Hezekiyeli 23:1-49
23 Ilizwi lakaJehova lafika kimi godu, lathi:
2 “Ndodana yomuntu, bekunabafazi ababili egade bamadodakazi womma munye.+
3 Baba ziingwadla eGibhide;+ kusukela ebutjheni babo bazinikela ebungwadleni. Bazinikela ekufebeni balahlekelwa buntombi babo.
4 Amagamabo bekungu-Ohola,* ongomdala nodadwabo kungu-Oholiba.* Baba ngebami begodu babeletha amadodana namadodakazi. Malungana namagamabo, u-Ohola yiSamariya,+ u-Oholiba yiJerusalema.
5 U-Ohola wathoma ukungwadla+ asesengewami. Wakhanukela iinthandwa zakhe,+ abomakhelwana bakhe ama-Asiriya.+
6 Bekubabusi abambethe izambatho ezihlaza namasekela wababusi, woke amasokana afiselekako akhwele iinjomani zawo.
7 Waragela phambili angwadla nawo woke amadodana anejamo we-Asiriya begodu wazisilaphaza+ ngeenthombe ezinyenyisako* zalabo ebekabakhanukela.
8 Akhenge alahle ubungwadla ebekabenza eGibhide ngombana kusukela ebutjheni bakhe bebaya emabhayini naye, bazinikela ebufebeni batjhisakalela ukuziphatha kumbi ngokuya emabhayini naye.+
9 Nje-ke ngamnikela esandleni seenthandwa zakhe, amadodana wama-Asiriya,+ awakhanukelako.
10 Bambula ubuhlubule bakhe,+ bathumba amadodana namadodakazakhe+ begodu bambulala ngesabula. Waduma ngobumbi hlangana nabafazi begodu bakhupha isahlulelo ngokujamelene naye.
11 “Udadwabo u-Oholiba nakabona lokhu, ikanukwakhe yakhohlakala khulu begodu ubungwadla bakhe baba bumbi khulu ukudlula udadwabo.+
12 Wakhanukela abomakhelwana bakhe amadodana wama-Asiriya,+ ababusi namasekela wababusi ebebambethe izambatho ezihle khulu begodu bakhwele iinjomani, woke amasokana afiselekako.
13 Nakazisilaphazako ngabona ukuthi bobabili balandele indlela efanako.+
14 Kodwana bekasolo angezelela ezenzweni zakhe zobungwadla. Bekabona amadoda agwale ebodeni, iinthombe zamaKhaledi* ezigwale ngobubomvu,
15 babophe amabhande emadininabo, babophe namatjhila athwalwa ehloko ehlela enzasi, baqaleka njengeengorho, woke afana nabantu beBhabhiloni, ababelethelwe enarheni yamaKhaledi.*
16 Nakababonako wathoma ukubakhanukela begodu wathumela iinthunywa kibo eKhaledi.*+
17 Nje-ke amadodana weBhabhiloni bewasolo eza embhedenakhe wokuya emabhayini begodu amsilaphaza ngekanukwabo. Ngemva kokusilaphazwa ngiwo, wasuka kiwo ngebanga lokuthi bewamnyenyisa.
18 “Lokha nakazibandakanya ekungwadleni ngokungabi neenhloni begodu wembula ubuhlubule bakhe,+ ngamlahla ngebanga lokumnyenya njengombana ngalahla udadwabo ngebanga lokumnyenya.+
19 Bekasolo andisa izenzo zakhe zobungwadla,+ akhumbula amalanga wobutjha bakhe lokha nakangwadla nenarha yeGibhide.+
20 Bekabakhanukela njengamadoda amakhohlo izitho zawo zobudoda zinjengezakadumbana neenjomani.
21 Bewukhanukela ukuziphatha kwakho okukhohlakeleko kobutjha bakho eGibhide+ lokha nawuzinikela ebufebeni nawusesemutjha.+
22 “Nje-ke Oholiba, nakhu iKosi ePhakemeko uJehova ekutjhoko: ‘Qala! Ngivusa iinthandwa zakho+ osuke kizo ngebanga lokuzinyenya, ngizoziletha ngokujamelene nawe zivela kiwo woke amahlangothi,+
23 amadodana weBhabhiloni+ nawo woke amaKhaledi,*+ amadoda wePekodi,+ eTjhowa neKhowa, kuhlanganise nawo woke amadodana we-Asiriya. Boke bamasokana anejamo, ababusi nabasekeli bababusi, iingorho namadoda akhethekileko akhethiweko, boke bakhwele iinjomani.
24 Bazokusahlela ngetjhada leenkarana zepi namavili, ngesiqubuthu esikhulu samasotja, ngesiviko esikhulu nesincani nangesikoporo. Bazokujama bakuvimbezele yoke indawo, ngizobavumela bona bakwahlulele begodu bazokwahlulela ngendlela ababona ngayo.+
25 Ngizokubonakalisa ukusilingeka kwami ngokujamelene nawe begodu bazokuba nelaka nabasebenzelana nawe. Bazokusika ipumulwakho neendlebe zakho begodu abaseleko bakho bazokuwa ngesabula. Bazokuthatha amadodana namadodakazakho begodu abaseleko bakho bazokutjhiswa ngomlilo.+
26 Bazokuhlubulisa izambatho zakho+ begodu bathathe izinto zakho ezihle zokuzihlobisa.+
27 Ngizokuqeda ukuziphatha kwakho okunyenyisako nobungwadla bakho,+ obuthome enarheni yeGibhide.+ Uzokulisa ukubaqala begodu angekhe usakhumbula iGibhide.’
28 “Ngombana nakhu iKosi ePhakemeko uJehova ekutjhoko: ‘Qala sengizokunikela kilabo abakuhloyako, labo osuke kibo ngebanga lokubanyenya.+
29 Bazokuphatha ngehloyo begodu bakuthathele zoke izinto ozisebenzele budisi,+ bakutjhiye ungakambathi begodu uhlubule. Ihlazo lobuhlubule bokuziphatha kumbi kwakho, ukuziphatha kwakho okukhohlakeleko nobungwadla bakho kuzokwambulwa.+
30 Izintwezi zizokwenzeka kuwe ngombana ugijime ngemva kweentjhaba njengengwadla+ ngombana uzisilaphaze ngeenthombe zazo ezinyenyisako.+
31 Ulandele indlela efana nekadadwenu+ begodu ngizokuthatha ikaphwakhe ngiyibeke esandleni sakho.’+
32 Nakhu iKosi ePhakemeko uJehova ekutjhoko:
‘Uzokusela ekaphweni ekulu nevulekileko yakadadwenu+Begodu uzokuba yinto eyihlekisa nelihlazo okuzizinto ezizele ekaphweni leyo.+
33 Ukudakwa nesizi kuzokuhlula,Ikapho yehlazo neyehlekelele,Ikapho kadadwenu, iSamariya.
34 Kuzokufuze uyisele, uyiqede+ begodu upupure amacezu wekapho leyo enziwe ngomdakaBegodu udabule amabelakho.
“Ngombana mina ngikhulumile,” kutjho iKosi ePhakemeko uJehova.’
35 Nje-ke nakhu iKosi ePhakemeko uJehova ekutjhoko: ‘Ngombana ungilibele begodu akhenge unginake*+ ngokupheleleko, uzokuthwala imiphumela yokuziphatha kwakho okukhohlakeleko nezenzo zakho zobungwadla.’”
36 Nje-ke uJehova wathi kimi: “Ndodana yomuntu, kghani ukulungele ukwenza isimemezelo sesahlulelo ku-Ohola no-Oholiba+ begodu ubatjele ngezenzo zabo ezinyenyisako?
37 Bafebile*+ begodu kuneengazi ezandleni zabo. Abakafebi kwaphela neenthombe zabo ezinyenyisako kodwana benza imihlatjelo* ngamadodanabo bona abe kukudla kweenthombe zabo.+
38 Ngaphezu kwalokho, ngilokho abakwenze kimi: Basilaphaze indawami ecwengileko ngelangelo, basilaphaza namasabathami.
39 Ngemva kokuhlahlela amadodanabo bona abe mhlatjelo eenthombeni zabo ezinyenyisako,+ bangena endawenami ecwengileko bona bayisilaphaze+ ngelangelo. Ngilokho abakwenzileko endlinami.
40 Baze bathumela isithunywa bona sibize amadoda avela kude.+ Nawezako, wena wahlamba, wazipenda amehlo begodu wazilungisa ngemikghabiso.+
41 Wena wahlala esihlalweni sezinga eliphezulu+ phambi kwaso bekunetafula,+ lapho ubeke khona ipephwami+ namafuthami.+
42 Kwazwakala itjhada lesiqubuthu samadoda anganandaba, hlangana nawo kwalethwa iindakwa ezivela emmangweni. Bafaka imihlobiso yezandleni ebafazini neenhlohlo ezihle eenhlokweni zabo.
43 “Nje-ke ngathi kilo oqedwe kufeba: ‘Nje uzokuragela phambili angwadla.’
44 Yeke bebasolo baya kuye njengalokha umuntu aya engwadleni. Nje-ke baya njalo ku-Ohola no-Oholiba, abafazi ebebaziphatha ngokukhohlakala.
45 Kodwana amadoda alungileko azomnikela isahlulelo esifaneleko sobufebe+ nokuphalaza iingazi;+ ngombana baziimfebe begodu baneengazi ezandleni zabo.+
46 “Ngombana nakhu iKosi ePhakemeko uJehova ekutjhoko: ‘Kuzokulethwa ibutho ngokujamelene nabo bona benziwe into yokusatjwa nento yokudlelezelwa.+
47 Ibutho lizobaphosa ngamatje,+ libabulale ngesabula. Lizokubulala amadodana namadodakazabo+ begodu litjhise izindlu zabo ngomlilo.+
48 Ngizokuqeda ukuziphatha okukhohlakeleko enarheni, boke abafazi bazokufunda isifundo begodu bangalandeli ukuziphatha kwenu okukhohlakeleko.+
49 Bazokuletha kini imiphumela yokuziphatha kwenu okukhohlakeleko nokwezono enizenzileko ngokulotjha iinthombe zenu ezinyenyisako; kuzokufuze nazi ukuthi ngiyiKosi ePhakemeko uJehova.’”+
Imitlolo Ephasi
^ Kutjho “iTende Lami Nguye.”
^ Kutjho “iTende Lakhe.”
^ Ibizo lesiHebheru elisetjenziswe la lingahlobana nebizo elithi “ubulongwe” begodu lisetjenziselwe ukuveza ukunyenya.
^ Namkha “zamaKasidi.”
^ Namkha “yamaKasidi.”
^ Namkha “eKasidi.”
^ Namkha “amaKasidi.”
^ NgesiHebheru, “ungifulathele.”
^ NgesiHebheru, “badlulisa amadodanabo emlilweni.”
^ Kutjho ukufeba nabanye abozimu.
