Joromiya 14:1-22
14 Leli lilizwi lakaJehova eleza kuJoromiya malungana nesomiso:+
2 UJuda uyalila,+ begodu amasangwakhe awile.
Atjhingela ngehlabathini adanile,Nesililo siyakhuphuka sivela eJerusalema.
3 Amakhosanabo athumela iinsebenzi zawo bona ziyokukha amanzi.
Zitjhinga emigodini yamanzi begodu aziwafumani.
Zibuyela emva nemijeka enganalitho.
Ziphethwe ziinhloni begodu zidanile,Begodu zizigubuzesa iinhloko.
4 Ngombana phasi kubharasile,Ngebanga lokuthi akunazulu ephasini,+Abalimi badanile begodu bagubuzese iinhloko zabo.
5 Ngitjho neqina elisikazi lesimini litjhiya umntwanalo oqeda ukubelethwaNgombana akunatjani.
6 Abodumbana bommango bajame emibundwini enganalitho.
Baphefumula msinyana bafuna umoya njengeempungutjha;Amehlwabo ayafiphala ngombana akunantjalo.+
7 Ngitjho nemitjhaphwethu ifakaza ngokujamelene nathi,Maye! Jehova, thatha igadango ngebanga legama lakho.+
Ngombana izenzo zethu zokungathembeki zinengi,+Begodu sonile phambi kwakho.
8 Maye! Themba laka-Israyeli, uMsindisakhe+ ngesikhathi sokugandeleleka,Kubayini unjengomuntu ongaziwako enarheni,Njengesikhambi esijama kwaphela bona sifumane indawo yokulala?
9 Kubayini unjengomuntu orarekileko,Unjengomuntu ongakghoni ukusindisa?
Ngombana uphakathi kwethu, maye! Jehova.+
Negama lakho libizwe kithi.+
Ungasilahli.
10 Nakhu uJehova akutjhoko malungana nabantwaba: “Bathanda ukuzulazula;+ abakghoni ukuhlala bangenzi litho.+ Yeke uJehova akathabi ngabo.+ Nje-ke uzokukhumbula imitjhaphwabo begodu uzobajezisa ngebanga lezono zabo.”+
11 Yeke uJehova wathi kimi: “Ungathandazeli abantwabo bona benzakalelwe zizinto ezihle.+
12 Nabazila ukudla, angisilaleli isililo sabo,+ nalokha nabanikela iminikelo etjhiswako epheleleko neminikelo yekoroyi, angiyithabeli+ ngombana ngizobatjhabalalisa ngesabula, ngendlala nangesibetho.”+
13 Ngemva kwalokho, ngathi: “Maye! Kosi ePhakemeko Jehova, abaphorofidi bathi kibo, ‘Angekhe niyibone isabula begodu angekhe nifikelwe yindlala, kodwana ngizoninikela ukuthula kwamambala endaweni le.’”+
14 Yeke uJehova wathi kimi: “Abaphorofidi baphorofida amala egameni lami.+ Akhenge ngibathumele namkha ngibayale namkha ngikhulume nabo.+ Umbono omamala nokuthukula okungasizi ngalitho nekohliso eenhliziyweni zabo ngilokho abakuphorofide kuwe.+
15 Nje-ke ngilokhu uJehova akutjhoko malungana nabaphorofidi abaphorofida egameni lami, ngitjho nanyana ngingakabathumeli begodu abathi akunasabula namkha indlala ezokufika enarheni le: ‘Abaphorofidaba bazokutjhabalala ngesabula nangendlala.+
16 Nabantu abaphorofida kibo bazokuphoselwa eendleleni zeJerusalema ngebanga lendlala nesabula, akunamuntu ozobabulunga,+ bona, abomkabo, amadodanabo namkha amadodakazabo, ngombana ngizokuthululela kibo ihlekelele ebafaneleko.’+
17 “Kufuze uthi kibo,‘Amehlwabo awatshege iinyembezi ubusuku nemini, zingomi,+Ngombana intombi yabantu bami itjhatjalaliswe ngokupheleleko begodu iphukile,+Ilimele khulu.
18 Nangiphumako bona ngiye esimini ngiyokuqala,Ngabona ababulewe ngesabula!+
Kwathi nangingena edorobheni,Ngabona ukugula okubangelwe yindlala!+
Ngombana umphorofidi nomphristi bakhambakhambe endleleni abangayaziko.’”+
19 Kghani umlahle ngokupheleleko uJuda namkha uhloye iZiyoni?+
Kubayini usibethe kangangobana singapholi?+
Besilindele ukuthula kodwana akunalitho elihle elifikileko,Besilindele isikhathi sokuphola kodwana kwafika ukusaba!+
20 Siyakubona ukukhohlakala kwethu, maye! Jehova,Nomtjhapho wabokhokho bethu,Ngombana sonile phambi kwakho.+
21 Ngebanga legama lakho, ungasilahli;+Ungahloyi isihlalo sakho sobukhosi esiphazimulako.
Khumbula, begodu ungaphuli isivumelwano sakho nathi.+
22 Kghani iinthombe ezingasizi ngalitho zeentjhaba zingaletha izulu,Namkha izulu lingeza bona lizinele lona ngokwalo?
Akusinguwe kwaphela na, maye! Jehova Zimethu?+
Sithembele kuwe,Ngombana nguwe kwaphela owenze zoke izintwezi.
