Sizokukhamba Ekuthembekeni Kwethu!
Sizokukhamba Ekuthembekeni Kwethu!
“Kodwana mina, ngizokukhamba ngokuthembeka kwami.”—RHA. 26:11.
1, 2. UJobhi wathini ngokuthembeka kwakhe, begodu kuthiwani ngaye kuJobhi-31?
EKADENI, izinto gade zikalwa esikalini sesimbi. Kanengi gade siba nesimbi eqabileko, esekelwe ngenye phakathi. Bese kuba neempani ezilengelele ngemaqadi. Into ekalwako gade ifakwa ngakenye ipani bese kube nesimedo ngakelinye ihlangothi. Abantu bakaZimu gade kufuze baberegise iinkali ezinobudisi obuthembekileko.—Iziy. 11:1.
2 Umuntu osaba uZimu uJobhi watlhaga ngaphambi kokugandelelwa nguSathana, wathi: “[uJehova] uzongikala esikalini esinqophileko begodu uZimu uzokwazi ukuthembeka kwami.” (Job 31:6) Malungana nalokho, uJobhi wakhuluma ngezinto ezinengi ezingabeka ukuhlala uthembekile esilingweni. UJobhi waphumelela evivinyweni elinjalo, njengombana kwatjengiswa mamezwakhe atlolwe kuJobhi isahluko-31. Isibonelo sakhe esihle sisitjhukumisela bona senze ngendlela efanako begodu ngesibindi sitjho njengombana kwatjho uDavidi: “Kodwana mina ngizokukhamba ngokuthembeka kwami.”—Rha. 26:11.
3. Kubayini kuqakathekile ukuthembeka kuZimu eentweni ezincani nezikulu?
3 Nanyana uJobhi alingwa kabuhlungu, wahlala athembekile kuZimu. UJobhi gade asibonelo esiveleleko sokuthembeka ngaphasi kokuvivinywa okubuhlungu. Asitlhagi ngokufana patsi noJobhi. Nokho, ukutjengisa bona sikhamba ngokuthembeka nokobana sisekela ubukhosi bakaJehova kufuze sithembeke kuZimu eentweni ezincani nezikulu.—Funda uLuka 16:10.
Kuqakathekile Ukuthembeka Ngokuziphatha
4, 5. Njengobulunga ukuthembeka, ngikuphi ukuziphatha uJobhi akugegedako?
4 Bona sithembeke kuJehova, kufuze sikakarele eenkambiswenilawulo zakhe zokuziphatha, njengombana kwenza uJobhi. Wathi: “Ngenze isivumelwano namehlwami. Ngalokho ngingayinaka njani intombi? . . . Nengabe ihliziywami ikarwa mfazi, begodu ngiragela phambili ngilinda endleleni engenako yomnganami, umkami akagayelele enye indoda, begodu amanye amadoda aguqe phezu kwakhe.”—Job 31:1, 9, 10.
5 Azimisele ukubulunga ukuthembeka kuZimu, uJobhi wagegeda ukuqala umfazi bekube kulapho arhalela ukuya naye emsemeni. Njengendoda etjhadileko, khenge adlale ngethando nomfazi ongakatjhadi namtjhana aqale umfazi wenye indoda ngomnqopho wokuba nethando. ETjumayelweni yeNtabeni, uJesu wenza isitatimende esinamandla malungana nokuziphatha okumbi ngokomseme—kwamambala, iphuzu ababulunga ukuthembeka okufuze balikhumbule.—Funda uMatewu 5:27, 28.
Ungaweli Emikghweni Yobuqili
6, 7. (a) Njengendabeni kaJobhi, uZimu uberegisani ukumeda ukuthembeka kwethu? (b) Kubayini kungakafuzi sibe maqili?
6 Angeze sawela emikghweni yobuqili nengabe sifuna ukubalwa njengababulungi bokuthembeka. (Funda Iziyema 3:31-33.) UJobhi wathi: “Nengikhamba nabantu bamala, nenyawo lami ligijimela ukudlelezela, yena [uJehova] uzongikala esikalini esinembileko noZimu uzokwazi ukuthembeka kwami.” (Job 31:5, 6) UJehova ukala soke isintu “esikalini esinembileko.” Njengendabeni kaJobhi, uZimu uberegisa iinkambisolawulo zakhe ezilungileko ukumeda ukuthembeka kwethu njengeenceku zakhe ezithembekileko.
7 Nengabe siba maqili, sizabe singabulungi ukuthembeka kwethu kuZimu. Ababulungi bokuthembeka ‘balahle yoke imisebenzi yobumnyama neyehlazo’ begodu abasakhambi “ngobuqili.” (2 Kor. 4:1, 2) Kodwana kuthiwani nengabe simaqili endleleni esikhuluma nesenza ngayo, sibangele esikholwa naye bona abawe irhelebho kuZimu? Umphumela uzokuba ngodanisako ngathi! Umrhalani wabhina: “Ngambiza uJehova ngisemtlhagweni, wangiphendula, ngalokho Jehova tjhaphulula umphefumulo wami elimini lamala, nelimini elikhohlisako.” (Rha. 120:1, 2) Kuhle ukukhumbula bona uZimu angahlola ekutjhingeni kwengaphakathi lethu, “uhlola ihliziyo neziso ukubona bona sibabulungi bokuthembeka bamambala na.”—Rha. 7:8, 9.
Yiba Sibonelo Ekuberegisaneni Nabanye
8. UJobhi wabaphatha njani abanye?
8 Bona sibulunge ukuthembeka, kufuze sifane noJobhi, obekathobekile, acabangela nabanye. Wathi: “Nengabe gade ngijayele ukwala isigwebo sencekwami namtjhana isigwebo sencekukazami ecaleni ezingibeke lona, ngalokho ngizokwenzani uZimu nasikimako? Nekafuna bona ngilandise, ngizomphendula ngithini? Owangibumbako ngemathunjini akusuye oyibumbileko, asikalungiswa ngoyedwa esibelethweni na?”—Job 31:13-15.
9. Ngiziphi iimfanelo ezatjengiswa nguJobhi ekuberegelaneni neenceku zakhe, begodu kufuze senzeni malungana nalokhu?
9 Eqinisweni, bezingekho iindlela ezirareneko zokudemba amacala asemthethweni ngeenkhathi zakaJobhi. Amacala bekagwetjwa ngendlela ehlelekileko, ngitjho neengqila bezikwazi ukuya ekhotho. UJobhi bakalungile begodu anesirhawu ekuberegelaneni neenceku zakhe. Nengabe sizokukhamba ngokuthembeka kwethu, kufuze sitjengise iimfanelo ezinjalo, khulukhulu nesikhonza njengabadala ebandleni lobuKrestu.
Yiba Nomusa, Ungabi Marhamaru
10, 11. (a) Sazi njani bona uJobhi bekaphana begodu alisizo? (b) UJobhi 31:16-25 usikhumbuza siphi isiluleko samva esingokoMtlolo?
10 UJobhi bekaphana begodu alirhelebho, angazicabangeli yena, namtjhana amarhamaru. Wathi: “Nengibangela amehlo womfelokazi bona afiphale, ngijayele ukudla isiqetjhana sami ngingedwa, kukulapho intandani ingasidli . . . Nengabe ngijayele ukubona umuntu atjhabalala ngebanga lokungabi nesembatho . . . Nengabe ngaphaya isandla sami malungana nentandani, ngikubona ukutlhogeka kwesizo lami eyegeni, isiphanga sami asiwe ehlombe laso, begodu nomkhonwami awuphuke ethanjeni lawo elingehla.” UJobhi bengeze abulunge ukuthembeka kwakhe ngathana wathi erhawudeni: “Ulithemba lami!”—Job 31:16-25.
11 Amezwi asakondlo la angasikhumbuza amezwi womfundi uJakobosi: “Ukukholwa okumsulwa nokungikho phambi kwakaZimu onguBaba ngilokhu: kukhambela iintandani nabafelokazi ekutlhageni kwabo nokuzilonda ungasilaphazwa liphasi.” (Jak. 1:27) Godu singakhumbula nesiyeleliso sakaJesu: “Lemukani nizitjheje nina bona ningabi marhamaru, ngombana ipilo yomuntu ayibanjwa zizinto anazo.” Ngemva kwalokho uJesu wabeka naku umfanekiso ngokuba marhamaru kwendoda eregileko eyafa ‘ingakanothi ngehlangothini lakaZimu.’ (Luka 12:15-21) Bona sibulunge ukuthembeka, akukafuzi sivumele izono zokuba marhamaru. Ukuba marhamaru kukhonza iinthombe ngombana umuntu omarhamaru ukurhala kumphambukisela kude noJehova ngalokho kuba sithombe. (Khol. 3:5) Ukuthembeka nokuba marhamaru mamanzi namafutha!
Dzimelela Ekukhulekeleni Kweqiniso
12, 13. Ngisiphi isibonelo uJobhi asibekako ekugegedeni ukukhulekela iinthombe?
12 Labo ababulunga ukuthembeka abaphambuki ekukhulekeleni kwamambala. UJobhi akhenge enze njalo, begodu wabikezela: Nengabe bengijayele ukubona umkhanyo newumeruzako, namtjhana inyezi eligugu ikhamba, ihliziywami yathoma ukuthatheka ngemsithelweni nesandla sami sancwanga umlomami, nalokho godu bekuzokuba yiphoso ebelizokutlhoga ukutjhejwa bahluleli, ngombana bengizabe ngimphikile uZimu ophezulu.”—Job 31:26-28.
13 UJobhi akhenge akhulekele izinto ezingaphiliko. Nengabe ihliziywakhe yalingeka ngemsithelweni bona akhulelekele izinto zaphezulu ezibonakalako, ezinjengenyezi begodu ngathana ‘isandla sakhe sancwanga umlomakhe,’ bese wavuthela isandla ngesenzo sokukhonza iinthombe, bekazokuba mkhulekeli weenthombe ophike uZimu. (Dut. 4:15, 19) Bona sibulunge ukuthembeka kwethu kuZimu kufuze sigegede koke ukukhulekela iinthombe.—Funda yoku-1 KaJwanisi 5:21.
Ungabi Nelunya Namtjhana Umzenzisi
14. Kubayini singathi uJobhi bekanganalunya?
14 UJobhi bekanganalunya begodu angakanqophi ukulimaza. Bekazi bona izenzo ezinjalo bezizokuveza bona akasimumuntu obulunga ukuthembeka, ngalokho wathi: “Nengabe bengijayele ukuthaba ngokutjhabalala kwenaba lami, namtjhana ngithabe ngombana okumbi kumfumene . . . , akhenge ngivumele ilwanga lami bona lone ngokubawa isifungo maqondana nomphefumulo wakhe.”—Job 31:29, 30.
15. Kubayini kungakalungi ukuthabela ukubona inaba lakho livelelwa ngokumbi?
15 UJobhi olungileko akhenge athabe inaba lakhe nelivelelwa ngokumbi. Isaga samva siyayelelisa: “Inaba lakho neliwako, ungathabi; begodu nalibangelwa bona likhutjwe, ihliziywakho ayingathabi, bona uJehova angaboni kube kumbi emehlwenakhe bese ngokuqinisekileko abuyise ilaka lakhe kilo.” (Iziy. 24:17, 18) Njengombana uJehova ufunda ihliziyo, uyakghona ukubona nengabe ngemsithelweni siyathaba nesibona inaba lethu lenza iphoso begodu akawuthabeli umukghwa onjalo. (Iziy. 17:5) UZimu angaberegelana nathi ngokufaneleko, ngikho athi: “Ukuzibuyiselela ngekwami.”—Dut. 32:35.
16. Ngitjho nanyana singakaregi, singakutjengisa njani ukwamukela abayeni?
16 UJobhi bekanomusa. (Job 31:31, 32) Nanyana singakaregi, ‘singabaphatha kuhle abayeni.’ (Rom. 12:13) Singahlanganyela nabo ekudleni okulula, sikhumbula bona “isitja semirorho sibhedere la kunethando khona kunekunzi enonileko ekhambisana nehloyo.” (Iziy. 15:17) Ukudla nababulunga ukuthembeka esikanye nabo ngomoya wethando kungenza ngitjho nokudla okulula kuthabise begodu kwamambala singazuza ngokomoya.
17. Kubayini kungakafuzi silinge ukufihla izono ezikulu?
17 Kufuze bona bekwakha ngokomoya ukuthabela ukuba noJobhi, ngombana ubuntu bakhe bebungasi ngebokuzenzisa. Bekangafani namadoda abekangamsabiko uZimu angena ngokukhukhutha ebandleni langekhulu lokuthoma begodu ‘alandela iinkhanuko zawo ezimbi . . . ze afumane inzuzo.’ (Juda 3, 4, 16) UJobhi akhenge agubuzese ukona kwakhe namtjhana ‘afihle iimtjhaphwakhe ngesikhwameni seyembhakhe,’ asaba bona abantu ngeze basamhlonipha nebafunda ngayo. Bekazimisele ukuhlolwa nguZimu, loyo azokuvuma kuye iimlamdu nekutlhogekako. (Job. 31:33-37) Nesenza isono esikhulu, singalingi ukukufihla ukona okunjalo bona sivikele igama lethu. Singatjengisa njani bona silinga ukubulunga ukuthembeka? Ngokuvuma iimtjhaphwethu, siphenduke, sifune irhelebho elingokomoya, begodu senze koke esingakghona ukukwenza bona siyilungise.—Iziy. 28:13; Jak. 5:13-15.
Ukuthembeka KwakaJobhi Kuyalingwa
18, 19. (a) Kubayini kungathiwa uJobhi khenge atlhorise namunye? (b) Khuyini uJobhi ebekazimisele ukuyenza nekafumaneka amlandu?
18 UJobhi bekathembekile begodu alungile. Ngalokho-ke, bekangathi: “Nengabe iphasi lami lizokulilela irhelebho, neemsele yalo beyizokulila; nengabe ngidle iinthelo zalo ngaphandle kwemali, begodu ngabangela umphefumulo wabanikazi bazo bona ukhefuzele, esikhundleni sekoroyi vumela utjani obunameva bukhule, esikhundleni sebhali utjani obunukako.” (Job 31:38-40) UJobhi akhenge athathe inarha yabanye, begodu akhenge azitlhorise iimberegi. Njengaye sitlhoga ukubulunga ukuthembeka kwethu kuJehova eentweni ezikulu nezincani.
19 UJobhi wakhuluma ngendlela akhe aphila ngayo phambi kwabangani bakhe abathathu nesokaneni elingu-Elihu. Ngomlando omude wokuphila kwakhe wokulwela ukubulunga “ibizo” lakhe, uJobhi wamema amanabakhe bona amuse ekhotho ambeke umlandu nengabe wakhe wawona. Nengabe uJobhi wafumaneka amlandu, bekazozimisela ukujeziswa. Ngalokho wathumela umlandwakhe walindela isahlulelo sekhotho yaphezulu. Ngalokho, ‘amezwi kaJobhi ayaphela.’—Job 31:35, 40.
Ungakghona Ukubulunga Ukuthembeka
20, 21. (a) Kubayini uJobhi ahlala athembekile? (b) Singalihlawulela njani ithando ngoZimu?
20 UJobhi wakghona ukubulunga ukuthembeka kwakhe ngombana bekamthanda uZimu, begodu noJehova bekamthanda wamrhelebha. UJobhi wathi: “Wena [Jehova] uberegise kimi ukuphila nomusa wethando [“ithando lamambala”] begodu ukutlhogomela kwakho kunqophise umoyami.” (Job. 10:12) Ngaphezu kwalokho, uJobhi watjengisa bona uyabathanda abanye, atjheja bonyana nanyana ngubani onganathando lamambala kwabanye uzabe angatjengisi ukusaba okufanele uMninimandla woke. (Job 6:14) Ababulungi bokuthembeka bathanda uZimu nabomakhelwana.—Mat. 22:37-40.
21 Singahlawulela ithando ngoZimu ngokufunda iLizwi lakhe qobe begodu sizindle ngalokho elikutjhoko ngaye. Emthandazweni osuka ehliziyweni, singadumisa uJehova simthokoze ngobuhle bakhe kithi. (Fil. 4:6, 7) Singabhinela uJehova begodu sizuze ngokuhlangana nabantu bakhe qobe. (Heb. 10:23-25) Ngalokho, nathi ithando lethu ngoZimu lizokukhula njengombana sihlanganyela ekonzweni sitjhumayela “iindaba ezimnandi bona usiphulusile.” (Rha. 96:1-3) Ngendlela leyo, singabulunga ukuthembeka njengombana kwenza umrhalani owabhina wathi: “Ukutjhidela kwami kuZimu kuhle. Ngibeke isiphephelo sami eKosini eMbusi uJehova.”—Rha. 73:28.
22, 23. Njengabasekeli bobubusi bakaJehova, iimberegwethu imadaniswa njani neyababulungi bokuthembeka bokuthoma?
22 Ngaphezu kwamakhulu weemnyaka, uJehova wanikela ababulungi bokuthembeka izabelo ezinengi ezihlukahlukeneko. UNuwa wakha umkhumbi begodu gade ‘amtjhumayeli wokulunga.’ (2 Pit. 2:5) UJoshuwa wasa ama-Israyeli eNarheni Yesithembiso, kodwana waphumelela kwaphela ngombana “bekafunda incwadi yomthetho . . . imini nobusuku” wenza ngokuvumelana nayo. (Josh. 1:7, 8) AmaKrestu wangekhulu lokuthoma enza abafundi begodu bekahlangana qobe ukufunda iMitlolo.—Mat. 28:19, 20.
23 Sisekela ububusi bakaJehova begodu sibulunga ukuthembeka kwethu ngokutjhumayela ukulunga, ukwenza abafundi, ukuberegisa isiluleko soMtlolo, nokuhlangana ndawonye nesikholwa nabo emihlanganweni yebandla, nemihlanganweni emncani nemkhulu. Izenzo ezinjalo zisirhelebha bona sibe nesibindi, siqine ngokomoya, siphumelele nekwenzeni intando kaZimu. Lokhu akusibudisi khulu kithi ngombana sisekelwa nguBabethu wezulwini neNdodanakhe. (Dut. 30:11-14; 1 Kho. 8:57) Ngaphezu kwalokho, sisekelwa “bazalwana bephasi mazombe,” nabo abakhamba ngokuthembeka badumisa uJehova njengeKosi eMbusi.—1 Pit. 2:17.
Ungaphendula Njani?
• Kufuze siziqale njani iinkambisolawulo zakaJehova zokuziphatha?
• Ngiziphi iimfanelo zakaJobhi ezikukara khulu?
• Njengombana kutjengiswe kuJobhi 31:29-37, uJobhi waziphatha njani?
• Kubayini kungakghoneka ngathi ukubulunga ukuthembeka kwethu kuZimu?
[Iimbuzo Yesifundo]