Kubayini Iimtjhado Eemnengi Ibhalelwa?

“AbaFarisi beza kuye [uJesu], balinga ukumthiya ngokumbuza bathi: ‘Umthetho wekhethu uyayivumela indoda itlhalane nomkayo namtjhana ngasiphi isizatho enaso na?’”—Matewu 19:3.

ABANYE ebebaphila ngesikhathi sakaJesu babuza bona umtjhado ungahlala namtjhana kufuze uhlale isikhathi eside. UJesu wathi kibo: “Azange khenifunde imitlolo ethi emathomeni uMbumbi wabumba omduna nomsikazi na? Yeke uZimu wathi: ‘Ngesizathwesi indoda izatjhiya uyise nonina ihlale nomkayo, ababilaba bazaba munye.’ Abasesebabili, kodwana banye. Yeke umuntu akangahlukanisi okuhlanganiswe nguZimu.” * (Matewu 19:4-6) Kuyakhanya, uZimu bekanqophe bona iimtjhado ihlale isikhathi eside.

Eenarheni ezinengi namhlanje, amaphesenti ama-40 namtjhana ngaphezulu wayo yoke iimtjhado ‘ayahlukana’ agcine ngokutlhala. Isiluleko seBhayibhili malungana nomtjhado siphelelwe sikhathi? Kungenzeka bona iimtjhado ibhalelwa ngombana ilungiselelo lomtjhado linephoso?

Cabangela umfanekiso naku: Iimkhaya eembili ithenga umhlobo ofanako wekoloyi. Omunye umkhaya uyitlhogomela kuhle ikoloyawo begodu uyitjhayela ngokuyelela. Ikoloyawo ayiphuki. Omunye umkhaya awuziphi isikhathi namandla wokutlhogomela ikoloyawo, bewuyitjhayela butjhapha. Ikoloyi leyo iyaphuka begodu uyayinghala. Iphoso ibe kuphi—isekoloyini namtjhana kubanikazi? Kusepakameni bona abanikazi ngibo abanomlandu omkhulu.

Ngokufanako, bona iimtjhado eemnengi iyabhalelwa akutjho bonyana ilungiselelo lomtjhado linephoso ngendlela ethileko. Iingidi zeemtjhado ephumelelako zitjengisa lokho. Iimtjhado leyo iletha ithabo nokunzinza kumuntu ngamunye, eemndenini neemphakathini. Kodwana umtjhado, njengekoloyi, utlhoga ukutlhogonyelwa kuhle nokulungiswa newuzakuhlala isikhathi eside.

Bona usand’ ukutjhada namtjhana unesikhathi eside utjhadile, isiluleko seBhayibhili sokobana ungawutlhogomela begodu uwuqinise njani siberega kwamambala. Emakhasini alandelako tjheja ezinye zeembonelo.

[Umtlolo waphasi]