Yamukela Umoya KaZimu Ingasi Wephasi

‘Asikamukeliswa umoya wephaseli, kodwana samukeliswe umoya ovela kuZimu, ze sikwazi lokho uZimu asiphe khona.’—1 KOR. 2:12.

1, 2. (a) AmaKrestu weqiniso asepini ngamuphi umqondo? (b) Ngimiphi iimbuzo esizoyicabangela?

AMAKRESTU weqiniso asepini! Inaba lethu linamandla, linobuqili begodu lisisilwi. Linesikhali esinamandla kangangobana sesihlule abantu abanengi. Kodwana akukafuzi sizizwe singanamandla namtjhana sihlulekile. (Isa. 41:10) Sinesivikelo esingakwazi ukujamelana nananyana ngikuphi ukusahlelwa.

² Ipethu ayisiyo yenyama; ingokomoya. Inaba lethu nguSathana uDeveli, begodu isikhali esikhulu asiberegisako “umoya wephaseli.” (1 Kor. 2:12) Isivikelo sethu esiyihloko malungana nokusahlela kwakhe mumoya kaZimu. Bona sithumbe epini le sihlale sinobuhlobo obuseduze noZimu, kufuze sibawe umoya kaZimu bese sitjengisa iinthelo zawo ekuphileni kwethu. (Gal. 5:22, 23) Alo-ke, uyini umoya wephasi, begodu ube njani nomthelela ongaka? Singabona njani bona umoya wephaseli unomthelela kithi? Begodu singafundani kuJesu ngokufumana umoya kaZimu nokulwisana nomoya wephaseli?

Umoya Wephasi—Kubayini Urhatjheke Kangaka?

3. Uyini umoya wephasi?

³ Umoya wephasi uvela kuSathana, “umphathi wephaseli,” begodu uphikisana nomoya kaZimu ocwengileko. (Jwa. 12:31; 14:30; 1 Jwa. 5:19) Kutjhigamela kwephasi okunamandla, begodu kudosela abantu esenzweni. Amandla aphilisako la adosela umphakathi wesintu ekuphikisaneni nentando nomnqopho kaZimu.

4, 5. Umoya othuthukiswa nguSathana warhatjheka njani kangaka?

⁴ Umoya uSathana awuthuthukisako urhatjheke njani kangaka? Kokuthoma, uSathana wadukisa u-Efa esimini ye-Edeni. Wamkhohlisa ngokobana athi ukungabuswa nguZimu kuzokuthuthukisa ukuphila kwakhe. (Gen. 3:13) Amala ahlaza tlabha! (Jwa. 8:44) Bese, ngomfazi, wenza u-Adamu bona angathembeki kuJehova. Ngokukhetha kwaka-Adamu, isintu sathengiswa esonweni, ngebanga lalokho salandela umoya kaSathana wokungalaleli.—Funda Kwebe-Efesu 2:1-3.

⁵ USathana godu waba nomthelela enanini elikhulu leengilozi, ezaba madimoni. (ISam. 12:3, 4) Ukulahla uZimu okunjalo kwenzeka  ngesikhathi esithileko ngaphambi koKukhulamungu wangesikhathi sakaNuwa. Iingilozezo zakholelwa bona nezingatjhiya izabelo zazo ezulwini, zilandele ngokungabi neenhloni iimfiso ezingasi ngokwemvelo ephasini, kuzozikhambela kuhle. (Juda 6) Ngerhelebho lamadimoni la, kwanje asele abuyele endaweni yemimoya, uSathana ‘ukhohlisa iphasi loke.’ (ISam. 12:9) Ngokudanisako, inengi lesintu lihlala lingawazi umthelela wamadimoni.—2 Kor. 4:4.

Umoya Wephasi Unomthelela Kuwe?

6. Ngiyiphi okukuphela kwendlela umoya wephaseli ongaba nomthelela ngayo kithi?

⁶ Abanengi abawuboni umthelela kaSathana, kodwana amaKrestu weqiniso ayawazi amaqhinga wakhe. (2 Kor. 2:11) Eqinisweni, umoya wephasi angekhe ube nomthelela kithi ngaphandle kobana siwuvumela. Akhe sihlahlubeni iimbuzo emine ezosisiza bonyana sibone bona singaphasi komthelela womoya kaZimu namtjhana wephasi.

7. Ngiyiphi enye indlela uSathana alinga ngayo ukusihlukanisa noJehova?

⁷ Zokuzithabisa engizikhethako zivezani ngami? (Funda KaJakobosi 3:14-18.) USathana ulinga ukusihlukanisa noZimu ngokuphehla umoya wenturhu eenhliziyweni zethu. UDeveli uyazi bona uJehova uzonda nanyana ngubani othanda inturhu. (Rha. 11:5) Ngalokho, uSathana ulinga ukusebenzisa iincwadi, amabhayisikobho, umbhino neemdlalo ye-electronic, eminye yayo eyenza abadlali balingise ukuziphatha okumbi khulu nelunya—bona kuvuse iimfiso zethu zenyama. USathana akanandaba nengabe ingcenye yehliziyo yethu ithanda okulungileko, kwaphela nengabe ingcenye yayo ithanda okumbi, akuthuthukisako.—Rha. 97:10.

8, 9. Ngimiphi iimbuzo malungana nezokuzithabisa okufuze sizibuze yona?

⁸ Ngakelinye ihlangothi, umoya kaZimu utjhukumisa labo abawufumanako bona babe msulwa, babe nokuthula nomusa omkhulu. Kufuze sizibuze, ‘Zokuzithabisa engizikhethako zingikhuthaza bona ngibe neemfanelo ezihle?’ Ukuhlakanipha kwaphezulu ‘akunakuzenzisa.’ Labo abanqotjhiswa mumoya kaZimu abatjhumayeli ngobumsulwa nokuthula kibomakhelwana babo kodwana kungilapho bona bathabela ukubukela inturhu ehlahlathelisa umzimba nokuziphatha okumbi nebabodwa emzinabo.

⁹ UJehova ulindele bona sizinikele ngokupheleleko. Nokho, uSathana anganeliseka ngesenzo sinye tere sokumkhulekela, njengombana bekafuna kwenze uJesu. (Luka 4:7, 8) Singazibuza: ‘Zokuzithabisa engizikhethako zenza ngikghone ukuzinikela ngokukhethekileko kuZimu? Ukukhetha kwami kwenza kube budisi namtjhana kube lula ngami ukwala umoya wephasi? Kufuze ngitjhentjhe indlela engikhetha ngayo zokuzithabisa esikhathini esizako?’

10, 11. (a) Malungana nezinto eziqalekako, ngiwuphi umbono othuthukiswa mumoya wephasi? (b) ILizwi lakaZimu eliphefumulelwe ngomoya likhuthaza wuphi umbono?

¹⁰ Uyini umbonwami malungana nezinto eziqalekako? (Funda uLuka 18:24-30.) Umoya wephasi uthuthukisa “iinkanuko ezimbi” ngokukhuthaza uburhamaru nezinto eziqalekako. (1 Jwa. 2:16) Ukhulise ukuzimisela kwabantu abanengi ukufuna ukurega. (1 Thi. 6:9, 10) Umoya loyo usenza sikholelwe bona ukubuthelela izinto eziqalekako kuzosilethela isivikelo esingapheliko. (Iziy. 18:11) Nokho, nesithanda imali khulu ukudlula ukuthanda uZimu, uSathana uzobe athumbile. Kufuze sizibuze, ‘Ukuphila kwami kudzimelele ekufuneni ukuzigedla ngezinto eziqalekako nezokuzithabisa?’

¹¹ Ngokuphambeneko, iLizwi lakaZimu eliphefumulelwe ngomoya lisikhuthaza bona sibe nombono olinganiselweko ngemali nokuberega budisi bona sizitlhogomele thina neemndenethu ngezinto eziqalekako. (1 Thi. 5:8) Umoya kaZimu urhelebha labo abawamukelako bona batjengise ubuntu bakaJehova bokupha. Abanjalo baziwa njengabaphi, ingasi  njengabamukeli. Baqala abantu njengabaqakatheke khulu kunezinto eziqalekako begodu bathabela ukuhlanganyela abanakho nabanye nebakghonako ukwenza njalo. (Iziy. 3:27, 28) Abavumeli ukufuna imali kuze qangi kunokukhonza uZimu.

12, 13. Ngokuphambene nomoya wephasi, umoya kaZimu usizuzisa njani?

¹² Ubuntu bami butjengisa wuphi umoya? (Funda KwebeKholose 3:8-10, 13.) Umoya wephasi uthuthukisa iimberego yenyama. (Gal. 5:19-21) Ivivinyo lamambala lokobana ngimuphi umoya onomthelela kithi, alizi izinto nezikhamba kuhle, kodwana nezingakhambi kuhle, njengalapho umzalwana nofana udade omKrestu angasinaki, asikhuba, namtjhana asona. Ngaphezu kwalokho, nesingemsitheleni emakhaya, kungabonakala bona sivumela umoya ocwengileko namtjhana wephasi bona ube nomthelela kithi. Ukuzihlola kuyafaneleka. Zibuze, ‘Eenyangeni ezisithandathu ezidlulileko, ubuntu bami bube njengebakaKrestu namtjhana ngibuyele emikghweni emimbi yokukhuluma nokuziphatha?’

¹³ Umoya kaZimu ungasirhelebha bona ‘silahle isimo esidala nemikghwaso’ sembathe “isimo esitjha.” Lokho kuzosirhelebha sibe nethando elikhulu nomusa. Sizokukghona ukulibalelana ngokutjhaphulukileko, ngitjho nofana kunebanga elizwakalako lokunghonghoyila. Nesiphethwe kumbi ngekhe ‘sibambelane amavunda, sithathe ngobukhali, sibange itjhada, sithukane.’ Kunalokho, sizokwenza umzamo wokuba “nesisa komunye nomunye.”—Efe. 4:31, 32.

14. Abantu abanengi ephasini baliqala njani iLizwi lakaZimu?

¹⁴ Ngiyazihlonipha begodu ngiyazithanda iinkambisolawulo zeBhayibhili zokuziphatha? (Funda Iziyema 3:5, 6.) Umoya wephasi utjengisa ukuhlubuka eLizwini lakaZimu. Labo ababanjwe mumoya lo abanandaba nalokho abakuqala njengeengcenye ezithikazisako zeBhayibhili ezingavumelani nabo, kunalokho babhederisa amasiko namafilosofi wabantu. (2 Thi. 4:3, 4) Abanye abalihloniphi ngokupheleleko iLizwi lakaZimu. Abanjalo bazaza bona iBhayibhili iqakathekile nokobana iliqiniso, bazibona bahlakaniphile emehlwenabo. Baqalela phasi iinkambisolawulo zalo ezihlwengileko ezimalungana nobuhlola, ukuthandana kwabantu bobulili obufanako nokutlhala. Bafundisa bona “okuhle kumbi nokumbi kuhle.” (Isa. 5:20) Umoya lo uyasithinta na? Sithembele ekuhlakanipheni kwabantu, kuhlanganise neembonwenethu nesiqalene neemraro? Namtjhana silwela ukulandela isiluleko seBhayibhili?

15. Kunokuthembela ekuhlakanipheni kwethu, khuyini okufuze siyenze?

¹⁵ Umoya kaZimu usenza sihloniphe iBhayibhili. Njengomrhalani, siqala ilizwi lakaZimu njengelampa eenyaweni nokukhanya endleleni  yethu. (Rha. 119:105) Kunokuthembela ekuhlakanipheni kwethu, sithembela ngokuqiniseka eLizwini lakaZimu elitloliweko bona lisirhelebhe sihlukanise okulungileko kokumbi. Sifunda ukungahloniphi kwaphela iBhayibhili, kodwana nokuthanda umthetho kaZimu.—Rha. 119:97.

Funda Esibonelweni SakaJesu

16. Kuhlanganisani ukuba ‘nomkhumbulo kaKrestu’?

¹⁶ Bona samukele umoya kaZimu, kufuze sihlawulele “umkhumbulo kaKrestu.” (1 Kor. 2:16) Ukuba “nomoya munye wokunyamazela njengombana simlingisa uKrestu uJesu,” kufuneka sazi indlela egade afundisa begodu enza ngayo bese siyamlingisa. (Rom. 15:5; 1 Pit. 2:21) Cabangela iindlela esingakwenza ngazo lokho.

17, 18. (a) Sifundani kuJesu malungana nomthandazo? (b) Kubayini kufuze ‘siragele phambili sibawa’?

¹⁷ Thandazela umoya kaZimu. Ngaphambi kokuqalana neenlingo, uJesu wathandazela umoya kaZimu bona umrhelebhe. (Luka 22:40, 41) Nathi kufuze sibawe uZimu bona asiphe umoya wakhe ocwengileko. UJehova ubapha simahla nangesandla esivulekileko boke abawubawa ngekholo. (Luka 11:13) UJesu wathi: “Bawani, nizaphiwa; funani nizafumana; kokodani nizavulelwa. Ngombana loyo naloyo obawako uzaphiwa, naloyo ofunako uzafumana, naloyo okokodako uzavulelwa.”—Mat. 7:7, 8.

¹⁸ Newufuna irhelebho nomoya kaJehova, ungarhabi khulu ukulisa ukuwubawa. Kungatlhogeka sithandaze kanengana, siphikelele emthandazweni. Ngezinye iinkhathi, uJehova angavumela abambawako batjengise bona batshwenyeke kangangani, nokobana ikholo labo liqine kangangani ngaphambi kokuphendula iimthandazo yabo. *

19. Yini uJesu egade ayenza ngaso soke isikhathi, begodu kubayini kufanele simlingise?

¹⁹ Lalela uJehova ngokupheleleko. Ngaso soke isikhathi uJesu wenza izinto ezithabisa uYise. Okunganani esehlakalweni esisodwa, indlela uJesu ebekangathanda ukuqalana ngayo nobujamo gade ingafani naleyo efunwa nguYise. Kodwana, ngokuqiniseka wathi kuYise: ‘Kungenzeki intando yami, kodwana intando yakho.’ (Luka 22:42) Zibuze, ‘Ngiyamlalela uZimu ngitjho nanyana ukwenza njalo kungasibulula?’ Ukulalela uZimu yindaba yokufa nokuphila. Kufuze simlalele ngokupheleleko ngombana Mbumbi, uMthombo noMsekeli wokuphila kwethu. (Rha. 95:6, 7) Ayikho into engathatha isikhundla sokulalela. Ngeze sawufumana umusa kaZimu ngaphandle kokulalela.

20. Ukuphila kwakaJesu bekudzimelele kuphi, begodu singamlingisa njani?

²⁰ Yazi kuhle iBhayibhili. Nekalwisana nokuhlasela kwakaSathana okunqophileko kwekholo lakhe, uJesu wadzubhula eMitlolweni. (Luka 4:1-13) Nekaqalene nabaphikisi bekolo, uJesu wasebenzisa iLizwi lakaZimu njengegunya lakhe. (Mat. 15:3-6) Koke ukuphila kwakaJesu bekudzimelele ekwazini nekuzaliseni umthetho kaZimu. (Mat. 5:17) Nathi kufuze sihlale sondla iingqondo zethu ngeLizwi lakaZimu eliqinisa ikholo. (Fil. 4:8, 9) Ukufumana isikhathi sesifundo somuntu mathupha nesomndeni kungaba budisi kwabanye bethu. Nokho, kunokufumana isikhathi, kungatlhogeka sisenze.—Efe. 5:15-17.

21. Ngiliphi ilungiselelo elingasirhelebha bona silazi ngcono iLizwi lakaZimu begodu silisebenzise?

²¹ ‘Inceku ethembekileko nehlakaniphileko’ isirhelebhe bona sibe nesikhathi sesifundo somuntu mathupha nesomndeni ngokuhlela bona kube nelanga lokuKhulekela Komndeni qobe veke. (Mat. 24:45) Ulisebenzisa  ngokuhlakanipha ilungiselelweli? Ukukurhelebha bona ube nomkhumbulo kaKrestu, esifundweni sakho, ungakwazi ukuhlanganisa ihlelo lokucabangela lokho okwafundiswa nguJesu ngendaba ethileko oyikhethako? Ungasebenzisa i-Watch Tower Publications Index ukufumana ukwaziswa ngendaba ofuna ukufunda ngayo. Isibonelo, kusukela ngo-2008 kuya ku-2010, igadangiso lomphakathi lakamagazini INqabayokulinda laba nomlandelande weenhloko ezi-12 ezithi “Lokho Esikufunda KuJesu.” Mhlamunye ungathanda ukusebenzisa iinhlokwezi njengesisekelo sesifundo sakho. Kusukela ngo-2006, i-Phaphama! beyineenhloko ezithi “Ubungaphendula Kanjani?” Iimbuzo erarejako leyo yenzelwa ukwandisa nokudephisa ilwazi lakho leLizwi lakaZimu. Kubayini ungahlanganisi ukwaziswa okunjalo ekuKhulekeleni kwakho Komndeni ngeenkhathi ezithileko?

Singalihlula Iphasi

22, 23. Kufuze senzeni bona sihlule iphasi?

²² Bona sinqotjhiswe mumoya kaZimu, kufuze silwisane nomoya wephasi. Ukwenza lokho akusibulula. Kungaba mzabalazo, ipi ebudisi. (Juda 3) Kodwana singahlula! UJesu wathi ebafundini bakhe: “Ephasinapha nizatlayiseka, kodwana yibani nesibindi! Ngilahlule iphaseli!”—Jwa. 16:33.

²³ Nathi singalihlula iphasi nesilwa nomoya walo begodu senze koke okusemandlenethu ukufumana umoya kaZimu. Kwamambala, ‘uZimu nekajame ngakithi, alo-ke ngubani ongajamelana nathi na?’ (Rom. 8:31) Ngokufumana umoya kaZimu nokulandela isinqophiso sawo njengombana sitlolwe eBhayibhilini, sizokufumana ukwaneliseka, ukuthula, ithabo, nesiqinisekiso sokuphila okungapheliko ephasini elitjha eliseduze.

[Umtlolo waphasi]

Uyakhumbula?

• Kubayini umoya wephasi urhatjheke kangaka?

• Ngimiphi iimbuzo emine okufuze sizibuze yona?

• Ngiziphi izinto eentathu esizifunda kuJesu ngokufumana umoya kaZimu?

[Iimbuzo Yesifundo]

[Isithombe ekhasini 10]

Ezinye iingilozi zaba njani madimoni?

[Isithombe ekhasini 12]

USathana uberegisa umoya wephasi ukulawula abantu, kodwana singatjhaphuluka emthelelenawo