Amosi 7:1-17
7 Nakhu iKosi ePhakemeko uJehova angitjengise khona: Qala! Uthumela isikhonyani* lokha nakuthoma ukumila iintjalo zebusika.* Lokhu kwenzeke ngemva kobana kusikwe utjani bekosi.
2 Isikhonyani nasiqeda ukudla zoke iintjalo enarheni, ngathi: “Kosi ePhakemeko Jehova, ngibawa ulibalele+ abantu bakho! UJakopo uzokusinda njani anganamandla nje?”+
3 UJehova watjhugulula umkhumbulwakhe.*+ UJehova wathi, “Okubonilekokhu, angekhe kwenzeke.”
4 Nakhu iKosi ePhakemeko uJehova engitjengise khona: Qala! IKosi ePhakemeko uJehova ikhuphe umyalo wokobana inarha izokujeziswa ngomlilo. Umlilo loyo uzokutjhisa ilwandle belome, utjhise nengcenye yenarha.
5 Nje-ke ngathi: “Kosi ePhakemeko Jehova, ngibawa ujame.+ UJakopo uzokusinda njani anganamandla nje?”+
6 UJehova watjhugulula umkhumbulwakhe.*+ IKosi ePhakemeko uJehova yathi, “Nalokho angeze kwenzeke.”
7 Nakhu angitjengise khona: Qala! UJehova bekajame phezu kweboda ebelakhiwe lanqopha kuhle begodu aphethe intambo yokulinganisa.
8 UJehova wathi kimi: “Ubonani, Amosi?” Ngathi: “Ngibona intambo yokulinganisa.” UJehova wathi: “Ngibeka intambo yokulinganisa hlangana nabantu bami, u-Israyeli. Angeze ngisabalibalela.+
9 Iindawo eziphakemeko zaka-Isaka+ angeze kusahlalwa kizo neendawo ezicwengileko zaka-Israyeli zizokutjhatjalaliswa,+ ngizokusahlela indlu kaJerobhowamu ngesabula.”+
10 U-Amaziya umphristi weBhetheli,+ uthumele umlayezo eKosini yakwa-Israyeli, uJerobhowamu+ wathi: “U-Amosi ukulukela amano hlangana nendlu ka-Israyeli.+ Abantu benarheni angeze bawabekezelele amezwi ka-Amosi.+
11 U-Amosi uthi, ‘UJerobhowamu uzokubulawa ngesabula begodu abantu bakwa-Israyeli bazokususwa enarhenabo bese basiwe ekudingisweni.’”+
12 U-Amaziya wathi ku-Amosi: “Wena mboni, khamba ubalekele enarheni yakwaJuda, udlele uburotho bakho lapho begodu uphorofidele khona.+
13 Kodwana ungasaphorofidela eBhetheli,+ ngombana iyindawo ecwengileko yekosi+ begodu iyindlu yombuso.”
14 Nje-ke u-Amosi waphendula u-Amaziya wathi: “Bengingasimphorofidi namkha indodana yomphorofidi; kodwana bengingumalusi,+ ngitlhogomela imithi yesikhamore.*
15 UJehova wangilisisa ukulusa umhlambi bese uJehova wathi kimi, ‘Khamba uyokuphorofidela abantu bami, u-Israyeli.’+
16 Yizwa ilizwi lakaJehova: ‘Wena uthi, “Ungaphorofidi ngokujamelene no-Israyeli+ begodu ungatjhumayeli+ ngokujamelene nendlu ka-Isaka.”
17 Nakhu uJehova akutjhoko: “Umkakho uzokuba yingwadla edorobheni begodu amadodanakho namadodakazakho azokubulawa ngesabula. Inarhakho izokuhlukaniswa ngentambo yokulinganisa, wena uzokuhlongakalela enarheni esilapheleko; u-Israyeli uzokusuka enarhenakhe asiwe ekudingisweni.”’”+
Imitlolo Ephasi
^ Ziintethe ezinengi ezidla okuhlaza.
^ Kutjho phakathi kwakaJanabari noFebherbari.
^ Namkha “wazisola.”
^ Namkha “wazisola.”
^ Mhlobo othileko womuthi wamafeyi.
