Bamemezela ILizwi LakaZimu Ngesibindi!

Isibindi nebaqalene netjhutjhiso. Ifanelo le itjengiswa maKrestu weqiniso, njengombana kutjengiswe eencwadini ezinjengethi ‘Ukunikeza Ubufakazi Obuphelele’ NgoMbuso KaNkulunkulu nethi OFakazi BakaJehova—Abamemezeli BoMbuso KaNkulunkulu. Njengamakholwa esikunye nawo wangekhulu lokuthoma, sithandaza kuJehova ukufumana umoyakhe nesizo lokukhuluma ilizwi lakhe ngesibindi.—IZe. 4:23-31.

Malungana nomsebenzethu wokutjhumayela hlangana nepi yephasi yokuthoma, omunye umzalwana watlola: “Iinceku zakaZimu bezirhatjha ngetjiseko umqulu wekhomba we-Studies in the Scriptures, onesihloko esithi, The Finished Mystery. Ukurhatjhokho bekudlula nanyana ngikuphi ekhekwenziwa phambilini. I-Kingdom News No. 1 yatjhatjhululwa ngo-1918. Ngemva kwalokho kwalandela i-Kingdom News No. 2, egade ihlathulula bona kubayini i-The Finished Mystery yagandelelwa ngabasemagunyeni. Lokho kwalandelwa yi-Kingdom News No. 3. Iincwadezi zarhatjhwa kabanzi sigaba sabazesiweko esithembekileko. Bekutlhoga ikholo nesibindi ukurhatjha i-Kingdom News.”

Namhlanjesi, abarhuweleli boMbuso abatjha bafumana ibandulo ekonzweni, kodwana bekungasinjalo ngaso soke isikhathi. Akhumbula okuhlangabezanwe nakho kwakhe kokuthoma ekonzweni yesimini ngo-1922, omunye umzalwana okhuluma isi-Polish e-United States watlola: “Nginganalwazi lokobana zikhanjiswa njani iincwadi begodu ngingakghoni ukukhuluma kuhle isiNgisi, ngajama ngedwa phambi kwe-ofisi lakadorhodere ngakokoda. Unesi wavula umnyango. Ngeze ngakukhohlwa okwenzeka mhlokho, ngombana bengithabile begodu ngithukiwe. Njengombana ngivula isikhwama sami, zoke iincwadi zawela eenyaweni zakanesi. Angazi bona ngathini, kodwana ngamkhambisela incwadi. Nengikhambako, besele nginesibindi begodu ngazizwa ngibusiswe nguJehova. Ngakhambisa iincwajana ezinengi ngelangelo esitradeni samabhiziniseso.”

Omunye udade wathi, “Ngabo-1933, abazalwana abanengi basebenzisa iinkoloyi ezinesipikara ukurhatjha umlayezo woMbuso.” Kesinye isenzakalo, yena nesibili esiboFakazi bebatjhumayela endaweni eneentaba eCalifornia, e-U.S.A. Uyakhumbula, “Umzalwana wathatha ikoloyi enesipikara wayisa endaweni ephezulu eentabeni, thina sahlala phasi edorobheni. Nekathoma ukudlala umlayezo orekhodiweko, bekuzwakala ngasuthi uvela ezulwini. Abantu bedorobha balinga balingile ukufumana umzalwana, kodwana azange bamfumane. Ngemva kobana irekhodi liphelile, besivakatjhela abantu sifakaze kibo. Ngasebenza ngezinye iinkoloyi ezinesipikara eembili begodu ngingakuqinisekisa bona inengi labantu belingafuni ukuzwa umlayezo. Kodwana bebangeze bakubalekela ukuzwa iinkulumo njengombana umlayezo ovela eenkoloyini ezinesipikara uzwakala ngokukhanyako eemzinabo. Qobe besibona bonyana uJehova bekabangela bona kusetjenziswe indlela efaneleko ngesikhathi esifaneleko.  Indlela le beyitlhoga bona sitjengise soke isibindi esinaso, kodwana beyihlala iwuphetha umnqophwayo, nebizo lakaJehova beliphazinyuliswa.”

Ngabo-1930 nekuthomeni kwabo-1940, kwasetjenziswa ama-phonograph begodu bekudlalwa iinkulumo zeBhayibhili ezirekhodiweko ekonzweni yethu. Omunye umfazi omKrestu uyakhumbula: “Omunye udade osesemutjha bekasebenza endlini ngendlu nge-phonograph. Ngemva kobana athome ukudlala irekhodi endlini ethileko, indoda yomuzi lowo yakwata kangangobana yararha i-phonograph yaphuma ngeveranda. Alikho irekhodi elaphukako. Amadoda amathathu egade adla ukudla kwemini elorini ejamileko abona okwenzekako, amema udade bona azowadlalela irekhodi, begodu athatha iincwadi kuye. Lokhu kwavala ukuphathwa kumbi.” Bekutlhoga isibindi ukukghodlhelela iinlingo ezinjalo.

Udade ofanako uyangezelela: “Ngikhumbula ukuthoma komsebenzi wokukhanjiswa kwakamagazini endleleni ngo-1940. Ngaphambilini bekunamamatjhi wokurhatjha ukwaziswa. Ngendlela efanako, abanakwethu nabodade bebakhamba qadi kwendlela baphethe amatshwayo athi, ‘Religion Is a Snare and a Racket’ [Ikolo Isithiyo Neqhinga Lokwenza Imali] nelithi ‘Serve God and Christ the King’ [Khonza UZimu NoKrestu IKosi]. Ngesikhathi esifanako, abantu bebanikelwa amaphetjhana wasimahla. Bekutlhoga isibindi ukuhlanganyela eengcenyenezi zomsebenzi, kodwana zafikelela umnqopho wokwenza ibizo lakaJehova nabantu bakhe baziwa emphakathini.”

Omunye udade wathi, “Ukukhambisa umagazini endleleni zamadorobha amancani bekubudisi khulu. Lokhu bekungesikhathi ukuphikiswa kwaboFakazi kunamandla khulu. . . . Bekutlhoga isibindi esikhulu ukujama ekhoneni uphethe abomagazini begodu utjho amezwi ebekunyulwa bona siwasebenzise. Nanyana kunjalo, bekungakajayeleki bona sitshwile uMgqibelo. Ngezinye iinkhathi abantu bebaba nobungani. Ngezinye iinkhathi abantu abakwatileko bebasibungelela begodu bekutlhogeka sibaleke ukwenzela bona singalinyazwa.”

Naphezu kwetjhutjhiso abaqalana nalo hlangana nePi Yephasi II, aboFakazi BakaJehova baraga ikonzwabo ngesibindi. Ejimeni lamalanga ama-43 elathoma ngoDisemba 1, 1940, kuya kuJanabari 12, 1941, abarhuweleli abangaba zi-50 000 e-United States barhatjha iincwajana ezipheze zibe ziingidi ezibunane hlangana nalokho okwabizwa ngokobana Sikhathi Sokufakaza “Ngesibindi.”

Abanengi abakhulileko ehlanganweni kaZimu bazikhumbula ngokukhanyako iintjhijilo ezabenza batlhoga ukutjengisa isibindi. Abanye bakhumbula bona eemnyakeni eemnengi, umoyabo wesibindi wazwakala emezwini egade bawabuyelela athi, asirageleni phambili sitjhumayela ngetjiseko bekube sekupheleni! Akwaziwa bona umlayezo esiwunikelwe nguZimu uzokuba njani ngaphambi kokuphela kwephasi elimbeli. Nokho ngesizo lakaZimu, sizokuragela phambili sirhuwelela ilizwi lakaJehova ngekholo nangesibindi.

[Umkhangiso osekhasini 9]

Isibindi besisolo sitlhogeka ekuhlanganyeleni emsebenzini wokutjhumayela ngoMbuso