Ukuthintana Nendawo Yemimoya

UZIMU UMNINIMANDLA woke wabele iimbunjwa zomoya iimberego ethileko. Isibonelo, wabeka ukubuswa kwephasi ezandleni zakaJesu Krestu, wakhetha neengilozi ezithembekileko bona zirhelebhe ukunqophisa ukutjhunyalelwa kweendaba ezimnandi. (ISambulo 14:6) Nokho, iimthandazo ihlukile. Akakabeli nanyana ngubani bona alalele iimthandazo. Iimthandazwethu kufuze inqotjhiswe kuZimu kwaphela.

UJehova ‘Mumuzwi womthandazo.’ (AmaRhalani 65:2) Uyayilalela iimthandazwethu begodu uyayiphendula. Malungana nomthandazo, umpostoli uJwanisi watlolela iinceku zakaJehova egade anazo wathi: “Sibandamela kuZimu ngesibindi, ngombana siyazi bona uyasizwa nasimbawa nayini emalungana nentando yakhe. Uyasizwa njalo lokha nesimbawako; njengombana sazi bona lokhu kuliqiniso, siyazi bona sesikuzuzile esikubawa kuye.”—1 KaJwanisi 5:14, 15.

Iingilozi ezithembekileko azifuni silinge ukukhulumisana nazo namtjhana sithandaze kizo. Ziyalazi begodu ziberegisana nelungiselelo lakaZimu lomthandazo, ngezinye iinkhathi elizibandakanya ngokunqophileko. Ngayiphi indlela? Isibonelo, umporofidi uDanyela  nekathandaza kuJehova ngokutjhatjalaliswa kweJerusalema, uZimu wawuphendula umthandazwakhe ngokuthumela ingilozi uGabriyeli nomlayezo okhuthazako.—Danyela 9:3, 20-22.

Kunemilayezo Evela Kwabahlongakeleko Na?

Kufuze silinge ukukhulumisana nabahlongakeleko? Iindaba ezinengi zikhuluma ngeenkulumiswano okungenzeka abantu ababa nazo nemimoya yabahlongakeleko. Isibonelo, umfazi we-Ireland wakhuluma nomuntu oberegelana nemimoya, owathi ngobusuku bayizolo ukhulume noFred, indoda yomfazi lo. Nokho, uFred wahlongakala eemvekeni ezimbalwa ezidlulileko. Umuntu oberegelana nemimoya lo wamtjela lokho “uFred” akutjhoko, izinto umkakhe ebekakholelwa bona zaziwa nguye kwaphela. Qala bona bekuzokuba lula kangangani ngaye ukuphetha ngokobana uFred bekaphila endaweni yemimoya begodu bekalinga ukukhuluma naye ngomuntu ongaziwako lo. Nokho, isiphetho esinjalo besizokuphikisana nalokho iBhayibhili ekutjho ngokukhanyako ngobujamo babahlongakeleko.—Qala ibhoksi elisenzasi.

Alo-ke, zingahlathululwa njani iindaba ezinjengalezi? Enye indlela amadimoni alinga ngayo ukukhohlisa abantu kulingisa umuntu ohlongakeleko, endabeni le, uFred. Uyini umnqophwawo? Kususa abantu kilokho okufundiswa yiBhayibhili nokubogabogisa ikholo nethemba labo kuJehova. Akunakuzaza, uSathana namadimoni bakhohlisa abantu ‘ngawo woke amandla, iimbonakaliso, neemmangaliso ezimamanga. Usebenzisa yoke ikohliso yokungalungi kilabo ababekelwe ukubhubha.’—2 KwebeTesalonika 2:9, 10.

Ukuqinisekisa, kunababeregelana nemimoya  nabazihlanganisa nabo abakholelwa kwamambala bona bakhuluma nabantu abahlongakalako. Kuliqiniso, nebakhuluma nabahlongakalako, bakhuluma nemimoya ephikisana noJehova. Ngokufanako, kunalabo abakholelwa bona bakhulekela uZimu, kodwana bayazikhohlisa. Umpostoli uPowula waphefumulelwa bona atlole isiyeleliso esiqinileko nasi: “Imihlabelo yabangakholwako yenzelwe amadimoni; abakuhlabeli uZimu.”—1 KwebeKorinte 10:20, 21.

Sazi bona singathandaza koPhezukoke, osithandako nositlhogomelako, kubayini singafuna ukuthandaza komunye umuntu? Ngaphezu kwalokho, iBhayibhili iyasiqinisekisa: “Malungana noJehova, amehlwakhe aqalaqala ephasini loke bonyana atjengise amandlakhe kilabo abanehliziyo epheleleko kuye.”—2 IMilando 16:9.

[Umkhangiso osekhasini 9]

Sazi bona singathandaza koPhezukoke, osithandako nositlhogomelako, kubayini singafuna ukuthandaza komunye umuntu?

[Ibhoksi/Isithombe ekhasini 8, 9]

Iqiniso Namala

IQINISO: USATHANA MUMUNTU WAMAMBALA

“USathana isibili ukhavele asele ayingilozi yokukhanya.”—2 KwebeKorinte 11:14.

“Tjhejani nilinde, inaba lenu uSathana, utjhagala hlangana nani njengengwenyama ebhodlako, efuna ezomudla.”—1 KaPitrosi 5:8.

“Loyo owonako ngewakaSathana, ngombana uSathana wona kusukela emathomeni.”—1 KaJwanisi 3:8.

“Nje-ke zithobeni kuZimu, nijamelane noSathana, uzanibalekela.”—KaJakobosi 4:7.

“USathana . . . kusukela emathomeni bekambulali, azange akhabe neqiniso, ngombana akanalo iqiniso. Nakhuluma amanga, ukhuluma lokho okuyimvelo kuye, ngombana unamanga, unguyise wamanga.”—Jwanisi 8:44.

AMALA: EKUFENI BOKE ABANTU BADLULELA ENDAWENI YEMIMOYA

“Ngengurumelakho uzokudla uburotho bakho bewubuyele ehlabathini, ngombana wathathwa kiyo. Ngombana ulithuli uzokubuyela ethulini.”—Genesisi 3:19.

“Abaphilako bayazi bonyana bazokuhlongakala, kodwana abahlongakeleko abazi litho.”—UMtjhumayeli 9:5.

“Koke isandla sakho esikghona ukukwenza, kwenze ngamandlakho woke, ngombana akunamsebenzi, amano, ilwazi namtjhana ukuhlakanipha eShiyoli [emazindleni], indawo oya kiyo.”—UMtjhumayeli 9:10.

“Umoyakhe uyaphuma, abuyele ehlabathini; ngelangelo iimkhumbulwakhe iyaphela.”—AmaRhalani 146:4.

IQINISO: IINGILOZI EZITHEMBEKILEKO ZIYASIKHATHALELA

“Ingilozi kaJehova ikampe mahlangothi woke walabo abamsabako, uyabaphulusa.”—AmaRhalani 34:7; 91:11.

“Iingilozi ziyini na? zithunywe nguye bona zisize labo abayokudla ilifa lephuluso.”—KumaHebheru 1:14.

“Ngabona ingilozi iphapha phezulu emkhathini, iphethe iindaba ezimnandi nezingapheliko ebe izozitjhumayela ebantwini bephasi, kizo zoke iintjhaba, nemindeni, neenlimi namakoro. Yarhuwelela yathi: ‘Mesabeni uZimu niphakamise idumo lakhe!’”—ISambulo 14:6, 7.

AMALA: UJESU ULINGANA NOZIMU

‘Ngifuna nazi bona uKrestu uyihloko yendoda, njengombana ihloko yowesifazana kuyindoda, kanti ihloko kaKrestu nguZimu.’—1 KwebeKorinte 11:3.

“Lapho koke sekubekwe ngaphasi kweNdodana, yona ngokwayo iyozibeka ngaphasi koZimu, owabeka koke ngaphasi kwayo, uZimu abuse jikelele ngaphezu kwakho koke.”—1 KwebeKorinte 15:28.

“Kwamambala ngithi kini: INdodana angekhe yenze litho ngokwayo, yenza lokho ebone uYise akwenza.”—Jwanisi 5:19.