Joromiya 21:1-14
21 UJoromiya wafumana ilizwi elivela kuJehova lokha iKosi uTsedekhiya+ nayithuma uPhatjhirhuri+ indodana kaMalikiya noZefaniya+ indodana kaMaseya umphristi, abawa lokhu:
2 “Sibawa usibuzele kuJehova ngombana iKosi uNebukadinetsari* yeBhabhiloni ifuna ukulwa nathi.+ Mhlamunye uJehova angenza eminye yemisebenzakhe emangalisako ngebanga lethu, bona angasalwi nathi.”+
3 UJoromiya wathi kibo: “Nakhu ekufuze nikutjho kuTsedekhiya,
4 Ngilokhu uJehova uZimu ka-Israyeli akutjhoko: “Iinkhali zepi ezisezandleni zenu, enilwa ngazo nekosi yeBhabhiloni+ namaKhaledi* angaphandle kweboda anivimbezeleko, ngizoziqalisa ngakini. Ngizobabuthelela phakathi nedorobheli.
5 Mina ngizokulwa nani+ ngilule isandla sami nomkhonwami onamandla, ngokusilingeka, ngelaka nangetukuthelo ekulu.+
6 Ngizokubetha izakhamuzi zedorobheli, kokubili umuntu nesibandana. Ngesibetho esikhulu* bazokuhlongakala.”’+
7 “‘“Ngemva kwalokho,” kutjho uJehova, “Ngizokunikela iKosi yakwaJuda uTsedekhiya neensebenzi zayo nabantu bedorobheli, abasinde esibethweni, esabuleni, nendlaleni, esandleni seKosi uNebukadinetsari* yeBhabhiloni, esandleni samanababo, nesandleni salabo abafuna ukubabulala.+ Uzobabetha ngesabula. Angekhe abazwele namkha abarhawukele namkha abe nomusa kibo.”’+
8 “Begodu kufuze uthi ebantwinaba, ‘Ngilokhu uJehova akutjhoko: “Ngibeka phambi kwenu indlela yokuphila nendlela yokufa.
9 Labo abasala edorobheneli bazokufa ngesabula, ngendlala nangesibetho. Kodwana nanyana ngubani ozinikela kumaKhaledi* anivimbezeleko, uzokuragela phambili aphila, begodu uzokusindisa ukuphila kwakhe.”’+
10 “‘“Ngombana ngifulathele idorobheli bona lehlelwe yihlekelele ingasi intwehle,”+ kutjho uJehova. “Lizokunikelwa esandleni sekosi yeBhabhiloni+ begodu lizokutjhiswa ngomlilo.”+
11 “‘Endlini yekosi yakwaJuda: Yizwani ilizwi lakaJehova.
12 Maye! Ndlu kaDavida, ngilokhu uJehova akutjhoko:
“Sekelani ubulungiswa qobe ekuseni,Sindisani odlelezelwako esandleni somdlelezeli,+Bona ilaka lami lingavuthi njengomlilo+
Litjhise kungabi nomuntu ozolicimaNgebanga lezenzo zenu ezimbi.”’+
13 ‘Ngijamelene nani zakhamuzi zemrhobeni,Maye! Dwala lenarha elelezekileko,’ kutjho uJehova.
‘Nina enithi: “Ngubani ozokuza ajamelane nathi?
Begodu ngubani ozokudlelezela iindawo zethu?”
14 NgizonijezisaNgokwalokho okunifaneleko!’+ Kutjho uJehova.
‘Begodu ngizokutjhisa amahlathalo,Umlilo uzokurhiribidela zoke izinto ezilibhodileko.’”+
Imitlolo Ephasi
^ NgesiHebheru, “Nebukadretsari,” ngenye indlela elitlolwa ngayo.
^ Namkha “namaKasidi.”
^ Namkha “Ngokugula.”
^ NgesiHebheru, “Nebukadretsari,” ngenye indlela elitlolwa ngayo.
^ Namkha “kumaKasidi.”
