Funda ELizwini LakaZimu

Ngubani UZimu?

Isihlokwesi siphakamisa iimbuzo okungenzeka wazibuza yona, bese sikutjengisa bona ungazifumanaphi iimpendulo eBhayibhilinakho. AboFakazi BakaJehova bangakuthabela ukucoca nawe ngeempendulwezi.

1. Ngubani UZimu?

UZimu weqiniso Mbumbi wazo zoke izinto. IBhayibhili imbiza ngokobana ‘yiKosi ebusa ngokungapheliko,’ okutjho bona azange abe nesithomo begodu angekhe abe nesiphetho. (1 KuThimothi 1:17) Njengombana uZimu aMthombo wokuphila, kufuze sikhulekele yena kwaphela.—Funda ISambulo 4:11.

2. Unjani UZimu?

Akakho okhe wabona uZimu ngombana uMumoya, okutjho bona ulihlobo lokuphila eliphakemeko kuneembunjwa zenyama eziphila ephasini. (Jwanisi 1:18; 4:24) Ubuntu bakaZimu bubonakala eentweni azenzileko. Isibonelo, nesicabanga ngokwakheka neemhlobo yeenthelo namathuthumbo, sibona ithando nokuhlakanipha kwakaZimu. Ubukhulu bendawo yoke busitjengisa amandlakhe.—Funda KwebeRoma 1:20.

Singafunda nokhunye okunengi ngobuntu bakaZimu eBhayibhilini. Isibonelo, isitjela bona yini uZimu ayithandako nangayithandiko, ubaphatha njani abantu, begodu uqalana njani nobujamo obuhlukahlukeneko.—Funda IRhalani 103:7-10.

3. UZimu Unalo Ibizo?

UJesu wathi: “Baba wethu osezulwini; ibizo lakho alicwengiswe.” (Matewu 6:9) Ngitjho nofana uZimu aneziqu ezinengi, unebizo elilodwa tere. Elinye nelinye ilimi linendlela yalo yokuliphimisela. NgesiNdebele sithi “Jehova.”—Funda IRhalani 83:18.

Ibizo lakaZimu lisusiwe eemBhayibhilini ezinengi lajanyiselelwa ngeziqu ezithi Kosi namtjhana Zimu. Kodwana nekutlolwa iBhayibhili, ibizo lakaZimu belivela iinkhathi ezingaba zi-7 000. UJesu wenza ibizo lakaZimu laziwa ngokulisebenzisa nekahlathululela abantu iLizwi LakaZimu. Warhelebha abantu bona bazi uZimu.—Funda uJwanisi 17:26.

  4. UJehova Unendaba Nathi?

UJehova utjengisa ikareko anayo kithi ngokuyilalela yena ngenyama iimthandazo yethu. (IRhalani 65:2) Kghani ukwanda komtlhago kutjho bona uZimu akanandaba nathi? Abanye abantu bathi uZimu uyasitlhagisa ngombana asilinga, kodwana lokho akusiliqiniso. IBhayibhili ithi: “Akube kude noZimu weqiniso ukwenza ngendlela ekhohlakeleko.”—Jobhi 34:10; funda KaJakobosi 1:13.

UZimu uhloniphe umuntu ngokumnikela ilungelo lokuzenzela iinqunto. Asiyithabeli na ikululeko yokuzikhethela ukukhonza uZimu? (Joshuwa 24:15) Umtlhago wanda ngombana abanengi bakhetha ukwenza izinto ezimbi kwabanye. Kumzwisa ubuhlungu uJehova ukubona ukungalungi okunjalo.—Funda uGenesisi 6:5, 6.

Msinyana, uJehova uzokusebenzisa uJesu ukuqeda umtlhago nalabo abawubangelako. Okwanje, uJehova unamabanga azwakalako wokuvumela umtlhago isikhatjhana, njengombana nobaba onethando enza nekathatha umntwanakhe bona ayokufumana ukunyangwa kwezamaphilo. Esinye seenhloko ezilandela ehlelweneli sizokuhlathulula bona kubayini uZimu avumela umtlhago.—Funda u-Isaya 11:4.

5. UZimu Ufuna Senzeni?

UJehova usidale saba nekghono lokumazi nokumthanda. Ufuna sifunde iqiniso ngaye. (1 KuThimothi 2:4) Nesitaditjha iBhayibhili, sizomazi njengoMngani.—Funda Iziyema 2:4, 5.

Njengombana uJehova asiphe ukuphila, kufuze simthande ukudlula nanyana ngubani. Singatjengisa uZimu bona siyamthanda ngokukhuluma naye ngomthandazo nangokwenza lokho afuna sikwenze. (Iziyema 15:8) UJehova ufuna siphathe abanye abantu ngethando.—Funda uMarkosi 12:29, 30; 1 KaJwanisi 5:3.

[Umkhangiso osekhasini 23]

Ukufumana ilwazi elingeziweko, qala isahluko-1 sencwadi le Khuyini Kwamambala Okufundiswa YiBhayibhili?, egadangiswe boFakazi BakaJehova.

[Isithombe ekhasini 23]

Likhona ibanga elizwakalako lokuvumela umtlhago isikhatjhana?