USamyela Wesibili 11:1-27
11 Ekuthomeni komnyaka,* ngesikhathi amakhosi aya emajimeni ngaso, uDavida wathumela uJowabi neensebenzi zakhe nalo loke ibutho lakwa-Israyeli bona bayokutjhabalalisa ama-Amoni, bavimbezela iRabha+ kodwana uDavida bekahlezi eJerusalema.+
2 Ngelinye ilanga entambama,* uDavida wavuka embhedenakhe wakhambakhamba phezu kwephahla lendlu yekosi.* Nakathi mehlo suka asephahlenapho, wabona umfazi ahlamba begodu bekamuhle khulu.
3 UDavida wathumela umuntu othileko bona ayokubuzisisa ngomfazi loyo, umuntu lo wambikela wathi: “Kghani akusinguBhathi-Tjheba lo,+ indodakazi ka-Eliyamu+ umka-Uriya+ umRhiti?”+
4 Ngalokho uDavida wathumela iinthunywa bona zize naye.+ Yeke umfazi lo wangena ngakuye, uDavida walala naye.+ (Lokhu kwenzeka ngesikhathi umfazi lo azihlwengisa ekusilaphaleni kwakhe.*)+ Ngemva kwalokho, umfazi lo wabuyela emzinakhe.
5 Umfazi lo wazithwala, wathumela umlayezo kuDavida wathi: “Ngisidisi.”
6 Ngalokho uDavida wathumela umlayezo kuJowabi wathi: “Thumela u-Uriya umRhiti kimi.” Yeke uJowabi wathumela u-Uriya kuDavida.
7 U-Uriya nakafika kuye, uDavida wambuza ukuthi uJowabi uvuke njani namasotja avuke njani nokuthi ipi ikhamba njani.
8 Ngemva kwalokho, uDavida wathi ku-Uriya: “Yehlela kwakho uyokuphumula.”* U-Uriya nakasuka endlini yekosi walandelwa sisipho esivela ekosini.*
9 Nanyana kunjalo, u-Uriya walala esangweni lendlu yekosi nazo zoke ezinye iinsebenzi zekosakhe, azange ehlele emzinakhe.
10 Yeke uDavida wafumana umbiko othi: “U-Uriya akhenge ehlele emzinakhe.” Ngalokho uDavida wathi ku-Uriya: “Kghani awubuyi ekhambweni na? Kubayini ungakehleli emzinakho?”
11 U-Uriya waphendula uDavida wathi: “UmFaji,+ ama-Israyeli namaJuda ahlala emitlhatlhaneni, ikosami uJowabi neenceku zekosami zihlome ikampa emmangweni. Yeke inga-kghani kufuze ngiye kwami ngiyokudla bengisele begodu ngilale nomkami?+ Ngifunga ngokuphila kwakho, angeze ngayenza into leyo!”
12 UDavida wathi ku-Uriya: “Hlala lapha nanamhlanjesi, ngizokukhambisa kusasa.” Yeke u-Uriya wahlala eJerusalema mhlokho nangakusasa kwakhona.
13 UDavida wathumela bona ayokuthathwa, azokudla bekasele naye begodu wamenza wadakwa. Kodwana ntambama, wakhamba wayokulala embhedenakhe neensebenzi zekosakhe, azange ehlele emzinakhe.
14 Ekuseni uDavida watlolela uJowabi incwadi, wamthumelela yona ngesandla saka-Uriya.
15 Encwadini leyo watlola wathi: “Bekani u-Uriya phambili epini lapho itjhisa ngakhona khulu. Bese niyasuka ngemva kwakhe bona arhayilwe ahlongakale.”+
16 UJowabi bekaqale idorobho ngelihlo elibukhali begodu wabeka u-Uriya lapho azi bona kuneengorho ngakhona.
17 Kwathi amadoda wedorobho nakaphumako begodu alwa noJowabi, ezinye iinsebenzi zakaDavida zabulawa, u-Uriya umRhiti bekaphakathi kwalabo abahlongakalako.+
18 Nje-ke uJowabi wabikela uDavida zoke iindaba ezimalungana nepi.
19 Wayala isithunywa wathi: “Nawuqeda ukubikela ikosi ngakho koke okwenzeka epini,
20 kungenzeka ikosi isilingeke beyithi kuwe, ‘Kubayini nitjhidele eduze kangaka nedorobho bona niyokulwa? Beningazi na bona bazonidumuza baphezu kweboda?
21 Ngubani owarhayila u-Abimeleki+ indodana kaJerubhetjhethi?+ Kghani akusimfazi obekaphezu kweboda owamphosa ngembokotho wambulala eThebezi? Kubayini nitjhidele eduze kangaka neboda?’ Kufuze uthi, ‘Isisebenzi sakho u-Uriya umRhiti naso sihlongakele.’”
22 Yeke isithunywa sakhamba satjela uDavida koke uJowabi ebekasithume bona simtjele khona.
23 Ngemva kwalokho, isithunywa sathi kuDavida: “Abantu bakhona basihlulile begodu basisahlele emmangweni kodwana silwe nabo besayokufika esangweni ledorobho.
24 Abadumuzi bemisubela bebadumuza iinsebenzi zakho begodu bebangaphezu kweboda bese ezinye iinsebenzi zekosi zihlongakele; isisebenzi sakho u-Uriya umRhiti naso sihlongakele.”+
25 Ngalokho uDavida waphendula isithunywa wathi: “Tjela uJowabi nakhu: ‘Ungavumeli indaba le ikutshwenye ngombana isabula idla nanyana ngubani. Qinisa ipi usahlele idorobho bewulithumbe.’+ Umkhuthaze.”
26 Umka-Uriya nakezwa bona indodakhe u-Uriya ihlongakele, wathoma ukuyizilela.
27 Msinyana nakuphela isikhathi sokuzila, uDavida wathumela bona ayokuthathwa alethwe endlinakhe, waba mkakhe+ wambelethela indodana. Kodwana lokho okwenziwa nguDavida akhenge kumthabise nakancani uJehova.*+
Imitlolo Ephasi
^ Kutjho ngetwasahlobo.
^ NgesiHebheru, “Ngobunye ubusuku.”
^ Namkha “lesigodlo.”
^ Kungenzeka ukusilaphala kokuba sesikhathini.
^ NgesiHebheru, “uyokuhlamba iinyawo.”
^ Namkha “sisabelo sekosi,” kutjho isabelo esithunyelwa ngovakatjhelweko esivakatjhini esihloniphekileko.
^ NgesiHebheru, “bekukumbi emehlweni kaJehova.”
