Bewazi?

Liyini ‘itjhila elibomvu be’ kanengi okukhulunywa ngalo encwadini ka-Eksodosi?

▪ Ngokulandisa kweBhayibhili amatjhila wetende akha amaboda neyege yetabarnakele, indawo eyihloko yokukhulekela kwaka-Israyeli wekadeni, bekenziwe “ngentambo ehlaza noboya obudaywe baba bomvu okusipiridzana netjhila elibomvu be nelineni eliphothiweko elicwengileko.” (Eksodosi 26:1; 38:18) ‘Izambatho ezicwengileko’ zabapristi nazo bekufuze zenziwe kusetjenziswa ‘itjhila elibomvu be.’—Eksodosi 28:1-6.

Umbala obomvu be, godu owaziwa ngokuthi kermes, bekuyidayi ebomvu. Idayi le beyithathwa emzimbeni weengogwana ezisikazi zomndeni wama-Coccidae. Iingogwana ezinganamaphikwezi zihlala emthini i-kermes oak (Quercus coccifera), omila ePumalanga Emaphakathi begodu nendaweni emagega nelwandle leMedithera. Umbala obomvu ungaphakathi kwamaqanda angaphakathi kwengogwana esikazi. Ingogwana leyo neyinamaqanda, ifana nomomori (berry), opheze ulingane begodu wakheke njengentanga yerhruni, enamathela emakarini nematakeni we-kermes oak. Ngemva kobana zithathwe zapatlazwa, iingogwanezi zikhupha umbala obomvu, oncibilikako ngemanzini begodu olungele bona ungadaya iimpahla. Isazimlando seRoma uPliny Omkhulu wakhuluma ngombala obomvu be begodu wawubala hlangana neembala ephuma phambili yangesikhathi sakhe.

Ngibaphi abatloli beMitlolo yamaKrestu yesiGirigi egade bakhona ngePentekosi laka-33 C.E.?

▪ Kungenzeka bona amadoda asithandathu kwabunane atlola ingcenye yeMitlolo le bekakhona.

Ngokulandisa kweZenzo, uJesu walayela abafundi bakhe wathi: “Ningasuki eJerusalema, kodwana nilindele isipho uBaba anithembisa sona.” (IZenzo 1:4) Ukulandisa okufanako kutjengisa bona abatloli beBhayibhili besikhathi esizako uMatewu, uJwanisi noPitrosi balalela isinqophiswesi bahlangana ‘ndawonye,’ nabanye abafundi. Abanakwabo lakaJesu ngonina nabo gade balapho. (IZenzo 1:12-14; 2:1-4) Ababili babo, uJakobosi noJuda (uJudasi), kamva batlola iincwadi eembili zeBhayibhili ezibizwa ngamagamabo.—Matewu 13:55; KaJakobosi 1:1; KaJuda 1.

EVangelini lakhe, uMarkosi ukhuluma ngesokana elabaleka ngobusuku uJesu abotjhwa ngabo. Kuyakhanya bona bekaqalise kuye, njengombana boke abanye abafundi besele bamtjhiyile uJesu. (Markosi 14:50-52) Ngalokho, kubonakala kwanga uMarkosi bekangomunye wabafundi bokuthoma, begodu kungenzeka bona gade akhona ngePentekosi.

Abatloli ababili abaseleko beMitlolo yamaKrestu yesiGirigi ephefumulelweko bekunguPowula noLuka. NgePentekosi laka-33 C.E., uPowula bekangakabi mlandeli kaKrestu. (KwebeGalatiya 1:17, 18) Kubonakala kwanga, uLuka naye bekangekho, njengombana akhenge azibale ‘kwababona’ ikonzo kaJesu.—Luka 1:1-3.

[Isithombe ekhasini 20]

Iingogwana ebezisetjenziselwa ukwenza idayi

[Umthombo]

Courtesy of SDC Colour Experience (www.sdc.org.uk)

[Isithombe ekhasini 20]

UPitrosi ukhuluma ngePentekosi laka-33 C.E.