Eksodusi 30:1-38
30 Kufuze wenze i-aldara lapho kuzokutjhiselwa khona ipepho,+ kufuze ulenze ngomuthi womunga.+
2 Kufuze libe sikwere, likhubhithi* ubude, likhubhithi ububanzi belibe makhubhithi amabili ukuphakama. Iimpondo zalo kufuze zifane nalo.+
3 Kufuze ulinameke ngegolide elihlwengileko phezulu, ngemaqadi neempondweni zalo bewulenzele umphetho wegolide magega nalo.
4 Kufuze wenze namasongo amabili wegolide ngaphasi komphetho emahlangothini amabili begodu amasongo la azokubamba iingodo ekugugwa ngazo i-aldara.
5 Wenze iingodo ngomuthi womunga uzinameke ngegolide.
6 Kufuze ubeke i-aldara phambi kwerharideni elihlanu komfaji wobuFakazi,+ phambi kwesivalo esiphezu kobuFakazi lapha ngizokubonakala kuwe khona.+
7 “U-Aroni+ uzokutjhisa ipepho enuka kamnandi+ e-aldareni+ lokha nakayokukhanyisa iimbani+ qobe ekuseni.
8 U-Aroni nakakhanyisa iimbani ngamarhwaqela uzokutjhisa nepepho. Ipepho le izokuhlala itjhiswa phambi kwakaJehova kizo zoke iinzukulwana zenu.
9 Kufuze ungatjhisi ipepho engakavumeleki+ kilo, umnikelo otjhiswako namkha umnikelo weenthoro begodu ungatheli umnikelo weenselo kilo.
10 U-Aroni kufuze enze umhlatjelo wokulitjalelwa kwezono phezu kweempondo ze-aldara kanye ngomnyaka.+ Athathe ezinye iingazi zomnikelo wesono enze umhlatjelo wokulitjalelwa kwezono,+ enzele i-aldara umhlatjelo wokulitjalelwa kwezono kanye ngomnyaka kizo zoke iinzukulwana zenu. Licwengeke khulu kuJehova.”
11 Nje-ke uJehova wathi kuMosi:
12 “Nanyana kunini nawubala abantwana bakwa-Israyeli,+ omunye nomunye wabo kufuze alethe isihlengo kuJehova ngebanga lokuphila kwakhe bona kungabi nesibetho esibehlelako nabatloliswako.
13 Abazokutloliswa nakhu ekufuze bakunikele: isiquntu setjhekeli* ngokwetjhekeli* lendawo ecwengileko.+ Amagera* ama-20 alingana netjhekeli. Isiquntu setjhekeli kufuze sinikelwe kuJehova.+
14 Woke umuntu otlolisiweko oneminyaka ema-20 ukuya phezulu, kufuze anikele uJehova umnikelo.+
15 Abanjingileko akukafuzi bakhuphe okungezelelekileko nabatlhagileko akukafuzi bakhuphe okungaphasi kwesiquntu setjhekeli,* bona kube mnikelo oya kuJehova begodu kube mnikelo wokulitjalelwa kwezono ngebanga lokuphila kwenu.
16 Kufuze uthathe imali yesiliva yomnikelo wokulitjalelwa kwezono kuma-Israyeli bewuyinikele emsebenzini owenziwa etendeni lokuhlangana, ukwenzela bona uJehova akhumbule ama-Israyeli begodu imali leyo kwenziwe ngayo umnikelo wokulitjalelwa kwezono ngebanga lokuphila kwawo.”
17 UJehova waraga wakhuluma noMosi wathi:
18 “Yenza isitja sokuhlambela nesisekelo saso ngekhopha,+ usibeke hlangana kwetende lokuhlangana ne-aldara uthele amanzi ngakiso.+
19 U-Aroni namadodanakhe bazokuhlambela khona izandla zabo neenyawo.+
20 Nabangena etendeni lokuhlangana namkha nabatjhidela e-aldareni bona bayokulotjha begodu benze iminikelo yomlilo intuthu yakhona ikhuphukele kuJehova, kufuze bahlambe ukwenzela bona bangafi.
21 Kufuze bahlambe izandla zabo neenyawo zabo ukwenzela bona bangafi. Umthetho lo uzokuhlala usebenza ku-Aroni neenzukulwaneni zakhe.”+
22 UJehova waraga wakhuluma noMosi wathi:
23 “Ngemva kwalokho thatha iinthako ezikhethekileko amakhilogremu asithandathu wemire eqinileko, amakhilogremu amathathu wesinamoni enuka kamnandi, amakhilogremu amathathu wekhalamusi enuka kamnandi,
24 namakhilogremu asithandathu womunye umhlobo wesinamoni* okalwe ngesilinganiso setjhekeli lendawo ecwengileko+ nehini* yamafutha we-oliva.
25 Wenze ngazo amafutha acwengileko wokuzesa, kufuze zihlanganiswe ngendlela ekuhlanganiswa ngayo iinthako.+ Kufuze kube mafutha acwengileko wokuzesa.
26 “Kufuze uzese ngawo itende lokuhlangana+ nomfaji wobuFakazi,
27 uzese itafula nezitja zakhona, ilithi lesibani nezitja zalo, i-aldara lepepho,
28 i-aldara lomnikelo otjhiswako nazo zoke izitja zakhona, isitja nesisekelo saso.
29 Kufuze uzicwengise ukwenzela bona zicwengeke khulu.+ Nanyana ngubani ozithintako kufuze acwengeke.+
30 Kufuze uzese u-Aroni+ namadodanakhe+ begodu ubacwengise ukwenzela bona babe baphristi bami.+
31 “Uzokukhuluma nama-Israyeli uthi, ‘Lokhu kuzokuraga kumafutha acwengileko wokuzesa kimi hlangana neenzukulwana zenu.+
32 Akunamuntu okufuze azele ngawo begodu akukafuzi nizenzele afana nawo ngombana acwengile. Kufuze ahlale acwengile nakini.
33 Nanyana ngubani owenza amafutha afana nawo begodu atjhatjhe ngawo umuntu ongasimphristi* kufuze abulawe.’”+
34 Nje-ke uJehova wathi kuMosi: “Thatha isilinganiso esifanako seenthako nanzi: ikghomu, ipepho enuka kamnandi,+ igalibhamu enuka kamnandi nepepho emhlophe ehlwengileko.
35 Kufuze wenze ngazo ipepho,+ iinthakwezi kufuze zihlanganiswe ngobuthakgha, zinungwe ngetswayi,+ zihlwengeke begodu zicwengeke.
36 Enye yayo kufuze uyigaye ibe yipuphu esefiweko ubeke enye phambi kobuFakazi etendeni lokuhlangana, lapho ngizokubonakala kuwe khona. Kufuze icwengeke khulu kuwe.
37 Ningazenzeli ipepho ngeenthakwezi bona niyisebenzise nina.+ Kufuze ihlale iyinto ecwengileko kuJehova.
38 Nanyana ngubani owenza efana nayo bona anukise kamnandi kufuze abulawe.”
Imitlolo Ephasi
^ Ikhubhithi belingaba masentimitha ayi-44.5. Qala Isith. B14.
^ Itjhekeli beyilingana namagremu ayi-11.4. Qala Isith. B14.
^ Namkha “ngokwendlela okulinganiswa ngayo.”
^ Igera beyilingana namagremu ayi-0.57. Qala Isith. B14.
^ Itjhekeli beyilingana namagremu ayi-11.4. Qala Isith. B14.
^ NgesiHebheru, “yikhasiya.” Qala Ihlathululo.
^ Ihini beyilingana namalitha ayi-3.67. Qala isith. B14.
^ NgesiHebheru, “umuntu ongaziwako” kutjho ukuthi umuntu ongaveli emndenini ka-Aroni.
