Yesibili YamaKhosi 5:1-27
5 Nje-ke uNamani isikhulu sebutho lekosi yeSiriya bekadumile ayindoda eqakathekileko ekosinakhe ngombana ngaye uJehova wenza iSiriya yathumba. Bekayingorho nanyana bekanobulepheru.*
2 Kokhunye ukusahlela kwawo, amaSiriya athumba umntazanyana enarheni yakwa-Israyeli, owaba sisebenzi somkaNamani.
3 Umntazanyana lo wathi kumkaNamani: “Ukube ikosami beyingavakatjhela umphorofidi+ weSamariya! Bekazoyilapha ebulepherwini bayo.”+
4 Nje-ke wayokubikela* ikosakhe, wayitjela lokho akutjelwe mntazana wakwa-Israyeli.
5 Nje-ke ikosi yeSiriya yathi: “Khamba nje! Ngizokuthumela incwadi ekosini yakwa-Israyeli.” Wakhamba-ke, aphethe amatalende* alitjhumi wesiliva, iimpaparwana zegolide ezizii-6 000 nezambatho ezilitjhumi.
6 Waletha ekosini yakwa-Israyeli incwadi ebeyithi: “Kunye nencwadi le, ngithumela isisebenzi sami uNamani bona umlaphe ebulepherwini bakhe.”
7 Msinyana ngemva kokuthi ikosi yakwa-Israyeli ifunde incwadi leyo, yarathula izambatho zayo yathi: “Kghani nginguZimu obulalako begodu asindise ukuphila?+ Ngombana ikosi yeSiriya ithumele indoda le kimi, ingitjela bona ngiyilaphe ebulepherwini bayo! Nani niyazibonela ukuthi iyangirhuga.”
8 Kodwana u-Elitjha umuntu kaZimu weqiniso nakezwa bona ikosi yakwa-Israyeli irathule izambatho zayo, khonokho yathumela ilizwi ekosini yathi: “Kubayini urathule izambatho zakho? Ngibawa umthumele kimi ukwenzela bona azi ukuthi kunomphorofidi kwa-Israyeli.”+
9 Nje-ke uNamani weza neenjomani zakhe neenkarana zakhe zepi, wajama ebungenweni bendlu ka-Elitjha.
10 Yeke u-Elitjha wathumela isithunywa bona sithi kuye: “Khamba uyokuhlamba amahlandla alikhomba+ eJordani,+ isikhumba sakho sizokulapheka, uzokuhlambuluka.”
11 UNamani wasilingeka khulu wakhamba, wathi: “Yazi bengizitjela ukuthi, ‘Uzokuza kimi, ajame lapha abize igama lakaJehova uZimakhe, akhambakhambise isandla sakhe phezu kobulepheru bona abulaphe.’
12 I-Abana neParipari, imilambo yeDamaseku,+ ayisingcono na kunawo woke amanzi wakwa-Israyeli? Angekhe na ngahlambela kiyo begodu ngihlambuluke?” Nje-ke wajika wabona eze ngayo asilingeke kokufa.
13 Iinsebenzi zakhe zatjhidela kuye zathi: “Baba, ukube umphorofidi ukutjele bona wenze into engakajayeleki bewungekhe wayenza na? Kangangani-ke njengombana akhulume nawe kwaphela wathi, ‘Hlamba bese uhlambuluke’?”
14 Ngemva kwalokho wehla wazicwilisa eJordani amahlandla alikhomba, ngokuvumelana nelizwi lomuntu kaZimu weqiniso.+ Nje-ke isikhumba sakhe salapheka, safana nesikhumba somsanyana+ begodu wahlambuluka.+
15 Ngemva kwalokho, wabuyela emuntwini kaZimu weqiniso,+ yena nawo woke amasotjakhe, wajama phambi kwakhe wathi: “Nje khona sengazi kuhle ukuthi ephasini loke akekho omunye uZimu ngaphandle kwakaZimu ka-Israyeli.+ Nje-ke ngibawa wamukele isipho esivela esisebenzini sakho.”
16 Yeke u-Elitjha wathi: “Ikani uJehova engimlotjhako nakasaphilako, angekhe ngisamukele.”+ Wamncenga bona asamukele kodwana wasolo abhala.
17 Emaswapheleni uNamani wathi: “Nakungasinjalo, ngibawa isisebenzi sakho sinikelwe ihlabathi yenarha le engathwalwa ziimeyila ezimbili ngombana isisebenzi sakho angekhe sisenza umnikelo otjhiswako namkha umhlatjelo kinanyana ngibaphi abozimu ngaphandle kwakaJehova.
18 Kwanga uJehova angalibalela isisebenzi sakho ngalokhu: Ikosami nayingena ngendlini kaRimoni bona iyokukhothama lapho, izisekela ngesandla sami, nje-ke kufuze ngikhothame endlini* kaRimoni. Nangikhothama endlini kaRimoni, ngibawa uJehova alibalele isisebenzi sakho ngalokhu.”
19 Yeke wathi kuye: “Khamba ngokuthula.” Ngemva kokusuka kuye begodu sekakhambe ibangana,
20 uGerhazi+ umsizi ka-Elitjha umuntu kaZimu+ weqiniso wathi ngehliziywenakhe: ‘Qala-ke ikosami ilise umSiriya loya onguNamani+ ngokungamukeli isipho ebekayiphathele sona. Ikani uJehova nakasaphilako, ngizokugijima ngemva kwakhe begodu ngithathe okuthileko kuye.’
21 Nje-ke uGerhazi wagijima ngemva kwakaNamani. UNamani nakabona kunomuntu ogijima ngemva kwakhe, wahlika ekaranenakhe bona ayomhlangabeza wathi: “Koke kusakhamba kuhle?”
22 Waphendula wathi: “Koke kukhamba kuhle. Ngithunyelwe yikosami, ithi, ‘Qala kuqeda ukufika kimi amasokana amabili wesifundeni seentaba sakwa-Efrayimu angamanye wamadodana wabaphorofidi. Ngibawa uwanikele italende lesiliva nezambatho ezimbili.’”+
23 UNamani wathi: “Kulungile, ungathatha amatalende amabili.” Wasolo amncenga+ bona awathathe, wamfakela amatalende amabili wesiliva nezambatho ezimbili ngemigodleni emibili, waziphathisa iinsebenzi zakhe ezimbili, zamthwalela zona zakhamba phambi kwakhe.
24 Nakafika e-Ofeli,* wathatha izintwezo ezandleni zazo wazibeka ngendlini, wakhambisa amadoda lawo. Nawaqeda ukukhamba,
25 wangena ngendlini wajama phambi kwekosakhe. U-Elitjha wathi kuye: “Ubuyaphi Gerhazi?” Kodwana yena wathi: “Isisebenzi sakho akhenge siye ndawo.”+
26 U-Elitjha wathi kuye: “Kghani ihliziywami beyingasilapho nawe, indoda leya nayihlika ekaranenayo bona izokuhlangabeza? Kghani lesi sikhathi sokwamukela isiliva namkha izambatho namkha isimu yama-oliva namkha isimu yamadiribe namkha izimvu namkha iinkomo namkha iinsebenzi eziduna namkha ezisikazi?+
27 Nje-ke ubulepheru bakaNamani+ buzokunamathela kuwe neenzukulwaneni zakho ngokungapheliko.” Khonokho wasuka phambi kwakhe anobulepheru, amhlophe twa njengegabhogo.+
Imitlolo Ephasi
^ Namkha “bekanobulwelwe besikhumba.”
^ Kungenzeka kuqaliselwe kuNamani.
^ Italende beyilingana namakhilogremu ayi-34.2. Qala Isith. B14.
^ Namkha “ethempelini.”
^ Indawo eseSamariya, kungenzeka umbundu namkha indawo evikelekileko.
