Usinikele Ilungelo Lokuzikhethela
Tjhidela KuZimu
Usinikele Ilungelo Lokuzikhethela
ABABELETHI kufuze babekele abantwababo isibonelo esihle. Umthelela omuhle wesibonelo sombelethi ungarhelebha umntwana bona ahlawulele ubuntu obuthandekako enze nokukhetha okuhle. Ngokudanisako ababelethi abanengi babekela abantwababo isibonelo esimbi. Lokho kutjho bonyana abantwana abanjalo angeze baphumelela na? Sifumana ipendulo eqinisweni elikhuthaza khulu—uJehova uZimu uphe ngamunye wethu isipho sekululeko yokuzikhethela. Cabangela indaba kaHezekiya, njengombana ifumaneka ku-2 AmaKhosi 18:1-7.
UHezekiya “bekayindodana ka-Ahazi ikosi yakwaJuda.” (iVesi-1) U-Ahazi wadosela iinkhonzi zakhe kude nokukhulekela okuhlwengileko. Ikosi embi le gade ikhulekela uBhali, nesiko layo lokwenza isihlabelo ngabantu. Wabulala oyedwa namtjhana ngaphezulu wabanakwabo lakaHezekiya. U-Ahazi wavala amabadi wetempeli “wazenzela ama-aldare kiwo woke amawugu weJerusalema.” “Wasilinga uJehova.” (2 IMilando 28:3, 24, 25) Kuyakhanya bona usoHezekiya gade amumbi khulu. Kodwana uHezekiya gade abophekile na bona abuyelele iimtjhapho kayise?
Ngemva kobana uHezekiya abe yikosi, msinyana watjengisa bona angekhe avumele isibonelo esimbi sakayise bonyana kube ngiso esitjhoko bona uzokuba mumuntu onjani. UHezekiya “waragela phambili enza okuhle emehlweni kaJehova.” (iVesi-3) UHezekiya wathembela kuJehova, “akhenge kube khona onjengaye hlangana nawo woke amakhosi wakwaJuda.” (iVesi-5) Ngomnyakakhe wokuthoma wokubusa, ikosi etja le yathoma ijima lokukhulekela kweqiniso okwenza bona kususwe iindawo eziphakemeko, lapho egade kukhulekelwa khona abosingazimu. Itempeli lavulwa godu, nokukhulekela kweqiniso kwabuyiselwa. (iVesi-4; 2 IMilando 29:1-3, 27-31) UHezekiya “waragela phambili akakarele kuJehova . . . , uJehova waba naye.”—amaVesi-6, 7.
Khuyini eyenza uHezekiya bona ahlule isibonelo sakayise esimbi? Kungenzeka na bona unina, u-Abhija—esinelwazi elincani ngaye—waba nomthelela omuhle endodanenakhe? Isibonelo esihle saka-Isaya, owathoma ikonzwakhe yokuporofida ngaphambi kobana uHezekiya abelethwe, saba nomthelela omuhle na ekosaneni encani le? * IBhayibhili ayitjho. Nanyana ngiliphi ibanga, into esiqiniseka ngayo ngile: UHezekiya wakhetha ukuphila ngendlela ehluke khulu kuneyakayise.
Isibonelo sakaHezekiya sikhuthaza nanyana ngubani okungenzeka abe nababelethi abasibonelo esimbi. Angeze sakwazi ukutjhugulula into edlulileko; angekhe sakwazi nokususa izinto ezasenzakalelako. Kodwana izinto ezinjalo akutjho bona zizosenza sibe babantu ababhalelwako. Ukukhetha esikwenzako nje kungasidosela engomusweni elithabisako. NjengoHezekiya, singakhetha ukuthanda nokukhulekela uZimu weqiniso, uJehova. Ikambo enjalo iphumela ekuphileni okwanelisako njenganje begodu ingadosela ekuphileni okungapheliko ephasini lakaZimu elitjha. (2 KaPitrosi 3:13; ISambulo 21:3, 4) Qala bona kufuze sithokoze kangangani kuZimu onethando ophe ngamunye wethu isipho esiligugu khulu—ilungelo lokuzikhethela!
[Umtlolo waphasi]
^ isig. 7 U-Isaya waporofida pheze kusukela ngabo-778 B.C.E. bekube sesikhathini esithileko ngemva kwaka-732 B.C.E. UHezekiya wathoma ukubusa ngo-745 B.C.E., aneemnyaka ema-25.