1. Khuyini uJehova asivumela bona siyenze?

UJEHOVA uyasivumela bona sikhethe esifuna ukukwenza. Uyasifundisa ukuthi singazenza njani iinqunto ezivuthiweko, nasenze iinqunto ezimthabisako, uyasisiza siphumelele. (Rhu. 119:173) Nasilandela iinqophiso ezihle esizifumana eBhayibhelini, kuzokuba lula bona senze iinqunto ezivuthiweko.—Heb. 5:14.

2. Ngibuphi ubudisi esingaqalana nabo ngemva kokwenza isiqunto?

² Ngitjho nanyana sithatha iinqunto ezivuthiweko, khekube budisi ukuqedelela esikuthomileko. Cabanga nganasi isibonelo: Umfowethu osesemutjha uqunte ukulifunda loke iBhayibheli. Kuphele iimveke ezimbalwa asilandela kuhle isiqunto sakhe, kuthi kusesenjalo alise. Udade othileko uqunta ukuphayona kodwana akabi netlha nakufuze akhethe ilanga azokuthoma ngalo. Isihlopha sabadala siqunta ukukhambela amalunga webandla ngehloso yokuwakhuthaza, kodwana kudlula iinyanga ezimbalwa soloko abakakwenzi abavumelane ngakho. Iimbonelwezi zihlukile kodwana zinento ezifana ngayo. Abantu esikhulume ngabo benze iinqunto kodwana akhenge banamathele eenquntweni zabo. AmaKrestu wokuthoma ebewahlala eKorinte aba nomraro ofanako. Akhesibone ukuthi singafundani kiwo.

3. Abantu beKorinte baqunta ukwenzani kodwana kwenzekani?

³ Ngomnyaka ka-55, amaKrestu weKorinte athatha isiqunto esiqakathekileko. Ezwa bona abafowabo nabodadwabo beJerusalema neJudiya bebaqalene nokugandeleleka begodu batlhagile, amabandla amanye abuthelela iimali bona abasize. AmaKrestu weKorinte bekanomusa begodu anesandla esivulekileko, yeke afuna ukusiza abafowabo abatlhagileko. UPowula wathumela iinqophiso wabe wakhetha uTitosi bona kube nguye obuthelela imali. (1 Kor. 16:1; 2 Kor.  8:6) Ngemva kweenyanga ezimbalwa, uPowula wezwa ukuthi amaKrestu weKorinte akhenge asanikela ngendlela egade athembise ngayo. Lokho kwenza bona iminikelwabo ingahlangani ngesikhathi bona ihlanganiswe neminikelo yamanye amabandla, ithunyelwe eJerusalema.—2 Kor. 9:4, 5.

4. Ngokomtlolo wesi-2 kwebeKorinte 8:7, 10, 11, uPowula wakhuthaza amaKrestu weKorinte bona enzeni?

⁴ AmaKrestu weKorinte enza isiqunto esihle begodu uPowula wawabuka ngokutjengisa kwawo ukukholwa nesifiso sokuba nesandla esivulekileko. Kodwana wabuye wawakhuthaza bona aqedelele akuthomileko. (Funda yesi-2  kwebeKorinte 8:7, 10, 11.) NemaKrestwini avuthiweko kungaba budisi ukwenza njengombana aquntile.

5. Sizokuphendula miphi imibuzo?

⁵ Nathi singenzeka njengamaKrestu weKorinte, singafumana ubudisi nakufuze senze esikuthembisileko. Kubayini? Lokho kungabangwa kukuthi sinesono, yeke singasolo siriyada. Kungenzeka into ebesingakayilindeli, bese asisenzi ngendlela esithembise ngayo. (UMtj. 9:11; Rom. 7:18) Nasifuna ukuthuthukisa isinqunto esisenzileko, khuyini ekufuze siyenze? Singaqiniseka njani bona siyakuqedelela esikuthomileko?

6. Kunini lapho kufuze sitjhugulule ebesele siqunte ukukwenza?

⁶ Ezinye izinto esiqunte ukuzenza angeze sakghona ukuzitjhugulula. Ngokwesibonelo, nange sikhethe ukulotjha uJehova kufuze sinamathele esiquntweneso kumnyama kubomvu, nalokha nasitjhadileko kufuze sihlale sithembekile emuntwini esitjhade naye. (Mat. 16:24; 19:6) Kodwana ezinye iinqunto kufuze sizenze kabutjha. Kubayini? Ngebanga lokuthi izinto zikhamba zitjhuguluka. Ngiwaphi amagadango esingawalandela nasifuna ukwenza iinqunto ezivuthiweko?

7. Khuyini ekufuze siyithandazele begodu kubayini?

⁷ Thandazela ukuhlakanipha. UJehova waphefumelela uJakopo bona atlole athi: “Nje-ke nangabe omunye wenu utlhoga ukuhlakanipha, akaragele phambili akubawa kuZimu, uzokuphiwa khona, ngombana ubapha boke ngomusa ngaphandle kokusola.” (Jak. 1:5) Ngezinga elithileko ‘soke siyakutlhoga ukuhlakanipha.’ Yeke, bawa uJehova akusize nawuthatha iinqunto nalokha nakufuze uzitjhugulule. UJehova uzokusiza bona uthathe iinqunto ezihlakaniphileko.

8. Ngaphambi kokuthatha isiqunto, ngiliphi irhubhululo ekufuze silenze?

⁸ Yenza irhubhululo. Funda iliZwi lakaZimu, iincwadi ezivele ehlanganweni kaJehova begodu ukhulume nabantu abavuthiweko. (IzA. 20:18) Ngaphambi kokuthatha isiqunto sezefundo ukwenzela bona ufumane imali yokuzitlhogomela nokuragela phambili ulotjha uJehova, kuqakathekile ukuthi senze irhubhululo.

9. Ukuthembeka kuzosizuzisa njani?

⁹ Hlolisisa iinsusa zakho. UJehova unendaba nokuthi kubayini senza izinto. (IzA. 16:2) Ufuna sithembeke ezintweni zoke. Nathi sifuna ukuthembeka kithi, kabanye abantu kuhlanganise neenquntweni esizithathako. Nangabe asikakathembeki, sizokuba nobudisi nakufuze sinamathele eenquntweni zethu. Ngokwesibonelo, umfowethu osesemutjha angaqunta ukuba liphayona lesikhathi esizeleko. Kuthi ekukhambeni kwesikhathi, abe nobudisi bokuhlanganisa ama-iri alindelekileko, ekugcineni uyalisa ukuba liphayona. Kungenzeka ukuthi ihloswakhe yokuphayona bekukuthabisa uJehova. Kodwana kungenzeka  ukuthi ibanga elimenze waphayona bekukufuna ukuthabisa ababelethi bakhe namkha omunye umuntu.

10. Khuyini etlhogekako nasizakwenza amatjhuguluko?

¹⁰ Cabanga ngesibonelo somuntu ofundelwa iBhayibheli ofuna ukulisa ukubhema. Ekuthomeni akabhemi bekudlule iveke namkha ezimbili, ngitjho nanyana ukwenza njalo kubudisi, kodwana ngemva kwesikhathi esithileko uyabuyela ekubhemeni. Ekugcineni, uyaphumelela. Ukuthanda uJehova nesifiso sokumthabisa kumsiza ahlule umukghwa omumbi lo.—Kol. 1:10; 3:23.

11. Kubayini kufuze sibe nemigomo enqophileko?

¹¹ Zibekele imigomo enqophileko. Nangabe imigomwakho inqophile, kulula ukuqedelela okuthomileko. Ngokwesibonelo, mhlamunye uqunte ukufunda qobe iBhayibheli. Kodwana awunalo ihlelo lokufunda, lokho kungakwenza ungakufezi ebewunqophe ukukwenza. * Abadala bebandla bangaqunta ukwenza umsebenzi wokulusa ibandla, kodwana ngezinye iinkhathi abenzi njengombana baquntile. Nabazakuphumelela, bangabuza imibuzo efana nale: “Kghani silenzile ihlelo labafowethu nabodadwethu abatlhoga sibavakatjhele? Sisibekile na isikhathi esizobavakatjhela ngaso?”

12. Khuyini ekufuze sikwenze begodu kubayini?

¹² Zibekele imigomo ongayifikelela. Akekho umuntu onesikhathi namandla wokwenza zoke izinto afuna ukuzenza. Yeke, azi amandlakho. Nakutlhogekako kungafuze utjhugulule isiqunto esingaphezu kwamandlakho, obonako ukuthi angekhe ukghone ukusifeza. (UMtj. 3:6) Akhesithi sewusibuyekezile isiqunto sakho, yenza koke okutlhogekako bona usilungise ukwenzela bona ukghone ukusifeza. Naka amagadango amahlanu azokusiza bona uqede okuthomileko.

13. Ungawafumana njani amandla owatlhogako bona uqedelele okuthomileko?

¹³ Thandaza ubawe amandla wokusebenza. UZimu angakunikela ‘amandla wokusebenza’ bona uqedelele into oyithomileko. (Flp. 2:13) Yeke bawa uJehova akuphe ummoyakhe ocwengileko ozokunikela amandla owatlhogako. Ragela phambili uwuthandazela ngitjho nanyana ubona ngasuthi imithandazwakho ayiphendulwa. UJesu wathi: “Phikelelani nibawa, [ummoya ocwengileko] nizakuphiwa wona.”—Luk. 11:9, 13.

14. Ikambiso ekuzAga 21:5, ingakusiza njani bona wenze njengombana uquntile?

¹⁴ Zakhele ihlelo. (Funda izAga 21:5.) Bona uqedelele nanyana yini oyithomako, kufuze ube nehlelo. Bese uyalilandela. Nawenza isiqunto, yiba namagadango ozowalandela bona wenze njengombana uquntile. Nawunomsebenzi omkhulu okufuze uwenze, wenze ube ziinquntu, uzokukghona ukuwenza bulula. UPowula wakhuthaza ibandla leKorinte bona libekele okuthileko ngeqadi “ngelanga lokuthoma lenye nenye iveke” kunokulinga ukubuthelela imali nasele kufike isikhathi sokwenza umnikelo. (1 Kor. 16:2) Ukwenza umsebenzi omkhulu kancanikancani kungenza bona ungagandeleleki.

15. Ngemva kokwenza ihlelo, khuyini okufuze uyenze?

¹⁵ Ukutlola phasi lokho ohlela ukukwenza, kungakusiza ufeze isiqunto osithetheko. (1 Kor. 14:40) Ngokwesibonelo, isihlopha sabadala sinqotjhiswa bona sabele umdala munye bona atlole phasi amaminidi  womhlangano neenqunto zesihlopha sabadala kuhlanganise nalabo abanikelwe izabelo ezithileko kunye namalanga okufuze baqede ngawo izabelo abanikelwe zona. Abadala abalandela iinqophiso, kanengi bayakufeza abakuquntileko. (1 Kor. 9:26) Nawe ungalinga ukwenza into efanako ekuphileni kwakho. Ngokwesibonelo, ungazakhela ihlelo lezinto ohlela ukuzenza bese uqunta ukuthi ngikuphi ofuna ukukwenza qangi. Lokho kuzokusiza uqedelele okuthomileko begodu uzokukghona ukwenza okunengi ngesikhathi esincani.

16. Kufuze wenzeni nawuzakuqeda okuthomileko, begodu yeKwebeRoma 12:11, ikusekela njani lokho?

¹⁶ Zimisele. Kutlhoga umzamo ukunamathela ehlelweni lakho begodu uqedelele okuthomileko. (Funda kwebeRoma 12:11.) UPowula wathi kuThimothi kufuze ‘aragele phambili azinikele’ begodu ‘aphikelele’ ekubeni mfundisi ongcono. Iselulekweso sisebenza kizo zoke izinto eziphathelene nobuhlobo bethu noJehova.—1 Thim. 4:13, 16.

17. Kwebe-Efesu 5:15, 16 ingasisiza njani bona senze njengombana siquntile?

¹⁷ Sisebenzise kuhle isikhathi sakho. (Funda kwebe-Efesu 5:15, 16.) Zibekele isikhathi sokwenza okuquntileko, unamathele kikho. Kubalekele ukufuna isikhathi esifaneleko ngombana kanengi, isikhatheso asibi khona. (UMtj. 11:4) Kufuze utjheje ukuthi ungavumeli izinto ezingakaqakatheki zikwenze uphelelwe mamandla wokwenza izinto eziqakathekile. (Flp 1:10) Nakungenzeka, bekela eqadi isikhathi la kunganazinto ezingakuthikazisa khona. Tjela abanye bona utlhoga isikhathi sokuzindla namkha sokufunda. Cima ufunjathwakwakho, umvule nasele uqede ukufunda. *

18-19. Khuyini engakusiza bona uqedelele okuthomileko ngitjho kungaba budisi?

¹⁸ Qala umvuzo. Umphumela wesiqunto sakho ufana nebanga lendlela oyikhambako. Nawufuna ukufika la uya khona, uzokukhamba ngitjho nanyana indlela indlela okhamba ngayo ivaliwe. Ngendlela efanako, nasiqala umphumela weenqunto zethu, angekhe saphosela itewu nasihlangana neenqabo namkha izinto ezosiriyadisa.—Gal 6:9.

¹⁹ Ukuthatha iinqunto ezihle kubudisi begodu nokwenza njengombana siquntile kungaba budisi. Kodwana uJehova angakwenza uhlakaniphe, akunikele namandla owatlhogako bona uqedelele okuthomileko.