Abahluleli 12:1-15
12 Ngemva kwalokho, kwabizwa amadoda wakwa-Efrayimu, ayamela eTsafoni* athi kuJafta: “Kubayini ungakasibizi nawuyamela ngaphetjheya uyokulwa nama-Amoni?+ Sizoyitjhisa thokgho indlwakho nawe ungaphakathi kwayo.”
2 Kodwana uJafta wathi kiwo: “Mina nabantu bami besisepini ekulu nama-Amoni. Ngabawa isizo kini, kodwana azange ningisindise esandleni sawo.
3 Kwathi nangibona ukuthi angekhe ningisindise, ngaqunta ukubeka ukuphila kwami engozini bona ngiyokulwa nama-Amoni,+ uJehova wawanikela esandleni sami. Alo kubayini nizokulwa nami namhlanjesi?”
4 Yeke uJafta wahlanganisa woke amadoda weGiliyadi,+ balwa no-Efrayimu; amadoda weGiliyadi amhlula u-Efrayimu, obekathe: “Nina nibabaleki abavela kwa-Efrayimu, nina maGiliyadi akwa-Efrayimu nakwaManase.”
5 UGiliyadi wathumba amazibuko weJordani+ ebewaphambi kwaka-Efrayimu; bekuthi amadoda wakwa-Efrayimu nawalinga ukubaleka athi, “Ngivumelani ngiyamele ngaphetjheya”; amadoda weGiliyadi bewabuza ngamunye wawo athi, “UmEfrayimu na?” Nakaphendula athi, “Awa,”
6 bewathi kuye, “Sibawa uthi Tjhibolethi.” Kodwana bekathi, “Sibolethi,” ngombana bekangakghoni ukuphimisela ibizwelo kuhle. Ngalokho bewambamba, ambulale emazibukweni weJordani. Kwabulawa ama-Efrayimu azii-42 000 ngesikhatheso.
7 UJafta wahlulela u-Israyeli iminyaka esithandathu, ngemva kwalokho uJafta umGiliyadi wahlongakala, wabulungwa edorobheni lakhe eGiliyadi.
8 Ngemva kwakhe, u-Ibitsani weBhetlehema wahlulela u-Israyeli.+
9 Bekanamadodana ama-30 namadodakazi ama-30. Watjhadisa amadodakazakhe namadoda wakwenye ikoro begodu waletha abafazi abama-30 bona bazokutjhada namadodanakhe. Wahlulela u-Israyeli iminyaka elikhomba.
10 Ngemva kwalokho, u-Ibitsani wahlongakala, wabulungwa eBhetlehema.
11 Ngemva kwakhe u-Eloni umZebuloni wahlulela u-Israyeli; waba ngumahluleli wakwa-Israyeli iminyaka elitjhumi.
12 U-Eloni umZebuloni wahlongakala, wabulungwa e-Ayaloni enarheni yakwaZebuloni.
13 Ngemva kwakhe u-Abidoni indodana kaHileli umPiratoni wahlulela u-Israyeli.
14 Bekanamadodana ama-40 neenzukulwana eziduna ezima-30, boke njalo bebakhwela abodumbana abama-70. Wahlulela u-Israyeli iminyaka ebunane.
15 U-Abidoni indodana kaHileli umPiratoni wahlongakala, wabulungwa ePiratoni enarheni yakwa-Efrayimu entabeni yama-Amalekhi.+
Imitlolo Ephasi
^ Namkha kungenzeka “ayamela ngetlhagwini.”
