Yokuthoma YeenKronike 23:1-32
23 Kuthe uDavida nasele aluphele begodu sekazokuhlongakala, wabeka indodanakhe uSolomoni yaba yikosi kwa-Israyeli.+
2 Yeke wabuthelela woke amakhosana wakwa-Israyeli, abaphristi+ namaLevi.+
3 Kwabalwa amaLevi ebekaneminyaka ema-30 ukuya phezulu;+ isibalo sawo, nakubalwa ihloko yendoda ngayinye, saba zii-38 000.
4 Kilawa, azii-24 000 bewaziinduna zomsebenzi wendlu kaJehova begodu bekunabaphathi nabahluleli abazii-6 000,+
5 bekunabalindisango abazii-4 000+ begodu kunabazii-4 000 abadumisa+ uJehova ngeenliliswa uDavida athi ngazo, “Ngizenzele bona zisetjenziselwe ukudumisa.”
6 Ngemva kwalokho, uDavida wawahlela* ngeengaba+ ngokwamadodana kaLevi: UGeritjhoni, uKhehathi noMerari.+
7 EmaGeritjhonini bekunguLadani noTjhimeyi.
8 Amadodana kaLadani bekunguJerhiyeli ihloko, uZethamu noJuweli,+ bewamathathu.
9 Amadodana kaTjhimeyi bewamathathu, bekunguTjhelomothi, uRhaziyeli noHarana. Laba bebaziinhloko zekoro kaLadani.
10 Amadodana kaTjhimeyi bekunguJarhathi, uZina, uJewutjhi noBheriya. Abanaba bebamadodana kaTjhimeyi.
11 UJarhathi bekayihloko begodu uZiza angowesibili. Kodwana njengombana uJewutjhi noBheriya bebanganamadodana amanengi, babalwe njengekoro yinye banesabelo sinye somsebenzi.
12 Amadodana kaKhehathi bekungu-Amramu, uJitsihari,+ uRhebroni no-Uziyeli,+ bewamane.
13 Amadodana ka-Amramu bekungu-Aroni+ noMosi.+ Kodwana u-Aroni wabekelwa eqadi safuthi+ bona acwengise iNdawo eCwengeke Khulu, yena namadodanakhe, ukuze benze imihlatjelo phambi kwakaJehova, bamsebenzele begodu bamemezele iimbusiso egameni lakhe qobe.+
14 Malungana noMosi umuntu kaZimu weqiniso, amadodanakhe abalwa hlangana nekoro yamaLevi.
15 Amadodana kaMosi bekunguGeritjhomu+ no-Eliyezeri.+
16 Emadodaneni kaGeritjhomu, uTjhebuyeli+ bekayihloko.
17 Eenzukulwaneni* zaka-Eliyezeri, uRerhabiya+ bekayihloko; u-Eliyezeri bekanganawo amanye amadodana kodwana amadodana kaRerhabiya bewamanengi khulu.
18 Emadodaneni kaJitsihari,+ uTjhelomithi+ bekayihloko.
19 Amadodana kaRhebroni bekunguJeriya ihloko, u-Amariya angowesibili, uJarhaziyeli angowesithathu begodu uJekhamamu+ angowesine.
20 Amadodana ka-Uziyeli+ bekunguMikha ihloko, uYitjhiya angowesibili.
21 Amadodana kaMerari bekunguMarhili noMutjhi.+ Amadodana kaMarhili bekungu-Elazara noKhitjhi.
22 U-Elazara wahlongakala kodwana bekanganamadodana, bekanamadodakazi kwaphela. Nje-ke iinhlobo zawo, amadodana kaKhitjhi, atjhada nawo.
23 Amadodana kaMutjhi bekunguMarhili, u-Ederi noJeremothi, bewamathathu.
24 La bekumadodana kaLevi ngokweenkoro zawo zaboyise, iinhloko zeenkoro zaboyise, ngokwalabo abatlolisiweko ababalwa bebafakwa erhelweni ngamagamabo begodu benza umsebenzi wendlu kaJehova, ukusuka eminyakeni ema-20 ukuya phezulu.
25 Ngombana uDavida wathi: “UJehova uZimu ka-Israyeli unikele abantu bakhe ukuphumula+ begodu uzokuhlala eJerusalema ngokungapheliko.+
26 Godu amaLevi angekhe kutlhogeke athwale ithaberinakeli namkha nanyana ngiziphi izitja zalo ezisetjenziselwa ukulotjha.”+
27 Ngombana ngokuvumelana neenqophiso zakaDavida zamaswaphela, kwabalwa amaLevi aneminyaka ema-20 ubudala ukuya phezulu.
28 Umsebenzawo bekukusiza amadodana ka-Aroni+ bona enze umsebenzi wendlu kaJehova, atlhogomele isirhodlo,+ iinkumba zokudlela, ukuhlanjululwa kwayo yoke into ecwengileko, nokwenza nanyana ngimuphi umsebenzi ebewutlhogeka wendlu kaZimu weqiniso.
29 Asiza ngoburotho obubekwa ngamalarha,*+ ngeflowuru esefiweko yomnikelo weenthoro, ngoburotho obunganasibiliso oburhwamuzelako,+ ngamakuke asipara, ngehlama evangiweko,+ nangazo zoke iinlinganiso zenani nobukhulu.
30 Bekufuze ajame qobe ekuseni+ nantambama athokoze bewadumise uJehova.+
31 Bewasiza nanyana kunini nakwenzelwa uJehova imihlatjelo etjhiswako ngamaSabatha,+ ngokuthwasa kwenyanga,+ hlangana neenkhathi zeminyanya,+ ngokuvumelana nesibalo ebesifunwa mithetho emalungana nawo, bewenza njalo qobe phambi kwakaJehova.
32 Godu bewatlhogomela izabelo zawo zomsebenzi malungana netende lokuhlangana, indawo ecwengileko namalungana nabafowabo amadodana ka-Aroni bona enze umsebenzi wendlu kaJehova.
Imitlolo Ephasi
^ Namkha “wawahlukanisa.”
^ NgesiHebheru, “Emadodaneni.”
^ Kutjho uburotho bombukiso.
