Isaya 28:1-29
28 Maye! Esihlohlweni* esizikhakhazisako seendakwa zakwa-Efrayimu+Nethuthumbo elitjhwabileko lobuhle baso obuphazimulako,Esisehloko yomrhoba ovundileko walabo abahlulwa liwayini!
2 Qala! UJehova unomuntu onamandla.
Njengesinanja esinomdumo, isiwuruwuru esitjhabalalisako,Njengomoya onomdumo weenkhukhula ezinamandla,Uzosiphosela phasi ephasini ngamandla.
3 Iinhlohlo ezizikhakhazisako zeendakwa zakwa-EfrayimuZizokugadangwa.+
4 Ithuthumbo elitjhwabako lobuhle bephazimulwazo,Esehloko yomrhoba onothileko,Lizokuba njengefeyi lokuthoma elivuthwa ihlobo lingakangeni.
Lokha umuntu nakalibonako, uzolikha alidle msinya.
5 Ngelangelo uJehova wamabutho uzokuba sihlohlo esiphazimulako nomkghabiso omuhle ebantwini bakhe abaseleko.+
6 Uzokuba mmoya wobulungiswa kiloyo ohlezi ekwahluleleni nomthombo wamandla kilabo abavikela isango ekusahlelweni manaba.+
7 Nalaba bayaphambuka ngebanga lewayini;Utjwala babo bubenza batherezele.
Umphristi nomphorofidi bayaphambuka ngebanga lotjwala;Iwayini liyabatjharaganisa,Begodu bayatherezela ngebanga lotjwala babo;Umbonwabo ubenza baphambuke,Begodu bakhupha izahlulelo ezingakafaneli.+
8 Ngombana amatafulabo azele amahlanzaAkunandawo enganawo.
9 Umuntu uzolidlulisela kubani ilwazi,Begodu uzowuhlathululela bani umlayezo?
Kghani labo abalisiswe ukumunya,Labo abasuswe ebeleni?
10 Ngombana ngaso soke isikhathi uthi: “Umyalo ngemva komyalo, umyalo ngemva komyalo,Umthetho phezu komthetho, umthetho phezu komthetho,+Okuncani la, okuncani lapha.”
11 Uzokukhuluma nesitjhabesi ngabantu abangunguzako nalabo abakhuluma ilimi elingaziwako.+
12 UZimakhe wathi kibo: “Le yindawo yokuphumula. Odiniweko akaphumule; le yindawo yokuphumula,” kodwana akhenge balalele.+
13 Nje-ke ilizwi lakaJehova lizokuthi kibo:
“Umyalo ngemva komyalo, umyalo ngemva komyalo,Umthetho phezu komthetho, umthetho phezu komthetho,+Okuncani la, okuncani lapha,”
Bona nabakhambako bakhutjwe bawe ngomhlanaBaphuke, bathiywe bese babanjwe.+
14 Nje-ke lalelani ilizwi lakaJehova, nina bantu abazikhakhazisako,Nina babusi besitjhabesi abaseJerusalema,
15 Ngombana nina bantu nithi:
“Senze isivumelwano nokuFa,+Begodu senze isivumelwano* neThuna.*
Nakudlula isikhukhula esinamandla,Angekhe sifike kithi,Ngombana senze amala aba siphephelo sethuBegodu sizifihle emaleni.”+
16 Nje-ke nakhu iKosi ePhakemeko uJehova ekutjhoko:
“Ngibeka ilitje elihlolisisiweko bona libe sisekelo eZiyoni,+Ilitje eliligugu lesisekelo esiqinileko.+
Okholwa kilo angeze asabe.+
17 Ngizokwenza ubulungiswa bube mumuda wokulinganisa+Nokulunga kube lithulusi lokulinganisa.+
Isinanja sizokuthanyela isiphephelo samala,Namanzi azokukhukhula indawo yokubhaca.
18 Isivumelwano senu nokuFa sizokutjhatjalaliswa,Nesivumelwano senu neThuna* angeze sijame.+
Nakudlula isikhukhula esinamandlaSizonitjhabalalisa.
19 Qobe nasidlulako,Sizonithanyela;+Ngombana sizokudlula qobe ekuseni,Emini nebusuku.
Kusaba kwaphela okuzobenza bazwisise abakuzwileko.”*
20 Ngombana umbhede mfitjhani bona ungalula iinyawo kiwo,Netjhila elilukiweko lincani bona ungaziphuthela ngalo.
21 Ngombana uJehova uzokusikima njengeNtabeni iPeratsimu;Uzokusilingeka njengemrhobeni oseduze neGibiyoni,+Bona enze isenzo sakhe, isenzo esingakajayelekiBegodu enze umsebenzakhe, umsebenzakhe ongakajayeleki.+
22 Nje-ke ninganyefuli,+Bona amaketanenu angaqiniswa khulu,Ngizwile eKosini ePhakemeko uJehova wamabutho,Bona uqunte ukutjhabalalisa inarha yoke.+
23 Lalelani nizwe ilizwi lami;Lalelisisani, nizwe engikutjhoko.
24 Kghani umlimi ulima ilanga loke ngaphambi kobana atjale imbewu?
Kghani usolo aphutjhula amagade begodu alinganise ihlabathakhe?+
25 Lokha nasele aleleze isimakhe,Akarhatjhi na ikhumini enzima begodu atjale ikhumini,Akatjali na ikoroyi, inyaluthi, nebhali eendaweni zazoNeminye imihlobo yekoroyi?*+
26 Ngombana umfundisa indlela elungileko;UZimakhe uyamnqophisa.+
27 Ngombana ikhumini enzima ayibhulwa ngeengodo zesileyi,+Nekarana yamavili ayikhanjiswa phezu kwekhumini.
Kunalokho ikhumini enzima ibhulwa ngeswazi,Begodu ikhumini ibhulwa ngentonga.
28 Umuntu nakabhula iinthoro azozisebenzisa nakenza uburotho kghani uyazisila?
Awa, akazisili ngokubuyelelweko;+Nakatjhayela ikaranakhe enamavili phezu kwayo edoswa ziinjomani zakhe,Akayisili.+
29 Nalokhu kuvela kuJehova wamabutho,Oneseluleko esimangalisakoBegodu uhlala aphumelela kilokho akwenzako.+
Imitlolo Ephasi
^ Kubonakala ngasuthi kuqalisele kuhloko dorobho, iSamariya.
^ Namkha kungenzeka “senze umbono.”
^ Namkha “neTjhiyoli.” Qala Ihlathululo.
^ Namkha “neTjhiyoli.” Qala Ihlathululo.
^ Namkha kungenzeka “Nabazwisisa umlayezo, bazokusaba khulu.”
^ Ibizo lesiHebheru eliqalisele komunye umhlobo wekoroyi ebewulinywa eGibhide yekadeni.
