Hezekiyeli 7:1-27
7 Ilizwi lakaJehova lafika kimi godu, lathi:
2 “Nakunguwe, nakhu iKosi ePhakemeko uJehova ekutjhoko enarheni yakwa-Israyeli: ‘Ukuphela! Ukuphela kufikile eengcenyeni ezine zephasi.
3 Isiphelo sikufikele, ngizokukhupha ilaka lami ngokujamelene nawe, ngizokwahlulela ngokweendlela zakho begodu ngikwenze uziphendulele ngazo zoke izenzo zakho ezinyenyisako.
4 Amehlwami angekhe akuzwele ubuhlungu; namkha ngikurhawukele,+ ngombana ngizokulethela imiphumela ngokweendlela zakho, uzokuqalana nemiphumela yezenzo zakho ezinyenyisako.+ Ngombana kuzokufuze nazi bona nginguJehova.’+
5 “Nakhu iKosi ePhakemeko uJehova ekutjhoko: ‘Qala! Ngizokuletha ihlekelele, ihlekelele engakajayeleki, iyeza.+
6 Isiphelo siyeza; isiphelo sizokuza; sizonifikela ningakalindeli. Qala! Siyeza.
7 Ilanga lakho liyeza, wena ohlala enarheni. Isikhathi siyeza, ilanga litjhidele.+ Kunehlangahlangano ingasi itjhada lethabo eentabeni.
8 “‘Ngizokuthululela ilaka lami kuwe,+ ngizokukhupha loke ilaka lami ngokujamelene nawe+ begodu ngizokwahlulela ngokweendlela zakho ngikwenze uziphendulele ngazo zoke izenzo zakho ezinyenyisako.
9 Amehlwami angekhe akuzwele ubuhlungu; angekhe ngikurhawukele.+ Ngizokuletha imiphumela ngokweendlela zakho, uzokuqalana nemiphumela yezenzo zakho ezinyenyisako. Kuzokufuze nazi ukuthi mina, Jehova ngimi onijezisako.+
10 ““Qala! Ilanga! Qala, liyeza!+ Ilanga lakho lifikile; intonga yokujezisa seyilungele bona ngiyisebenzise, inaba selizikhakhazisa khulu.
11 Inturhu seyiphenduke intonga yokukhohlakala.+ Akekho noyedwa ozokusinda, umnothwabo, isiqubuthu sabo namkha ukuvelela kwabo.
12 Isikhathi sizokufika, ilanga lizokufika. Othengako akangathabi, othengisako akangalili, ngombana kunelaka ngokujamelene naso soke isiqubuthu.*+
13 Ngombana umthengisi angekhe akufumane akuthengisileko, ngitjho nanyana ukuphila kwakhe kungasinda, ngombana umbono ujamelene naso soke isiqubuthu. Akekho ozokubuyela begodu ngebanga lemitjhaphwakhe, akekho ozokusindisa ukuphila kwakhe.
14 “‘Babethe ibhorompita,+ woke umuntu ulungele ukuya epini kodwana akunamuntu oya epini, ngombana ilaka lami lijamelene naso soke isiqubuthu.+
15 Isabula ingaphandle,+ isibetho nendlala zingaphakathi. Nanyana ngubani osesimini uzokufa ngesabula, nangendlala begodu isibetho sizokurhayila abasedorobheni.+
16 Abasindileko babo abaphunyurhileko bazokuya eentabeni njengamajuba wemirhoba, omunye nomunye wabo uzokulilela imitjhaphwakhe.+
17 Izandla zabo zizokuba buthakathaka, woke amadolwabo azokwehla amanzi.*+
18 Bambethe imigodla+ begodu bayahlengezela ngebanga lokubanjwa kusaba. Woke umuntu uzokuphathiswa iinhloni begodu zoke iinhloko* zizokugudwa.+
19 “‘Bazokuphosela isiliva labo eendleleni begodu igolide labo lizokuba yinto enyenyisako kibo. Isiliva negolide labo angekhe zikghone ukubasindisa ngelanga lelaka lakaJehova.+ Angekhe baneliseke, namkha basuthise amathumbabo, ngombana zibe* siqabo esibabangela ukuthi bone.
20 Bebazikhakhazisa ngobuhle bokuzirhabisa kwabo, ngazo* benze iinthombe ezinyenyisako nabozimu abanyenyisako.+ Kungebangelo ngizozenza izinto ezinyenyisako kibo.
21 Ngizozinikela* ezandleni zabantu abavela kwenye inarha bona badlelezele nebantwini abakhohlakeleko bephasi zibe zizinto ezithethwe ngekani, bazozisilaphaza.
22 “‘Ngizobafulathela+ begodu bazokusilaphaza indawami* efihlekileko begodu abadlelezeli bazokungena kiyo bayisilaphaze.+
23 “‘Yenza iketani,*+ ngombana inarha igcwele umlandu weengazi+ begodu idorobho lizele inturhu.+
24 Ngizokuveza ukukhohlakala kweentjhaba+ begodu zizokuthatha izindlu zabo,+ ngizokuphelisa ukuzikhakhazisa kwabanamandla neendawo zabo ezicwengileko zizokusilaphazwa.+
25 Nasele kufika ubuhlungu, bazokufuna ukuthula kodwana angekhe bakufumane.+
26 Kuzokuvela ihlekelele ngemva kwehlekelele, nombiko ngemva kombiko, abantu bazokufuna umbono kumphorofidi+ kodwana umthetho womphristi neseluleko sabadala angekhe zisaba lisizo.+
27 Ikosi izokulila,+ ikosana izokumbathiswa ukudana begodu izandla zabantu benarheni zizokuhlengezela ngebanga lokusaba. Ngizobaphatha ngokweendlela zabo, ngizobahlulela ngokweendlela abahlulela ngayo. Kuzokufuze bazi ukuthi nginguJehova.’”+
Imitlolo Ephasi
^ Lokho kutjho ukuthi, abathengako nabathengisako angekhe bazuze, ngombana ihlekelele izobafikela boke.
^ Kutjho ukuzithundela ngebanga lokusaba.
^ Kutjho ukuthi iinhloko zabo zizokugudwa ngebanga lokuzila.
^ Kutjho isiliva negolide labo.
^ Kutjho izinto zabo zegolide nesiliva.
^ Kutjho isiliva labo negolide labo ezisetjenziselwe ukwenza abozimu.
^ Kungenzeka kuqaliselwa engcenyeni efihlekileko yekumba yendawo ecwengeke khulu kaJehova.
^ Kutjho iinketani zokuvimbezela.
