Tjhidela KuZimu

Induduzo Kilabo Abaneenhliziyo Eziphukileko

‘UJEHOVA ngeze angithanda.’ Watjho njalo omunye umfazi omKrestu olwisane nokugandeleleka isikhathi eside sokuphila kwakhe. Waziqinisekisa ngokobana uJehova kufuze bona ukude naye. UJehova ukude nabakhulekeli bakhe okungenzeka bagandelelekile? Ipendulo etjhiriyako ifumaneka emezwini womrhalani uDavidi atlolwe kuRhalani 34:18.

UDavidi bekazi bona ukugandeleleka okudluleleko kungaba namuphi umphumela emkhulekelini kaJehova othembekileko. Ngesikhathi alisokana, uDavidi waphila njengombaleki, azunywa nguSawula, ikosi enomona ebeyizimisele ukumbulala. UDavidi wabalekela endaweni ebekacabanga bona uSawula ngeze ayomfuna kiyo—umuzi wamanaba weGathi, endaweni yamaFilistiya. Kodwana ngemva kobana bambone, uDavidi wasinda ngokulambisa ngokuzenza ihlanya. UDavidi wadumisa uZimu ngokuphuluka kwakhe begodu ngokusekelwe kilokho okwamehlakalelako, watlola iRhalani 34.

UDavidi bekakholelwa bona uZimu ukude khulu nalabo okuthi ngebanga lokugandeleleka badane namtjhana bazizwe bangafanelwa litjhejo Lakhe? UDavidi uyatlola: “UJehova useduze nalabo abaneenhliziyo eziphukileko; nalabo abaphukileko emoyeni uyabaphulusa.” (Ivesi 18) Akhe sibone indlela amezwi la atjhiriya begodu anikele ithemba ngayo.

“UJehova useduze.” Enye incwadi ithi amezwi la “ayindlela ekhanyako yokuthi iKosi iyatjheja begodu iyatlhogomela, ngaso soke isikhathi ikulungele ukusiza nokuphulusa abantu bayo.” Kuqinisa idolo ukwazi bona uJehova uyabatjheja abantu bakhe. Uyayibona iimraro abaqalana nayo ‘kilemihla yokuphela,’ wazi namazizo wabo angeneleleko.—2 Thimothi 3:1; IZenzo 17:27.

“Labo abaneenhliziyo ezaphukileko.” Kwamanye amasiko, amezwi athi, ‘ihliziyo ephukileko’ adlulisela umqondo wokuthanda umuntu ongakuthandiko. Kodwana esinye isazi sithi amezwi womrhalani aqalisele “khulu esizini nekudaneni okujayelekileko.” Kwamambala, ngitjho nabakhulekeli bakaZimu abathembekileko bangaqalana nobudisi obudluleleko obubaphula iinhliziyo.

“Labo abaphukileko emoyeni uyabaphulusa.” Abadanileko bangazinyaza kangangobana isikhatjhana bangalahlekelwa ngilo loke ithemba. Incwadi yabatjhugululi beBhayibhili ithi amezwi la angabekwa ngokobana “labo abanganalitho elihle abangaqala phambili kilo.”

UJehova usabela njani kilabo “abaneenhliziyo eziphukileko nalabo abaphukileko emoyeni”? Uzitjhidisela kude nabo, anamazizo wokobana abafanelwa lithando netjhejo lakhe? Wenza okuphambene nalokho! Njengombelethi onethando obamba begodu atjhiriye umntwanakhe ogandelelekileko, uJehova useduze nabakhulekeli bakhe abalilela isizo lakhe. Uzimisele ukutjhiriya nokuthoba iinhliziyo nomoya wabo ophukileko. Angabanikela ukuhlakanipha namandla atlhogekako bona bakghodlhelele nanyana ngiziphi iinlingo abangaqalana nazo.—2 Korinte 4:7; Jakobosi 1:5.

Kubayini ungenzi irhubhululo lokobana ungatjhidela njani eduze kwakaJehova? UZimu onethando lo uyathembisa: “Ngizokuhlala . . . naloyo ophukileko nophasi emoyeni, bona ngivuselele umoya wophasi ngivuselele nehliziyo yalabo abaphulwako.”—Isaya 57:15.