Yesibili YeenKronike 31:1-21
31 Kuthe lokha nabaqeda ukwenza koke lokho, woke ama-Israyeli ebewakhona atjhinga emadorobheni wakwaJuda, aphadlha iinsika ezicwengileko,+ aqunta iingodo ezicwengileko*+ begodu agiriza iindawo eziphakemeko+ nama-aldara+ akiyo yoke inarha yakwaJuda, yakwaBhenjamini, yakwa-Efrayimu neyakwaManase,+ bekwaba kulapho sebakutjhabalalise koke. Ngemva kwalokho woke ama-Israyeli abuyela emadorobhenawo, omunye nomunye wabuyela lapha ahlala khona.
2 Nje-ke uHezekiya wahlela abaphristi namaLevi ngokweenqhema zabo,+ bona benze umsebenzi abanikelwe wona.+ Bekufuze benze iminikelo etjhiswako, imihlatjelo yetjhebiswano, benze imisebenzi kaZimu, bamthokoze bese bamdumise emasangweni wesirhodlo sakaJehova.+
3 Izinto ikosi eyanikela ngazo kwenziwa ngazo iminikelo etjhiswako,+ okuhlanganisa iminikelo etjhiswako+ yekuseni neyantambama, iminikelo etjhiswako yamaSabatha,+ yokuthwasa kwenyanga+ neyeminyanya+ njengombana kutloliwe emThethweni kaJehova.
4 Godu wayala abantu beJerusalema bona banikele abaphristi namaLevi+ ingcenyabo ukuthi bazinikele ngokupheleleko emthethweni kaJehova.
5 Kwathi ngemva kokuthi kukhutjhwe umyalo, ama-Israyeli aletha okunengi kweenthelo zawo zokuthoma, zeenthoro, iwayini elitjha, amafutha,+ iliju nakho koke okufumaneka emasimini.+ Aletha kwetjhumi okunengi kwakho koke.+
6 Abantu bakwa-Israyeli nebakwaJuda abahlala emadorobheni wakwaJuda nabo baletha kwetjhumi kweenkomo nokwezimvu, baletha nokwetjhumi kwezinto ezicwengileko+ ezacwengiselwa uJehova uZimabo. Nje-ke babuthelela izipho ezinengi.
7 Enyangeni yesithathu,+ bathoma ukubuthelela zoke izipho ezilethwe babantu, bazibeka endaweni yinye begodu enyangeni yekhomba+ baqeda.
8 Kwathi uHezekiya namakhosana nababona ukuthi zinengi kangangani izipho ezilethwe babantu, badumisa uJehova, babusisa nabantu bakwa-Israyeli.
9 UHezekiya wabuza abaphristi namaLevi ukuthi zibuyaphi izipho ezinengi kangaka.
10 U-Azariya umphristi ophakemeko wendlu kaTsadokhi wathi: “Kusukela ngesikhathi abantu abathome ngaso ukuletha iminikelo endlini kaJehova,+ abantu bebasolo badla begodu baneliseka. Kusese nokunengi okuseleko ngombana uJehova ubabusisile abantu, nje-ke qala bona kunengi kangangani okuseleko.”+
11 Yeke uHezekiya wabatjela ukuthi balungise iinlulu+ ezingendlini kaJehova begodu benza njalo.
12 Baragela phambili nokuthembeka ekuletheni iminikelo, kwetjhumi+ nezinto ezicwengileko. UKonaniya wabekwa bona abe yinduna yakho koke lokhu begodu umfowabo uTjhimeyi bekalisekela lakhe.
13 UJerhiyeli, u-Azaziya, uNarhathi, u-Asaheli, uJerimothi, uJozabadi, u-Eliyeli, uJisimakiya, uMarhathi noBhenaya bebabalawuli basiza uKonaniya nomfowabo uTjhimeyi njengombana kwatjho iKosi uHezekiya. U-Azariya bekayinduna yendlu kaZimu weqiniso.
14 UKhore indodana kaJimna umLevi, obekamlindi wesango elingepumalanga+ bekatjheje iminikelo esuka ehliziyweni+ eyenzelwe uZimu weqiniso. Godu gade aba umnikelo obewenzelwe uJehova,+ aba nezinto ezicwengeke khulu.+
15 Ebebangaphasi kwakhe emadorobheni wabaphristi+ bekungu-Edeni, uMinyamini, uJetjhuwa, uTjhemaya, u-Amariya noTjhekaniya. Bathembeka ekwabeleni abafowabo,+ omdala nomncani bathola ngokulinganako.
16 Lokhu bekuhlanganisa nalokho okwabiwa kunikelwa abaduna ebebaneminyaka emithathu ubudala ukuya phezulu nebegade batloliswe ngokweenkoro zabo, ebebeza qobe endlini kaJehova bona bazokusebenza, benze nemisebenzabo ngokweenqhema zabo.
17 Abaphristi namaLevi ebewaneminyaka ema-20 ukuya phezulu+ batloliswa ngokwemindenabo, ngokweenhloko zeenkoro zabo+ nangokwemisebenzi abayenzako ngokweenqhema zabo.+
18 Nabatloliswa ngokwemindenabo bekutloliswa nabantwababo, abafazi babo nawo woke amalunga womndenabo. (Bebaqiniseka ukuthi bahlala bacwengile ngombana bebaphathiswe imisebenzi ecwengileko.)
19 Bekutloliswa neenzukulwana zaka-Aroni, okubaphristi ebegade bahlala emasimini wamadlelo ebewahlanu kwamadorobhazo.+ Kiwo woke amadorobho lawo bekunamadoda akhethiweko bona abele abaphristi ukudla nabo boke egade batloliswe ngokwemindeni yamaLevi.
20 Ngilokho uHezekiya akwenza kiyo yoke inarha yakwaJuda, waragela phambili enza okulungileko, wathembeka nakuJehova uZimakhe.
21 Kiwo woke umsebenzi ebekawenza bona alotjhe uZimakhe, kungaba msebenzi owenziwa endlini kaZimu weqiniso,+ emThethweni nemyalweni, wawenza ngehliziywakhe yoke bese waphumelela.
Imitlolo Ephasi
^ Qala Ihlathululo.
