OKWENZA ABANTU ABANENGI BAZAZE: Abantu abanengi bacabanga bona uZimu uqala abantu njengezoni kwaphela—abantu abasilapheleko nabangakufanelekeli ukutjhejwa nguye. UKendra, ogade anomraro wokugandeleleka ngokwamazizo, wazizwa amlandu ngombana bekangakghoni ukuphila ngeemfuneko zakaZimu. Ngebanga lalokho, uthi, “Ngalisa ukuthandaza.”

OKUFUNDISWA LILIZWI LAKAZIMU: UJehova uqala ngale kokungapheleli kwethu begodu uzwisisa lokho ongikho. IBhayibheli lithi, “Yena uyazi bona sibunjwe ngani, uyakhumbula bonyana silithuli nje.” Ngaphezu kwalokho, akasebenzelani nathi “njengokufanele izono zethu,” kodwana ngomusa uyasilibalela nesiphendukako.—IRhubo 103:10, 14.

Cabanga ngoDavida, ikosi yakwa-Israyeli ekukhulunywe ngaye esihlokweni sokuthoma somagazini lo. UDavida wathi nekathandaza kuZimu: “Amehlwakho angibona ngisese lihlwili. Koke ukubunjwa kwami kwatlolwa encwadinakho . . . Yewungiphenye Jehova, wazi ihliziywami.” (IRhubo 139:16, 23) UDavida bekaqiniseka bona ngitjho nanyana ona khulu—ngezinye iinkhathi—uJehova bekayibona ihliziywakhe ephendukileko.

UJehova ukwazi ngcono ukudlula omunye umuntu. IBhayibheli lithi, “Abantu batjheja ijamo lomuntu kodwana uJehova utjheja ihliziyo.” (1 Samyela 16:7) UZimu uyazi bona kubayini wenza izinto ngendlela ozenza ngayo—ifuzo, indlela owakhula ngayo, indawo ohlala kiyo, indlela ubuntu bakho obakha ngayo ihlobo lomuntu ongilo. Uyalibona begodu uyalazisa ihlobo lomuntu olwela ukuba ngilo, ngitjho nanyana wenza iimphoso.

Alo-ke, uZimu uyisebenzisa njani indlelakhe ephakemeko azwisisa ngayo ‘ihlobo lomuntu onguye’ bona akududuze?