Bewazi?

Besiyini “isihlalo sokwahlulela” umpostoli uPowula asiwa kiso?

▪ Umlando okuZenzo 18:12, 13, NW, uthi amaJuda weKorinte asola uPowula ngokutjhumayela ngokungasi semthethweni begodu amdosela ‘esihlalweni sokwahlulelwa,’ namtjhana i-beʹma (ibizo lesiGirigi elitjho “isitepisi”). IKorinte yekadeni gade ineplatifomu ephakemeko, namtjhana indawo yokujama isikhulumi, hlanu kwendawo ephakathi ne-agora, namtjhana imaraga, engaba likhambo elincani ukusuka esinagogeni. Indawo iplatifomu le ebeyikiyo beyenza kube lula ukukhuluma nabalaleli. Beyenziwe ngomabula ohlaza nokumhlophe begodu inemikghabiso eminengi emihle ebaziweko nephuka msinyana, iplatifomu beyinamakamura amabili wokulinda egade anamabhanga wemabula phasi kukghatjiswe ngama-tiles amibalabala.

Indawo yesikhulumi kwanga beyisihlalo sokwahlulela lapho umpostoli uPowula ajama khona phambi komphathi wesifundazwe uGaliyo, umbusi we-Akhaya omRoma. Endaweni le, ababusi abahleziko bebalalela amacala begodu bakhiphe izahlulelo zekhotho phambi kwesiqubuthu ebesihlangene lapho.

Emadorobheni weemfundeni zeGrisi, bekujayelekile bona kubanjelwe imihlangano phambi kwe-beʹma enjalo, lapho bekubanjelwa khona woke amabhizinisi womphakathi. Emlandwenawo wecala lakaJesu, imitlolo yesiGirigi kaMatewu 27:19 noJwanisi 19:13 iqalise kuPontiyasi Pilato akhuluma nesiqubuthu aku-beʹma yakhe.—IZenzo 12:21.

Kubayini amanye amaJuda aphathwa kumbi yindlela uJesu afa ngayo?

▪ Umpostoli uPowula wathi ngamaKrestu wekhulu lokuthoma: “Sitjhumayela uKrestu abethelwe, [esigodweni] okuyisikhubekiso emaJudeni nobudlhayela [kwabatjhili].” (1 KwebeKorinte 1:23) Kubayini indlela uJesu afa ngayo yabaphatha kumbi abanye?

Malungana nendlela uJesu afa ngayo namasiko walabo abaphila ePumalanga Emaphakathi ngekhulu lokuthoma, isazi seBhayibhili uBen Witherington III sathi “lokhu kukufa okuphathisa iinhloni khulu. Gade kungaqalwa njengokufela ikholo okuhloniphekako.” UWitherington waragela phambili wathi: “Abantu bendaweni leyo bebakholelwa bona indlela ofa ngayo yembula ihlobo lomuntu ongilo. Ngaphasi kwesisekelo esinjalo, uJesu bekaqalwa njengomdlelezeli, ivukelambuso, umuntu obekafanelwe kukufa kwesigqila.” Sinamabanga la, kubonakala kunganangqondo ukucabanga bona amaKrestu wekhulu lokuthoma azithomela indaba yokufa nokuvuka kwakaJesu.