“Ungasami Ngelwazi Lakho”
“Ungasami Ngelwazi Lakho”
“Thembela kuJehova ngayo yoke ihliziyo yakho, ungasami ngelwazi lakho.”—IZIY. 3:5.
1, 2. (a) Ngibuphi ubujamo esingaqalana nabo? (b) Nesiqalene nokugandeleleka, senza isiqunto, namtjhana silwisana nesilingo, ngubani ekufuze sithembele kuye begodu kubayini?
UMQATJHI kaCynthia * besele avale ezinye iingcenye zekampani yakhe begodu aqothe nezimbalwa zeensebenzi zakhe. UCynthia unamazizo wokobana uzokuba ngolandelako ukuphelelwa msebenzi. Uzokwenzani nekangaphelelwa msebenzi? Uzozibhadela njani iindleko zakhe? UPamela, udade omKrestu ufuna ukuthuthela endaweni enetlhogeko ekulu yabarhuweleli boMbuso, kodwana kufanele na? Isokana ekuthiwa nguSamuel litshwenyeka ngokhunye okuhlukileko. Nekasesemcani wabukela iinthombe zomseme ezisilapheleko. Njengombana nje sekasemnyakeni yama-20, uqalene nesilingo esinamandla sokubuyela emukghweni loyo. Angalwisana njani naso?
2 Ngubani othembela kuye newuqalene nobujamo obugandelelako, newenza iinqunto eziqakathekileko, namtjhana ulwisana neenlingo? Uthembela kuwe kwaphela, namtjhana ‘uphosa umthwalwakho phezu kwakaJehova’? (Rha. 55:22) IBhayibhili ithi, “Amehlo kaJehova aqale abalungileko, begodu iindlebe zakhe zizwa ukulilela kwabo isizo.” (Rha. 34:15) Ngalokho, qala bona kuqakatheke kangangani bona sithembe uJehova ngayo yoke ihliziyo yethu begodu singasami elwazini lethu!—Iziy. 3:5.
3. (a) Kubandakanyani ukuthembela kuJehova? (b) Kubayini abanye bangatjhigamela ekusameni ngelwazi labo?
3 Ukuthembela kuJehova ngehliziyo epheleleko kubandakanya ukwenza izinto ngendlela yakhe, ngokuvumelana nentando yakhe. Okuqakatheke khulu ekwenzeni lokho kuhlala sitjhidela kuye ngomthandazo sibawa isinqophiso sakhe ngokusuka ehliziyweni. Nokho, ukuthembela kuJehova ngokupheleleko kusitjhijilo kwabanengi. Ngokwesibonelo, udade omKrestu ekuthiwa nguLynn uyavuma, “Ukufunda ukuthemba uJehova ngokupheleleko kube mzabalazo ongapheliko kimi.” Kubayini? Uthi, “Zange ngibe nobuhlobo obutjhideleneko nobaba, begodu umma bekangandaba nami ngokwamazizo nangokwenyama. Ngalokho ngakufunda msinyana ukuzitlhogomela.” Isizinda sakaLynn sikwenza kube budisi kuye ukuthemba nanyana ngubani ngokuzeleko. Godu ikghono nepumelelo umuntu abe nayo kungambangela bona azithembe. Athembela kokuhlangabezenwe nakho kwakhe, umdala angathoma ukutlhogomela iindaba zebandla ngaphandle kokutjhidela kuZimu ngomthandazo.
4. Sizokufunda ngani esihlokwenesi?
4 UJehova ulindele bona senze umzamo wamambala wokuphila ngokuvumelana neemthandazwethu begodu senze ngokuvumelana nentando yakhe. Ngalokho, singalinganisela njani hlangana kokuphosela okusitshwenyako kuye nokwenza umzamo womuntu mathupha wokurarulula iimraro ebudisi? Nekuziwa ekwenzeni iinqunto, khuyini ekufuze siyiyelele? Kubayini umthandazo uqakathekile nesilinga ukulwisana neenlingo? Sizokuphendula iimbuzo le ngokucabangela iimbonelo eziseMtlolweni.
Nesigandelelekileko
5, 6. Wasabela njani uHezekiya nekasongelwa yikosi ye-Asiriya?
5 Malungana neKosi yakwaJuda uHezekiya iBhayibhili ithi: “Waragela phambili akakarele kuJehova. Khenge aphambuke ekumlandeleni, kodwana waragela phambili enza iimlayo uJehova ebekayiyale uMosisi.” Kwamambala, ‘wathembela kuJehova uZimu ka-Israyeli.’ (2 Kho. 18:5, 6) UHezekiya wasabela njani iKosi uSaniheribhi neyithumela abajameli bayo—kuhlanganise noRabishake—eJerusalema bakhamba nebutho lezepi elikhulu? Ibutho le-Asiriya elinamandla besele lithumbe imizi yakwaJuda evikelekileko eemnengi, begodu uSaniheribhi besele aliqale ngelihlo lokutheza iJerusalema. UHezekiya waya endlini kaJehova wathandaza: “Jehova Zimethu, sibawa usiphuluse esandleni sakhe, bona yoke iimbuso yephasi yazi bona wena, Jehova, unguZimu wedwa.”—2 Kho. 19:14-19.
6 UHezekiya wenza ngokuvumelana nomthandazo wakhe. Ngitjho nangaphambi kobana aye etempelini ayokuthandaza, watjela abantu bona bangaphenduli ekunyefuleni kwakaRabishake. Godu uHezekiya wathuma iinthunywa ku-Isaya umporofidi, afuna isiluleko sakhe. (2 Kho. 18:36; 19:1, 2) UHezekiya wathatha woke amagadango ebekufuze awathathe. Esenzakalwenesi, zange alinge ukuzifumanela isisombululo esingavumelani nentando kaJehova ngokufuna isekelo eGibhide namtjhana eentjhabeni ezibomakhelwana. Esikhundleni sokusama elwazini lakhe, uHezekiya wathembela kuJehova. Ngemva kobana ingilozi kaJehova ibulele amadoda kaSaniheribhi azi-185 000, uSaniheribhi “wasuka” wabuyela eNiniva.—2 Kho. 19:35, 36.
7. Ngiyiphi induduzo esingayifumana emthandazweni kaHana newakaJona?
7 UHana, umfazi wendoda emLefi u-Elkana, naye wathembela kuJehova nekagadelelekileko ngombana bekayinyumba. (1 Sam. 1:9-11, 18) Umporofidi uJona waphuluswa emathunjini wefesi ekulu ngemva kobana athandaze wathi: “Ngabiza uJehova ngisekugandelelekeni kwami, wangiphendula. Ngingemathunjini weShiyoli, ngalilela isizo. Wena walizwa ilizwi lami.” (Jona 2:1, 2, 10) Qala bona kutjhiriya kangangani ukwazi bona kungakhathaliseki bona ubujamo bethu bumbi kangangani, singabiza uJehova ‘ngesibawo somusa’!—Funda iRhalani 55:1, 16.
8, 9. Ngikuphi ukutshwenyeka okwavezwa emthandazweni kaHezekiya, uHana, noJona, begodu singafundani kilokho?
8 Isibonelo esibekwe nguHezekiya, uHana, noJona godu sisifundisa isifundo esiqakathekileko malungana nalokho ekufuze sihlale sikukhumbula njengombana sithandaza singaphasi kobujamo obugandelelako. Bobathathu bezwa ubuhlungu ngokwamazizo nebasebujamweni obubudisi. Nokho, iimthandazwabo itjengisa bona bebangakatshwenyeki ngabo nokufumana ipumuzo emirarwenabo kwaphela. Ibizo lakaZimu, ukukhulekela kwakhe, nokwenza intando yakhe bekuzizinto eziqakatheke khulu kibo. UHezekiya bekezwa ubuhlungu ngokuhlanjalazwa kwebizo lakaJehova. UHana wathembisa ukunikela ngayo kanye indodana ebekafisa kangaka ukuba nayo bona iyokukhonza etabarnakele eShilo. UJona wathi: “Engikufungileko, ngizokwenza.”—Jona 2:9.
9 Nesithandazela ukuphuluswa ebujamweni obubudisi, kukuhlakanipha ukuhlolisisa iinhloso zethu. Sitshwenyeka kwaphela ngokufumana ipumuzo emrarweni, namtjhana sihlala sikhumbula uJehova nomnqophwakhe? Ukutlhaga komuntu mathupha kungenza bona kube lula ukudzimelela ebujamweni bethu kangangobana kufiphaze ukutshwenyeka kwethu ngezinto ezingokomoya. Nesithandazela isizo kuZimu, asidzimelelise imikhumbulwethu kuJehova, ukucwengiswa kwebizo lakhe, nokulwelwa kobukhosi bakhe. Ukwenza lokho kungasisiza bona sihlale sinombono ofaneleko ngitjho nanyana isisombululo ebesinethemba lokusifumana singaveli. Ipendulo yeemthandazwethu kungaba kukobana sitlhoga ukukghodlhelela ubujamo ngesizo lakaZimu.—Funda u-Isaya 40:29; KwebeFilipi 4:13.
Nesenza Iinqunto
10, 11. Wenzani uJehoshafati nekaqalene nobujamo obamenza wangazi bona kufuze enzeni?
10 Uzenza njani iinqunto eziqakathekileko ekuphileni? Uyaqunta mantazi bese ubawa uJehova abusise isiqunto osenzileko? Cabanga ngalokho uJehoshafati, ikosi yakwaJuda, akwenza lokha ihlanganisela yamabutho wakwaMowabi newakwa-Amoni izokulwa naye. UJuda bengeze akwazi ukujamelana nawo. UJehoshafati bekazokuthatha liphi igadango?
11 IBhayibhili ithi, “UJehoshafati wasaba, wazimisela bona afune uJehova.” Wamemezela ukuzila kilo loke lakwaJuda begodu wabuthelela abantu ndawonye “bona babuze kuJehova.” Ngemva kwalokho wasikima ehlanganweni yakwaJuda neyeJerusalema wathandaza. Ngokwengcenye warabhela wathi: “Zimethu angekhe ubahlulele na? Ngombana asinawo amandla phambi kwesiqubuthu esikhulwesi esiza bona sizokulwa nathi, begodu thina ngokwethu asazi bona yini okufuze siyenze, kodwana amehlwethu aqale kuwe.” UZimu weqiniso wawuzwa umthandazo kaJehoshafati wabaphulusa ngokusimangaliso. (2 Mil. 20:3-12, 17) Nesenza iinqunto, khulukhulu lezo ezingathinta ingokomoya lethu, akukafaneli na sithembele kuJehova kunokusama ngelwazi lethu?
12, 13. IKosi uDavidi yabeka siphi isibonelo ekwenzeni iinqunto?
12 Kufuze senzeni nasiqalene nobujamo okungabonakala kubulula ukuburarulula—mhlamunye ngombana okuhlangabezanwe nakho kwesikhathi esidlulileko kusenza sicabange isisombululo msinyana? Ukulandisa okubandakanya iKosi uDavidi kunikela ilemuko endabeni le. Ama-Amaleki nekathumba umuzi weZikilagi, athatha abafazi nabantwana bakaDavidi kuhlanganise nebamadoda egade anaye. UDavidi wabuza uJehova wathi: “Ngisilandele isiqhema sabathumbesi?” UJehova waphendula: “Silandele, ngombana ngokuqinisekileko, uzobafumana begodu ngokuqinisekileko uzokwenza iphuluso.” UDavidi wenza ngokuvumelana nalokho, “begodu waphulusa koke ebekuthathwe ma-Amaleki.”—1 Sam. 30:7-9, 18-20.
13 Isikhathi esithileko ngemva kokuphanga kwama-Amaleki, amaFilisti eza azokulwa no-Israyeli. Godu uDavidi wabuza uJehova wafumana ipendulo ekhanyako. UZimu wathi: “Khamba, ngombana ngokuqinisekileko amaFilisti ngizowanikela ezandleni zakho.” (2 Sam. 5:18, 19) Msinyana ngemva kwalokho, amaFilisti abuya godu azokulwa noDavidi. UDavidi bekazothatha liphi igadango nje? Bekangathi: ‘Sengiqalane nobujamo obunjengalobu kabili ngaphambili. Angikhuphuke ngiyokulwa namanaba kaZimu, njengombana ngenza ngaphambilini.’ Namtjhana bekazokufuna isinqophiso sakaJehova? UDavidi zange athembele kokuhlangabezanwe nakho kwakhe. Godu waya kuJehova ngomthandazo. Qala bona kungenzeka wathaba kangangani ngokwenza lokho! Wafumana iinqophiso ezihlukileko ngesikhatheso. (2 Sam. 5:22, 23) Nesiqalene nobujamo namtjhana umraro esiwujayeleko, kufuze siyelele bona singathembeli kwaphela kokuhlangabezanwe nakho kwethu.—Funda uJeremiya 10:23.
14. Ngisiphi isifundo esingasifunda endleleni uJoshuwa namadoda amadala wakwa-Israyeli asebenzelana ngayo nabaseGibhiyoni?
14 Njengombana singakapheleli, soke—ngitjho nabadala abanokuhlangabezanwe nakho—kutlhogeka sitjheje ukubhalelwa kufuna isinqophiso kuJehova nesenza iinqunto. Cabangela indlela lowo owathatha isikhundla sakaMosisi, uJoshuwa, namadoda amadala wakwa-Israyeli abasabela ngayo nebatjhidelwa madoda ahlakaniphileko weGibhiyoni azifihlako azitjhaya abantu abavela enarheni ekude. Ngaphandle kokubuza kuJehova, uJoshuwa nabanye benza ukuthula nabaseGibhiyoni, benza isivumelwano nabo. Ngitjho nanyana emaswapheleni uJehova asisekela isivumelwaneso, waqinisekisa bona ukubhalelwa kwabo ukufuna isinqophiso sakhe kuyabulungwa eMitlolweni bona kuzuzise thina.—Josh. 9:3-6, 14, 15.
Nesizabalazela Ukulwisana Neenlingo
15. Hlathulula bona kubayini umthandazo uqakathekile ekuhluleni isilingo.
15 Njengombana ‘sinomthetho wesono’ emzimbenethu, kutlhogeka silwe budisi ukuhlula ukutjhigamela ekwenzeni isono. (Rom. 7:21-25) Kodwana singahlula epini le. Njani? UJesu watjela abalandeli bona ukuthandaza kuqakathekile ekulweni neenlingo. (Funda uLuka 22:40.) Ngitjho nanyana iimfiso namtjhana iimcabango emimbi kungaragela phambili ngemva kobana sithandaze kuZimu, kutlhogeka ‘siragele phambili sibawa uZimu’ ukuhlakanipha kokuqalana nesilingweso. Siyaqinisekiswa bona ‘upha boke ngesihle.’ (Jak. 1:5) Godu uJakobosi utlola athi: “Ukhona ogulako [ngokomoya] hlangana nani na? Akabize iinkhulu zebandla, zimthandazele ngokumzesa ngamafutha ebizweni leKosi. Umthandazo wokukholwa uzamphilisa ogulako.”—Jak. 5:14, 15.
16, 17. Nesifuna isizo lokulwisana nesilingo, ngisiphi isikhathi esingcono khulu ukuthandaza ngaso?
16 Umthandazo uqakathekile ekulwisaneni nesilingo, kodwana kufuze silemuke itlhogeko yokuthandaza ngesikhathi esifaneleko. Cabangela iindaba yesokana elithileko ekukhulunywa ngalo kuZiyema 7:6-23. Ngamarhwaqela, likhamba endleleni eyaziwako bona umfazi oziphethe kumbi ngokomseme uhlala kiyo. Lidurhiswe kukholisa kwakhe begodu liyengwe kukhuluma kwakhe kamnandi, liyamlandela, njengekunzi eyokuhlatjwa. Kubayini isokaneli liye lapho? Njengombana “belinganahliziyo,” okutjho bona belinganakho okuhlangabezanwe nakho, pheze belilwisana neemfiso ezingakalungi. (Iziy. 7:7) Kunini lapho umthandazo bewungalizuzisa khona khulu? Liqiniso, ukuthandazela ukulwisana nesilingo nanyana kunini ekuhlangabezaneni kwalo nesilingo bekungaba yinzuzo. Kodwana isikhathi esingcono khulu sokuthandaza bekungaba kulapho nekathoma ukuba nomcabango wokukhamba ngendlela leyo.
17 Namhlanjesi, kungenzeka indoda ilwa budisi ukubalekela ukubukela iinthombe zomseme ezisilapheleko. Nokho, khesithi beyiya kuma-Web site eyaziko bona aneenthombe namtjhana amavidiyo asilapheleko. Lokhu bengeze kufane nendaba yesokana okukhulunywa ngalo kuZiyema isahluko 7? Qala bona leyo yindlela eyingozi kangangani ukuthoma ukukhamba kiyo! Ukulwisana nesilingo sokubukela iinthombe zomseme ezisilapheleko, umuntu kutlhogeka afune isizo lakaJehova ngomthandazo ngaphambi kobana athome ukukhamba endleleni leyo ku-Internet.
18, 19. (a) Kubayini ukulwisana nesilingo kungaba budisi, kodwana ungaqalana njani naso ngokuphumelelako? (b) Uzimisele ukwenzani?
18 Akusilula ukulwisana nesilingo namtjhana ukuhlula imikghwa emimbi. UPowula wathi, “Iinkanuko zomzimba ziphambene nezakamoya, kanti neenkanuko zakamoya ziphambene nezomzimba.” Ngalokho, ‘asikwenzi lokho esithanda ukukwenza.’ (Gal. 5:17) Ukuqalana nesitjhijilwesi, kutlhogeka sithandaze ngetjiseko iimcabango emimbi namtjhana iinlingo nezifika eengqondweni zethu sithathe namagadango avumelana neemthandazwethu. “Ukulingwa koke esenidlule kikho, ngikho lokho okufikela abantu boke,” begodu ngesizo lakaJehova, singahlala sithembekile kuye.—1 Kor. 10:13.
19 Kungakhathaliseki bona siqalene nobujamo obubudisi, kutlhogeka senze isiqunto esiqakathekileko, namtjhana silinga ukulwisana nesilingo, uJehova usiphe isipho esirarako—ilungiselelo lomthandazo eliligugu. Ngalo, sitjengisa ukuthembela kwethu kuye. Kufuze siragele phambili sibawa uZimu bona asiphe umoyakhe ocwengileko, osinqophisako begodu usiqinise. (Luka 11:9-13) Godu ngazo zoke iindlela, asithembeleni kuJehova singasami elwazini lethu.
[Umtlolo waphasi]
^ isig. 1 Amabizo atjhugululiwe.
Uyakhumbula?
• Ufundeni kuHezekiya, uHana, noJona ngokuthembela kuJehova?
• Isibonelo sakaDavidi noJoshuwa siyigandelela njani itlhogeko yokuyelela ngaphambi kobana wenze iinqunto?
• Kunini ngokukhethekileko lapho kufuze sithandaze khona ngeenlingo?
[Iimbuzo Yesifundo]
[Isithombe ekhasini 9]
Ekulwisaneni nesilingo, umthandazo uzuzisa khulu nini?
