1. Khuyini uJehova ayilemukako kithi?

UJEHOVA uZimu “uyabathabela abantu bakhe.” (Rhu. 149:4) Kghani akukuthabisi lokho! UJehova uyabulemuka ubuntu obuhle esinabo, ubona nezinto ezihle esikghona ukuzenza begodu usidosela kuye. Nasihlala sithembekile kuye, uzokuhlala anathi isiphelani!—Jwa. 6:44.

2. Kubayini abanye bakufumana kubudisi ukukholwela ukuthi uJehova uyabathanda?

² Abanye bangathi, ‘Ngiyazi ukuthi uJehova uyabathanda abantu bakhe kodwana ngingaqiniseka njani ukuthi uyangithanda mina?’ Khuyini engenza umuntu acabange ngendlela le? U-Oksana * owakhula kabuhlungu nakamntwana uthi: “Ngathaba khulu lokha nangibhajadiswako begodu ngithoma nokuphayona. Kwathi ngemva kweminyaka eli-15 ngafikelwa mikhumbulo ebuhlungu. Ngaphetha ngokuthi uJehova akangithandi begodu anginalungelo lokuthandwa nguye.” UYua, udade oliphayona naye ongakhange akhule kamnandi uthi: “Nganikela ukuphila kwami kuJehova ngombana ngifuna ukumthabisa. Nanyana kunjalo, bengiqiniseka ukuthi uJehova angeze amthanda umuntu onjengami.”

3. Khuyini esizokucoca ngayo esihlokwenesi?

³ NjengamaKrestu esikhulume ngawo ngehla, nawe uyamthanda uJehova begodu umthanda khulu kodwana awuqiniseki ukuthi yena uyakuthanda. Kubayini kufuze uqiniseke ukuthi unendaba nawe? Khuyini engakusiza ukuthi uqalane nemikhumbulo  emimbi yokucabanga ukuthi akakuthandi? Akhesicoce ngeempendulo zemibuzo le.

4. Kubayini kuyingozi ukuzaza ithando lakaJehova ngathi?

⁴ Ithando linamandla khulu. Nasiqiniseka ngokuthi uJehova uyasithanda nokuthi uyasisekela, sizokuthabela ukumlotjha ngehliziywethu yoke naphezu kokuqalana neentjhijilo zokuphila. Ngakelinye ihlangothi, nasingaqiniseki ukuthi uJehova unendaba nathi, ‘umkhawulo wamandlethu uzokubonakala.’ (IzA. 24:10) Nasiphelelwa mamandla sizaze nokuthi uJehova uyasithanda, uSathana uzokusebenzisa lokho ukuthi asihlasele.—Efe. 6:16.

5. Ngimiphi imiphumela abanye abaqalana nayo ngokuzaza ithando lakaJehova?

⁵ Amanye amaKrestu athembekileko wangesikhathi sethu aphele amandla ngebanga lokuzaza. UJames ongumdala webandla uthi: “Ngitjho nanyana bengisebenza eBethel, ngithabela isimu yebandla lelinye ilimi, bengizibuza ukuthi, kghani uJehova uyayamukela yoke imizamwami na. Ngesinye isikhathi ngakhe ngazibuza ukuthi uyayilalela na imithandazwami.” U-Eva osekonzweni yesikhathi esizeleko, uthi: “Ngalemuka ukuthi ukuzaza ithando lakaJehova kuyingozi ngombana kungenza bona sidane besiphelelwe mamandla. Lokho kukwenza ungabi nesifiso sokufunda ngezinto ezithuthukisa ubuhlobo bakho noJehova bewugcine ungasakuthabeli ukumlotjha.” UMichael oliphayona lesikhathi esizeleko nongumdala webandla uthi: “Nawungakholwa ukuthi uZimu unendaba nawe, uzokutjhidela kude naye.”

6. Khuyini ekufuze siyenze nasifikelwa mikhumbulo yokuzaza ithando lakaZimu?

⁶ Iimbonelwezi zitjengisa umphumela oyingozi olethwa kuzaza ithando lakaJehova. Khuyini esingayenza nasifikelwa kuzaza ithando lakaJehova? Kufuze singariyadi ukubalekela umkhumbulo onjalo! Bawa uJehova akusize ubalekele ‘imikhumbulo’ enjalo, akunikele ‘ukuthula okudlula koke ukuzwisisa okuzokuvikela ihliziywakho nemicabangwakho.’ (Rhu. 139:23; Flp. 4:6, 7) Khumbula ukuthi awusiwedwa. Abanye abafowethu nabodadwethu nabo baqalana nayo imikhumbulo emimbi le. Ngitjho neenkhozi zakaJehova zangesikhathi sekadeni khezaqalana nesitjhijilwesi. Tjheja bona khuyini esingayifunda esibonelweni sompostoli uPowula.

7. Ngimiphi imiraro uPowula aqalana nayo?

⁷ Kghani ngezinye iinkhathi ufumana kunezinto ezinengi ekufuze uzenze kodwana ungakghoni ukuzenza zoke? Nange kunjalo, uzobuzwisisa ubujamo bakaPowula. Bekatshwenyekile, ingasi ngebandla linye kwaphela kodwana “ngawo woke amabandla.” (2 Kor. 11:23-28) Kghani unokugula okungapheliko okwenza bona uphelelwe lithabo? UPowula ‘bekaneliva enyameni,’ ebelimenza bona ezwe ubuhlungu emzimbenakhe begodu bekafuna ngamandlakhe woke ukuthi lisuke. (2 Kor. 12:7-10) Kghani imitjhapho oyenzako iyakudanisa? NoPowula bekanokuba njalo. Wazibiza ngokuthi ‘mumuntu otlhuwisako’ ngebanga lokulwisana nemitjhaphwakhe.—Rom. 7:21-24.

8. Khuyini eyasiza uPowula wakghona ukuqalana nemirarwakhe?

⁸ Nanyana uPowula bekaqalana neenlingo ezihlukahlukeneko, waragela phambili alotjha uJehova. Khuyini eyamnikela amandla wokwenza njalo? Nanyana bekalemuka ukuthi unesono kodwana bekakholelwa esihlengweni. Bekajayelene nesithembiso sakaJesu esithi, ‘woke umuntu otjengisa ukukholwa kuye [uJesu]. . . uzokuba nokuphila okungapheliko.’ (Jwa. 3:16; Rom. 6:23) Siyaqiniseka ukuthi uPowula bekaphakathi kwalabo ebebakholelwa esihlengweni. Bekaqiniseka nangokuthi uJehova uhlala akulungele ukulibalela nanyana ngubani owonileko nangabe uyatjhuguluka.—Rhu. 86:5.

9. Khuyini esiyifunda emezwini kaPowula asemtlolweni webeGalatiya 2:20?

⁹ UPowula bekanethemba lokuthi uZimu uyamthanda ngombana wathumela iNdodanakhe uKrestu bona izosifela. (Funda yebeGalatiya 2:20.) Tjheja amezwi asiqinisekiso aphetha iveseli: ‘INdodana kaZimu, eyangithanda, yazinikela ngebanga lami.’ UPowula akhenge athi ithando lakaZimu kunalapha liphelela khona, mhlambe acabange athi, ‘Ngiyabona ukuthi kubayini uJehova angathanda abafowethu, ingasi mina.’ UPowula wakhumbuza abantu beRoma wathi: “Ngesikhathi sisesezizoni, uKrestu wasifela.” (Rom. 5:8) Ithando lakaZimu akuna la eliphelela khona!

10. Khuyini esiyifunda emtlolweni webeRoma 8:38, 39?

¹⁰ Funda yebeRoma 8:38, 39. UPowula bekaqiniseka ngethando lakaZimu. Watlola wathi akunanto “engakghona ukusihlukanisa nethando lakaZimu.” UPowula bekazi nokuthi uJehova wasibekezelela kangangani isitjhaba sama-Israyeli. Bekazi nokuthi uJehova waba  nomusa kangangani kuye. Singaphetha lokho uPowula akutjhoko ngokuthi, ‘Njengombana uJehova athumela iNdodanakhe bona izongifela, kghani nginebanga lokuthi ngizaze indlela angithanda ngayo?’—Rom. 8:32.

11. Nanyana uPowula bekenze izono ezisemtlolweni woku-1 kaThimothi 1:12-15, kubayini bekaqiniseka ngokuthi uZimu uyamthanda?

¹¹ Funda yoku-1 kaThimothi 1:12-15. Kungenzeka bekuba neenkhathi la uPowula bekatshwenywa zizinto ebakazenza esikhathini esidlulileko. Wazifanisa nesoni ‘esikhulu’ begodu lokho akubuzwa! Ngaphambi kokobana afumane amaqiniso, uPowula bekatjhutjhisa amaKrestu emadorobheni ngokuhlukahlukana kwawo, awafaka emajele bekenze neemphakamiso zokuthi amanye abulawe. (IzE. 26:10, 11) Ungacabanga indlela uPowula ebekangazizwa ngayo nabekangahlangana nomKrestu osesemutjha owahlongakalelwa babelethi bakhe ngebanga lokuthi uPawula wenza isiphakamiso sokuthi abulawe. UPowula bekazisola ngemitjhaphwakhe kodwana bekazi ukuthi angeze akghona ukutjhugulula litho ngalokho. Wamukela ukuthi uKresu wahlongakala ngebanga lakhe begodu ngaphandle kokuzaza, watlola wathi: “Ngomusa omkhulu kaZimu ngingilokhu engingikho.” (1 Kor. 15:3, 10) Sifundani kilokhu? Qiniseka ukuthi uKresu wahlongakala ngebanga lakho bewenza ukuthi kukghonakale bona ube nobuhlobo obutjhideleneko noJehova. (IzE. 3:19) Okuqakathekileko kuZimu ngilokhu esikwenzako nje nesizokwenza esikhathini esizako, ingasi imitjhapho esiyenze esikhathini esidlulileko, akutshwenyi ukuthi ngesikhetheso besiboFakazi bakaJehova namkha awa.—Isa. 1:18.

12. Amezwi asemtlolweni woku-1 kaJwanisi 3:19, 20, asisiza njani lokha nasizizwa singasililitho namkha singathandwa?

¹² Nawucabanga ngokuthi uJesu wafa ngebanga lethu, ungazizwa ngendlela le, ‘Angiboni  ngilifanelekela ilungelo elinjengalelo.’ Kubayini ungazizwa ngendlela leyo? Kungombana iinhliziyo zethu ezinesono zingasidurhisa, zisenze sizizwe singasililitho besingafanelwa nakuthandwa. (Funda yoku-1 kaJwanisi 3:19, 20.) Nasizizwa njalo, kufuze sikhumbule ukuthi “UZimu mkhulu kuneenhliziyo zethu.” Ithando lakaBabethu wezulwini nendlela asilibalela ngayo kukhulu khulu nasikumadanisa nemicabango engasimihle engasifikela. Kufuze siziqale ngendlela uJehova asiqala ngayo. Bona senze njalo, kufuze sifunde iLizwi lakhe qobe, singakulisi ukuthandaza besiragele phambili sizihlanganise nabafowethu nabodadwethu. Kubayini ukwenza njalo kuqakathekile?

13. Ukufunda iLizwi lakaZimu kungasisiza njani? (Qala ibhoksi elithi “ Indlela IliZwi LakaZimu Elibasiza Ngayo.”)

¹³ Funda iLizwi lakaZimu qobe langa, lokho kuzokusiza ubone ubuntu bakaJehova obuhle ngendlela ekhanyako. Uzokubona ukuthi uJehova uzizwa njani ngawe. Ukuzindla ngengcenye ethileko yeLizwi lakaZimu qobe langa kungakusiza ukuthi ubone izinto kuhle, ‘unqophise izinto’ emkhumbulwenakho nehliziywenakho. (2 Thim. 3:16) UKevin ongumdala, bekatshwenywa mazizo wokuzizwa angasililitho, uthi, “Ukufunda nokuzindla ngeRhubo 103, kungisize ngalungisa umkhumbulwami begodu ngibone nendlela uJehova angiqala ngayo.” U-Eva ekukhulunywe ngaye ekuthomeni uthi: “Ngiphetha ilanga lami ngokuthi ngizindle ngomkhumbulo kaJehova, lokho kunginikeza ukuthula bekwakhe nekholo lami.”

14. Umthandazo ungasisiza njani?

¹⁴ Thandaza qobe. (1 Thes. 5:17) Ubungani obuqinileko busekelwe ekuthululelaneni iimfuba. Kungendlela efanako nasiza ebuhlotjeni bethu noJehova. Nasikhuluma noJehova ngomthandazo simtjela indlela esizizwa ngayo, izinto esizicabangako nezinto ezisitshwenyako, sisuke sitjengisa ukuthi siyamthemba begodu siyazi ukuthi uyasithanda. (Rhu. 94:17-19; 1 Jwa. 5:14, 15) UYua ekhesakhuluma ngaye phambilini uthi, “Nangithandazako ngilinga ukutjela uJehova okungaphezu kokuthi ilanga lami likhambe njani. Ngimtjela koke okusehliziywenami ngimtjele ngendlela engizizwa ngayo. Kancani kancani ngibonile ukuthi uJehova akafani nomphathi wekhamphani ethileko kodwana unguBaba osithandako njengombana sibantwana bakhe. Qala ibhoksi elithi, “ Sele Uyifundile?”

15. UJehova utjengisa njani ukuthi unendaba nathi?

¹⁵ Zihlanganise nabangani abathembekileko; basisipho esivela kuJehova. (Jak. 1:17) UBabethu wezulwini usitjengisa ukuthi unendaba nathi ngokusinikela umndeni onobuhlobo obuhle naye, okubafowethu nabodadwethu ‘abahlala bathembekile.’ (IzA. 17:17) Encwadinakhe  ayitlolela beKolose, wakhuluma ngamaKrestu amsekelako, wathi, ‘amthombo wenduduzo ekulu.’ (Kol. 4:10, 11) Ngitjho noJesu Krestu bekalitlhoga isekelo elivela ebanganini bakhe, okubabantu neengilozi begodu bekalithokozela.—Luk. 22:28, 43.

16. Abangani abavuthiweko bangasisiza njani sitjhidelane noJehova?

¹⁶ Kghani kuyakuzuzisa ukuba nabangani abasisipho esivela kuJehova? Ukukhuluma ngezinto ezikutshwenyako nomnganakho ovuthiweko akusilitshwayo lokubogaboga, kungakuvikela. Akhucabange ngoJames ekhesakhuluma ngaye ngaphambilini, uthi: “Ukuba nabangani abavuthiweko abamaKrestu kungisize khulu ekuphileni kwami. Nangifikelwa micabango engakhiko nengigandelelako abanganaba bebangilalela, bangibekezelela bebangikhumbuze ukuthi bangithanda kangangani. Bangenza ngibone ukuthi uJehova uyangithanda bewuyangitlhogomela.” Kuqakatheke khulu ukwakha nokuthuthukisa ubungani nabafowethu nabodadwethu abavuthiweko.

17-18. Ngubani ekufuze simlalele begodu kubayini?

¹⁷ USathana ufuna silise ukwenza okuhle. Ufuna sikholelwe ukuthi uJehova akasithandi nokuthi asikufanelekeli ukusindiswa. Njengombana sibonile, lawo mamala ahlaza.

¹⁸ UJehova uyakuthanda. Uqakatheke khulu emehlwenakhe. Nawumlalelako, ‘uzokuhlala usethandweni lakhe’ isiphelani njengombana kwenza uJesu. (Jwa. 15:10) Yeke ungamlaleli uSathana nemikhumbulo engakhiko. Kunalokho lalela uJehova, uyakubona okuhle okwenzako. Qiniseka ngokuthi “uyabathabela abantu bakhe,” lokho kufaka hlangana nawe!