1. Udade nakazokukhetha umuntu azokutjhada naye, ngimiphi imibuzo ekufuze azibuze yona?

WOKE amaKrestu azithoba ngaphasi kwehloko enganasono uJesu Krestu. Nanyana kunjalo, lokha udade omKrestu nakatjhadako, uzozithoba endodenakhe nanyana inesono. Lokhu kungaba sitjhijilo. Yeke, nakacabanga ngomuntu azokutjhada naye, kuzokuba kuhle azibuze imibuzo nasi: ‘Khuyini engiyibona kumfowethu lo engenza ngicabange ukuthi uzokuba yihloko yomndeni engifaneleko? Kghani unendaba nobuhlobo bakhe noZimu? Nakungasinjalo, khuyini engenza ngicabange ukuthi uzokuba yihloko yomndeni ethanda uZimu nasele sitjhadile?’ Kuzokuba kuhle udade azibuze ukuthi: ‘Khuyini engingayenza bona umtjhadwami uphumelele? Kghani ngiyabekezela begodu nginomusa? Kghani nginobuhlobo obuqinileko noJehova?’ (UMtj. 4:9, 12) Udade nakenza iinqunto ezifaneleko ngaphambi kobana atjhade, uzokuthaba khulu ngitjho nalokha sele asemtjhadweni.

2. Sizokucoca ngani esihlokwenesi?

² Iingidigidi zabodadwethu abamaKrestu zibeka isibonelo esihle sokuthobela amadodabo. Kufuze babukwe ngalokho! Kuyasithabisa ukulotjha uJehova kunye nabodadwethu abathembekilekwaba! Esihlokwenesi, sizokuphendula imibuzo emithathu: (1) Ngiziphi iintjhijilo abafazi abaqalana nazo? (2) Kubayini umfazi akhetha ukulalela indodakwakhe? (3) Khuyini amadoda nabafazi abamaKrestu abangayifunda esibonelweni sakaJesu, u-Abigeyili noMariya, omfazi kaJosefa nomma kaJesu?

3. Kubayini imitjhado izokuba nemiraro?

³ Umtjhado usisipho esihle esivela kuZimu kodwana siya  ebantwini abanesono. (1 Jwa. 1:8) Kungebangelo iliZwi lakaZimu lithi abantu abatjhadileko bazokuqalana neentjhijilo ezinengi, iBhayibheli elizihlathulula ngokuthi, ‘lisizi enyameni.’ (1 Kor. 7:28) Tjheja ezinye zeentjhijilo abafazi abangaqalana nazo.

4. Kubayini umfazi angazizwa ngasuthi kumehlisa isithunzi ukuthobela indodakwakhe?

⁴ Kungenzeka umfazi azizwe ngasuthi kumehlisa isithunzi ukuthobela indodakwakhe, lokhu kungabangelwa yindlela akhuliswe ngayo. UMarisol we-United States uthi: “La ngakhulela khona, abafazi bebakhuthazwa ukuthi kufuze balingane namadoda kikho koke. Ngiyazi ukuthi uJehova wenze ilungiselelo lobuhloko bewanikela nabafazi indima ehloniphekileko yokuzithoba. Kubudisi ukukwenza lokho ngebanga lendlela iphasi elicabanga ngayo.”

5. Ngimuphi umbono ongakafaneli abanye abanayo ngendima yomfazi?

⁵ Ngakelinye ihlangothi, kungenzeka umfazi atjhade indoda ekholelwa ukuthi amadoda aqakatheke ukudlula abafazi. Udade ohlala eSouth America ibizo lakhe lingu-Ivon uthi, “La ngihlala khona amadoda adla qangi bese kulandela abafazi. Abantazana abancani kulindeleke ukuthi bapheke bebahlwengise indlu. Abomma nabantazana benzela abasana zoke izinto bebabuye batjelwe nokuthi, ‘bamakhosi ngendlini.’” UYingling udade we-Asia, uthi: “Kunesitjho esiveza umqondo wokuthi abomma akukafuzi bahlakaniphe namtjhana bakghone ukuzenzela izinto. Indimabo kukuthi benze yoke imisebenzi yangendlini kodwana akukafuzi baveze indlela abazizwa ngayo emadodenabo.” Indoda enombono ongatjengisi ithando nongavumelani nalokho okutjhiwo liBhayibheli, yenza kube budisi ngomkayo ukuyithobela, ngokwenza njalo, ibhalelwa kulingisa uJesu begodu ayimthabisi noJehova.—Efe. 5:28, 29; 1 Pit. 3:7.

6. Khuyini abafazi ekufuze bayenze nabazakuqinisa ubuhlobo babo noJehova?

⁶ Njengombana sikhe sayidemba indaba le esihlokweni esigadungileko, uJehova ulindele ukuthi amadoda amaKrestu atlhogomele imindenayo endleleni ezizwa ngayo nangazo zoke izinto ezitlhogekako bekayisize ilotjhe uJehova. (1 Thim. 5:8) Nanyana kunjalo, abodade abatjhadileko kufuze bafunde iliZwi lakaZimu qobe lilanga, bacabangisise ngalo bebakhulume noJehova ngomthandazo. Lokhu kungaba sitjhijilo. Kanengi abafazi bahlala bamajadu, yeke bangazizwa ngasuthi abanaso isikhathi begodu abanawo namandla wokwenza zoke izintwezi, kodwana kufuze bakhumbule ukuthi ukwenza lokhu kuqakathekile. Kubayini kunjalo? Kungombana uJehova ufuna ngamunye wethu abe nobuhlobo obuhle naye.—IzE. 17:27.

7. Khuyini ezokwenza kube lula ngomfazi ukuthi afeze isabelo sakhe?

⁷ Kuzokufuze umfazi asebenze budisi nakazakuthobela indodakwakhe enesono. Nanyana kunjalo, kuzokuba lula khulu ukwenza izabelo uJehova amnikele zona nangabe uzwisisa kuhle bekamukele amabanga asemtlolweni wokuthi kubayini kufuze athobeke.

8. Ngokomtlolo webe-Efesu 5:22-24, kubayini umfazi omKrestu akhetha ukuthobela indodakwakhe?

⁸ Umfazi omKrestu ukhetha ukuthobela indodakwakhe ngoba ngilokho uJehova ambawa ukuthi akwenze. (Funda yebe-Efesu 5:22-24.) Uyamthemba uBabakhe wezulwini ngoba uyazi ukuthi koke akwenzako, ukwenza ngebanga lethando begodu umfunela okuhle.—Dut. 6:24; 1 Jwa. 5:3.

9. Ubayini umphumela lokha umfazi nakathobela indodakwakhe?

 ⁹ Iphasi likhuthaza abafazi ukuthi bangazilaleli iinkambiso zakaZimu bebaziqale ngasuthi zizobehlisa isithunzi. Kazi abantu abakhuthaza izintwezi, abazi ukuthi uZimu ulithando. UJehova angeze anikele abafazi isabelo esizobehlisa isithunzi. Umfazi osebenza budisi ukufeza isabelo uJehova amnikele sona, wenza kube nokuthula emndenini. (Rhu. 119:165) Lokho kuzuzisa yena, indodakwakhe nabantwana.

10. Khuyini esingakufunda kilokho okwatjhiwo nguCarol?

¹⁰ Lokha umfazi nakathobela indodakwakhe enesono, utjengisa ukuthi uthanda uJehova bewuyamhlonipha, okunguye othome ilungiselelo lobuhloko. UCarol weSouth America uthi, “Ngiyazi ukuthi indodakwami izokutjhapha. Ngiyalemuka nokuthi indlela engisabela ngayo nakatjhaphileko, iveza ukuthi ngibuhlonipha kangangani ubuhlobo bami noJehova. Yeke, ngilinga ukuthobeka ngaso soke isikhathi ngombana ngifuna ukuthabisa uBabami wezulwini.”

11. Khuyini esiza udadwethu u-Aneese ukuthi alibalele begodu sifundani kilokho?

¹¹ Kungaba sitjhijilo ngomfazi ukuthobela nokuhlonipha indodakwakhe nangabe uzizwa ngasuthi indodakwakhe ayinandaba nezinto ezimtshwenyako nendlela azizwa ngayo. Tjheja indlela udadwethu u-Aneese aziphatha ngayo nakwenzeka izintwezi. Uthi: “Ngilinga ngamandla ukungambambeli amavunda. Ngiyakhumbula ukuthi nami ngiyayenza imitjhapho. Ngizimisele ukumlibalela njengombana noJehova asilibalela. Lokha nangimlibalelako, ngiba nokuthula komkhumbulo.” (Rhu. 86:5) Kuba lula ngomfazi olibalelako ukuthi athobeke.

12. Ngiziphi iimbonelo esizifumana eBhayibhelini?

¹² Abanye bangacabanga ukuthi umuntu othobekileko uyabogaboga. Umbono loyo awusiliqiniso. IBhayibheli lineembonelo zabantu abanengi ebebathobekile kodwana banesibindi. Tjheja lokho esingakufunda kuJesu, u-Abigeyili noMariya.

13. Kubayini uJesu azithoba kuJehova? Hlathulula.

 ¹³ UJesu uyazithoba kuJehova, kodwana ingasi ngoba akakahlakaniphi namkha akanalwazi. Mumuntu ohlakaniphileko kwaphela ongafundisa ngendlela elula nezwakalako njengoJesu. (Jwa. 7:45, 46) UJehova bekamthemba uJesu kangangokuthi wamvumela ukuthi abe hlanu kwakhe lokha nakadala izulu nephasi. (IzA. 8:30; Heb. 1:2-4) Ngemva kokuvuswa kwakaJesu, uJehova wamnikela “loke ilawulo ezulwini nephasini.” (Mat. 28:18) UJesu uhlakaniphile, nanyana kunjalo uyasibawa isinqophiso kuJehova. Kubayini? Kungoba uyamthanda uBabakhe.—Jwa. 14:31.

14. Khuyini amadoda atjhadileko ayifundako endleleni (a) uJehova aphatha ngayo abafazi? (b) nakulokho okutlolwe kuzAga 31?

¹⁴ Lokho okungafundwa madoda atjhadileko. UJehova akhenge athi abafazi kufuze bazithobe emadodenabo ngebanga lokuthi abakaqakatheki ukudlula amadoda. UJehova usibekele isibonelo esihle endabeni le ngokuthi akhethe abafazi babe hlangana nabantu abayokubusa noJesu ezulwini. (Gal. 3:26-29) UJehova utjengisile ukuthi uyayithemba iNdodanakhe ngokuthi ayinikeze ilawulo. Ngendlela efanako, indoda ehlakaniphileko izomthemba umkayo ngokumnikela ilawulo kezinye zezinto. IliZwi lakaZimu nalikhuluma ngomfazi okhutheleko lithi, ukghona nokwenza irhwebo elizomnikela imadlana yokutlhogomela umndenakhe nepahlakhe. (Funda IzAga 31:15, 16, 18.) Akasilikhobongo elingakwazi ukuveza umbonwalo. Kunalokho, indodakwakhe iyayilalela beyithembe nembonwakhe. (Funda IzAga 31:11, 26, 27.) Lokha indoda nayiphatha umkayo ngehlonipho enjalo, uzokuthabela ukuzithoba ngaphasi kwakhe.

15. Khuyini engafundwa bafazi esibonelweni sakaJesu?

¹⁵ Lokho okungafundwa bafazi. Nanyana uJesu enze izinto ezihle kangaka, akazizwa alahlekelwa sithunzi nakazithoba ebuhlokweni bakaJehova. (1 Kor. 15:28; Flp. 2:5, 6) Ngendlela efanako, nomfazi okhutheleko olandela isibonelo sakaJesu akazizwa alahlekelwa sithunzi ngokuzithoba endodenakhe. Uzokusekela indodakwakhe, ingasi ngokuthi uyayithanda kwaphela kodwana ngebanga lokuthi uthanda bekahloniphe uJehova.

16. Ngokuya ngokweyoku-1 Samyela 25:3, 23-28, ngiziphi iintjhijilo u-Abigeyili aqalana nazo? (Qala isithombe esingaphandle.)

¹⁶ U-Abigeyili bekanendoda ibizo layo kunguNabali. Bekamarhamaru, azikhukhumeza begodu angathokozi. Nanyana kunjalo, lokho akhenge kwenze u-Abigeyili afune ukuphuma emtjhadwenakhe. Bekangavele azithulele, avumele uDavida nebutho lakhe babulale indodakwakhe. Kunalokho, wathatha amagadango wokuvikela uNabali nomndenakhe. Cabanga ngesibindi ebesitlhogeka ku-Abigeyili bona atjhidele phambi kwakaDavida nebutho lamadoda ama-400 begodu ngehlonipho akhulume noDavida. Bekazimisele ukuthi kusolwe yena ngezenzo zakaNabali. (Funda yoku-1 Samyela 25:3, 23-28.) UDavida wavuma khonokho ukuthi uJehova usebenzise umfazi lo ukumnikela iseluleko esamkhandela ekwenzeni umtjhapho omumbi khulu.

17. Khuyini amadoda atjhadileko angayifunda endabeni ka-Abigeyili noDavida?

¹⁷ Lokho amadoda atjhadileko angakufunda. U-Abigeyili bekamfazi ohlakaniphileko. UDavida watjengisa ukuhlakanipha ngokumlalela. Umphumela kwaba kukuthi wabalekela ukuba nomlando weengazi. Ngokufanako, amadoda ahlakaniphileko kufuze  alalele abafazi bawo lokha nakufuze kuthathwe iinqunto eziqakathekileko. Kungenzeka umbonwakhe usize indodakhe ingathathi isiqunto esingakahlakaniphi.

18. Khuyini abafazi abangayifunda esibonelweni saka-Abigeyili?

¹⁸ Lokho abafazi abangakufunda. Umfazi othanda nohlonipha uJehova angadlala indima eqakathekileko emndeninakhe, nanyana indodakwakhe ingamlotjhi uJehova, ingaphili ngeenkambisolawulo zakhe. Angekhe afune amabanga angazwakaliko wokuphuma emtjhadwenakhe. Kunalokho, ngehlonipho nangokuzithoba, uzokulinga ukhuthaza indodakwakhe ukuthi ifunde ngoJehova. (1 Pit. 3:1, 2) Nanyana indodakwakhe ingekhe iqunte ukulotjha uJehova kodwana kuzomthabisa uJehova ukubona ukuthi uyazithoba endodenakhe.

19. Ngibuphi ubujamo la umfazi angekhe ayilalele khona indodakwakhe?

¹⁹ Umfazi omKrestu angeze avuma ukuphula imithetho eseBhayibhelini lokha ubabakwakhe nakambawa enze njalo. Lokho kungenzeka ngokuthi indodakwakhe imbawe ukuthi akhulume amala, ebe namkha enze izinto ezingavumelani nomthetho weBhayibheli. Woke amaKrestu, kuhlanganise nabodadwethu abatjhadileko, kufuze balalele uJehova uZimu. Nange udadwethu ukatelelwa ukuphula umthetho kaJehova kufuze ale, ahlathulule ngommoya ophasi nangomusa ukuthi kubayini angeze enza njalo.—IzE. 5:29.

20. Sazi njani ukuthi uMariya bekanobuhlobo obutjhideleneko noJehova?

²⁰ UMariya bekanobuhlobo obutjhideleneko noJehova. Bekayazi kuhle imitlolo. Nakakhuluma no-Elizabethi, unina lakaJwanisi uMbhabhadisi, uMariya wadzubhula emiTloweni yesiHebheru amahlandla ama-20. (Luk. 1:46-55) Cabanga ngalokhu, nanyana uMariya bekathembisene noJosefa, ingilosi akhenge ivele kuJosefa qangi. Yathoma ngokukhuluma ngokunqophileko noMariya beyamtjela ukuthi uzokubeletha iNdodana kaZimu. (Luk. 1:26-33) UJehova bekamazi kuhle uMariya begodu bekanethemba lokuthi uzoyithanda bekayitlhogomele  iNdodanakhe. Siyaqiniseka ngokuthi uMariya waragela phambili aba nobuhlobo obuhle noJehova ngitjho nangemva kokuhlongakala nokuvuselwa kwakaJesu ezulwini.—IzE. 1:14.

21. Khuyini amadoda angayifunda kilokho iBhayibheli elikutjhoko ngoMariya?

²¹ Lokho amadoda atjhadileko angakufunda. Indoda ehlakaniphileko iyathaba lokha nayazi ukuthi umfazayo uyazi kuhle imiTlolo. Ayimsilingekeli, icabange ukuthi ufuna ukuzenza ihloko yomndeni. Iyatjheja ukuthi umkayo uzizwisisa kuhle iinkambisolawulo zeBhayibheli nokuthi lokho kungaba lisizo emndeninayo. Iye khona, nanyana umfazi ayazi kuhle imitlolo ukudlula indodakwakhe, kusesemthwalo wendoda ukudosa phambili emndeninayo, awusize ulotjhe uJehova.—Efe. 6:4.

22. Khuyini abafazi abangayifunda kuMariya?

²² Lokho abafazi abangakufunda. Umfazi kufuze azithobe endodenakhe kodwana akhumbule ukuthi unomthwalo wokwakha ubuhlobo bakhe noZimu. (Gal. 6:5) Lokho uzokwenza ngokuthi abe nesikhathi sokufunda iliZwi lakaZimu bekazindle ngalokho akufundako. Ukwenza njalo kuzomsiza aqinise ithando lakhe nehlonipho anayo ngoJehova bekathabele ukuzithoba endodenakhe.

23. Abafazi abathembekileko bayisiza njani imindenabo kunye nebandla?

²³ Abafazi abathobela amadodabo ngebanga lokuthanda uJehova bafumana ithabo nokwaneliseka ukudlula labo abangalihloniphi ilungiselelo lakaJehova lobuhloko. Babekela amadoda amatjha nabafazi abasesebatjha isibonelo esihle. Bathuthukisa ithabo nokuthula ebandleni nemndenini. (Tit. 2:3-5) Namhlanjesi banengi abafazi abathembekileko abalotjha uJehova ngokuthembeka. (Rhu. 68:11) Soke ebandleni sinendima eqakathekileko, kungaba mfazi namkha indoda. Esihlokweni esilandelako sizokucoca ngokuthi singayidlala njani indimethu ebandleni.