1. Khuyini esiqinisekisa ngokuthi siphila “emihleni yokuphela”?

KGHANI wabelethwa ngemva komnyaka ka-1914? Nangabe kunjalo, kutjho khona ukuthi uphila “emihleni yokuphela” kwephasi lakaSathana. (2 Thim. 3:1) Soke sezwa ngezenzakalo zangesikhathesi ezabikezelwa nguJesu. Izenzakalwezo zihlanganisa izipi, ukutlhayela kokudla, ukusikinyeka kwephasi, izifo ezibulalako, ukwanda kokuphulwa komthetho nokuhlunguphazwa kwabantu bakaJehova. (Mat. 24:3, 7-9, 12; Luk. 21:10-12) Sibabonile nabantu abaziphatha ngendlela eyabikezelwa ngumpostoli uPowula. (Qala ibhoksi elithi, “ Indlela Abantu Abaphila Ngayo Nje.”) Thina boFakazi bakaJehova siyaqiniseka ukuthi siphila “emihleni yokuphela.”—Mik. 4:1, NW.

2. Ngimiphi imibuzo etlhoga iimpendulo?

² Sekudlule isikhathi eside khulu kusukela ngo-1914 bekube nje, yeke siyaqiniseka ngokuthi siphila ekugcineni ‘kwemihla yokuphela.’ Njengombana ukuphela kutjhidela, kufuze sazi iimpendulo zemibuzo eqakathekileko le: Ngiziphi izenzakalo ezizokwenzeka emihleni yokuphela? UJehova ulindele bona senzeni njengombana silindele izenzakalwezo?

3. Ngokwesiphorofido esikweyoku-1 kwebeThesalonika 5:1-3, ngisiphi isimemezelo esizokwenziwa ziintjhaba?

³ Funda yoku-1 kwebeThesalonika 5:1-3. UPowula ukhuluma ‘ngelanga lakaJehova.’ Njengombana lisetjenziswe emtlolweni lo, ilangelo liqalisele esikhathini esithoma ngokuhlaselwa  “kweBhabhiloni elikhulu,” umbuso wephasi wekolo yamala ozokuphela nge-Arimagedoni. (IsAm. 16:14, 16; 17:5) Ngaphambi kokufika ‘kwelangelo,’ iintjhaba zizabe zimemezela ukuthi ‘Sekunokuthula nokuvikeleka!’ (Amanye amaBhayibheli athi; “Ukuthula nokuphepha.”) Ngezinye iinkhathi ababusi bephasi bayawasebenzisa amagama la nabakhuluma ngokuthuthukisa itjhebiswano hlangana neentjhaba. * Nanyana kunjalo, isaziso esithi, “ukuthula nokuvikeleka” ekukhulunywa ngaso eBhayibhelini sizokuhluka. Kubayini? Ngombana nakwenziwa isaziswesi abantu bazokucabanga ukuthi ababusi bephasi baphumelele ekwenzeni iphasi bona libe yindawo ephephileko. Eqinisweni, “isizi elikhulu” lizokuthoma khonokho begodu “ukutjhatjalaliswa kuzobafikela bangakalindeli.”—Mat. 24:21.

4. (a) Khuyini ekufuze silindele ukuyazi mayelana nesaziso esithi, “ukuthula nokuvikeleka”? (b) Khuyini esele sikwazi ngaso?

⁴ Kunezinto esizaziko mayelana nesaziso “sokuthula nokuvikeleka.” Nanyana kunjalo, kunezinye esingazaziko. Asazi ukuthi khuyini ezokwenza ababusi bephasi benze isazisweso. Asazi ukuthi kuzokuba simemezelo esisodwa namkha kuzokuba milandelande yezaziso. Kinanyana ngikuphi, sazi lokhu: Ababusi babantu angeze baletha ukuthula ephasini, yeke isaziso sabo kufuze singasikhohlisi. Kunalokho, leso sisaziso ebesisilindele esabikezelwako. Silitshwayo elitjengisa ukuthi “ilanga lakaJehova” selizokuthoma!

5. UmTlolo weyoku-1 kwebeThesalonika 5:4-6, usitjela ukuthi senzeni nasizakulungela “ilanga lakaJehova”?

⁵ Funda yoku-1 kwebeThesalonika 5:4-6. Amezwi kaPowula asikhuthazo la, asitjela ngokuthi khuyini ekufuze siyenze nasizakuqiniseka bona sililungele “ilanga lakaJehova.” Kufuze “singalali njengombana abanye benza.” Kunalokho, kufuze ‘sihlale siphapheme.’ Ngokwesibonelo, kufuze sitjheje bona singazibandakanyi kwezepolotiki. Nangathana besizibandakanya, besizokuba ‘yingcenye yephasi.’ (Jwa. 15:19) Siyazi ukuthi mBuso kaZimu kwaphela ozokuletha ukuthula ephasini.

6. Khuyini esifuna ukusiza abanye bayenze begodu kubayini?

⁶ Ngaphandle kokuhlala siphapheme, kufuze sisize nabanye bazwisise lokho okwabikezelwa liBhayibheli ngalokho okuzokwenzeka ephasini. Kufuze sikhumbule ukuthi isizi elikhulu lathoma, angekhe kusaba nesikhathi sokufundisa abantu bona balotjhe uJehova. Kungebangelo umsebenzethu wokutjhumayela urhabekile! *

7. Khuyini uJehova alindele bona siyenze?

⁷ Esikhathini esiselekwesi ngaphambi kokuthoma ‘kwelanga’ lakhe, uJehova ulindele bona sihlale simajadu emsebenzini wokutjhumayela. Kufuze siqiniseke ngokuthi ‘sihlala sinokunengi kokukwenza emsebenzini weKosi.’ (1 Kor. 15:58) UJesu wakubikezela lokho okufuze sikwenze. Nakakhuluma ngezinto eziqakathekileko ezizokwenzeka emalangeni wokuphela, wathi: “Iindaba ezimnandi kufuze zitjhunyayelwe kizo zoke iintjhaba qangi.” (Mar. 13:4, 8, 10; Mat. 24:14) Akhucabange: Qobe nawuyokutjhumayela, usuke uzalisa isiphorofido seBhayibheli.

8. Sazi njani ukuthi umsebenzi wokutjhumayela uyaphumelela?

⁸ Khuyini esingakutjho ngokuphumelela komsebenzi wokutjhumayela ngomBuso? Qobe mnyaka, umsebenzi lo uragela phambili. Ngokwesibonelo, akhucabange ngokukhuphuka kwesibalo sabarhuweleli bomBuso ephasini mazombe emalangeni wokuphela la. Ngo-1914, bekunabarhuweleli abazii-5 155 eenarheni ezima-43. Namhlanjesi, eenarheni ezima-240 kunabarhuweleli abaziingidi eziyi-8.5! Nanyana kunjalo, umsebenzethu lo usaragela phambili. Kufuze siragele phambili sitjela abantu ukuthi umBuso kaZimu usisombululo semiraro yabo.—Rhu. 145:11-13.

9. Kubayini kufuze siragele phambili nokutjhumayela iindaba zomBuso?

⁹ Umsebenzethu wokutjhumayela ngomBuso angeze wajama bekube kulapho uJehova athi sekwanele. Singangani isikhathi esiseleko bona abantu bazi ngoJehova uZimu noJesu Krestu? (Jwa. 17:3) Asazi. Esikwaziko kukuthi bekube kulapho kuthoma khona isizi elikhulu, “boke abazimisele ukufumana ukuphila okungapheliko” basesenethuba lokwamukela iindaba ezimnandi, balotjhe uJehova. (IzE. 13:48) Singabasiza njani abantu isikhathi sisesekhona?

10. Ngiliphi isizo uJehova asinikela lona bona sifundise abantu iqiniso?

¹⁰ UJehova usebenzisa ihlanganwakhe ukusinikela koke esikutlhogako bona sifundise abantu iqiniso. Ngokwesibonelo, sibandulwa qobe esifundweni saphakathi neveke. Isifundwesi sisisiza sazi esizokutjho nasitjhumayeza umuntu kokuthoma nalokha nasenza amabuyelo. Godu sifunda nendlela yokuraga iimfundo zeBhayibheli. Ihlangano kaJehova  isinikele izinto zokufundisa ezisemaThulusini wokuFundisa. Izintwezi zisiza bona . . .

• sithome imikhulumiswano,

• sikhulume ngendlela evusa ikareko,

• sisize abantu bafunde okungeziweko ngeBhayibheli,

• sifundise abantu iqiniso, begodu

• simemele abathanda ukwazi okungeziweko bona bavakatjhele izinzolwazi lethu neWolweni lomBuso.

Iye khona akukaneli ukuba namathulusi la kwaphela. Kufuze siwasebenzise. * Ngokwesibonelo, nangabe ucoce nomuntu olalelako, bese umtjhiyela iphetjhana namkha umagazini, umuntu loyo uzokukghona ukusala azifundela bekube sikhathi esilandelako nanihlangana godu. Kumthwalwethu bona sibe majadu ekutjhumayeleni khulu ngendlela esingakghona ngayo qobe nyanga.

11. Kubayini kwenziwe ihlelo le-Online Bible Study Lessons?

¹¹ I-Online Bible Study Lessons efumaneka ku-jw.org^®, ingenye yeendlela uJehova asiza ngayo abantu bona bazi iqiniso. (Qala ngaphasi kwesithi, BIBLE TEACHINGS > ONLINE LESSONS.) Kubayini kwenziwe ihlelweli? Kungombana qobe mnyaka, abantu abanengi ephasini mazombe bangena ku-Inthanethi bafune ukufunda iBhayibheli. Iimfundo ezikuzinzolwazi lethu zingasiza abantwaba bona bathome ukufunda iqiniso eliseliZwini lakaZimu. Abanye babantwaba nawukhuluma nabo kungenzeka bazaze ukufundelwa iBhayibheli. Nangabe kunjalo, batjengise ingcenye le efumaneka kuzinzolwazi lethu namkha ubathumelele i-link eneemfundwezo. *

12. Khuyini umuntu angayifunda ku-Online Bible Study Lessons?

¹² I-Online Bible Study Lessons yethu icoca ngeenhlokwezi: “IBhayibheli NomTloli Walo,” “Abantu BeBhayibhelini Abaveleleko,” kunye “Nomlayezo Wethemba OseBhayibhelini.” Iinhlokwezi zifundisa godu nangokuthi:

• Indlela iBhayibheli elingamsiza ngayo umuntu

• Ungubani uJehova, uJesu, neengilozi

• Kubayini uZimu adala abantu

• Kubayini kwenzeka izinto ezimbi begodu sizwa ubuhlungu

Iimfundwezi godu zikhuluma nangendlela uJehova . . . 

• azokuqeda ngayo ubuhlungu nokufa,

• azokuvusa ngayo abantu, begodu

• ajamiselele imibuso yabantu ngomBuswakhe.

13. Kghani iimfundo ezifumaneka ku-online bible study, zijamiselela ilungiselelo lesifundo seBhayibheli? Hlathulula.

¹³ Iimfundo ezifumaneka ku-online bible study azijamiseleli ilungiselelo lesifundo seBhayibheli. UJesu usinikele ilungelo lokwenza abafundi. Sithemba ukuthi abantu abathanda ukufunda okwengeziweko bazozifundela iimfundwezi ezifumaneka ku-online begodu bazokuthabela abakufundako. Mhlamunye bangasamukela isifundo seBhayibheli. Ekupheleni kwesifundo ngasinye, umfundi umenywa bona afake isibawo sesifundo seBhayibheli. Qobe lilanga, ihlangano ifumana iimbawo ezivela ephasini loke ezingaphezu kwama-230 zeemfundo zeBhayibheli. Kuqakathekile ukuthi umuntu afundelwe.

14. Ngokweenqophiso ezatjhiwo nguJesu kuMatewu 28:19, 20, khuyini ekufuze silinge ngamandla ukuyenza begodu kubayini?

¹⁴ Funda uMatewu 28:19, 20. Njengombana  siraga iimfundo zeBhayibheli, kufuze silinge ngamandla bona ‘senze abafundi . . . , sibafundise ukwenza koke [uJesu] asiyale ngakho.’ Kufuze sisize abantu bazwisise ukuthi kuqakatheke kangangani bona bathathe igadango lokulotjha uJehova nokusekela umBuswakhe. Lokhu kutjho ukuthi sibakhuthaze bona basebenzise abakufundako, banikele ukuphila kwabo kuJehova begodu babhajadiswe. Nabenza njalo, bazokusinda ngelanga lakaJehova.—1 Pit. 3:21.

15. Ngisiphi isikhathi esinganaso begodu kubayini?

¹⁵ Njengombana kuveziwe ngaphambilini, sekusele isikhathi esifitjhani bona kuphele iphasi lakaSathana. Ngebangelo, asinaso isikhathi sokufunda nabantu abangakazimiseli ukuba bafundi bakaKrestu. (1 Kor. 9:26) Umsebenzethu uqakatheke khulu! Kusesenabantu abanengi ekusafuze bezwe umlayezo womBuso ngaphambi kobana kufike isiphelo.

16. NgokwesAmbulo 18:2, 4, 5, 8, khuyini soke ekufuze siyenze? (Qala umtlolo ongenzasi.)

¹⁶ Funda isAmbulo 18:2, 4, 5, 8. Amavesi la aveza okuthileko uJehova akulindele ebantwini abamlotjhako. Woke amaKrestu weqiniso, kufuze akwenze kukhanye bona awazibandakanyi nekolo yamala. Ngaphambi kokufunda iqiniso, umfundi weBhayibheli kungenzeka bekalilunga lekolo yamala. Kungenzeka bekaya esondweni begodu ahlanganyela ezintweni elizenzako. Mhlamunye bekanikela ekolweni leyo. Ngaphambi kokuthi umuntu abe mrhuweleli ongakabhajadiswa, kufuze aphume ngokupheleleko ekolweni yamala. Kufuze atlole incwadi yokusula esondweni namkha kinanyana ngiyiphi ihlangano esekela ikolo yamala ayazise ukuthi akaseselilunga layo. *

17. Ngimuphi umsebenzi wokuziphilisa umKrestu ekufuze awubalekele begodu kubayini?

¹⁷ UmKrestu weqiniso kufuze aqiniseke ngokuthi umsebenzakhe wokuziphilisa awuzibandakanyi nekolo yamala. (2 Kor. 6:14-17) Ngokwesibonelo, angeze asebenza esondweni. Ngaphezu kwalokho, umKrestu oqatjhwe ngomunye usomabhizinisi angekhe asebenze emakhiweni ethuthukisa ikolo yamala. Nange anebhizinisi lakhe, angekhe amukele umsebenzi osekela ikolo yamala. Kubayini singazibandakanyi? Ngombana asifuni ukuhlanganyela kinanyana ngiyiphi ifundiso yamala nemikghwayo esilapheleko phambi kwakaZimu.—Isa. 52:11. *

18. Omunye umfowethu watjengisa njani ukuthi ulalela iinkambisolawulo zeBhayibheli ukudlula umsebenzakhe wokuziphilisa?

 ¹⁸ Eminyakeni edlulileko, usogontraga wabawa umdala obekanebhizinisi bona ayokusebenza esondweni elisendaweni yala kuhlala khona umfowethu. Usogontraga bekazi ukuthi umfowethu angekhe avume ukuyokusebenza esondweni ngombana bekungasilihlandla lokuthoma ambawa bona ayomenzela okuthileko. Kodwana usogontraga bekatlhoga umuntu ozokwenza umsebenzi lo ngokurhabako. Nanyana kunjalo, umfowethu walalela iinkambisolawulo zeBhayibheli begodu akhenge awuthathe umsebenzi loyo. Kwathi ngeveke elandelako, iphephandaba lendawo laveza isithombe somuntu obekafaka isiphambano esondwenelo. Nangathana umfowethu akhenge alalele iinkambisolawulo zeBhayibheli, bekuzokuba nguye osesithombeni. Cabanga ukuthi bekazolilimaza kangangani ibandla kuhlanganise negama lakhe! Godu cabanga nangendlela uJehova ebekazozizwa ngayo.

19-20. (a) Khuyini esiyifundileko? (b) Khuyini esizokucoca ngayo esihlokweni esilandelako?

¹⁹ IBhayibheli lithi isiphorofido esiqakathekileko esizokuzaliseka ingasikade simemezelo sababusi bephasi esithi, “ukuthula nokuvikeleka.” Siyamthokoza uJehova ngokusifundisa, ngombana sesiyazi ukuthi ababusi angekhe baletha ukuthula ephasini. Khuyini ekufuze siyenze ngaphambi kokuzaliseka kwesenzakalweso, nangaphambi kokufika kokutjhatjalaliswa okungakalindeleki? UJehova ulindele bona siragele phambili sitjhumayela umlayezo womBuso begodu senze abafundi abangeziweko. Ngesikhathi esifanako, kufuze siphume ngokupheleleko ekolweni yamala. Lokho kutjho ukuthi singabi malunga wekolo yamala begodu sibalekele nokwenza imisebenzi esekela iBhabhiloni eliKhulu.

²⁰ Kunezinye izenzakalo ezisazokwenzeka ekugcineni ‘kwemihla yokuphela.’ Kunezinye izinto uJehova alindele bona sizenze. Ngiziphi izintwezo begodu singakulungiselela njani okuzokwenzeka esikhathini esizako? Sizokucoca ngazo esihlokweni esilandelako.