ISIHLOKO SAMA-41
Thembela KuJehova Ngesikhathi ‘Sesizi Elikhulu’
“Thandani uSomnini noke nina bathembekileko bayo! USomnini uyabalondoloza abaqotho.”—RHU. 31:24.
INGOMA 129 Asikghodlheleleni
OKUZOKUCOCWA NGAKHO *
1-2. (a) Khuyini ezokumenyezelwa babusi bephasi ingasikade? (b) Ngimiphi imibuzo etlhoga iimpendulo?
AKHUCABANGE ngesikhathi ababusi bephaseli sele benze isimemezelo esabikezelwako esithi, “ukuthula nokuvikeleka.” Bangazikhakhazisa ngokuthi iphasi sele linokuthula. Ababusi bazokufuna sicabange ukuthi bayakghona ukusombulula imiraro yephasi. Kodwana iqiniso kukuthi angekhe bakghona ukuvimbela lokho okuzokwenzeka! Kubayini? IBhayibheli lithi, “ukutjhatjalaliswa kuzobafikela bangakalindeli, . . . angekhe baphunyurhe.”—1 Thes. 5:3.
2 Kunemibuzo eqakathekileko etlhoga iimpendulo: Khuyini okuzokwenzeka ngesikhathi ‘sesizi elikhulu’? UJehova uzokulindela bona senzeni ngesikhatheso? Singazilungiselela njani nje bona sihlale sithembekile ngesikhathi sesizi elikhulu?—Mat. 24:21.
KHUYINI EZOKWENZEKA NGESIKHATHI ‘SESIZI ELIKHULU’?
3. NgokwesAmbulo 17:5, 15-18, uZimu uzolitjhabalalisa njani “iBhabhiloni eliKhulu”?
3 Funda isAmbulo 17:5, 15-18. “IBhabhiloni eliKhulu” lizokutjhatjalaliswa! Njengombana kutjhiwo ngaphambili, ababusi angeze bakghona ukuvimbela lokho okuzokwenzeka ngesikhatheso. Kubayini? Ngombana uZimu ‘uzokufaka eenhliziyweni zabo ukuthi benze ngokomcabangwakhe.’ Uyini umcabango loyo? Kutjhabalalisa umbuso wephasi wekolo yamala, kuhlanganise namaSondo. * UZimu uzokufaka umcabangwakhe ‘eempondweni ezilitjhumi’ ‘zesibandana esibomvu be.’ “Iimpondo ezilitjhumi” zijamele boke aborhulumende abasekela “isibandana”—iinTjhaba eziBumbeneko. (IsAm. 17:3, 11-13; 18:8) Lokha aborhulumendabo nabahlasela ikolo yamala, isenzweso sizokuba litshwayo lokuthi isizi elikhulu selithomile. Isenzakalweso sizokubangela umonakalo omkhulu.
4. (a) Ngimaphi amabanga azokwenza ababusi bephasi bahlasele ikolo yamala? (b) Khuyini amalunga wamasondo azoyenza?
4 Asiwazi amabanga azokwenza bona ababusi bephasi bahlasele iBhabhiloni eliKhulu. Mhlamunye bangathi amasondo athikazisa ukuthula begodu angenele khulu eendabeni zepolotiki. Namkha bangathi iinhlangano zamasondo sele zibuthelele imali enengi kunye neendawo ezinengi. (IsAm. 18:3, 7) Kubonakala ngathi ababusi nabahlasela amasondo angekhe bahlasele woke amalungawo. Kunalokho, kubonakala ngasuthi ababusi bazokuhlasela iinhlangano zamasondo. Kuzokuthi iinhlanganwezo nasele zitjhatjalalisiwe, amalungwazo azokulemuka ukuthi abadosi phambili bamasondo babhalelwe kubavikela, yeke bazozihlukanisa namasondo lawo.
5. Malungana nesizi elikhulu, khuyini uJehova ayithembisileko begodu kubayini?
5 IBhayibheli alivezi ukuthi ukutjhatjalaliswa kweBhabhiloni eliKhulu kuzokuthatha isikhathi eside kangangani, kodwana siyazi bona angeze kwathatha isikhathi eside. (IsAm. 18:10, 21) UJehova uthembise ukuthi ‘uzokurhunyeza amalanga’ wesizi ukwenzela bona ‘abakhethiweko’ bakhe kunye nekolo yeqiniso basinde. (Mar. 13:19, 20) Kodwana khuyini uJehova azokulindela bona siyenze nakuthoma isizi elikhulu nepi ye-Arimagedoni?
LOTJHA UJEHOVA EKOLWENI YEQINISO
6. Khuyini esingayenza bona sizihlukanise nekolo yamala?
6 Njengombana isihloko esidlulileko khesacoca ngendaba le, uJehova ulindele bona abakhulekeli bakhe balise ukuzihlanganisa nekolo yamala. Lokhu kubandakanya okungaphezu kokuzihlukanisa nekolo yamala. Kufuze sizimisele ukulotjha uJehova ekolweni yeqiniso. Akhesicoce ngeendlela ezimbili ezingasisiza bona senze njalo.
Singakulisi ukuhlangana ndawonye ngitjho nanyana kubudisi (Funda isigaba 7) *
7. (a) Singadzimelela njani eenkambisweni ezilungileko zakaJehova zokuziphatha? (b) AmaHebheru 10:24, 25 akugandelela njani ukuqakatheka kokuhlangana ndawonye, khulukhulu nje?
7 Kokuthoma, kufuze sidzimelele eenkambisweni ezilungileko zakaJehova zokuziphatha. Asifuni ukwamukela iinkambisolawulo zokuziphatha zephaseli. Ngokwesibonelo, asikwamukeli ukuziphatha okumbi ngokomseme kwananyana ngiliphi ihlobo, lokho kuhlanganisa ukutjhadisa abantu bobulili obufanako nokuthandana kwabantu bobulili obufanako. (Mat. 19:4, 5; Rom. 1:26, 27) Kwesibili, kufuze siragele phambili silotjha uJehova sinamanye amaKrestu. Lokhu sikwenza nanyana kunini, kungaba semaWolweni womBuso, ngezinye iinkhathi singakwenza emakhaya waboFakazi ngitjho nangemsitheleni. Nanyana kungenzekani, angeze salisa ukuya esifundweni. Ekhabolakhona, kufuze sihlangane ndawonye ‘khulukhulu njengombana sibona ilanga litjhidela.’—Funda amaHebheru 10:24, 25.
8. Kungenzeka uzokutjhuguluka njani umlayezo esiwutjhumayelako esikhathini esizako?
8 Ngesikhathi sesizi elikhulu, umlayezo esiwumemezelako kungenzeka utjhuguluke. Okwanje, sitjhumayela iindaba ezimnandi zomBuso begodu silinga ukwenza abafundi. Kodwana ngesikhatheso, kungenzeka sizokutjhumayela umlayezo onqophileko ofana namatje wesinanja. (sAm 16:21) Kungenzeka simemezele ukuthi msinyana iphasi lakaSathaneli lizokutjhatjalaliswa. Ngokukhamba kwesikhathi, sizokufumana ukuthi kuhlekuhle uzokuthini umlayezo ekufuze siwutjhumayele begodu sizowutjhumayela njani. Kghani sizokusebenzisa iindlela ezifanako ebesizisebenzisa eminyakeni engaphezu kwelikhulu eyadlulako sitjhumayela begodu sifundisa abantu? Namkha sizokusebenzisa ezinye iindlela? Kuzokufuze silinde. Kinanyana ngikuphi, kubonakala ngasuthi sizokuba nelungelo lokutjhumayela ngesibindi umlayezo wesahlulelo sakaJehova!—Hez 2:3-5.
9. Ababusi bazokusabela njani emlayezwenethu, kodwana khuyini esiqiniseka ngakho?
9 Kuyakhanya ukuthi umlayezwethu uzokwenza ababusi bephaseli bona basilisise ngokupheleleko ukutjhumayela. Njengombana sithembele kuJehova nasitjhumayelako nje, kuzokufuze sithembele kuye nangesikhatheso. Kufuze siqiniseke ngokuthi uZimethu uzosinikela amandla wokwenza umsebenzakhe.—Mik 3:8.
ZILUNGISELELE UKUHLASELWA KWABANTU BAKAZIMU
10. Njengombana kwabikezelwa kuLukasi 21:25-28, inengi labantu lizokusabela njani ngesikhathi sesizi elikhulu?
10 Funda uLukasi 21:25-28. Ngesikhathi sesizi elikhulu, abantu bazokungenwa mamanzi emadolweni njengombana babona koke ebebakuthembile kufadalala. Bazabe ‘baseenhlungwini,’ begodu batshwenyekile bona kungenzeka babulawe njengombana kuzabe kusikhathi esimbi khulu emlandweni wabantu. (Zef. 1:14, 15) Ngesikhatheso, ukuphila kuzabe kubudisi khulu ngitjho nebantwini bakaJehova. Ngebanga lokuthi asisiyingcenye yephaseli, sizokuqalana neentjhijilo ezibuhlungu. Kungenzeka singabi nezinto esizitlhogako.
11. (a) Kubayini aboFakazi bakaJehova bazokuba bongazimbi bokuhlaselwa? (b) Kubayini kufuze singalisabi isizi elikhulu?
11 Esikhathini esithileko, abantu ebebasonda kungenzeka basilingeke ngombana aboFakazi bakaJehova bazabe basesekhona, baragela phambili balotjha uJehova. Bazokuvusa imiguruguru, batjengise nakwezokuthintana bona babasilingekele kangangani aboFakazi bakaJehova. Iintjhaba nombusazo uSathana, bazosihloya ngebanga lokuthi ikolwethu ngiyo kwaphela ezabe isele. Bazabe bangakawufezi umgomwabo wokutjhabalalisa woke amasondo ephasini. Yeke, sizokuba bongazimbi bokuhlaselwa. Ngesikhatheso, ababusi bazokuthatha indima kaGogi wakwaMagogi. * Bazokuhlangana ndawonye begodu bahlasele abantu bakaJehova ngawo woke amandlabo. (Hez. 38:2, 14-16) Kungenzeka sitshwenyeke ngokuthi kuzokwenzekani hlangana nesizi elikhulu, khulukhulu njengombana singayazi yoke imininingwana. Nanyana kunjalo, yinye into esiqiniseka ngayo: Akutlhogeki silisabe isizi elikhulu. UJehova uzosinikela iinqophiso ezizokusindisa ukuphila kwethu. (Rhu. 34:19) Sizokukghona ‘ukujama rwe siphakamise iinhloko [zethu], ngombana ukutjhatjhululwa kwethu kutjhidele.’ *
12. “Inceku ethembekileko nehlakaniphileko” isilungiselele njani lokho okuzokwenzeka esikhathini esizako?
12 “Inceku ethembekileko nehlakaniphileko” isilungiselele bona sihlale sithembekile bekufike isizi elikhulu. (Mat. 24:45) Lokhu ikwenze ngeendlela ezinengi, kodwana cabangela isibonelo nasi: Imihlangano emikhulu esibe nayo kusukela ngo-2016 kuya ku-2018. Iinkulumo zemihlangano leyo zisikhuthaze bona siqinise iimfanelo ezitlhogekako njengombana ilanga lakaJehova litjhidela. Akhesibuyekeze iimfanelwezo.
RAGELA PHAMBILI UQINISA UKUTHEMBEKA KWAKHO, UKUKGHODLHELELA NESIBINDI
Zilungiselele nje bona usinde “esizini elikhulu” (Funda iingaba 13-16) *
13. Singakuqinisa njani ukuthembeka kwethu kuJehova begodu kubayini kufuze sikwenze nje?
13 Ukuthembeka: Umhlangano wango-2016 bewunesihloko esithi, “Hlala Uthembekile KuJehova!” Umhlangano lo usifundise ukuthi nasinobuhlobo obuqinileko noJehova, sizokuthembeka kuye. Sakhunjuzwa nokuthi singahlala siseduze noJehova ngokuthi sithandaze ngokusuka ehliziyweni begodu sikhuthalele nokufunda iBhayibheli. Ukwenza njalo kusinikela amandla wokuhlula nanyana ngiziphi iintjhijilo esiqalana nazo. Njengombana isizi elikhulu litjhidela, singalindela ukuthi ukuthembeka kwethu kuZimu nemBuswenakhe kuzokulingwa khudlwana. Abantu bazokuragela phambili bahlekisa ngathi. (2 Pit. 3:3, 4) Lokhu kuzokwenzeka ngombana asisiyingcenye yephasi lakaSathaneli. Kufuze siqinise ukuthembeka kwethu nje, ukwenzela bona sihlale sithembekile ngesikhathi sesizi elikhulu.
14. (a) Ngiliphi itjhuguluko elizokwenzeka kubafowethu abadosa phambili ephasini? (b) Kubayini kuzokutlhogeka bona sithembeke ngesikhatheso?
14 Ngesikhathi sesizi elikhulu, kuzokuba netjhuguluko malungana nabafowethu abadosa phambili ephasini. Esikhathini esithileko, boke abazesiweko abasesephasini bazokubuthelelwa ezulwini bona bayokuhlanganyela epini ye-Arimagedoni. (Mat. 24:31; IsAm. 2:26, 27) Lokho kutjho bona isiHlopha esiBusako sizabe singasekho ephasini. Nanyana kunjalo, isiqubuthu esikhulu sizokuhlala sihlelekile. Abafowethu abafanelekako bezinye izimvu bazokudosa phambili. Kuzokufuze sitjengise ukuthi sithembekile kuJehova ngokusekela abafowethwaba begodu silandele neenqophiso ezivela kuZimu. Nasizakusinda kufuze silalele iinqophiswezo!
15. Singakuqinisa njani ukukghodlhelela kwethu begodu kubayini kuqakathekile ukwenza njalo nje?
15 Ukukghodlhelela: Umhlangano wango-2017 bewunesihloko esithi, “Ungalahli Ithemba!” Umhlangano lo usisize sakghodlhelela iintjhijilo. Safunda nokuthi ukukghodlhelela kwethu akukayami kithi. Singaqinisa ukukghodlhelela kwethu ngokuthembela kuJehova. (Rom. 12:12) Kwangathi singahlala siwakhumbula amezwi kaJesu athi: “Loyo okghodlhelele bekwaba sekupheleni uzokusindiswa.” (Mat. 24:13) Amezwi la atjho bona kufuze sihlale sithembekile naphezu kobudisi esiqalana nabo. Nasikghodlhelela ubujamo obubudisi nje, ukukholwa kwethu kuzokuqina ngaphambi kokufika kwesizi elikhulu.
16. Khuyini etjengisa ukuthi sinesibindi begodu singakuqinisa njani ukuba kwethu nesibindi nje?
16 Isibindi: Umhlangano wango-2018 bewunesihloko esithi, “Qina Ube Nesibindi!” Umhlangano lo wasikhumbuza ukuthi ukuba nesibindi akuyi ngamakghonwethu. Njengokukghodlhelela, nasizakuba nesibindi, kufuze sithembele kuJehova. Singakuqinisa njani ukuthembela kwethu kuye? Singakwenza ngokufunda iliZwi lakhe qobe lilanga begodu sizindle nangalokho uJehova akwenzela abantu bakhe esikhathini esidlulileko. (Rhu. 68:20; 2 Pit. 2:9) Ababusi bephasi nabasihlaselako ngesizi elikhulu, kuzokutlhogeka bona sibe nesibindi begodu sithembele kuJehova ukudlula nanini ngaphambili. (Rhu. 112:7, 8; Heb. 13:6) Nasithembela kuJehova nje, sizokuba nesibindi sokuqalana noGogi wakwaMagogi nakasihlaselako. *
KULINDELE NGABOMVU UKUSINDISWA KWAKHO
UJesu nebutho lakhe lezulwini bakhwele iinjomani ezimhlophe basepini ye-Arimagedoni, barhayila amanaba kaZimu! (Funda isigaba 17)
17. Kubayini kungakafaneli bona sisabe i-Arimagedoni? (Qala isithombe esingaphandle.)
17 Njengombana sifundile esihlokweni esidlulileko, inengi lethu liphile emihleni yokuphela. Nanyana kunjalo, sinethemba lokusinda esizini elikhulu. Ipi ye-Arimagedoni izokuba siphetho sokuphela kwephasi lakaSathana. Nokho, akutlhogeki bona sisabe. Kubayini? Kungombana ipi le akusingeyethu, kunalokho ngeyakaZimu. (IzA. 1:33; Hez. 38:18-20; Zak. 14:3) UJehova nakakhipha umyalo, uJesu Krestu uzokudosa phambili ibutho batjhinge epini. Uzabe anabazesiweko abavusiweko kuhlanganise namabutho weengilozi. Boke bazokulwa noSathana, amadimoni namabuthwakhe wephasini.—Dan. 12:1; IsAm. 6:2; 17:14.
18. (a) Khuyini uJehova asiqinisekisa ngayo? (b) IsAmbulo 7:9, 13-17, sisiza njani bona siqiniseke ngengomuso?
18 UJehova usiqinisekisa ngokuthi: “Akunasikhali esibekelwe wena esizakuphumelela.” (Isa. 54:17) “Isiqubuthu esikhulu” seenceku zakaJehova ezithembekileko sizokusinda “esizini elikhulu.” Sizokuragela phambili silotjha uJehova. (Funda isAmbulo 7:9, 13-17.) IBhayibheli lisinikela amabanga amanengi wokusiqinisekisa ngengomuso! Siyazi ukuthi “uSomnini uyabalondoloza abaqotho.” (Rhu. 31:24) Boke abathanda uJehova bazokuthabela ukumbona nakahlwengisa ibizo lakhe elicwengileko.—Hez. 38:23.
19. Ngiliphi ingomuso elithabisako esililindeleko?
19 Akhucabange bona incwadi yesi-2 kaThimothi 3:2-5 beyizokuthini nayihlathulula abantu bephasini elitjha, abangasalawulwa nguSathana. (Funda ibhoksi elithi, “ Indlela Abantu Abazokuphila Ngayo Ngesikhatheso.”) UmFowethu uGeorge Gangas, * obekalilunga lesiHlopha esiBusako, wayihlathulula bunjesi wathi: “Kuzokuba njani ephasini nasele woke umuntu alotjha uJehova? Msinyana woke umuntu uzokuba nelungelo lokuphila ephasini elitjha. Sizokuphila ngokungapheliko njengoJehova.” Lelo lithemba elithabisa kwamambala!
INGOMA 122 Asidzimeleleni!
^ isig. 5 Soke siyazi ukuthi msinyana abantu bazokuqalana ‘nesizi elikhulu.’ Kuzokwenzakalani kithi? UJehova uzokulindela bona senzeni ngesikhatheso? Nasizakuhlala sithembekile, ngiziphi iimfanelo ekutlhogeka bona sibe nazo? Isihlokwesi sizosinikela iimpendulo.
^ isig. 3 IHLATHULULO YAMAGAMA: Lobukholwa lakhiwa masondo azibiza ngokuthi maKrestu, kodwana akafundisi abantu bona balotjhe uJehova ngendlela ayifunako.
^ isig. 11 IHLATHULULO YAMAGAMA: Ibizo elithi, uGogi wakwaMagogi (ngokurhunyeziweko, litjho uGogi) liqalisele esiqhemeni seentjhaba ezizokuhlangana bona zihlasele abantu abalotjha uJehova ngesikhathi sesizi elikhulu.
^ isig. 11 Bona ufumane imininingwana enabileko malungana nalokho okuzokwenzeka ngaphambi kwe-Arimagedoni, qala isahluko 21 encwadini ethi, UmBuso KaZimu Uyabusa! Bona ufumane imininingwana engeziweko malungana nokuhlasela kwakaGogi wakwaMagogi nokuthi uJehova uzobavikela njani abantu bakhe epini ye-Arimagedoni, qala isiThala, sakaJulayi 15, 2013, amakhasi 3-8, nesakaJulayi 15, 2015, amakhasi 14-19.
^ isig. 16 Umhlangano wango-2019 unesihloko esithi, “Ithando Ngeze Laphela!” uzosiqinisekisa ngokuthi singahlala sivikelekile ethandweni lakaJehova.—1 Kor. 13:8.
^ isig. 19 Funda isihloko esithi, ‘Izenzo Zakhe Ziyomlandela’ esiThaleni sangoDisemba 1, 1994, esifumaneka ngesiZulu.
^ isig. 65 IHLATHULULO YEENTHOMBE: Ngesikhathi sesizi elikhulu, isiqhema saboFakazi ngesibindi sihlangene ehlathini bona sibe nesifundo.
^ isig. 67 IHLATHULULO YEENTHOMBE: Isiqubuthu esikhulu seenceku zakaJehova ezithembekileko sizokuphuma esizini elikhulu, siphila begodu sithabile!
