Akhe ubone ngelihlo lengqondo ubaba akhuluma nendodanakhe eneminyaka elikhomba. Uthi kiyo, “Eminyakeni eminengi eyadlulako, uZimu wenza iphasi nezinto ezikilo, wenza ilanga, inyanga neenkwekwezi.” Umsana ucabanga ngalokhu isikhatjhana bese uyabuza, “Baba, ngubani owenza uZimu?”

Ubaba uthi nekaphendulako, “Akunamuntu owenze uZimu. Bekasolo akhona.” Ihlathululo elula leyo yanelisa umntwana okwanjesi kwaphela. Njengombana akhula, umbuzo lo uragela phambili umtshwenya. Ukufumana kubudisi ukuzwisisa bona kungenzeka njani bona umuntu angabi nesithomo. Ingani ngitjho nendawo yoke inesithomo. Uyazibuza, ‘Wavelaphi uZimu?’

IBhayibheli liphendula njani? Eqinisweni, liphendula ngendlela ubaba osesibonelweni awuphendula ngayo. UMosi watlola: “Jehova, wena bewunguZimu nini nanini, iintaba zingakabi khona, iye, ungakavezi iphasi nelizwe.” (IRhubo 90:1, 2) Nomphorofidi u-Isaya wababaza: “Anazi na? Kghani anikezwa bonyana [uJehova] unguZimu isiphelani, umdali wepelazwe na”? (Isaya 40:28) Nencwadi kaJuda ithi uZimu ukhona ‘kilo loke iphakade.’—Juda 25, NW.

Imitlolo le itjengisa bona uZimu “yiKosi yesiphelani” njengombana umpostoli uPowula amhlathulula. (1 Thimothi 1:17) Lokhu kutjho bona uZimu bekasolo akhona, kungakhathaliseki bona sibuyela emva isikhathi eside kangangani. Begodu uzokuhlala akhona. (IsAmbulo 1:8) Ngalokho, ukuba khona kwakhe ngokungapheliko kusisici esiyihloko soMninimandla.

Kubayini kubudisi ngathi ukuzwisisa lokhu? Ngombana ukuphila kwethu okufitjhani kusenza siqale isikhathi ngendlela ehlukileko kileyo uJehova aqala ngayo isikhathi. Njengombana uZimu aphila ngokungapheliko, kuye iminyaka eyikulungwana ifana nelanga linye. (2 Pitrosi 3:8) Ukufanisa: Inga-kghani intethe, ephile amalanga ama-50 nesele ikhule ngokupheleleko, ingasizwisisa isikhathi sokuphila kwethu esiminyaka ema-70 nofana ema-80? Awa! Nokho, iBhayibheli ithi sinjengeentethe nesimadaniswa noMbumbi wethu oMkhulu. Ngitjho nekghono lethu lokucabanga lilinganiselwe khulu nelimadaniswa nelakhe. (Isaya 40:22; 55:8, 9) Ngalokho akurari bona kusesenezinye izici zobuntu bakaJehova abantu abangeze bazizwisisa ngokuzeleko.

Nanyana kubudisi ukuzwisisa indaba yokobana uZimu uphila ngokungapheliko, nesicabanga ngayo siyabona ukuthi kunengqondo. Nengabe kunomuntu obumbe uZimu, umuntu bekazokuba Mbumbi. Nokho, njengombana iBhayibheli lihlathulula, uJehova nguye “owabumba koke.” (IsAmbulo 4:11) Ngaphezu kwalokho, siyazi bona indawo yoke ekuthomeni gade ingekho. (Genesisi 1:1, 2) Yavelaphi? Kwatlhogeka bona kube noMbumbi wayo qangi. Waba khona ngaphambi kobana kube khona ezinye iimbunjwa, njengokukuphela kweNdodanakhe kunye neengilozi. (Jobho 38:4, 7; Kolose 1:15) Ngalokho, kuyakhanya bona ekuthomeni bekayedwa. Akhenge abunjwe; ayikho into egade ikhona okungenzeka yambumba.

Ukuba khona kwethu nokwendawo yoke kubufakazi bokuba khona kwakaZimu ophila ngokungapheliko. Loyo obangela bona indawo yoke isikinyeke, Loyo owathoma imithetho elawula indawo yoke, kufuze bona bekasolo akhona. Nguye yedwa okufuze bona waphefumulela ukuphila kizo zoke ezinye izinto.—Jobho 33:4.