Hezekiyeli 47:1-23
47 Wangibuyisa ngobungeno bethempeli+ begodu lapho ngabona amanzi agelezela ngepumalanga avela ngaphasi kobungeno bethempeli+ ngombana ingaphambili lethempeli beliqale epumalanga. Amanzi ebewagelezela phasi avela ngaphasi ngehlangothini lesidleni lethempeli, esewula ye-aldara.
2 Ngemva kwalokho, wangisa ngaphandle ngendlela yesango letlhagwini,+ wangisa ngaphandle magega nesango elingaphandle eliqale epumalanga,+ ngabona amanzi athontako avela ehlangothini langesidleni.
3 Lokha indoda le nayiphumako hlanu kwepumalanga nentambo yokulinganisa esandleni sayo,+ yalinganisa amakhubhithi* ayi-1 000, yangidlulisa ngemanzini; amanzi bekafika engogoriyaneni.*
4 Ngemva kwalokho, yalinganisa enye i-1 000 yangidlulisa emanzini, bekafika emadolweni.
Yalinganisa enye i-1 000 yangidlulisa begodu amanzi bekafika eenyongeni.
5 Nayilinganisa enye i-1 000, bekumlanjana engingakghoni ukudlula kiwo ngombana amanzi bekazike kangangokuthi umuntu bekufuze adude, umlanjana wamanzi ongekhe wadlula kiwo ngeenyawo.
6 Yangibuza: “Ukhe wakubona lokhu, ndodana yomuntu?”
Ngemva kwalokho, yangikhambisa yangibuyisela magega nomlanjana.
7 Nangibuyelako, ngabona ukuthi magega nomlanjana bekunemithi eminengi mahlangothi womabili.+
8 Nje-ke yathi kimi: “Amanzi la agelezela hlanu kwesifunda sepumalanga ehlele nge-Araba,+ angene elwandle. Nakangena elwandle,+ amanzi azokulapheka.
9 Iinlwana eziphilako zizokukghona ukuphila nanyana kukuphi lapho amanzi ageleza khona. Kuzokuba neemfesi ezinengi ngebanga lokuthi amanzi la azokugelezela khona. Amanzi welwandle azokulapheka begodu koke kuzokuphila nanyana kukuphi lapho umlambo uya khona.
10 “Abathiyi beemfesi bazokujama hlanu kwawo ukusuka e-Eni-Gedi+ ukufikela e-Eni-Egilayimu lapho kuzokuba nendawo yokomisa iinrhurhulanede. Kuzokuba nemihlobo eminengi yeemfesi, njengeemfesi zeLwandle eliKhulu.+
11 “Lizokuba neendawo ezinamanzi nezinedaka begodu angekhe zilatjhwe. Zizokuhlala zinetswayi.+
12 “Yoke imihlobo yemithi yokudla izokukhula mahlangothi womabili hlanu kwemilanjana. Amakarayo angekhe atjhwabe namkha iinthelo zayo ziphele. Qobe ngenyanga zizokuthela iinthelo ezitja ngombana amanzawo ageleza avela endaweni ecwengileko.+ Iinthelo zawo zizokuba kukudla begodu amakarawo azokuba ngewokulapha.”+
13 Nakhu iKosi ePhakemeko uJehova ekutjhoko: “Le, yindawo ozoyaba njengenarha elilifa yeenkoro ezili-12 zakwa-Israyeli begodu uJosefa uzokuba neengcenye ezimbili.+
14 Izokuba lilifa lenu, nizokufumana izabelo ezilinganako. Ngafunga ukunikela inarha le kibokhokhwenu+ begodu nje inikelwe nina njengelifa.
15 “Lo, mkhawulo wenarha esehlangothini letlhagwini: Ukhamba usuka eLwandle eliKhulu ngendlela eya eRhetiloni+ eduze neTsedadi,+
16 eRhamathi,+ eBherothayi,+ neSibrayimu ehlangana nendawo yeDamaseku nendawo yeRhamathi ukufika eRhateri-Hatikoni hlanu komkhawulo weRhawurana.+
17 Nje-ke umkhawulo uzokusuka elwandle ukufikela eRhatseri-Enoni+ hlanu komkhawulo weDamaseku ukufikela etlhagwini nemkhawulweni weRhamathi.+ Lo mkhawulo wetlhagwini.
18 “Ihlangothi elisepumalanga lisuka hlangana neRhawurana neDamaseku hlanu kweJordani hlangana neGiliyadi+ nenarha yakwa-Israyeli. Kufuze ulinganise ukusuka emkhawulweni welwandle* elisepumalanga. Lo mkhawulo wepumalanga.
19 “Umkhawulo wesewula uzokusuka eTamari ufike emanzini weMeriba-Khadetjhi,+ ukhambe ufike emRhobeni* neLwandle eliKhulu.+ Lo mkhawulo wesewula.
20 “Ehlangothini elisetjingalanga liLwandle eliKhulu, ukusukela emkhawulweni ukufikela endaweni ephambi kweLebo-Rhamathi.*+ Lo mkhawulo wetjingalanga.”
21 “Kufuze nihlukaniselane inarha le hlangana neenkoro ezili-12 zakwa-Israyeli.
22 Kufuze nihlukaniselane yona phakathi kwenu bona ibe lilifa, nabantu abavela kwezinye iinarha abanani ababe nabantwana ngesikhathi bahlangana nani bazokuba njengama-Israyeli kini. Bazokufumana ilifa hlangana neenkoro zakwa-Israyeli kunye nani.
23 Kufuze ninikele umuntu ovela kwenye inarha ohlala nani ilifa endaweni yekoro yalapho ahlala khona,” kutjho iKosi ePhakemeko uJehova.
Imitlolo Ephasi
^ Lokhu kuqalisele emakhubhithini amade. Qala Isith. B14.
^ Namkha “enyaweni.”
^ Kutjho iLwandle eliFileko.
^ Kutjho umRhoba weGibhide.
^ Namkha “ubungeno beRhamathi.”
