Yesibili YeenKronike 13:1-22
13 Ngomnyaka we-18 wokubusa kweKosi uJerobhowamu, u-Abhiya waba yikosi yakwaJuda.+
2 Wabusa eJerusalema iminyaka emithathu. Igama lakanina bekunguMikaya+ indodakazi ka-Uriyeli weGibeya.+ Kwaba nepi phakathi kwaka-Abhiya noJerobhowamu.+
3 Nje-ke u-Abhiya waya epini anebutho leengorho ezibanduliweko* ezizii-400 000 ezinamandla.+ UJerobhowamu naye wajama ngendlela ehlelekileko njengeenqhema zamasotja bona ayokulwa naye anamadoda abanduliweko* azii-800 000, iingorho ezinamandla.
4 U-Abhiya wajama eNtabeni iTsemarayimu esesifundeni seentaba sakwa-Efrayimu, wathi: “Ngilalela Jerobhowamu nawe Israyeli.
5 Anazi na bona uJehova uZimu ka-Israyeli wanikela uDavida umbuso bona abuse u-Israyeli ngokungapheliko,+ wawunikela yena namadodanakhe+ ngesivumelwano setswayi?*+
6 Kodwana uJerobhowamu+ indodana kaNebathi, isisebenzi sakaSolomoni indodana kaDavida sasikima sajamelana nekosakhe.+
7 Amadoda amavila nanganabubhadekelo asolo abuthanela kuye. Aba namandla ukudlula uRerhobhowamu indodana kaSolomoni ngesikhathi uRerhobhowamu asesemncani, anganasibindi begodu angakghoni ukujamelana nawo.
8 “Nje-ke nicabanga ukuthi ningalwisana nombuso kaJehova osesandleni samadodana kaDavida ngombana nisiqubuthu esikhulu bese ninamakonyana wegolide uJerobhowamu anenzela wona bona abe bozimu benu.+
9 Akhenge na niqothe abaphristi bakaJehova,+ iinzukulwana zaka-Aroni namaLevi, nazibekela abaphristi benu njengombana kwenza abantu beenarha?+ Nanyana ngubani obekeza aphethe ikunzana namaramu alikhomba bekangaba mphristi walokho okungasibozimu.
10 Kodwana thina, uZimethu+ nguJehova begodu akhenge simlahle; abaphristi bethu, iinzukulwana zaka-Aroni basebenzela uJehova begodu amaLevi ayabasiza.
11 Bathunyisa iminikelo etjhiswako kuJehova qobe ekuseni naqobe ntambama,+ batjhisa nepepho enuka kamnandi,+ uburotho obubekwe ngamalarha*+ busetafuleni legolide elicwengileko, bakhanyisa namalithi wegolide+ neembani zawo qobe ntambama+ ngombana thina senza umsebenzi uJehova uZimethu asiphathise wona; kodwana nina nimlahlile.
12 Nje-ke qalani! UZimu weqiniso unathi begodu usidosa phambili. Abaphristi bakhe balapha, baphethe amabhorompita bona bahlabe umkhosi wepi ngokujamelene nani. Madoda wakwa-Israyeli, ningalwi noJehova uZimu wabokhokho benu ngombana angekhe niphumelele.”+
13 Kodwana uJerobhowamu wathumela elinye ibutho bona libakhukhuthele ngemva, ukuthi bona babe ngaphambi kwakaJuda bese kuthi ibutho elibakhukhutheleko libe ngemva kwakaJuda.
14 Amadoda wakwaJuda nakaphendukako, abona ukuthi asahlelwa ngemva nangaphambili. Nje-ke abiza uJehova,+ kukulapho abaphristi babethela amabhorompita phezulu.
15 Amadoda wakwaJuda ahlaba umkhosi wepi, kuthe nawahlaba umkhosi, uZimu weqiniso wahlula uJerobhowamu no-Israyeli woke phambi kwaka-Abhiya noJuda.
16 Ama-Israyeli abaleka, uZimu wawanikela esandleni sakaJuda.
17 U-Abhiya nabantu bakhe barhayila abantu abanengi khulu, kwarhayilwa amadoda abanduliweko* wakwa-Israyeli azii-500 000.
18 Amadoda wakwa-Israyeli athotjiswa ngesikhatheso kodwana amadoda wakwaJuda aba namandla ngombana athembela kuJehova uZimu wabokhokho bawo.+
19 U-Abhiya wasolo agijimisa uJerobhowamu, wathumba amadorobho kuye, iBhetheli+ namadorobho ayibhodileko, iJetjhana namadorobho ayibhodileko ne-Efroni+ namadorobho ayibhodileko.
20 UJerobhowamu akhenge asaba namandla hlangana nesikhathi sokubusa kwaka-Abhiya; yeke uJehova wamjezisa, wafa.+
21 Kodwana u-Abhiya wakhula waba namandla. Ngokukhamba kwesikhathi wathatha abafazi abali-14,+ waba namadodana ama-22 namadodakazi ali-16.
22 Woke omunye umlando ka-Abhiya, izenzo namezwakhe, utloliwe emitlolweni yomphorofidi u-Ido.+
Imitlolo Ephasi
^ NgesiHebheru, “ezikhethiweko.”
^ NgesiHebheru, “akhethiweko.”
^ Kutjho isivumelwano sasafuthi nesingatjhugulukiko.
^ Kutjho uburotho bombukiso.
^ NgesiHebheru, “akhethiweko.”
