KwebeGalatiya 6:1-18
6 Bafowethu, ngitjho nanyana umuntu angathatha igadango elingakalungi angakatjheji, nina eninqotjhiswa mmoya lingani ukumlungisa ngommoya ophasi.+ Kodwana nizitjheje+ ngombana ngisaba ukuthi nani ningalingeka.+
2 Ragelani phambili nokuthwalisana imithwalo,+ ngokwenza njalo nizokuzalisa umthetho kaKrestu.+
3 Ngombana umuntu nakazitjela ukuthi ulilitho khisibe akasililitho,+ uyazikhohlisa.
4 Kodwana omunye nomunye akahlole lokho yena akwenzako+ begodu uzokuba nebanga lokuthaba malungana naye ayedwa, ingasi ngokuzimadanisa nomunye umuntu.+
5 Ngombana omunye nomunye uzozithwalela umthwalwakhe.+
6 Ngaphezu kwalokho, nanyana ngubani ofundiswa* ilizwi akahlanganyele kizo zoke izinto ezihle naloyo onikela ifundiso enjalo.*+
7 Ningadurhiswa: UZimu akahlekwa ubudlhadlha. Lokho umuntu akutjalako, uzokuvuna khona;+
8 loyo otjala ngombono wenyama, uzokuvuna ukonakala okuvela enyamenakhe kodwana loyo otjala ngombono wommoya, uzokuvuna ukuphila okungapheliko okuvela emmoyeni.+
9 Ngalokho singalisi ukwenza okuhle ngombana ngesikhathi esifaneleko sizokuvuna nangabe asidinwa.*+
10 Nje-ke, nasisesenethuba,* asenzeni okuhle kibo boke kodwana khulukhulu kilabo abahlobene nathi ekukholweni.
11 Qalani ukuthi nginitlolele ngamaledere amakhulu kangangani ngesandla sami.
12 Boke labo abafuna ukuziveza babahle enyameni* ngibo abalinga ukunikatelela ukuthi nisokwe, benza lokhu kwaphela bona babalekele ukuhlunguphazwa ngebanga lesigodo sokuhlunguphazwa* sakaKrestu.
13 Ngombana nalabo abasokwako abakwenzi okutjhiwo mThetho+ kodwana bafuna nina nisokwe bona babe nebanga lokuzikhakhazisa ngenyamenu.
14 Kodwana mina ngifisa ukungazikhakhazisi, ngaphandle kokuzikhakhazisa ngesigodo sokuhlunguphazwa* seKosethu uJesu Krestu,+ ngaye iphasi libulewe* malungana nami begodu nami malungana nephasi.
15 Ngombana ukusokwa nokungasokwa akutjho litho+ kodwana okuqakathekileko yindalo etja.+
16 Malungana nabo boke labo abakhamba ngokuhlelekileko ngomthetho wokuziphatha lo, ukuthula nomusa akube phezu kwabo, iye, phezu kwaka-Israyeli kaZimu.+
17 Kusukela nje akungabi nomuntu ongitshwenyako ngombana emzimbenami nginamatshwayo wokuthi ngisigqila sakaJesu.+
18 Umusa omkhulu weKosethu uJesu Krestu ube nommoya eniwutjengisako, bafowethu. Amen.
Imitlolo Ephasi
^ Namkha “ofundiswa ngomlomo.”
^ Namkha “ifundiso yomlomo enjalo.”
^ Namkha “asipheli amandla.”
^ NgesiGirigi, “ngesikhathi esibekiweko.”
^ Namkha “abafuna ukubonakala babahle ngaphandle.”
^ Qala Ihlathululo.
^ Qala Ihlathululo.
^ Namkha “libulawelwe esigodweni.”
