Yokuthoma YamaKhosi 2:1-46
2 Kwathi nasele kutjhidele isikhathi sokobana uDavida ahlongakale, wanikela indodanakhe uSolomoni iinqophiso nanzi:
2 “Sengizokuhlongakala. Nje-ke qina+ ube yindoda.+
3 Kufuze ulalele uJehova uZimakho ngokukhamba eendleleni zakhe nangokulalela imithetho, imiyalo, izahlulelo neenkhumbuzo zakhe njengombana zitlolwe emThethweni kaMosi;+ ngokwenza njalo uzokuphumelela kikho koke okwenzako begodu nanyana kukuphi lapho uya khona.
4 UJehova uzokufeza isithembiso sakhe asenza kimi, nakathi: ‘Nangabe amadodanakho atjheja indlela akhamba ngayo, akhambe ngokuthembeka phambi kwami ngeenhliziyo zawo zoke nangemiphefumulwawo*+ yoke, kuzokuhlala kunomuntu osizukulwana sakho esihlalweni sobukhosi sakwa-Israyeli.’+
5 “Nawe ukwazi kuhle lokho uJowabi indodana kaTseruya akwenze kimi, lokho akwenze eenkhulwini ezimbili zamabutho wakwa-Israyeli, u-Abineri+ indodana kaNeri no-Amasa+ indodana kaJeteri. Wababulala, aphalaza iingazi+ zepi ngesikhathi sokuthula, wazitjhatjha ngeengazi zepi ebhandeni nemapatlagwaneni.
6 Kufuze wenze ngokuvumelana nokuhlakanipha kwakho begodu ungavumeli iqhegwanelo lehlele eThuneni* ngokuthula.+
7 “Kodwana malungana namadodana kaBharzilayi+ umGiliyadi, kufuze uwatjengise ithando* begodu kufuze abe hlangana nalabo abadla etafulenakho ngombana angisekela+ lokha nangibalekela umfowenu u-Absalomu.+
8 “Kunye nawe kunoTjhimeyi indodana kaGera umBhenjamini weBharhurimu. Nguye owangiqalekisa ngesiqalekiso+ esibuhlungu lokha nangiya eMarhanayimu+ kodwana kuthe nakehlako bona azokuhlangana nami eJordani, ngafunga kuye ngoJehova, ngathi: ‘Angekhe ngakubulala ngesabula.’+
9 Nje-ke kufuze umjezise,+ ngombana wena uyindoda ehlakaniphileko, uyakwazi okufuze ukwenze kuye; kufuze iqhegweli lehlele eThuneni* ngeengazi.”+
10 Ngemva kwalokho, uDavida walaliswa nabokhokho bakhe begodu wabulungelwa eDorobheni lakaDavida.+
11 Isikhathi sokubusa kwakaDavida kwa-Israyeli saba minyaka ema-40. ERhebroni+ wabusa iminyaka elikhomba, wabusa eJerusalema iminyaka ema-33.+
12 Nje-ke uSolomoni wahlala esihlalweni sobukhosi sakaDavida uyise, kancanikancani ubukhosi bakhe banzinza.+
13 Ngokukhamba kwesikhathi u-Adoniya indodana kaRhagithi weza kuBhathi-Tjheba unina kaSolomoni. UBhathi-Tjheba wathi kuye: “Uze ngokuthula na?” Waphendula wathi: “Iye ngize ngokuthula.”
14 U-Adoniya wathi: “Nginento engifuna ukukutjela yona.” Yeke wathi: “Khuluma.”
15 Waraga wathi: “Wazi kuhle ukuthi ubukhosi bekufuze bube ngebami, no-Israyeli woke bekalindele bona ngibe yikosi+ kodwana ubukhosi bangeqa, banikelwa umfowethu ngombana nguJehova othe bube ngebakhe.+
16 Nje-ke nginesibawo sinye tere kuwe. Ungangiqothi.” UBhathi-Tjheba wathi kuye: “Khuluma.”
17 Ngemva kwalokho, wathi: “Ngibawa ungibawele kuSolomoni ikosi ngombana wena angekhe akuqotha ukuthi anginikele u-Abitjhagi+ weTjhunemi bona abe mkami.”
18 Yeke uBhathi-Tjheba wathi kuye: “Akunamraro! Ngizokukhulumela ekosini.”
19 Nje-ke uBhathi-Tjheba waya eKosini uSolomoni bona ayokukhulumela u-Adoniya. Khonokho ikosi yasikima bona izomhlangabeza beyamkhothamela. Ngemva kwalokho, yahlala esihlalweni sayo sobukhosi yalungiselela unina wekosi isihlalo sobukhosi bona ahlale ngesidleni sayo.
20 Yeke wathi: “Kunentwanyana engiyibawa kuwe. Ungangiqothi.” Nje-ke ikosi yathi kuye: “Bawa mma ngombana angekhe ngikuqothe.”
21 Wathi: “Vumela u-Abitjhagi weTjhunemi anikelwe u-Adoniya umfowenu bona abe mkakhe.”
22 IKosi uSolomoni yaphendula unina yathi: “Kubayini ubawela u-Adoniya u-Abitjhagi weTjhunemi? Kungcono usale umbawela nobukhosi,+ ngombana mfowethu omdala+ begodu usekelwa ngu-Abhiyathari umphristi noJowabi+ indodana kaTseruya.”+
23 Nje-ke iKosi uSolomoni yafunga ngoJehova yathi: “Kwanga uZimu angangijezisa kabuhlungu nangabe u-Adoniya akalahlekelwa kuphila kwakhe ngesibawo asenzilekwesi.
24 Ikani uJehova nakasaphilako, yena ongibeke+ esihlalweni sobukhosi sakaDavida ubaba, wanzinzisa ukubusa kwami bewangenzela indlu+ njengombana athembisa, u-Adoniya uzokubulawa+ namhlanjesi.”
25 Msinyana iKosi uSolomoni yathumela uBhenaya+ indodana kaJehoyada, owaphuma wasahlela u-Adoniya wambulala.
26 Malungana no-Abhiyathari+ umphristi, ikosi yathi: “Iya emasiminakho e-Anatothi!+ Ufanelwe kukufa kodwana namhlanjesi angekhe ngikubulale ngombana uthwale umFaji weKosi ePhakemeko uJehova phambi kwakaDavida ubaba+ ngebanga lokuthi wahlanganyela nobaba kiwo woke amatshwenyekwakhe.”+
27 Nje-ke uSolomoni waqotha u-Abhiyathari esikhundleni sokuba mphristi kaJehova bona azalise lokho okwatjhiwo nguJehova malungana nendlu ka-Eli+ eTjhilo.+
28 Iindabezi nazifika kuJowabi ngebanga lokuthi bekasekela u-Adoniya+ kodwana akhenge asekele u-Absalomu,+ uJowabi wabalekela etendeni lakaJehova,+ wabamba iimpondo ze-aldara.
29 Nje-ke kwabikelwa iKosi uSolomoni kwathiwa: “UJowabi ubalekele etendeni lakaJehova begodu ulapho hlanu kwe-aldara.” Yeke uSolomoni wathumela uBhenaya indodana kaJehoyada, wathi: “Khamba uyombulala!”
30 UBhenaya waya etendeni lakaJehova, wathi kuye: “Nakhu okutjhiwo yikosi, ‘Phuma ngapho!’” Kodwana yena wathi: “Awa! Ngizokufela lapha.” UBhenaya wabuyela emva wabikela ikosi lokho okutjhiwo nguJowabi nokuthi umphendule wathini.
31 Nje-ke ikosi yathi kuye: “Yenza njengombana atjhwile; mbulale bese umbulunge, ususe kimi nendlini kababa iingazi eziphalazwe nguJowabi ngaphandle kwebanga elizwakalako.+
32 UJehova uzokubuyisela iingazi zakhe phezu kwehlokwakhe ngombana wasahlela, wabulala ngesabula amadoda amabili alunge khulu nangcono kunaye, okungu-Abineri+ indodana kaNeri, isikhulu sebutho lakwa-Israyeli+ no-Amasa+ indodana kaJeteri, isikhulu sebutho lakwaJuda.+ Lokho wakwenza ubaba uDavida angazi.
33 Iingazi zabo zizokubuyela ehloko kaJowabi neenhlokweni zeenzukulwana zakhe bekube nini nanini+ kodwana malungana noDavida, isizukulwana sakhe, indlwakhe nesihlalo sakhe sobukhosi, kwanga kungaba nokuthula okuvela kuJehova bekube nini nanini.”
34 Nje-ke uBhenaya indodana kaJehoyada wakhuphuka wasahlela uJowabi bewambulala, wabulungelwa endlinakhe emmangweni.
35 Ngemva kwalokho, ikosi yabeka uBhenaya+ indodana kaJehoyada bona aphathe ibutho esikhundleni sakhe, godu yabeka uTsadokhi+ umphristi esikhundleni saka-Abhiyathari.
36 Nje-ke ikosi yabiza uTjhimeyi+ yathi kuye: “Zakhele indlu eJerusalema, uhlale lapho; ungalingi uye kwenye indawo.
37 Ngelanga ozokuphuma ngalo begodu uyame umRhoba weKidroni,+ uzokufa nakanjani. Iingazi zakho zizokuba phezu kwehlokwakho.”
38 UTjhimeyi waphendula ikosi wathi: “Amezwakho ahlaba ikomo. Isisebenzi sakho sizokwenza njengombana ikosami ikhulumile.” Nje-ke uTjhimeyi wahlala eJerusalema amalanga amanengi.
39 Kodwana ekupheleni kweminyaka emithathu, iingqila ezimbili zakaTjhimeyi zabalekela ku-Akhitjhi+ indodana kaMaka ikosi yeGathi. UTjhimeyi nakatjelwa ukuthi: “Qala! Iingqila zakho ziseGathi,”
40 msinyana wabophela udumbanakhe wayokubona u-Akhitjhi eGathi bona ayokuthatha iingqila zakhe. Kuthe uTjhimeyi nakabuya eGathi neengqila zakhe,
41 uSolomoni watjelwa ukuthi: “UTjhimeyi uphumile eJerusalema waya eGathi begodu ubuyile.”
42 Khonokho ikosi yabiza uTjhimeyi yathi kuye: “Akhenge ngikufungise na ngoJehova bengakuyelelisa ngathi: ‘Ngelanga ozokuphuma ngalo uye kwenye indawo, yazi ukuthi uzokufa’? Akhenge wena uthi kimi, ‘Amezwakho ahlaba ikomo; ngizokulalela’?+
43 Kubayini-ke ungakhange uphethe isifungo sakaJehova nomyalo engiwubeke kuwe?”
44 Nje-ke ikosi yathi kuTjhimeyi: “Ehliziywenakho uyabazi boke ubuhlungu obenze kuDavida ubaba+ begodu uJehova uzokubuyisela ubuhlungobo ehlokwenakho.+
45 Kodwana iKosi uSolomoni izokubusiswa,+ nesihlalo sobukhosi sakaDavida sizokunzinziswa phambi kwakaJehova bekube nini nanini.”
46 Khonokho ikosi yayala uBhenaya indodana kaJehoyada, waphuma wayomsahlela bewambulala.+
Yeke umbuso wanzinziswa esandleni sakaSolomoni.+
Imitlolo Ephasi
^ Qala Ihlathululo.
^ Namkha “eTjhiyoli.” Qala Ihlathululo.
^ Namkha “ithando elithembekileko.”
^ Namkha “eTjhiyoli.” Qala Ihlathululo.
