Izenzo Ezimbi Zizokuphela!

UZIMU usinikele iLizwi lakhe eliphefumulelweko, elihlathulula amabanga wokobana kubayini abantu benza izinto ezimbi. Godu usinikele nelungelo lokuzikhethela namandla wokuzibamba enza sikghone ukukhetha ukwenza okulungileko. (Duteronomi 30:15, 16, 19) Sinamandla anjalo, singatjheja nanyana ngimiphi imikghwa emimbi esingaba nayo begodu sithathe amagadango atlhogekako bona siyilungise. Emaswapheleni, ukubalekela kwethu okumbi kuzokuletha ithabo kithi nakilabo abasibhodileko.—AmaRhalani 1:1.

Nanyana kunjalo, kungakhathaliseki bona umuntu ngamunye ulinga kangangani ukubalekela ukwenza izinto ezimbi, iphasi liragela phambili litshwenyeka ngezenzo ezimbi ezenziwa babantu esiphila nabo. IBhayibhili iyasiyelelisa: “Kwazi lokhu bona ngemihla yokuphela kofika iinkhathi ezibudisi  kwamambala.” Ukutjengisa bona khuyini eyenza ‘iinkhathi zibe budisi kwamambala,’ iragela phambili ithi: “Abantu bayorhubhela ngeenkhwanyeni zabo, bayorhuluphela imali, bazikhukhumeze, bazigqaje, bahlambalaze, banyaze abazali babo. Kuzakuba khona abangathokozi bangabi nandaba nalokho okucwengileko, kube khona abanganathando, nabangavumi ukubuyisana, kube khona nabahlebako, nabangakgoni ukuzibamba, nabagebengako, nabahloya okuhle. Kuyoba khona abakgaphela abanye, nabawalazelako, nabazikganisako, nabathanda iinjabulo kunokobanyana bathande uZimu. Bayozitjhaya sengathi bayamsaba uZimu, kodwana ngokwenza kwabo njalo babe bewaphika amandla afumaneka ngokukholwa. Ubaphephe abanjalo.”—2 Thimothi 3:1-5.

Mhlamunye ulitjhejile ibizo “ngemihla yokuphela” esiporofidweni esidzubhulwe ngehla. Lokho kutjho ukuthini kuwe? Njengombana ngokuvamileko kwaziwa, ukuthi “ngemihla yokuphela” kutjho bona into izokufika emaswapheleni. Kungaba yini leyo? Tjheja bona uZimu uthembisani eLizwini lakhe.

Abantu abambi bazokususwa ngokupheleleko.

“Esikhathini esingaphelisi ihliziyo, omumbi uzabe angasekho; ngokuqinisekileko uzoyiqala indawo yakhe, uzabe angasekho. Kodwana abathobekileko bazokudla ilifa lephasi, begodu bazokufumana ithabo nokuthula okukhulu.”—AMARHALANI 37:10, 11.

“UJehova utjheja boke abamthandako, kodwana boke abambi uzobatjhabalalisa.” —AMARHALANI 145:20.

Ukugandeleleka angekhe kusaba khona.

“Izokutjhaphulula okhwahlileko olilela irhelebho, notlhagako onganamrhelebhi. Izokuphulusa umphefumulwabo ekugandelelekeni nenturhwini.”—AMARHALANI 72:12, 14.

‘Okubunjiweko kuyokhululwa ebugqilini bokubola, kube nesabelo ekululekweni le, nebukhosini babantwana bakaZimu.’—KWEBEROMA 8:21.

Iintlhogo zabantu ezingokwenyama zizokuzaliswa.

“Eqinisweni bazokuhlala ngiloyo naloyo ngaphasi komuthakhe wamadribe, nangaphasi komuthakhe wamafeya, akekho ozobasabisa.”—MIKA 4:4.

“Ngokuqinisekileko bazokwakha izindlu bahlale kizo; bazokutjala isimu yamadribe badle iinthelo zayo. Angekhe bakhe kuhlale omunye; ngekhe batjale kudle omunye. Amalanga wabantu bami azokuba njengamalanga womuthi; neemberego yezandla zabakhethiweko bami bazoyiberegisa ngokuzeleko.”—ISAYA 65:21, 22.

Kuzokuba nokulunga.

“UZimu akazubazwela abantu bekhabo abalila imini nobusuku . . . ? Ngiyanitjela-yi: Uzobazwela msinyana.”—LUKA 18:7, 8.

“UJehova umthandi wokulunga, angeze abatjhiya abantu bakhe abathembekileko. Kwamambala uzobavikela bekube nini nanini.” —AMARHALANI 37:28.

Ukuba marhamaru kuzokujanyiselelwa ngokulunga.

“Kwamambala abakhileko enarheni ekhiqizako bazokufunda ukulunga.”—ISAYA 26:9.

“Kodwana ngesithembiso sakhe silindele amazulu amatjha, lapho kuyobusa khona ukulunga.”—2 KAPITROSI 3:13.

Abantu Bayatjhentjha—Ngitjho Nanje

Ngaphandle kokuzaza, soke zizosithabisa iinthembiso ezinjalo. Kodwana ngisiphi isiqinisekiso  sokobana zizokuzaliseka? Eqinisweni, ngitjho kwanje sinobufakazi bokobana iinthembiso zakaZimu zizokwenzeka. Ngibuphi ubufakazobo? Kuliqiniso bona iingidi zabantu ephasini mazombe namhlanjesi sezithabele ipumelelo yokuzikhipha ekubeni marhamaru, ekuziphatheni okumbi nofana emikghweni yokuba nenturhu, begodu zafunda ukuthembeka, ukuthula nokuba nomusa. Namhlanjesi, AboFakazi BakaJehova, ababalelwa eengidini ezingaphezu kwezilikhomba, banobudlelwano bobuzalwana bephasi loke elihlule ibandlululo, ubuhlanga, ubutjhaba, zepolotiki nokuhlukana kwezomnotho okubangela ihloyo ekulu, inturhu nokuphalaka kweengazi kiwo woke umlando. * Bona amatjhuguluko anjalo ayenzeka namhlanjesi kunikela isisekelo esiqinileko sokukholelwa bona iinthembiso zakaZimu zizokuzaliseka ngezinga elikhulu.

Nokho, khuyini eletha amatjhuguluko anjalo? Ipendulo ifumaneka kesinye isithembiso seBhayibhili, esatlolwa mporofidi u-Isaya. Watlola:

“Ipisi izokuhlala nelamjana, ingwemabala izokulala ndawonye nembuzana, nekonyana lizokudla nebhubezana; nomsanyana uzozidosa phambili. . . . Ngitjho nebhubezi lizokudla utjani njengekunzi. Nomntwana osamunyako uzokudlala emgodini wephiphi; umntwana uzokufaka isandla sakhe ngemgodini wenyoka enetjhefu. Ngekhe zenze umonakalo kiyo yoke intaba yami ecwengileko; ngombana ngokuqinisekileko iphasi lizokuzala ilwazi ngoJehova njengamanzi asibekela ilwandle.”—Isaya 11:6-9.

Isiporofidwesi sibikezela kwaphela isikhathi lapho iinlwana zizokuba nokuthula nabantu na? Awa, kunokunengi kunalokho. Tjheja bona ingcenye yamaswaphela yomtlolo lo iveza unobangela wamatjhuguluko: “Ngokuqinisekileko, iphasi lizokuzala ilwazi ngoJehova.” Ilwazi ngoZimu lingatjhugulula indlela  iimbandana eziziphatha ngayo? Awa, akusinjalo. Kodwana lingakghona ukutjhugulula begodu liyabatjhugulula abantu! Isiporofidwesi sabikezela bona labo abanemikghwa yobulwana bazoyilahla bese bathuthukisa ubunye bobuKrestu ngebanga lokufunda nokuberegisa okufundiswa yiBhayibhili.

Thatha uPedro njengesibonelo. * Wadlumbanyana bekalwela ukulunga nekazibandakanya ehlanganweni yamavukelambuso. Ngemva kobana abandulwe, bambawa bona ayokuhlasela ikampa yamapholisa. Nekasabhincela ukwenza njalo, wabotjhwa. UPedro wahlala iinyanga ezili-18 ejele, lapho aragela phambili khona ngomberegwakhe wokuvukela umbuso. Ngesikhatheso, umkaPedro wathoma ukufunda iBhayibhili naboFakazi BakaJehova. Ngemva kokutjhatjhululwa kwakhe, uPedro naye wathoma ukufunda iBhayibhili, begodu lokho akufundako ngoJehova uZimu kwamtjhukumisela bona enze amatjhuguluko amakhulu emikghweni yakhe nendlela esele akuqala ngayo ukuphila. UPedro wathi: “Ngithokoza uJehova bona hlangana neemnyaka yokuba kwami yivukelambuso akhenge ngibulale muntu. Gadesi ngiberegisa isabula yomoya kaZimu, iBhayibhili, ukunikela abantu umlayezo wokuthula nokulunga kwamambala—iindaba ezimnandi zoMbuso kaZimu.” UPedro wavakatjhela ngitjho nekampa ebekabhincela ukuyiqeda, bona abelane nabo iindaba zokuthula nezephasi elinganayo inturhu.

 Umphumela onamandla iLizwi lakaZimu elingaba nawo ebantwini ungezelela amabanga wethu wokuba nekholo esithembisweni sakaZimu sokobana zoke izenzo ezimbi zizokuphela. Kwamambala, abantu angeze bazenze unomphela izinto ezimbi kodwana bazokuba ngcono. Msinyana uJehova uzokususa umthomi wobumbi, uSathana uDeveli, omhlohlozeli onobuqili wabo boke ubumbi obusephasinapha. IBhayibhili ithi: “Iphasi loke lisemandleni woKhohlakeleko.” (1 KaJwanisi 5:19) Kodwana kungasikade uzakube angasekho. Nalabo ngekani abangafuni ukulisa iindlela zabo ezimbi bazabe bangasekho. Qala bona kuzokuba kuhle kangangani ukuphila esikhathini esibusiseke kangako!

Khuyini ngamunye okufuze ayenze bona aqiniseke ngengomuso elinjalo? Khumbula bona “ilwazi ngoJehova” ngilo namhlanjesi eliletha amatjhuguluko ebantwini begodu lizokuletha amatjhuguluko ephasini mazombe engomusweni elitjhidela msinyana. Ngokufumana ilwazi elinembileko leBhayibhili nokuliberegisa—njengombana kwenza uPedro—nawe ungaqala phambili ekuphileni ephasini lapho “kuyokubusa khona ukulunga.” (2 KaPitrosi 3:13) Ngalokho sikukhuthaza bona uberegise ithuba elisatholakalako ukungenisa ilwazi ngoZimu nangoJesu Krestu, ngombana lokho kungatjho ukuphila okungapheliko kuwe.—Jwanisi 17:3.

[Imitlolo yaphasi]

[Umkhangiso osekhasini 9]

Nawe ngokwakho ungaqala phambili ekuphileni ephasini lapho “kuyokubusa khona ukulunga.”—2 KAPITROSI 3:13