Msinyana, lokha urhulumende kaZimu wezulwini uthoma ukubusa boke abantu, iphasi lizokuba yindawo ethabisako lapho abantu bazokuphilisana ndawonye benze umsebenzi omuhle nowanelisako. UZimu ubeke uJesu Krestu bona abuse iphasi. Namhlanjesi ababusi abanengi abanandaba nabantu, uJesu uhlukile ngombana uzokuhlala enzela abantu izinto ezihle. Umbuswakhe uzokusekelwa ethandweni begodu uzokuba yiKosi enomusa, enezwelo nephatha abantu ngokulingana.—Isaya 11:4.

Ephasini elitjha abantu angekhe bahlukaniswe ngobutjhaba namkha ngokuthi bavelaphi. Abantu bazokuba yinyanda yinye. (IsAmbulo 7:9, 10) Boke abantu abahlala ephasini bazokuthanda uZimu, bathande abomakhelwanabo begodu basebenzisane ngokuthula bona bazalise ihloso kaZimu yekuthomeni yokutlhogomela ikhaya labo, iphasi.—IRhubo 115:16.

UmBuso kaZimu nawuthoma ukubusa iphasi, uMbumbi uzokulawula ngokupheleleko ubujamo bezulu, aqinisekise ukuthi buyalawuleka. (IRhubo 24:1, 2) Ngesikhathi asephasini, uJesu wasitjengisa kancani amandla uZimu amnikele wona, ngesikhathi athulisa isiwuruwuru esithusako ngokukhuluma nje kwaphela. (Markosi 4:39, 41) Ngaphasi kokubuswa nguKrestu, akunamuntu ozokuba nebanga lokusaba iinhlekelele zemvelo. UmBuso kaZimu uzokubuyisela ukuthula phakathi kwebhoduluko nabantu.—Hosiya 2:18.

Woke umuntu uzokuthabela ukuphila okunganakugula. Akunamuntu ozokugula begodu aguge namkha afe. (Isaya 35:5, 6) Abantu bazokuhlala endaweni ehle nehlwengekileko efana nendawo abatjhadikazi bokuthoma ebebahlala kiyo esimini ye-Edeni. Ephasini elitjha njengesimini ye-Edeni, ihlabathi izokukhiqiza ukudla okunengi begodu boke abantu abahlala ephasini bazokuba nokudla okunengi. (Genesisi 2:9) Boke abantu ePharadesi ‘bazokudla ukudla kwabo basuthe,’ njengesitjhaba sakaZimu u-Israyeli wekadeni.—Levitikusi 26:4, 5.

Ngaphasi kwakarhulumende kaZimu ozokubusa iphasi loke, boke abantu bazokuthabela ukuthula begodu baphathane ngomusa nangokulingana. Angekhe kusaba nezipi, ukusetjenziswa kumbi kwamandla angekhe kusaba khona begodu angekhe kusatlhogeka bona abantu basebenze budisi bona bafumane izinto abazitlhogako. IBhayibheli lithembisa ukuthi: “Woke umuntu uzazigedla ngaphasi kwesidiribe sakhe, nanyana ngaphasi komuthakhe wamakhiwani. Yeke akunamuntu ozabethusa.”—Mikha 4:3, 4.

Woke umuntu uzokuba nendawo yokuhlala ngaphandle kokusaba ukuthathelwa yona, begodu woke umsebenzi esiwenzako uzokwanelisa njengombana iBhayibheli litjho, labo abazokuhlala ephasini elitjha lakaZimu “abazukujulukela ilize.”—Isaya 65:21-23.

IBhayibheli lithembisa ukuthi: “iphasi lizakuzala ilwazi” lakaJehova. (Isaya 11:9) Abantu abazokuphila ngaphasi komBuso kaZimu bazokufunda ukuhlakanipha okungapheliko koMbumbawo uJehova, nangezinto ezihle azibumbileko. Angekhe basebenzise ilwazi labo bona benze iinkhali namkha ukulimaza abanye abantu. (Isaya 2:4) Kunalokho, bazokufunda ukuphilisana ngokuthula nabanye nokuthi bangalitlhogomela njani iphasi.—IRhubo 37:11.

UZimu wathatha isikhathi bona asilungiselele kuhle iphasi bona sithabele ukuphila ngokuzeleko qobe langa. Ufuna abantu baphile ephasini ngokungapheliko. (IRhubo 37:29; Isaya 45:18) Bona azalise ihloswakhe yekuthomeni, uZimu “uzakuqeda ukufa unomphela.” (Isaya 25:8) IBhayibheli lithembisa ukuthi, “ukufa angekhe kusaba khona, ngitjho nokulila nobuhlungu angekhe kusaba khona.” (IsAmbulo 21:4) UZimu uzokunikela boke abantu azobasindisa ithuba lokuphila ngokungapheliko nakatjhabalalisa iphasi elimbeli begodu uzokuvusa abantu abanengi abahlongakeleko ephasini elitjha elizako.—Jwanisi 5:28, 29; IzEnzo 24:15.

 Sikhuluma nje, iingidi zabantu ephasini loke zizilungiselela ukuphila ngaphasi komBuso kaZimu otjhideleko. Nanyana banesono, bayalinga ukuba babantu uZimu abafunako ephasini lakhe elitjha. Njani? Ngokufunda ngoJehova uZimu nangaloyo amthumileko, uJesu Krestu.—Jwanisi 17:3.

Fumana ukuthi ungasinda njani nakuphela iphaseli begodu uphile ephasini elingcono elitjhideleko. Yamukela isifundo seBhayibheli sasimahla komunye waboFakazi bakaJehova.