IsAmbulo Esiya KuJwanisi 15:1-8
15 Ngabona ezulwini esinye isibonakaliso, esikhulu nesirarako, iingilozi ezilikhomba+ ziphethe iimbetho zazo. Lezi ngezamaswaphela ngombana ngazo ilaka lakaZimu lifika ekugcineni.+
2 Ngabona okuthileko okunjengelwandle lerhalasi+ kuvangwe nomlilo nalabo abahlula+ isibandana nomfanekiswaso+ nesibalo segama laso+ bajame eduze nelwandle lerhalasi, baphethe iindonodono zakaZimu.
3 Bebabhina ingoma kaMosi+ inceku kaZimu nengoma yeMvana,+ bathi:
“Mikhulu begodu iyamangalisa imisebenzakho,+ Jehova* Zimu, Mninimandla Woke.+ Zilungile begodu ziliqiniso iindlela zakho,+ Kosi yanini nanini.+
4 Ngubani ongekhe akusabe na, Jehova* begodu aphazimulise igama lakho ngombana wena wedwa uthembekile?+ Ngombana zoke iintjhaba zizokuza zilotjhe phambi kwakho+ ngombana imiyalwakho elungileko yambuliwe.”
5 Ngemva kwalokhu, ngabona indawo ecwengileko yetende lobufakazi+ ivulwa ezulwini,+
6 kwavela iingilozi ezilikhomba ziphethe iimbetho ezilikhomba+ zivela endaweni ecwengileko, zimbethe ilineni elihlwengileko, elikhanyako begodu ziziphuthele ngamatjhila wegolide eemfubeni zazo.
7 Esinye seembunjwa eziphilako sanikela iingilozi ezilikhomba izitja zegolide ebezizele ilaka lakaZimu,+ ophila bekube ngokungapheliko.
8 Indawo ecwengileko yazala intuthu ngebanga lephazimulo kaZimu+ nangebanga lamandlakhe, akakho namunye obekakghona ukungena endaweni ecwengileko bekube kulapho iimbetho ezilikhomba+ zeengilozi ezilikhomba seziphelile.
