotjhako, ukuthembise ukuthi uzokuqeda ubuhlungu nokutlhaga wakunikela nethemba lokuthi uzokubona abantu obathandako abahlongakalako bavuswa ephasini elitjha nokhunye okunengi. (Mar. 10:​29, 30; Jwa. 5:​28, 29; Rom. 8:​38, 39; IsAm. 21:​3, 4) Amaqiniso la akuthabisa khulu. (Luk. 24:32) Wakuthanda ebewukufunda bewafuna ukutjela woke umuntu ngamaqiniso aligugu la!—Madanisa noJoromiya 20:9.

6. Khuyini oyifundako ku-Ernest no-Rose?

 ⁶ Cabanga ngendaba elandelako. Umfowethu u-Ernest b bekaneminyaka elitjhumi nakuhlongakala ubabakhe. U-Ernest uthi: “Ngazibuza: ‘Kghani uye ezulwini? Uhlongakale safuthi?’ Bengizwa ubuhlungu nangibona abanye abantwana banaboyise.” Qobe u-Ernest bekaya emathuneni, aguqe athandaze athi: “Ngiyakubawa Zimu, ngifuna ukwazi ukuthi ubabami ukuphi.” Ngemva kobana kudlule iminyaka engabali-17 ubabakhe ahlongakele, u-Ernest wafumana isibawo sokuthi angakuthabela na ukufunda iBhayibheli begodu wasamukela isibaweso. Kwamthabisa khulu ukwazi bona abantu abahlongakeleko abazi litho, kufana nokuthi balele ubuthongo begodu iBhayibheli lithembisa ukuthi kuzokuvuswa abafileko esikhathini esizako. (UMtj. 9:​5, 10; IzE. 24:15) Emaswapheleni wafumana iimpendulo zemibuzo ebeyimtshwenye isikhathi eside! U-Ernest wathaba ngamaqiniso awafunda eBhayibhelini. Umkakhe, u-Rose, naye wathoma ukufunda, wakuthabela akufundako. Ngo-1978, babhajadiswa. Batjhumayeza amalunga womndeni, abangani nabanye abalalelako ngamaqiniso aligugu la. U-Ernest no-Rose basize abantu abangaphezu kwe-70, bazi uJehova bebabhajadiswe.

7. Kwenzekani ithando lethu ngeqiniso nalikhulako? (Lukasi 6:45)

⁷ Nasithanda okuseBhayibhelini, sifuna ukutjela woke umuntu ngakho. (Funda uLukasi 6:45.) Sizizwa njengabafundi bakaJesu bangekhulu lokuthoma nabathi: “Angekhe silise ukukhuluma ngezinto esizibonileko nesizizwileko.” (IzE. 4:20) Silithanda khulu iqiniso kangangobana sifuna ukukhuluma ngalo nabantu abanengi ngendlela esingakghona ngayo.

SITJHUMAYELA NGOMBANA SITHANDA ABANTU

8. Kubayini sifuna ukutjela abanye ngeendaba ezimnandi? (Funda ibhoksi elithi, “ Thanda Abantu—Yenza Abafundi.”) (Qala nesithombe.)

⁸ Sithanda abantu njengoJehova neNdodanakhe. (IzA. 8:31; Jwa. 3:16) Sibazwela ubuhlungu ‘abanganaZimu’ nalabo ‘abanganathemba.’ (Efe. 2:12) Banemiraro eminengi, thina sinesisombululo semiraro leyo, ziindaba ezimnandi zomBuso kaZimu. Ngebanga lokuthi siyabathanda begodu sibazwela ubuhlungu, sifuna ukwenza koke esingakghona ukukwenza ukubatjela iindaba ezimnandi. Ukuzwa ngomlayezo oqakathekileko kungabanikela ithemba, kubasize bathabe nje bekubanikele ithuba lokufumana ukuphila  “kwamambala” okungapheliko ephasini elitjha lakaZimu.—1 Thim. 6:19.

9. Ngisiphi isiyeleliso esisinikelako malungana nengomuso begodu kubayini? (Hezekiyeli 33:​7, 8)

⁹ Ngebanga lokuthi sithanda abantu sifuna ukubayelelisa ngokuphela kwephasi elimbeli. (Funda uHezekiyeli 33:​7, 8.) Sibazwela ubuhlungu boke, kuhlanganise namalunga womndenethu angalotjhi uJehova. Abantu abanengi baraga nokuphila kwabo bangazi ukuthi “kuzokuba nesizi elikhulu elingakhenge khelibe khona soloko kwathoma iphasi bekube nje, nelingekhe lisaba khona godu.” (Mat. 24:21) Sifuna bazi ukuthi khuyini ezokwenzeka hlangana nesikhathi sokwahlulelwa, kokuthoma, ikolo yamala izokutjhatjalaliswa bese kutjhatjalaliswe iphasi elimbeli nge-Arimagedoni. (IsAm. 16:​14, 16; 17:​16, 17; 19:​11, 19, 20) Sithandazela ukuthi abanengi balalele lokho esibatjela khona bebaqunte ukulotjha uJehova nathi. Kuthiwani ngalabo abangasilaleliko nje, kuhlanganise namalunga womndeni esiwathandako?

10. Kubayini kuqakathekile ukuthi siragele phambili siyelelisa abantu ngaphambi kobana kufike isiphelo?

¹⁰ Njengombana kuhlathululiwe esihlokweni esidlulileko, kuyintando kaJehova ukufundisa labo abatjhugulukako lokha nababona ukutjhatjalaliswa kweBhabhiloni eliKhulu. Nange kunjalo, kuqakatheke khulu ukuragela phambili sibatjela ngomlayezo lo nje. Cabanga ngalokhu: Lokho esibatjela khona nje bangakukhumbula esikhathini esizako. (Madanisa noHezekiyeli 33:33.) Kungenzeka bakhumbule isiyeleliso esabatjela ngaso, lokho kungabenza bafune ukulotjha uJehova nathi ngaphambi kobana kuphele isikhathi. Njengonogada wejele eFilipi owatjhuguluka ngemva ‘kokusikinyeka kwephasi,’ kungenzeka abanye bangalaleli umlayezo womBuso nje kodwana kungenzeka bazokulalela ngemva kokutjhatjalaliswa kweBhabhiloni eliKhulu.—IzE. 16:​25-34.

SITJHUMAYELA NGOMBANA SITHANDA UJEHOVA NEGAMA LAKHE

11. Simnikela njani uJehova iphazimulo, idumo namandla? (IsAmbulo 4:11) (Qala nesithombe.)

¹¹ Ibanga eliqakatheke khulu lokutjhumayela iindaba ezimnandi kuthanda uJehova uZimu negama lakhe elicwengileko. Siqala umsebenzethu wokutjhumayela njengendlela yokudumisa uZimu esimthandako. (Funda isAmbulo 4:11.) Sivuma nabo boke abasezulwini abathi: “Ufanele Jehova Zimethu ukwamukela iphazimulo, idumo namandla.” Simnikela iphazimulo nedumo nasicocela abantu ngobufakazi obusiqinisekiso sokuthi siyaphila ngebanga lokuthi usinikele ukuphila. Sinikela uJehova  amandla nasisebenzisa isikhathi sethu, amandla nezinto esinazo ukutjhumayela kanengi ngendlela esingakghona ngayo. (Mat. 6:33; Luk. 13:24; Kol. 3:23) Nasiyibeka bulula, kuyasithabisa ukukhuluma ngoZimu esimthandako. Sikubona kufaneleka ukutjela abanye ngegama lakhe nokuthi litjho ukuthini. Kubayini?

12. Silicwengisa njani igama lakaJehova emsebenzinethu wokutjhumayela?

¹² Ithando esinalo ngoJehova lisenza sicwengise igama lakhe. (Mat. 6:9) Okutjho bona sifuna ukutjela abantu ukuthi izinto ezimbi uSathana azikhuluma ngoJehova zimamala. (Gen. 3:​1-5; Job. 2:4; Jwa. 8:44) Nasitjhumayelako sinesifiso sokutjela woke umuntu olalelako ukuthi ungubani uZimu nokuthi unjani. Sifuna woke umuntu azi ukuthi ubuntu bakhe obuphuma phambili lithando, indlela alawula ngayo ilungile begodu ifanele nokuthi umBuswakhe ingasi kade uzokuqeda koke ukutlhaga, ulethe ukuthula nethabo ebantwini. (Rhu. 37:​10, 11, 29; 1 Jwa. 4:8) Nasitjela abantu ngezintwezi, sicwengisa igama lakaJehova. Kuyasithabisa ngombana senza lokho ekufuze sikwenze njengaboFakazi bakaJehova. Kubayini sitjho njalo?

13. Kubayini sizikhakhazisa ngokuthi siboFakazi bakaJehova? (Isaya 43:​10-12)

¹³ UJehova usikhethile ukuthi sibe ‘bofakazi’ bakhe. (Funda u-Isaya 43:​10-12.) Eminyakeni eyadlulako incwadi evela esiHlopheni esiBusako yathi: “Ilungelo elikhulu esinalo kubizwa ngaboFakazi bakaJehova.” c Kubayini kunjalo? Cabanga ngomfanekiso olandelako. Akhesithi bakuleyela amala ngokuthi wenze into embi, uzokutlhoga umuntu  ozokukhulumela kabanye ukuthi lokho akusiliqiniso, umumuntu olungileko angekhe wayenza into enjengaleyo. Bewungakhetha umuntu onjani? Kuliqiniso ukuthi bewungakhetha umuntu omthembako, owaziwa ngobuntu obuhle, okulula ukuthi abantu bangamkholwa. Ngokusikhetha bona sibe boFakazi bakhe, kutjengisa ukuthi uJehova usazi kuhle begodu uyasithemba bona sizokukghona ukutjela abanye ukuthi nguye kwaphela uZimu wamambala. Kulilungelo elikhulu ukuba nguFakazakhe, sikghona ukusebenzisa nanyana ngiliphi ithuba esilifumanako ukwenza igama lakhe laziwe nokutjengisa ukuthi zoke izinto ezimbi ezikhulunywa ngaye azisiliqiniso. Ngendlela le senza lokho igama lethu elikutjhoko, siba boFakazi bakaJehova.—Rhu. 83:18; Rom. 10:​13-15.

SIZOKUTJHUMAYELA BEKUBE SEKUPHELENI

14. Ngisiphi isikhathi esithabisako esisilindeleko?

¹⁴ Kusithabisa khulu ukubona okuzokwenzeka ingasi kade! Ngesizo lakaJehova sifisa ukubona abanengi bamukela iqiniso ngaphambi kobana kuthome isizi elikhulu. Kusithabisa khulu ukuthi hlangana nesizi elikhulu, ekuzabe kusikhathi esibudisi khulu, abantu abanengi kungenzeka batjhiye iphasi lakaSathana elizokutjhabalala bahlanganyele nathi ekudumiseni uJehova!—IzE. 13:48.

15-16. Khuyini esizokuragela phambili siyenza begodu sizoyenza bekube kunini?

¹⁵ Okwanje, sinomsebenzi oqakatheke khulu ekufuze siwenze. Umsebenzi engekhe sawenza godu, ukutjhumayela iindaba ezimnandi zomBuso kaZimu ephasini loke. Ngesikhathi esifanako, kufuze siragele phambili siyelelisa abantu ngalokho okuzokwenzeka ingasi kade. Abantu kufuze bazi ukuthi ukuphela kwephasi elimbeli kuseduze khulu. Nakufika isikhathi sokwahlulela, bazokwazi ukuthi umlayezo ebesiwutjhumayela bewuvela kuJehova uZimu.—Hez. 38:23.

¹⁶ Khuyini-ke esizimisele ukuyenza? Ngebanga lethando, ukuthanda iindaba ezimnandi, ukuthanda abantu nokungaphezu kwakho koke, ithando ngoJehova uZimu negama lakhe, sizokuragela phambili sitjhumayela ngokuzimisela, sitjengisa bona umsebenzi lo urhabekile besikhuthale bekube kulapho uJehova athi, ‘Sekwanele.’