Joromiya 28:1-17
-
UJoromiya uphikisana nomphorofidi wamala uRhananiya (1-17)
28 Ngomnyaka ofanako, ekuthomeni kokubusa kweKosi yakwaJuda uTsedekhiya,+ ngomnyaka wesine, ngenyanga yesihlanu, umphorofidi uRhananiya indodana ka-Azuri weGibiyoni+ wathi kimi endlini kaJehova phambi kwabo boke abaphristi naphambi kwabo boke abantu:
2 “Ngilokhu uJehova wamabutho, uZimu ka-Israyeli, akutjhoko, ‘Ngizokuphula ijogi lekosi yeBhayibhiloni.+
3 Phakathi neminyaka emibili ngibuyisela endaweni le zoke izitja zendlu kaJehova lezo iKosi yeBhabhiloni uNebukadinetsari, eyazithatha endaweni le yazisa eBhabhiloni.’”+
4 “‘Ngizokubuyisela endaweni le uJokoniya+ indodana kaJehoyakhimu,+ ikosi yakwaJuda nabo boke abadingisiweko bakwaJuda ebebasiwe eBhabhiloni,’+ kutjho uJehova ‘ngombana ngizokuphahlaza ijogi lekosi yeBhabhiloni.’”
5 Nje-ke uJoromiya umphorofidi wakhuluma noRhananiya umphorofidi phambi kwabaphristi nabo boke abantu ebebajame endlini kaJehova.
6 uJoromiya umphorofidi wathi: “Amen!* Kwanga uJehova angakwenza lokhu! Kwanga uJehova angazalisa amezwakhe ophorofide ngawo ngokubuyisa endaweni le izitja zendlu kaJehova nabo boke abantu abadingisiweko eBhabhiloni.
7 Nanyana kunjalo, ngibawa uzwe umlayezo engiwukhuluma kuwe nakibo boke abantu.
8 Kusukela kade abaphorofidi abaphorofida ngaphambi kwami nangaphambi kwenu bebajayele ukuphorofida malungana neenarha ezinengi nemibuso emikhulu, ngepi, ngehlekelele nesibetho.*
9 Nangabe umphorofidi uphorofida ngokuthula bese amezwi womphorofidi loyo enzeke, kuzokwaziwa bona kwamambala nguJehova othumele umphorofidi loyo.”
10 Yeke uRhananiya wasusa ijogi lesimbi entanyeni yomphorofidi uJoromiya, waliphula.+
11 Nje-ke uRhananiya watjho lokhu phambi kwabo boke abantu: “Ngilokhu uJehova akutjhoko, ‘Ngokufanako ngizokuphula ijogi leKosi uNebukadinetsari yeBhabhiloni ngilisuse eentanyeni zazo zoke iintjhaba phakathi neminyaka emibili.’”+ Ngemva kwalokho, uJoromiya umphorofidi waraga nekhambo lakhe.
12 Ngemva kokuthi uRhananiya umphorofidi aphule ijogi entanyeni kaJoromiya umphorofidi, umlayezo lo kaJehova wafika kuJoromiya wathi:
13 “Khamba begodu uthi kuRhananiya, ‘Nakhu uJehova akutjhoko: “Uphule amajogi wesigodo+ kodwana esikhundleni sawo uzokwenza amajogi wesimbi.”
14 Ngombana nakhu uJehova wamabutho, uZimu ka-Israyeli akutjhoko: “Ngizokufaka iJogi lesimbi entanyeni yazo zoke iintjhabezi, eKosini uNebukadinetsari yeBhabhiloni begodu kufuze bamlotjhe.+ Ngitjho neembandana ngizozinikela kuye.”’”+
15 Nje-ke uJoromiya umphorofidi wathi kuRhananiya+ umphorofidi: “Ngibawa ulalele Rhananiya! UJehova akhenge akuthumele kodwana wena ubangele abantwaba bona bathembe amala.+
16 Nje-ke nakhu uJehova akutjhoko, ‘Qala! Ngizokubangela bona ufe. Uzokuhlongakala ngomnyaka lo ngombana ukhuthaze abantu bona bahlubuke kuJehova.’”+
17 Nje-ke uRhananiya umphorofidi wahlongakala ngomnyaka loyo, ngenyanga yekhomba.
