1. Kubayini ukuvuma kuqakathekile?

OMUNYE umtloli weengoma odumileko wathi: “Amagama enza abantu bacabange. Bese kuthi umvumo wona ubenza bathabe namkha badane.” Umvumo nawenza abantu bacabange bebazizwe ngendlela ethileko, kutjho khona bona kuthabisa khulu-ke ukuvuma iingoma zokudumisa uJehova uBabethu wezulwini. Kungebangelo ukuvuma bekusolo kuqakathekile nasilotjha uZimu ngeqiniso, kungakhathaliseki bona umuntu ubhina ayedwa namkha ubhina ebandleni anabantu bakaZimu.

2, 3. (a) Abanye bangazizwa njani ngokubhinela phezulu esifundweni? (b) Ngimiphi imibuzo ezokuphendulwa esihlokwenesi?

² Uzizwa njani ngokuvumela phezulu ebandleni? Kghani ubulawa ziinhloni? Phela kwezinye iindawo amadoda angeze athoma avumela phezulu phambi kwabantu. Imicabango efana nale ingalilimaza ibandla, khulukhulu nangabe abadala nabo badosa iinyawo endabeni yokuvuma namkha nakufuze kuvunywe babe phasiphezulu ngezinye izinto zebandla.—Rhu. 30:12.

³ Nange sihlala sikhumbula ukuthi ukuvuma ngenye yeendlela esilotjha ngazo uJehova, angeze sathi nakuvunywako siphume namkha sifike sekuvunyiwe esifundweni nemhlanganweni. Yeke soke akhesizibuzeni umbuzo naku: ‘Ngikuqala njani ukubhina esifundweni? Yini engangisiza bona ngihlule nanyana yini  engangithiya bona ngibhine ngethabo? Begodu yini engangisiza ngivume ngokusuka ehliziyweni?’

4, 5. Ngimaphi amahlelo wombhino enziwa ngesikhathi sama-Israyeli?

⁴ Kusukela kade abantu bakaJehova bebawusebenzisa umvumo nabadumisa uJehova. Ama-Israyeli nange alotjha uJehova ngehliziyo yoke, bewalemuka bona ukubhina kuqakathekile. Isibonelo salokho kungesikhathi iKosi uDavida nayilungiselela ukunikezelwa kwethempeli, yahlela amaLevi azii-4 000 bona azokubhina iingoma zokudumisa. Phakathi kwawo bekunawama-288 ‘ebewabanduliwe begodu anekghono lokukhalelela uZimu.’—1 Kron. 23:5; 25:7.

⁵ Nakunikezelwa ithempeli, ukuvuma kwadlala indima eqakatheke khulu. IBhayibheli lithi: ‘Ababethi beemporompita nabakhaleIi bekufuze badumise begodu bathokoze uJehova ngelizwi linye, . . . ithempeli lakaZimu lazala swi ngephazimulo [“kaJehova, NW”].’ Kwamambala ama-Israyeli aqina tle ekukholweni!—2 Kron. 5:13, 14; 7:6.

6. Akhusitjele ngomnyanya owahlelwa nguNerhemiya ngesikhathi amphathi weJerusalema.

⁶ Ngesikhathi uNerhemiya arhola ama-Israyeli bona kuvuselelwe iJerusalema, akhange awutjhiye umvumo, phela wahlela namaLevi azokubhina. Kwathi nangesikhathi imithangala le inikezelwa, wahlela umbhino okhethekileko, maye uthi abantu bathaba na. Begodu “iinqhema zombili zabadumisi” nazo bezikhona. Iinqhemezi bezibhina ezinye zitjhinge le kube ngapha ezinye zitjhinga le, bese zihlangane emthangaleni ohlanu kwethempeli ukwenzela bona umbhino wazo uzwakale ngitjho nakude. (Nerh. 12:27, 28, 31, 38, 40, 43) UJehova wathaba khulu ukuzwa abakhulekeli bakhe bamdumisa ngeengoma!

7. UJesu wakuveza njani ukuthi umbhino uqakatheke khulu emaKrestwini?

⁷ Kwathi nanyana kuthoma amabandla wobuKrestu, umbhino wasolo uyingcenye eqakathekileko yokulotjha uZimu ngeqiniso. Nangobusuku bamaswaphela bakaJesu ephasini, wathi nakaqeda ukujamisa isiDlo seKosi saNtambama baphetha ngokubhina ingoma yokudumisa.—Funda uMatewu 26:30.

8. AmaKrestu wangesikhathi sabapostoli bewasihlela njani isikhathi sokubhina?

⁸ NamaKrestu wangesikhathi sabapostoli nawo bese akwenze umkhuba ukuhlangana abhine. Ngitjho nanyana bewahlangana emizini yabafowabo, akhenge avumele litho liwaqede amandla ngokubhina. UPowula wathi: “Fundisanani beniyalane ngakho koke ukuhlakanipha; vumelani uZimu amarhubo, iingoma kanye nomvumo wokukholwa ngokuthokoza eenhliziyweni zenu.” (Kol. 3:16) Yeke iingoma zethu ‘zimvumo wokukholwa, [okufuze sizivume] ngokuthokoza.’ Nazo sizibala nokudla esikulungiselelwa ‘yinceku ethembekileko nehlakaniphileko.’—Mat. 24:45.

9. (a) Yini engakhandela abanye bona bangabhini esifundweni nemhlanganweni? (b) Kufuze simvumele njani uJehova, begodu bobani okufuze badose phambili endabeni le? (Qala isithombe esisekuthomeni.)

⁹ Ithiwani-ke nange ukubhina kungakajayeleki emndeninakho namkha emphakathini? Namhlanjesi itheknoloji ithuthuke khulu, yeke lokho kungakwenza kube bulula ukulalela umbhino ophuma phambili. Ngasikhathi kungakwenza uphathwe ziinhloni nawumadanisa iphimbo lakho nelabantu ovane ubezwe babhina. Ungakuvumeli lokho  kukuqede amandla, kukwenze ungasafuni ukubhinela uJehova. Kodwana vele uthathe incwadakho yokubhina uyiphathele phezulu, ungaqali phasi, lokho kuzokusiza bona uvume ngokusuka ehliziyweni. (Ezr. 3:11; funda iRhubo 147:1.) EmaWolweni womBuso amanengi amagama weengoma avela esikrinini, lokho kusiza abafowethu bona bavumele phezulu. Abadala nabaya esiKolweni sabo sebayafundiswa nangombhino. Lokho kwenzelwe ukuthi bakghone ukudosa phambili ekubhineni.

10. Yini okufuze siyikhumbule nasizizwa siba nevalo ngokubhina?

¹⁰ Enye yezinto ezenza inengi lingabhini, kusaba. Lisaba ukuthi lizakubhimba namkha lizakutlabalasa. Nasiza endabeni yokukhuluma, iBhayibheli lithi: ‘Soke sineemphoso ezinengi.’ (Jak. 3:2) Kodwana lokho akusenzi bona silise ukukhuluma ngoba batjho sisaba ukwenza iimphoso. Kuyafana-ke nendabeni yokubhina, akukafuzi silise ukubhina ngebanga lomraro wamaphimbo.

11, 12. Ngiziphi ezinye iindlela ezingasisiza sithuthukise indlela esibhina ngayo?

¹¹ Okhunye okungasenza singakuthandisisi ukubhina kungazi ukuthi kufuze sibhine njani. Yeke nawufuna ukuthuthukisa indlela obhina ngayo qala umtlolo waphasi. *

¹² Nawungafunda ukuphefumula kuhle nawubhinako kungakwenza ubhine kamnandi begodu uvumele phezulu. Njengombana negezi yenza ilampa likhanye, ukuphefumula kuhle lokha nawubhinako kungakwenza uvume kamnandi. Kufuze ubhinele phezulu kangangani? Ngendlela okhuluma ngayo namkha uphakamise iphimbo khudlwana. (Funda iindlela zokuthuthukisa ezifumaneka encwadini ethi Zuza Emfundweni YeSikole Senkonzo Esingokwasezulwini, amakhasi 181 kuya 184 ngaphasi  kwesihloko esithi “Phefumula Ngendlela Efanele.”) IBhayibheli lithi abakhulekeli bakaJehova kufuze ‘bamrhubele bahlokome.’—Rhu. 33:1-3.

13. Akhusihlathululele bona yini engasisiza sifunde ukubhina kamnandi.

¹³ Ekukhulekeleni komndeni namkha nawuwedwa phrakthiza iingomezi. Ungakwenza njani lokho? Naku ongakwenza: Khetha iingoma ozithandako. Bese ufunda amezwi wazo, uwafundele phezulu, ungabi nevalo. Ngemva kwalokho, dosa ummoya kanye bese ufunde umutjho munye. Bese uyawubhina umutjho loyo, uwubhinele phezulu. (Isa. 24:14) Okuhle kukuthi ngokukhamba kwesikhathi uzokufunda ukubhina kamnandi. Ungathomi ube neenhloni namkha ube nevalo!

14. (a) Ukuvula umlomo ngokwaneleko nasibhinako kungasisiza njani? (Funda ibhoksi elithi, “ Indlela Yokulithuthukisa.”) (b)Ngiziphi iimphakamiso ocabanga bona zingakusiza endabeni yokubhina?

¹⁴ Nawuzakubhina kuhle, kufuze uqiniseke bona akunalitho elingakuphazamisa ngemlonyeni. Ongakwenza kuvula umlomakho ngokwaneleko, njengalokha nawukhulumako. Alo ithiwani-ke nange uzizwa ngasuthi iphimbo lakho lincani khulu namkha ukhulumela phezulu khulu? Okhunye okungakusiza kufunda incwadi ethi, Zuza Emfundweni YeSikole Senkonzo Esingokwasezulwini, ikhasi 184, ebhoksini elithi “Ukunqoba Izinkinga Ezikhethekile..”

15. (a) Emhlanganweni wethu waqobe mnyaka wango-2016 kwenziwa siphi isaziso? (b) Ngiziphi izinto ezifakiweko eculweni elitjha?

¹⁵ Emhlanganweni waqobe mnyaka wango-2016 we-Watch Tower Bible and Tract Society of Pennsylvania uMfowethu uStephen Lett olilunga lesiHlopha esiBusako watjhaphulula iculo elitjha lokubhina, elinesihloko esithi “Bhinelani UJehova Ngethabo”, watjho ukuthi kungasikade sizabe siyisebenzisa emihlanganweni yethu. UMfowethu uStephen Lett watjho ukuthi kubayini kwenziwe iculo elitjha, wathi bebafuna bona likhambisane neBhayibheli etjha esanda  ukutjhatjhululwa i-New World Translation of the Holy Scriptures. Lokhu bekuhlanganisa ukukhipha amagama namkha imitjho engasekho eBhayibhelini i-New World Translation eyagadangiswa ngo-2013 ebuyekeziweko. Kwafakwa iingoma ezikhuluma ngomsebenzethu wokutjhumayela, ezinye zitjengisa indlela esithokoza ngayo ngesihlengo. Begodu ngebanga lokuthi ukubhina kuqakatheke khulu ekukhulekeleni kwethu, isiHlopha esiBusako besinqophe ukukhipha iculo elisezingeni eliphezulu khulu, begodu nomhlobiso walo ukhambisane neBhayibheli etjhugululwe ngobutjha le i-New World Translation.

16, 17. Ngimaphi amatjhuguluko enziweko eculweni lethu elitjha?

¹⁶ Kuzokuba bulula ukusebenzisa iculo elitjheli elinesihloko esithi, “Bhinelani UJehova Ngethabo”, iingoma zihlelwe ngalokho ezikhuluma ngakho. Ngokwesibonelo, iingoma zokuthoma ezili-12 zikhuluma ngoJehova, ezibu-8 zikhuluma ngoJesu nangesihlengo. Ekuthomeni kunekhasi elithi “Iingoma Ezikhuluma” ikhaseli lizokuba lisizo khulu, ngokwesibonelo abafowethu nabafuna ukukhetha iingoma mhlamunye zekulumo yenengi bangaqala kilo.

¹⁷ Amanye amagama abuyekeziwe, kwakhitjhwa nangasasetjenziswa, ukwenzela bona woke umuntu abhine ngokukhambisana nemiTlolo. Ngokwesibonelo, ngesiNgisi bekusetjenziswa igama elithi “shall,” yeke ngebanga lokuthi alisasetjenziswa khulu namhlanjesi, likhitjhiwe. Kwenziwa okufanako nemagameni anjengelithi “Long-Suffering” kwafakwa elithi “Exercise Patience.” Bese elithi “Guard Your Heart” lakhitjhwa kwafakwa elithi “We Guard Our Hearts,” yeke nje sicabangela woke umuntu ngokuthi nathi sizifake. Okhunye godu kukuthi nasisemihlanganweni emikhulu nemincani, kuba nabantu abanengi abasivakatjhelako nabantu abatjha. Kungebangelo amanye amagama neenhloko kubuyekeziwe.

18. Kubayini kuqakathekile ukuthi sijayele iingoma eziseculweni lethu elitjha? (Qala umtlolo waphasi.)

¹⁸ Ezinengi zeengoma eziseculweni lethu elinesihloko esithi “Bhinelani UJehova Ngethabo” , zibekeke samthandazo. Yeke iingomezi zenza bona sivumele uJehova ngokusuka ehliziyweni, sivume ngemizwa. Bese ezinye iingoma zisirhelebha bona ‘sikhuthazane ethandweni nemisebenzini emihle.’ (Heb. 10:24) Asingabazi bona soke siyafuna ukuzijayela iingoma zethwezi, sijayele ngitjho namezwazo. Zikhona ezirekhodiweko ku-jw.org, yeke kungaba kuhle sizilalele. Nawungaziprakthiza ngitjho nalokha usekhaya, kuzokuba bulula khulu ukuzivuma ngesibindi nangokusuka ehliziyweni nawusemihlanganweni. *

19. Soke singamlotjha njani uJehova ebandleni?

¹⁹ Soke sesiyazi ukuthi ukubhina kuqakatheke khulu nasilotjha uZimu. Ngenye yendlela esingatjengisa ngayo uJehova ukuthi simthanda kangangani. (Funda u-Isaya 12:5.) Ungalibali ukuthi nange ubhinela phezulu nangethabo, uzokukhuthaza nabanye bona benze soneso. Soke ebandleni kungakhathaliseki bona sibatjha, sibadala namkha sisanda ukuba boFakazi singaba nesandla endleleni yokulotjha uJehova le. Yeke ungathomi uvilaphele ukubhina! Kunokuthi wenze njalo, lalela amezwi womrhubi owathi: ‘Vumela [“uJehova, NW”] ingoma etja!’ Kwanga ungabhina ngethabo!—Rhu. 96:1.