Bengifuna Ukuba Njengendodakazi KaJafta

Njengombana ilandiswa nguJoanna Soans

Nengisesemutjha, ngaba nesifiso esinamandla sokuba njengendodakazi kaJafta. Akhe ngihlathulule bona bengicabangani nokobana ngokukhamba kwesikhathi ngaba njani njengayo.

NGO-1956, ngaya emhlanganweni waboFakazi BakaJehova wesifunda kokuthoma eBombay (nje ebizwa iMumbai), e-India, begodu lokho kwatjhentjha ukuphila kwami. Ngathintwa khulu yikulumo ebeyikhuluma ngendodakazi kaJafta engayizwa lapho.

Njengombana kungenzeka ukhe wafunda eBhayibhilini, indodakazi kaJafta okungenzeka beyiseseyitjha, yenza isivumelwano sokungatjhadi. Lokhu kwenza bona kukghoneke ngoyise ukuzalisa isifungo asenzako. Ngalokho wakhonza njengomfazi ongakatjhadi endlini kaJehova namtjhana etabarnakele, ukuphila kwakhe koke.—AbaHluleli 11:28-40.

Qala bona bengifuna ukufana nayo kangangani! Kodwana ngaqalana nomraro omkhulu—ukuhlala ungakatjhadi bekuphikisana nesiko lethu e-India ngesikhatheso.

Umlando Womndeni Wekhaya

Bengimntwana wesihlanu ebantwaneni abasithandathu ababelethwe nguBenjamin noMarcelina Soans e-Udipi, edorobheni elisetjhingalanga emagega ne-India. Ilimi lekhaya yisiTulu, lilimi elikhulunywa babantu pheze abaziingidi eembili. Nokho, njengabantu abanengi e-Udipi, safunda ngelimi lesiKannada.

Ukutjhada nokuba nabentwana gade kuyinto eqakathekileko endaweni le. Nengisakhulako angikhumbuli ngizwa amezwi athi “ukungatjhadi,” “isizungu,” namtjhana “ukukhumbula ekhaya.” Gade kungathi ubujamo obunjengalobo abukho. Isibonelo, besihlala soke nogogo nobamkhulu, abomalume, abokghari, abomani nabomzala abayitjhumi nambili!

Ngokwesiko, besiyingcenye yomndeni kamma. Imvelaphi yomndeni beyilandelelwa ngaye, begodu abantazana bebafumana ingcenye ekulu yelifa. Kweminye iimndeni yamaTulu, umntazana bekaragela phambili ahlala nommakhe ngemva komtjhado bese indodakhe iyakhamba iyokuhlala nabo.

Njengombana bekhaya besele bazibiza ngamaKrestu, ezinye izinto bezihlukile. Ubusuku obunye nobunye, ubamkhulwami bekadosa umndeni phambili nekukhulekwako, athandaza begodu afunda iBhayibhili ngokuzwakalako ngelimi lesiTulu. Qobe nekavula iBhayibhilakhe elupheleko bona asifundele, bekungathi uvula ibhoksi lamagugu. Bekuthabisa kwamambala! IRhalani 23:1 belingikara: ‘[UJehova] unguMelusi wami, angizukutlhoga litho.’ Ngazibuza, ‘Ngubani uJehova, begodu kubayini abizwa ngokuthi ungumelusi?’

“Ikungu” Yasuka Emehlwenami

Ngebanga lobudisi bezomnotho ngemva kwePi yePhasi II, safudukela eBombay, indawo emakhilomitha ama-900 ukusuka la besihlala khona. Lapho, ngomnyaka ka-1945, aboFakazi BakaJehova ababili bavakatjhela ubaba bebamnikela incwajana yeBhayibhili. Ubaba wafunda umlayezo wayo ngokuzimisela wawamukela njengehlabathi eyomileko emunya amanzi wezulu, begodu wathoma ukuhlanganyela umlayezwayo nabanye abakhuluma isiKannada. Ekuthomeni  kwabo-1950, besele kukhule isiqhema esincani sokuthoma sebandla lelimi lesiKannada eBombay.

UBaba noMma basifundisa thina abantwana bona sibe bafundi beBhayibhili abakhutheleko nabafundisi abahle. Qobe langa, bafumana amathuba wokuthandaza nokufunda nathi. (Duteronomi 6:6, 7; 2 KuThimothi 3:14-16) Langelinye njengombana ngifunda iBhayibhili, ikungu yasuka emehlwenami. Ngafunda bona uJehova ufaniswe nomelusi ngombana unqophisa, ondle begodu avikele abakhulekeli bakhe.—IRhalani 23:1-6; 83:18.

UJehova Wabamba Isandla Sami

Ngabhabhadiswa msinyana ngemva komhlangano wesigodi engekhe ngawulibala ogade useBombay ngo-1956. Ngemva kweenyanga ezisithandathu, ngalandela isibonelo somnakwethu omdala uPrabhakar ngaba yiphayona lesikhathi esizeleko. Namtjhana benginetjisakalo yokuhlanganyela amaqiniso weBhayibhili nabanye, ngavele ngatjha amathe njengombana ngilinga ukukhuluma ngalokho engikukholelwako. Ngangunguza, begodu ilizwi lami belihlengezela. Ngalila ngathi, ‘Ngingawenza ngesizo lakaJehova kwaphela umsebenzi lo!’

Ngafumana isizo lakaJehova ngeenthunywa zevangeli uHomer noRuth McKay ababuya eCanada, abaya esikolweni sokubandula iinthunywa zevangeli saboFakazi BakaJehova eNew York, e-U.S.A., ngo-1947. Kwaba sengathi babambe isandla sami, njengombana benginganalo ikghono nengithoma ikonzo. Qobe uRuth bekaphrakthisa nami iintjumayelo zokutjhumayela endlini ngendlu. Bekakwazi kuhle ukwehlisa ivalo lami. Bekabamba izandla zami ezihlengezelako athi, “Ungatshwenyeki s’thandwa.” Asilinge indlu elandelako.” Ilizwi lakhe eliqinisekisako langipha isibindi.

Langelinye, ngatjelwa bona u-Elizabeth Chakranarayan, umfundisi weBhayibhili okhulileko onokuhlangabezanwe nakho sekazokuba mlinganami ekonzweni. Ekuthomeni ngathi: ‘Ngizokukghona njani ukuhlala nodade lo?’ Mdala khulu kunami!’ Kodwana waba mlingani egade ngimtlhoga kwamambala.

“Eqinisweni, Asisisodwa”

Isabelo sethu sokuthoma besisedorobheni lomlando i-Aurangabad, pheze emakhilomitha ama-400 epumalanga yeBombay. Msinyana satjheja bona bekungithi kwaphela aboFakazi edorobheni elinabantu abapheze babe sigidi. Ngaphezu kwalokho, bekufuze ngifunde ilimi eliyihloko elikhulunywa edorobhenelo, isiMarathi.

Ngezinye iinkhathi, bengiphathwa sizungu begodu bengilila njengomntwana onganamma. Kodwana ilizwi laka-Elizabeth lobumma belingikhuthaza. Bekajayele ukuthi, “Singaphathwa sizungu ngesinye isikhathi, kodwana eqinisweni asisisodwa.” “Nanyana ukude khulu nabangani nebekhenu, uJehova uhlala anawe. Menze umnganakho, isizungu sakho msinyana sizokuphela.” Isiluleko sakhe ngisithatha njengesiligugu kimi bekube namhlanje.

Nasinganamali yokukhwela, besikhamba amakhilomitha ama-20 qobe langa ethulini nedakeni, emtjhisweni nemakhazeni. Ehlobo, amazinga wokutjhisa bekafika ku-40°C. Ngesikhathi sezulu elikhulu, ezinye iingcenye zesimu beziba nedaka iinyanga. Nokho, besifumana bona iimbono yabantu ngamasiko beyisitjhijilo esikhulu kunobujamo bezulu.

Abafazi bebangakhulumi namadoda tjhatjhalazi ngaphandle kobana baziinhlobo, begodu bekungakavami bona abafazi bafundise amadoda. Bekuhlekiswa ngathi begodu sitlhoriswa. Hlangana neenyanga ezisithandathu zokuthoma, bekungithi sobabili kwaphela ebesiba khona  emihlanganweni yeBhayibhili yaqobe veke. Ngokukhamba kwesikhathi, abantu abanekareko bahlanganyela nathi. Msinyana kwathoma isiqhema esincani. Abanye babe bakhamba nathi esimini.

“Ragela Phambili Ulola Amakghonwakho”

Ngemva kweemnyaka epheze ibe mbili nesiquntu, sabelwa ukukhonza eBombay. Njengombana u-Elizabeth aragela phambili emsebenzini wokutjhumayela, bangibawa bona ngisize ubaba, ngesikhatheso ogade kunguye kwaphela otjhugululela iincwadi zethu zeBhayibhili elimini lesiKannada. Walimukela isizo lami njengombana bekaneemsebenzi eemnengi ebandleni.

Ngo-1966, ababelethi bami baqunta ukubuyela e-Udipi, la besihlala khona ekuthomeni. Njengombana atjhiya iBombay, uBaba wathi: “Ragela phambili ulola amakghonwakho mntwanami. Tjhugulula bulula nangokuzwakalako. Kubalekele ukuzithemba khulu, uhlale uthobekile. Thembela kuJehova.” Lesi bekusiluleko sakhe sokugcina kimi, ngombana wahlongakala msinyana ngemva kokufika e-Udipi. Ngalinga ngamandla ukwenza lokho emsebenzinami wokutjhugulula bekube namhlanje.

“Awufuni Ukuba Nomndeni?”

Ngokwesiko, ababelethi be-India bahlelela abantwababo bona batjhade basesebancani, begodu babakhuthaza bona babe nomndeni. Ngalokho bengihlale ngibuzwa: “Awufuni ukuba nomndeni? Ngubani ozokutlhogomela nesele uluphele? Angekhe ube nesizungu?”

Ngezinye iinkhathi bengizizwa ngigandelelekile ngeenkulumo ezinjalo ezibuyelelwako. Namtjhana bengiyifihla indlela engizizwa ngayo phambi kwabantu, ngathululela ihliziywami kuJehova nengingedwa. Ngaduduzwa kukwazi bona bekangangiqali njengotjhodako ngombana ngingakatjhadi. Bona ngivuselele ukuzimisela kwami ukumkhonza ngaphandle kokuthikamezeka, ngacabanga ngendodakazi kaJafta kuhlanganise noJesu—bobabili abahlala bangakatjhadi begodu bamajadujadu benza intando kaZimu.—Jwanisi 4:34.

Isipho Esivela KuJehova

Mina no-Elizabeth sahlala sibangani abatjhideleneko pheze iimnyaka ema-50. Wahlongakala ngo-2005, aneemnyaka ema-98. Angasakghoni ukufunda iBhayibhili eemnyakeni eembalwa eyalandelako ngebanga lokungasaboni kuhle, bekasebenzisa pheze ilanga loke atjhidela kuZimu ngeemthandazo eluliweko. Ngesinye isikhathi bengicabanga bona bekacoca nomunye ngomtlolo ngekamarweni lakhe, kodwana bengifumana bona ukhuluma noJehova. BekaMumuntu wamambala kuye, begodu bekaphila kwanga bekanaye. Ngifunde bona le yindlela yokuhlala unzinzile ekukhonzeni uZimu, njengombana kwenza indodakazi kaJafta. Ngiyamthokoza uJehova ngokungilethela udade okhulileko, novuthiweko bona angibandule begodu angikhuthaze ebutjheni bami nakiyo yoke iimrarwami.—UMtjhumayeli 4:9, 10.

Qala bona ngithabe kangangani ngeembusiso engizifumene ngokukhonza uJehova njengendodakazi kaJafta! Ukuhlala ngingakatjhadi nokulandela isiluleko seBhayibhili kungenze bona ngiphile ukuphila okunothileko nokwanelisako, kukulapho ngifuna ‘okulungileko nokufaneleko emsebenzini weKosi ngingatshwenywa lilitho.’—1 KwebeKorinte 7:35.

[Isithombe ekhasini 22]

Ubaba anikela ikulumo yenengi eBombay ngabo-1950

[Isithombe ekhasini 22]

Ngino-Elizabeth ngaphambi kokuhlongakala kwakhe

[Isithombe ekhasini 23]

Simemezela ikulumo yeBhayibhili eBombay ngo-1960

[Isithombe ekhasini 23]

Nginengisebenza nabo e-ofisinethu yokutjhugulula