1. Khuyini ebekufuze uyifumane nawuzakukhuluma nekosi yePheresiya?

AKHUZICABANGE uphila eminyakeni ema-2500 eyadlulako ePheresiya. Kunendaba ofuna ukuyidemba nekosi, yeke uqunta ukukhamba uye edorobheni leTjhutjhani lapho ikosi ihlala khona. Awuyicabangi nokuyicabanga indaba yokukhuluma nekosi ngaphandle kwemvumo yayo. Kazi ukwenza njalo kungakufaka emrarweni omkhulu, ungabe ulahlekelwe kuphila kwakho.—Est. 4:11.

2. Kufuze sizizwe njani ngokutjhidela kuJehova?

² Kuyasithabisa ukwazi ukuthi uJehova akafani nekosi yePheresiya. UJehova unamandla begodu mkhulu ukudlula nanyana ngimuphi umbusi. Ngitjho nanyana amkhulu njalo, ufuna sitjhidele kuye ngaso soke isikhathi. Ufuna sizizwe sitjhaphulukile ukutjhidela kuye. Ngokwesibonelo, nanyana uJehova abizwa ngeziqu eziphakamileko ezithi, Mdali wendawo yoke, Somandla noMbusi wephasi loke, kodwana usasimema bona size kuye begodu ufuna simbize ngokuthi ‘Baba.’ (Mat. 6:9) Mbala kuyathabisa begodu kuthinta ihliziyo ukwazi ukuthi uJehova ufuna sitjhidele kuye.

3. Kubayini sibiza uJehova ngokuthi ‘nguBabethu’ begodu sizokucoca ngani esihlokwenesi?

³ UJehova simbiza kufanele ngokuthi ‘nguBabethu’ ngombana umthombo wokuphila. (Rhu. 36:10) Ngombana unguBabethu, sinesibopho sokuthi simlalele. Nasenza koke akufunako, sizokuthabela iimbusiso ezinengi. (Heb. 12:9) Iimbusiswezo zifaka hlangana ukuphila ngokungapheliko kungaba sephasina namkha ezulwini. Kunezinye iimbusiso esizithabelako  ngitjho nanje. Isihlokwesi sizokucoca ngokuthi yini etjengisa ukuthi uJehova unguBabethu, uyasithanda nokuthi angeze asilahla nesikhathini esizako. Kodwana okwanje akhesicoce ngokuthi kubayini siqiniseka ngokuthi uBabethu wezulwini uyasithanda begodu unendaba nathi.

4. Kubayini abanye bakufumana kubudisi ukuqala uJehova njengoBababo?

⁴ Kghani ukufumana kubudisi ukukholwa ukuthi uJehova angaba nguBabakho? Abanye bangacabanga ukuthi bancani khulu begodu abakaqakatheki nabamadaniswa noJehova, bayazaza ukuthi uMninimandla woke unendaba nabo. Nanyana kunjalo, uJehova akafuni sizizwe njalo. Nguye osinikela ukuphila begodu ufuna sitjhidele kuye. Umpostoli uPowula wahlathululela abantu ebebamlalele e-Athene wathi, ‘uJehova akasikude komunye nomunye wethu.’ (IzE. 17:24-29) UZimu ufuna sikhulume naye njengomntwana nakakhuluma nombelethakhe onethando.

5. Khuyini esiyifunda kilokho okwenzeka komunye udadwethu omKrestu?

⁵ Abanye bangakufumana kubudisi ukuqala uJehova njengoBababo. Ngombana abobababo akhenge babathande begodu akhenge babe nomusa kibo. Akhesicoce ngokwenzeka komunye udade omKrestu, uthi, ‘Ubabami bekamumuntu otlhorisako. Nangithoma ukufunda iBhayibheli bekubudisi kimi bona ngitjhidele kuBabethu wezulwini, kodwana ngemva kokwazi uJehova kwatjhuguluka koke lokho.’ Kghani nawe uzizwa ngendlela efanako? Nakunjalo, qiniseka ngokuthi nawe sizokufika isikhathi sokuthi umazi uJehova.

6. Ngokomtlolo kaMatewu 11:27, uJehova usisize njani bona simqale njengoBabethu unethando?

⁶ Enye indlela uJehova asisiza ngayo bona simqale njengoBabethu, kuqinisekisa ukuthi amezwi kaJesu nezinto azenzako kwatlolwa eBhayibhelini. (Funda uMatewu 11:27.) UJesu wabulingisa ngokupheleleko ubuntu bakaBabakhe kungebangelo akghona ukuthi, “Loyo ongibonileko ubone uBaba.” (Jwa. 14:9) Kanengi uJesu bekakhuluma ngendima uJehova ayidlalako ‘njengoBaba.’ Kusemavangelini amane kwaphela lapho uJesu asebenzisa khona ibizo elithi “Baba” iinkhathi ezili-165 aqalisele kuJehova. Kubayini uJesu akhuluma kangaka ngoJehova? Bekafuna abantu bakholelwe ukuthi uJehova unguBaba onethando.—Jwa. 17:25, 26.

7. Khuyini esiyifunda ngoJehova endleleni aphatha ngayo iNdodanakhe?

⁷ Akhucabange ngalokho esikufunda ngoJehova endleleni aphatha ngayo iNdodanakhe uJesu. UJehova bekahlala ayilalela imithandazo kaJesu. Akhenge ayizwe kwaphela kunalokho wayiphendula. (Jwa. 11:41, 42) Naphezu kobudisi aqalana nabo, walizwa ithando nesekelo lakaBabakhe.—Luk. 22:42, 43.

8. UJehova wamtlhogomela njani uJesu?

⁸ UJesu wavuma ukuthi uYise nguye owamnikela ukuphila. Kungebangelo athi, “Ngiphila ngoBaba.” (Jwa. 6:57) UJesu wathemba uJehova ngehliziywakhe yoke begodu uJehova wamupha koke ebekakutlhoga. Okuqakatheke khulu, uJehova wasiza uJesu bona ahlale athembekile.—Mat. 4:4.

9. UJehova wamsiza njani uJesu?

⁹ NjengoBaba onethando, uJehova waqiniseka ukuthi uJesu uyazi bona uzokuhlala asehlangothini lakhe. (Mat. 26:53; Jwa. 8:16) Iye khona uJehova akhenge avikele uJesu kizo zoke iintjhijilo aqalana nazo. Kodwana wamsiza bona azikghodlhelele. UJesu bekazi ukuthi nanyana ngibuphi ubuhlungu azokuqalana nabo bebuzokuba ngebesikhatjhana.  (Heb. 12:2) UJehova watjengisa uJesu ukuthi uyamthanda ngokuthi amsekele, amnikele koke akutlhogako begodu ambandule. (Jwa. 5:20; 8:28) Akhesibone ukuthi nathi uBabethu usitlhogomela njani ngendlela efanako.

10. NgokweRhubo 66:19, 20, uJehova utjengisa njani ukuthi uyasithanda?

¹⁰ UJehova uyasilalela nasithandazako. (Funda iRhubo 66:19, 20.) Akafuni sibale nasithandazako, ufuna sithandaze kanengi ngendlela esingakghona ngayo. (1 Thes. 5:17) Singazithoba sithandaze kuJehova kungakhathaliseki ukuthi sikhathi bani nokuthi sikuphi. UZimu uhlala anesikhathi sokusilalela begodu ufumaneka nanyana kunini. Nasilemuka bona uJehova ulalela imithandazwethu, sizizwa sitjhidelene naye. Umrhubi wathi, “Ngiyamthanda uSomnini ngombana uzwa iphimbo lami.”—Rhu. 116:1.

11. UJehova uyiphendula ngayiphi indlela imithandazwethu?

¹¹ UBabethu ulalela imithandazwethu begodu ayiphendule. Umpostoli uJwanisi usiqinisekisa ngokuthi: ‘Nanyana yini esiyibawa ngokuvumelana nentandwakhe, uyasizwa.’ (1 Jwa. 5:14, 15) Kungenzeka uJehova angayiphenduli imithandazwethu ngendlela ebesilindele ngayo. Uyazi bona yini esilungeleko, ngasikhathi ipendulwakhe ingaba ngu-awa namkha kungenzeka bona ufuna silinde.—2 Kor. 12:7-9.

12-13. UBabethu wezulwini usitlhogomela ngaziphi iindlela?

¹² UJehova uyasitlhogomela. Wenza lokho afuna abanye abobaba bona bakwenze. (1 Thim. 5:8) Unikela abantwana bakhe abakutlhogako bona baphile. Akafuni sitshwenyeke ngokuthi sizokudlani, sizokumbathani namkha sizokuhlalaphi. (Mat. 6:32, 33; 7:11) Ngebanga lokuthi uBabethu uyasithanda, usilungiselele izinto ezizosanelisa nangengomuso.

¹³ Okuqakatheke khulu, uJehova usinikela esikutlhogako bona sitjhidelane naye. Usebenzisa iBhayibheli bona asitjele iqiniso ngaye nentandwakhe, ngehloso yokuphila nokuthi lisiphatheleni ingomuso. Enye indlela atjengise ngayo ukuthi uyasithanda kukuthi usisize safunda iqiniso ngaye asebenzisa ababelethi bethu namkha abanye bona basifundise iBhayibheli. Sibuye sithole isizo kubadala bebandla abanethando nakubafowethu nabodadwethu abavuthiweko. Ukungezelela kilokho, uJehova usinqophisa asebenzisa ibandla njengombana sifunda ndawonye nabafowethu nabodadwethu. UJehova usebenzisa iindlelezi nezinye bona atjengise ukuthi uyasithanda njengobabethu.—Rhu. 32:8.

14. Kubayini uJehova asibandula begodu usibandula ngaziphi iindlela?

¹⁴ UJehova uyasibandula. Thina sihlukile kuJesu ngombana bekanganasono. Yeke kesinye isikhathi kutlhogeka bona ubabethu onethando asikhalime. IliZwi lakhe liyasikhumbuza: “UJehova uyabakhalima labo abathandako.” (Heb. 12:6, 7) Ukwenza lokho ngeendlela ezinengi. Ngokwesibonelo, esikufunda eliZwini lakhe namkha esifundweni kungalungisa indlela esicabanga ngayo. Ngasikhathi isizo esilitlhogako singalifumana kubadala. Kungakhathaliseki bona sikhalinywa ngayiphi indlela, uJehova usikhalima ngombana asithanda.—Jor. 30:11.

15. UJehova usivikela ngaziphi iindlela?

¹⁵ UJehova uyasisekela nasiqalene neentjhijilo. Ngokujayelekileko ubaba uyabasekela abantwana bakhe nabaqalene neentjhijilo, uBabethu wezulwini wenza okufanako uyasisekela nasiqalene neentjhijilo. Usebenzisa ummoyakhe ocwengileko bona usivikele kinanyana  yini engalimaza ubuhlobo bethu naye. (Luk 11:13) UJehova ubuye asisekele nalokha nasidanileko. Ngokwesibonelo, usiphe ithemba elikarisako. Ithembelo lisisiza sikghodlhelele nasiqalene neenkhathi ezibudisi. Akhucabange ngalokhu, nanyana ngiziphi izinto ezimbi ezenzeka kithi, ubabethu onethando uzoziqeda. Iintjhijilo esiqalana nazo zingezesikhatjhana, kodwana iinthembiso uJehova asithembisa zona zizokuhlala ngokungapheliko.—2 Kor. 4:16-18.

16. Kwenzekani ngemva kobana u-Adamu no-Eva bonile?

¹⁶ Sikghona ukubona ukuthi uJehova uyasithanda kilokho okwenziwa ngu-Adamu no-Eva, ukungalaleli. Ngemva kokuthi u-Adamu onile, akhenge asaba lilunga lomndeni kaJehova begodu kwenzeka okufanako nangomndenakhe. (Rom. 5:12; 7:14) Nanyana kunjalo, uJehova wangenela bona asize iinzukulwana zaka-Adamu.

17. Ngemva kokungalaleli kwaka-Adamu, uJehova wenzani?

¹⁷ UJehova wamjezisa u-Adamu, kodwana akhenge atjhiye iinzukulwana zakhe zinganathemba. Wathembisa ukusiza iinzukulwana zaka-Adamu ngokuthi athi zizokubuyela zibe mndenakhe. (Gen. 3:15; Rom. 8:20, 21) Lokhu uJehova wakwenza ngelungiselelo lesihlengo seNdodanakhe uJesu. UJehova watjengisa ukuthi usithanda kangangani ngokuthi anikele ngeNdodanakhe ayithandako.—Jwa. 3:16.

18. Kubayini singaqiniseka ukuthi uJehova ufuna sibe bantwana bakhe ngitjho nanyana khesadeda kuye?

¹⁸ Ngitjho nanyana sinesono, uJehova ufuna bona sibe yingcenye yomndenakhe begodu akasiboni simthwalo kuye. Kungenzeka simdanise namkha simtjhiye, kodwana akalilahli itewu. UJesu wafanekisa ithando lakaJehova  elikhulu ngomfanekiso wendodana eyalahlekako. (Luk. 15:11-32) Ubaba osemfanekisweni lo akhenge alahle ithemba lokuthi indodanakhe izokubuya. Nangabe khesamtjhiya uJehova, kodwana saphenduka, singaqiniseka ukuthi uJehova uhlala akulungele ukusamukela.

19. UJehova uzowulungisa njani umonakalo owabangelwa ngu-Adamu?

¹⁹ UBabethu uzowulungisa woke umonakalo obangelwe ngu-Adamu. Ngemva kobana u-Adamu ahlubukile, uJehova wakhetha abantu abangaba yi-144 000 ephasini bona bayokubusa njengamakhosi nabaphristi ezulwini neNdodanakhe. Ephasini elitjha, uJesu nalabo abazokubusa naye bazokusiza abantu abathembekileko bona baphelele. Ngemva kokuthi bathembeke bekwaba sekupheleni, uZimu uzobanikela ukuphila okungapheliko. Ngemva kwalokho, ubabethu uzokuthaba khulu nakabona iphasi loke lizele amadodakazi namadodana anganasono, kuzokuba sikhathi esimnandi khulu leso!

20. UJehova utjengise ngaziphi iindlela ukuthi uyasithanda begodu isihloko esilandelako sizokucoca ngani?

²⁰ UJehova usitjengisile ukuthi uyasithanda. UnguBaba ophuma phambili kinabo boke. Uyasilalela nasithandazako, usinikela esikutlhogako bona siphile begodu simlotjhe. Uyasibandula begodu asisekele. Kuneembusiso ezihle khulu asibekele zona. Kuyasithabisa ukwazi ukuthi uBabethu uyasithanda begodu unendaba nathi! Isihloko esilandelako sizokucoca ngeendlela esingabonisa ngazo ukuthi siyakuthabela koke asenzela khona njengabantwana bakhe.