Eksodusi 35:1-35
35 Kamva uMosi wabuthelela yoke ihlangano yakwa-Israyeli ndawonye wathi kiyo: “Lezi zizinto uJehova ayale bona nizenze:+
2 Kufuze nisebenze amalanga asithandathu kodwana ilanga lekhomba licwengile kini, lisabatha, ilanga lokuphumula elicwengileko kuJehova.+ Nje-ke nanyana ngubani osebenzako ngelangelo kufuze abulawe.+
3 Akukafuzi nibase umlilo nanyana kukuphi lapha nihlala khona ngelanga leSabatha.”
4 UMosi wathi kiyo yoke ihlangano yakwa-Israyeli: “Nakhu uJehova akutjhwileko,
5 ‘Nikelani kuJehova.+ Nanyana ngubani onesifiso sokunikela,+ akanikele kuJehova igolide, isiliva, ikhopha,
6 irhara ehlaza komkayi, iwulu esipiridzana, itjhila elibomvu be, ilineni elisezingeni eliphezulu, uboya bembuzi,+
7 iinkhumba zamaramu ezidaywe ngobubomvu, iinkhumba zesili,* iingodo zomunga,
8 amafutha weembani, ibhalisamu yokwenza amafutha wokuzesa neyokwenza ipepho enuka kamnandi,+
9 amatje we-oniksi, namanye amatje abekwa e-efodini+ nesikhwanyaneni esisesifubeni.+
10 “‘Boke labo abanamakghono+ hlangana nani abeze, bazokwenza lokho uJehova athe kwenziwe,
11 okulithaberinakeli, itende lalo nesivalo salo, iinghamelo, amafremu, iinqabo, iinsika, iinsekelo zalo,
12 umFaji+ neengodo zawo,+ isivalo,+ irharideni+ elihlukanisako,
13 itafula+ neengodo zalo, nazo zoke izitja zalo noburotho bombukiso,+
14 ilithi lesibani+ lokukhanyisa nezitja zalo, iimbani namafutha wokukhanyisa,+
15 i-aldara lepepho+ neengodo zalo, amafutha wokuzesa nepepho enuka kamnandi,+ irharideni lebungenweni bethaberinakeli;
16 i-aldara lomnikelo otjhiswako+ nesefalo yekhopha, iingodo zalo, nazo zoke izitja zalo, isitja nesisekelo saso,+
17 amarharideni wesirhodlo,+ iinsika neensekelo zawo, irharideni lebungenweni besirhodlo,
18 iinkhonkhwani zetende lethaberinakeli, iinkhonkhwani zetende lesirhodlo neenrobho zalo,+
19 izambatho ezithungwe kuhle+ zokusebenza endaweni ecwengileko, izambatho ezicwengileko zaka-Aroni+ umphristi nezambatho zamadodanakhe zokuba baphristi.’”
20 Yoke ihlangano yama-Israyeli yasuka phambi kwakaMosi.
21 Woke umuntu obekanesifiso+ weza ngaphambili waletha umnikelo kaJehova bona usetjenziswe etendeni lokuhlangana, usetjenziswe emisebenzini ebeyenziwa kilo nekwenzeni izambatho ezicwengileko.
22 Boke beza amadoda nabafazi, ngamunye onesifiso waletha iinghamelo, amacici, iindzilamnwana nezinye izinto zokuzikghabisa nayo yoke imihlobo yezinto zegolide. Boke baletha iminikelwabo yegolide kuJehova.+
23 Boke ebebaneenrhara ezihlaza komkayi, iwulu esipiridzana, itjhila elibomvu be, ilineni elisezingeni eliphezulu, uboya bembuzi, iinkhumba zamaramu ezidaywe ngokubomvu neenkhumba zesili* baziletha.
24 Boke ebebafuna ukunikela ngesiliva nangekhopha, baletha umnikelwabo kuJehova, nabo boke abanomuthi womunga wokwenza nanyana ngimuphi umsebenzi bawuletha.
25 Boke abafazi abanekghono+ lokuphotha baletha abakuphothileko, irhara ehlaza komkayi, iwulu esipiridzana, itjhila elibomvu be nelineni elisezingeni eliphezulu.
26 Boke abafazi abanekghono, abanesifiso baphotha uboya bembuzi.
27 Amakhosana aletha amatje we-oniksi namanye amatje abekwa e-efodini nesikhwanyaneni esisesifubeni,+
28 ibhalisamu, amafutha wokukhanyisa, amafutha wokuzesa+ newokwenza ipepho enuka kamnandi.+
29 Woke amadoda nabafazi ebebanesifiso sokuletha okuthileko emsebenzini uJehova alayela uMosi bona wenziwe; ama-Israyeli akuletha kwaba mnikelo osuka ehliziyweni oya kuJehova.+
30 Nje-ke uMosi wathi kuma-Israyeli: “Qalani uJehova ukhethe uBhetsaleli indodana ka-Uri, indodana kaRhuri wekoro yakwaJuda.+
31 Umuphe ummoyakhe, wamenza wahlakanipha, wazwisisa begodu waba nelwazi layo yoke imisebenzi yobukghwari,
32 waba nelwazi lokwenza imitlamo emihle, asebenze ngegolide, ngesiliva nangekhopha,
33 lokubaza amatje awahlalise kuhle nokwenza yoke imihlobo yezinto ngesigodo.
34 UZimu unikele uBhetsaleli no-Oholiyaba+ indodana ka-Arhisamaki wekoro yakwaDani ikghono lokufundisa abantu.
35 Ubaphe amakghono+ wokwenza woke umsebenzi wobukghwari nokuthunga basebenzisa irhara ehlaza komkayi, iwulu esipiridzana, itjhila elibomvu be nayo yoke imihlobo yezinto ezithungwako. Amadoda la azokwenza yoke imihlobo yemisebenzi bekenze nemitlamo.
