1. Ngiliphi isekelo abodadwethu abalinikela ihlangano, kodwana ngiziphi iintjhijilo abanengi babo abaqalana nazo? (Qala isithombe esisekuthomeni.)

KUFUZE kusenze sithabe ukuba nabodadwethu abasebenza ngamandla ebandleni. Ngokwesibonelo, banikela iimpendulo ezihle esifundweni nesimini. Abanye bahlanganyela emsebenzini wokulungisa amaWolo womBuso begodu bazinikela isikhathi sokutjengisa abafowethu nabodadwethu ukuthi banendaba nabo. Kodwana lokho akutjho ukuthi abahlangabezani neentjhijilo. Abanye batlhogomela ababelethi babo abalupheleko. Kuthi abanye bayaphikiswa mindenabo. Kuthi kusesenjalo, kube nabanye abakhulisa abantwababo babodwa, basebenza budisi ukwenza umsebenzi lo ube yipumelelo.

2. Kubayini kufuze silinge ngamandla ukusekela abodadwethu?

² Kubayini kufuze sisekele abodadwethu? Ngombana iphasi namhlanjesi alibaphathi kuhle abantu bengubo. Ukungezelela kilokho, iBhayibheli lisiyala bona sisekele abodadwethu. Ngokwesibonelo umpostoli uPowula wathi ebandleni leRoma, kufuze lamukela uFuwebe wathi, “Nimnikele nanyana yini ayitlhogako.” (Rom. 16:1, 2) Ngesikhathi uPowula amFarisi kungenzeka ukuthi bekenza ngokwesiko eliqalela abantu bengubo phasi. Kodwana njengombana besele amKrestu, besele alingisa isibonelo sakaJesu, aphatha abantu bengubo ngehlonipho nangomusa.—1 Kor. 11:1.

3. UJesu bekabaphatha njani abantu bengubo? Abantu bengubo abalotjha uJehova, bona bekabaqala njani?

³ UJesu bekabaphatha ngehlonipho boke abantu bengubo. (Jwa. 4:27) Akhenge aphathe abantu bengubo njengombana bekwenza abarholi bekolo bangesikhathi sakhe. Kuhlekuhle enye incwadi ehlathulula iBhayibheli ithi: “UJesu akhenge aphathe kumbi namkha aqalelele abantu bengubo phasi.” Kunalokho, uJesu bakabathanda abantu bengubo khulukhulu labo  abafuna ukwenza intando kaYise. Bekabaqala njengabodadwabo. Bekabaqala njengomndenakhe alotjha uJehova nawo, bekababala hlangana nabantu bembhaji.—Mat. 12:50.

4. Sizokucoca ngani esihlokwenesi?

⁴ UJesu bekahlala akuthabela ukusiza abantu bengubo abalotjha uJehova. Bekabathanda begodu abavikela nakutlhogekako. Akhesibone ukuthi singamlingisa njani uJesu ngokutjengisa ngezenzo ukuthi siyabazwisisa abadadwethu.

5. Kubayini kungaba budisi kwabanye abodadwethu ukufumana iinkhuthazo?

⁵ Soke sitlhoga ukuba nobuhlobo obuhle. Ngezinye iinkhathi abodadwethu bangakufumana kubudisi ukufumana abangani ababatlhogako. Kubayini kunjalo? Tjheja okutjhiwo bodadwethu. Omunye udade ibizo lakhe elinguJordan * uthi, “Ngebanga lokuthi angikatjhadi, ngezinye iinkhathi ngikufumana kubudisi ukwenza abangani, ngizizwa nginganandawo ebandleni.” Udade oliphayona ibizo lakhe elinguKristen yena uthi, “Nawusanda ukufika ebandleni ungazizwa unganabani.” Abanye abafowethu bangazizwa ngendlela efanako. Labo abahlala emndenini oneenkolelo ezihlukileko bangazizwa bangakatjhidelani nomndenabo, akhucabange nabazizwa njalo ngitjho nebandleni. Abantu abangakghoni ukuphuma ngendlini ngebanga lokugula namkha ezinye izinto bangazizwa banesizungu, nalabo abatlhogomela abantu abagulako bangazizwa ngendlela efanako. U-Annette uthi, “Bengingazamukeli iimemo ngombana bengitlhogomela umma.”

6. UJesu wabasiza njani uMarta noMariya njengombana kutlolwe kuLukasi 10:38-42?

⁶ UJesu bekenza isikhathi sokuba nabantu bengubo abalotjha uJehova, bakamngani wamambala kibo. Akhucabange indlela ebekamngani ngayo noMarta noMariya bobabili kubonakala kwanga bebangakatjhadi. (Funda uLukasi 10:38-42.) UJesu wabatjengisa ngamezwi nezenzo bona ufuna bazizwe bathandwa. UMariya wazizwa atjhaphulukile kangangokuthi wahlala eenyaweni zakaJesu njengomlandelakhe. * UMarta akhenge kumphathe kuhle ukuthi uMariya uhlezi noJesu wazizwa atjhaphulukile ukutjela uJesu indlela azizwa ngayo. Nanyana bebaziditjhele uJesu wakghona ukubasiza bobabili uMariya noMarta. UJesu watjengisa ukuthi unendaba nabodadaba begodu unendaba nomfowabo uLazaru ngokuthi nabo abavakatjhele babodwa. (Jwa. 12:1-3) Akurari ukuthi ngesikhathi uLazaro agulela ukufa, uMariya noMarta bazizwa batjhaphulukile ukufuna isizo kuJesu.—Jwa. 11:3, 5.

7. Singabakhuthaza njani abodadwethu?

⁷ Kabanye abodadwethu, ukuya emihlanganweni kulithuba elihle kibo lokuhlangana nabafowabo nabodadwabo. Yeke sifuna ukusebenzisa ithubeli bona sibamukele, sikhulume nabo begodu sibenze babone ukuthi sinendaba nabo. UJordan, ekhesakhuluma ngaye phambilini uthi, “Kungithabisa khulu lokha abanye nabazitjheja izinto ezihle engizenzako nalokha nabahlela isikhathi sabo bona bazokusebenza nami esimini, nalokha nabenza abangakwenza bona bangitjengise indlela abangithanda ngayo.” Kufuze sibatjele abodadwethu ukuthi baqakatheke kangangani kuthi. UKia uthi, “Ngiyazi ukuthi nange ngingahlala ngingayi esifundweni, abafowethu  bazongithumela umlayezo babuze ukuthi koke kusakhamba kuhle na. Lokho kungenza ngibone ukuthi mbala abafowethu nabodadwethu banendaba nami.”

8. Ngiziphi ezinye iindlela esingalingisa ngazo uJesu?

⁸ Singalingisa isibonelo sakaJesu ngokuthi senze isikhathi sokuba nabafowethu nabodadwethu. Nasele sinabo, kufuze siqinisekise ukuthi esikhuluma ngakho kuyabazuzisa. (Rom. 1:11, 12) Abadala kufuze balingise uJesu. UJesu bekazi ukuthi ukuhlala ungakatjhadi kuneentjhijilo zakho, kodwana wakwenza kwakhanya ukuthi ukutjhada namkha ukuba nabantwana akusizizinto ezingakulethela ithabo. (Luk. 11:27, 28) Kunalokho, ithabo lamambala silifumana ngokwenza umsebenzi kaJehova ngehliziyo epheleleko.—Mat. 19:12.

9. Khuyini abadala abangayenza bona basize abodadwethu?

⁹ Abadala kufuze baphathe abafazi abamaKrestu njengabomma nabodadwabo. (1 Thim. 5:1, 2) Kufuze bazinikela isikhathi sokukhuluma nabodadwethu ngaphambi nangemva kwemihlangano. UKristen uthi, “Omunye umdala webandleni watjheja ukuthi bengimajadu khulu, yeke bekafuna ukuzwisisa ukuthi khuyini ebeyingenza ngibe majadu kangaka. Kwangithabisa ukumbona anendaba nami.” Abadala nabenza isikhathi sokucoca nabodadwethu  lokho kutjengisa ukuthi banendaba nabo. * U-Annette ekhesakhuluma ngaye ekuthomeni uthi, “Kuqakatheke khulu bona abadala bakhulume nathi qobe. Lokho kungenza ukuthi ngibazi ngcono, nabo bangazi. Nakwenzeka ngiqalane nesikhathi esibudisi kuba bulula kimi bona ngikhulume nabo.”

10. Khuyini engenza abodadwethu bazizwe bathandwa?

¹⁰ Soke, amadoda nabafazi, kuyasithabisa lokha abanye nabasitjela ukuthi senza kuhle. Ngakwelinye ihlangothi, nangabe abantu abakuboni okuhle esikwenzako siyadana tle. Udade ongakatjhadi oliphayona ibizo lakhe elingu-Abigail, uyavuma ukuthi ngezinye iinkhathi uzizwa angatjhejwa. Uthi, “Abantu bangazi ngokuthi ngingudadwabo kazibanibanyana namkha ngiyindodakazi yomuntu othileko. Ngezinye iinkhathi ngizizwa ngingabonakali.” Tjheja okwatjhiwo ngudadwethu uPam. Ngesikhathi angakatjhadi bekasithunywa sevangeli iminyaka eminengi. Kwafuze abuyele ekhabo ayokutlhogomela ababelethi bakhe. Njenganje uneminyaka ekhambela kwema-70 kodwana useseliphayona lesikhathi esizeleko. Uthi, “Okwangisiza khulu kukuthi abantu bebangitjele ukuthi bangithanda kangangani.”

11. UJesu watjengisa njani ukuthi ubaqala njengabaqalathekileko abafazi ebebanaye ekonzwenakhe?

¹¹ UJesu walithabela isizo alifumana kibomma abakholwako abamtlhogomela “ngezinto zabo.” (Luk. 8:1-3) Akhenge bathabele lokho kwaphela kodwana wabambulela namaqiniso ayifihlo. Ngokwesibonelo, wabatjela ukuthi bekazokufa begodu avuswe. (Luk. 24:5-8) Njengombana alungiselela abapostoli bakhe walungiselela nabommaba iintjhijilo ebebazokuqalana nazo. (Mar. 9:30-32; 10:32-34) Tjheja ukuthi abapostoli bakaJesu babaleka lokha nakabotjhwako kodwana abanye abomma ebebamsekela bebanaye lokho nakafako esigodweni sokuhlunguphazwa.—Mat. 26:56; Mar. 15:40, 41.

12. Ngiwuphi umsebenzi uJesu awunikela abafazi?

¹² UJesu waphathisa abafazi umsebenzi oqakathekileko. Ngokwesibonelo abafazi abasaba uJehova baba ngebokuthoma ukubona uJesu nakavuswako. Wathi abafazabo kufuze bayokutjela abapostoli bakhe ukuthi sele avusiwe kwabafileko. (Mat. 28:5, 9, 10) Kungenzeka ukuthi ngePentekoste laka-33 esikhathini sakaJesu, abafazi bebakhona lokha nakuthululwa ummoya ocwengileko. Nangabe kunjalo, kungenzeka abodadwethwaba ebesele bazesiwe, nabo bafumana ngokusimangaliso ikghono lokukhuluma amalimi wezinye iintjhaba begodu batjela abanye “Ngezinto ezibabazekako zakaZimu.”—IzE. 1:14; 2:2-4, 11.

13. Abafazi abamaKrestu khuyini abayenzako namhlanjesi begodu khuyini esingayenza bona sibasekele kilokhu abakwenzako?

¹³ Kufuze sibabuke abodadwethu ngalokho abakwenzela uJehova. Imisebenzi abayenzako le, ifaka hlangana ukwakha nokuvuselela imakhiwo, ukusekela iinqhema ezikhuluma amanye amalimi kunye nokusiza emakhiweni yeBethel. Basiza emisebenzini yokuhlangula, basiza nangokutjhugulula iincwadi, abanye baba maphayona begodu abanye babaziinthunywa zevangeli. Njengabafowethu, abodadwethu nabo baya eenkolweni ezihlukahlukeneko ezifaka hlangana isikolo sabatjhumayeli bevangeli lomBuso nesikolo seGiliyadi kunye nesikolo samaphayona. Ngaphezu kwalokho abafazi basiza amadodabo bona bathwale umsebenzi obudisi wokusiza ibandla kunye nehlangano. Abafowethwaba bebangeze bakghone ukusiza ngokuzeleko ‘njengezipho ezibabantu’ ngathana bebangasekelwa bafazi babo. (Efe. 4:8) Kghani  zikhona iindlela ongasekela ngazo abodadwethwaba emsebenzinabo?

14. Ngokwalokho okusemtlolweni weRhubo 68:12 khuyini abadala abatjhejako abayenzako?

¹⁴ Abadala abatjhejako bayazi ukuthi “abafazi abanengi” balibutho leensebenzi begodu kanengi bahlangana nabatjhumayeli beendaba ezimnandi. (Funda amaRhubo 68:12.) Yeke, abadala bayafunda ekuhlakanipheni kwabo. U-Abigail ekhesakhuluma ngaye ekuthomeni, uyathaba abafowethu nabambuza ukuthi khuyini emsizileko, khulukhulu nakuziwa endleleni yokuthoma ukukhuluma nabantu uthi, “Lokhu kungenza ngibone ukuthi nami nginendawo ebandleni lakaJehova.” Ngaphezu kwalokho, abadala bayatjheja ukuthi abodadwethu abakholwako nabahlakaniphileko baqakathekile ekusizeni abodadwethu abasesebatjha bona baqalane neentjhijilo. (Tit. 2:3-5) Yeke kufuze sikuvume ukuthi abodadwethu kufuze sibathokoze ngemisebenzi abayenzako.

15. Kunini lapho abodade abangatlhoga ukusekelwa khona?

¹⁵ Ngasikhathi, abodadwethu bangatlhoga bona kube nomuntu obavikelako, khulukhulu lokha nabaqalene neentjhijilo ezithileko. (Isa. 1:17) Ngokwesibonelo, udade omhlolokazi namkha otlhalwe yindodakhe ngasikhathi angatlhoga bona kube nomuntu omtlhogomelako namkha enze imisebenzi ebeyenziwa indodakwakhe. Udade osele aluphele angatlhoga umuntu bona amkhulumele nakayokubona abodorhodera. Ngasikhathi kungaba nodade oliphayona kodwana abe nezabelo ezinye ekonzweni, angatlhoga bona kube nomuntu omkhulumelako nakungenzeka abanye nabamsola ngokuthi akabi sesimini ngaso soke isikhathi. Ngiyiphi enye indlela esingabasiza ngayo abodadwethu? Akhesibone indlela uJesu ebekenza ngayo.

16. UJesu wamvikela ngayiphi indlela uMariya njengombana kutlolwe kuMarkosi 14:3-9?

¹⁶ UJesu bekamsinyana ekuvikeleni abodadwabo nabangaphathwa kuhle. Ngokwesibonelo, wavikela uMariya ngesikhathi uMarta amsola. (Luk. 10:38-42) UJesu wabuye wavikela uMariya godu ngesikhathi abantu bamsola ngokuthi wenze isiqunto esimbi. (Funda uMarkosi 14:3-9.) UJesu bekazwisisa kuhle ukuthi kubayini uMariya enze into ayenzileko le, wabe wathi, “Ungenzele into ehle. . . .wenze angakwenza.” Wabe waphorofida ukuthi umusakhe kuzokukhulunywa ngayo, “nanyana kukuphi lapho kutjhunyayelwa khona iindaba ezimnandi ephasini loke” njengombana isihlokwesi sisitjho. Kuyinto ehle bona uJesu wathi nakakhuluma ngokutjhunyayelwa ephasini loke, wakuhlanganisa nesenzo esinziwa mfazi lo, sokungazicabangeli yena kwaphela. Amezwi la, amkhuthaza tle uMariya ngemva kokobana ahlulelwa angakazwisiswa.

17. Nikela isibonelo salapho kungatlhogeka khona bona sivikele abodadwethu.

¹⁷ Kuthiwani ngawe? Uyabavikela abodadwenu nakutlhogekako? Ngokwesibonelo, cabanga ngobujamo obulandelako. Abanye abatjhumayeli babona udade osemndenini ohlukeneko ngokwekolo afika lada esifundweni bese akhambe msinyana ngemva kwesifundo, balemuka nokuthi akezi nabantwana bakhe esifundweni. Abatjhumayelaba bayamsola bathi, kubayini angazijameli kubabakwakhe ongakholwako. Kodwana iqiniso kukuthi udade lo wenza koke okusemandlenakhe. Kufuze alindele ubabakwakhe bona amtjele ukuthi khuyini ekufuze ayenze khulukhulu nakuziwa endabeni yabantwana, akanalo ilungelo lokukatelela ukuya nabantwana esifundweni. Khuyini ongayenza? Nawungambuka udadwethu lo, bese utjela abanye ngezinto ezihle azenzako, lokho kungenza abantu bangakhulumi izinto ezimbi ngaye.

18. Ngiziphi ezinye iindlela esingasiza ngazo abodadwethu?

 ¹⁸ Singatjengisa indlela esibathanda ngayo abodadwethu ngokuthi sibasize ngezinto abazitlhogako. (1 Jwa. 3:18) U-Annette otlhogomela ummakhe ogulako uthi, “Abanye ebandleni bayeza bazongiphumuza batlhogomele umma, bese kuthi abanye balethe ukudla. Lokho kungenza ngizizwe ngithanda begodu ngililunga ebandleni.” UJordan naye wafumana isizo, umfowethu wamnikela iinhlongozo zokulungisa ikoloyakhe uthi, “Kumnandi ukwazi ukuthi abafowethu banendaba nami nehlalakuhle yami.”

19. Ngiziphi iindlela ezingeziweko abadala abangasiza ngazo abodadwethu?

¹⁹ Abadala nabo bafuna iindlela abangasiza ngazo abodadwethu. Bayazi ukuthi uJehova unendaba nokuthi babaphatha njani abodadwethu. (Jak. 1:27) Balingisa uJesu endabeni yokuzwisisa, ababeki imithetho lapha ingafuneki khona. (Mat. 15:22-28) Abadala abenza ithuba lokusiza abodadwabo babenza bazizwe bathandwa begodu basekelwa. Umdala osebandleni laboKia wathi nakezwa bona ufudukela kenye indlu, khonokho wahlela bona afumane isizo. UKia uthi, “Lokho kwehlisa umthwalo omkhulu emahlombami. Bangikhuthaza khulu abadala bangisiza nangezinto ebengizitlhoga lokho kwangitjengisa bona nami ngiqakathekile ebandleni begodu angisingedwa kilokhu engiqalene nakho.”

20-21. Singatjengisa njani bona siyabathanda boke abodade abamaKrestu esinabo ebandleni?

²⁰ Nasiqala emabandlenethu namhlanjesi, sibona abodadwethu abanengi, abamaKrestu nabasebenza budisi. Abodadwethwa kufanele sibasekele. Njengombana sifundile esibonelweni sakaJesu, singabasiza ngokuthi senze isikhathi sokuba nabo sibazi ngcono. Singabatjengisa ngokuthi sibathokoze ngakho koke abakwenzela uJehova begodu sibavikele lapho kutlhogeka khona.

²¹ Umpostoli uPowula nakaphetha incwadakhe eya kwebeRoma wakhuluma ngabafazi abamaKrestu watjho amabizwabo. (Rom. 16:1, 3, 6, 12, 13, 15) Siyaqiniseka ngokuthi abafazi abamaKrestwabo kwabakhuthaza ukuzwa amazwi kaPowula nesikhuthazo sakhe. Nathi asenzeni koke esingakwenza bona sisekele abodadwethu esinabo emabandleni. Nasenza njalo, sizabe siyabatjengisa ukuthi siyabathanda begodu siyathokoza ngokuthi babe malunga webandla lethu.