Joromiya 35:1-19
-
Ukulalela kwamaRekabi okusibonelo (1-19)
35 Ilizwi lakaJehova lafika kuJoromiya emalangeni kaJehoyakhimu+ indodana kaJosiya ikosi yakwaJuda, lithi:
2 “Tjhinga endlini yamaRekabi+ ukhulume nawo uwalethe endlini kaJehova, eenkumbeni zokudlela; uwanikele iwayini bona asele.”
3 Yeke ngathatha uJazaniya indodana kaJoromiya indodana kaRhabatsiniya, abafowabo, woke amadodanakhe nayo yoke indlu yamaRekabi
4 ngabasa endlini kaJehova. Ngabangenisa ngekumbeni yokudlela yamadodana kaRhanani indodana kaYigidaliya umuntu kaZimu weqiniso, ehlanu kwendawo yokudlela yamakhosana ebeyingaphezu kwendawo yokudlela kaMaseya indodana kaTjhalumu umlindisango.
5 Yeke ngabeka iinkapho neenkapho ezinganambambo ezizele iwayini phambi kwabantu bendlu yamaRekabi, ngathi kibo: “Selani iwayini.”
6 Kodwana bathi: “Angekhe sisele iwayini ngombana uJonadaba+ indodana kaRekabi ukhokhwethu usinikele umyalo othi, ‘Nina namadodanenu akukafuzi nisele iwayini.
7 Begodu akukafuzi nakhe indlu, nitjale imbewu, nilime namkha nibe nesimu yamadiribe. Kunalokho, kufuze nihlale ematendeni ngaso soke isikhathi, bona nihlale isikhathi eside enarheni enihlala kiyo njengabantu abavela kwenye inarha.’
8 Yeke saragela phambili silalela ilizwi lakaJonadaba indodana kakhokhwethu uRekabi kikho koke asiyala ngakho, ngokuthi singaseli iwayini, thina, abomkethu, amadodanethu namadodakazethu.
9 Asakhi izindlu bona sihlale kizo, asinamasimu wamadiribe namkha amasimu namkha imbewu.
10 Besisolo sihlala ematendeni begodu silalela koke uJonadaba ukhokhwethu asiyala ngakho.
11 Kodwana iKosi yeBhabhiloni uNebukadinetsari yeza ngokujamelene nenarha,+ sathi, ‘Yizani siye eJerusalema sibalekele ibutho lamaKhaledi* nelamaSiriya,’ begodu nje sihlala eJerusalema.”
12 Ilizwi lakaJehova leza kuJoromiya lathi:
13 “Ngilokhu uJehova wamabutho, uZimu ka-Israyeli akutjhoko, ‘Khamba uye ebantwini bakwaJuda nezakhamuzini zeJerusalema uthi: “Akhenge nikhuthazwe kanengi na bona nilalele amezwami?”+ kutjho uJehova.
14 “UJonadaba indodana kaRekabi wayala isizukulwana sakhe bona singaseli iwayini, begodu salalela amezwakhe ngokuthi singaliseli bekube kunamhlanjesi, salalela umyalo kakhokhwaso.+ Nanyana kunjalo, ngikhulume nani ngokubuyelelweko kodwana akhenge ningilalele.+
15 Bengisolo ngithumela iinceku zami abaphorofidi kini, ngizithumela kanengi,+ zithi, ‘Ngibawa niphenduke, omunye nomunye eendleleni zakhe ezimbi+ nenze okulungileko! Ningalandeli abanye abozimu benibalotjhe. Nanenza njalo nizokusolo nihlala enarheni enganinikela yona, nina nabokhokho benu.’+ Kodwana akhenge ningizwe namkha ningilalele.
16 Iinzukulwana zakaJonadaba indodana kaRekabi zalalela umyalo ezawufumana kukhokhwazo,+ kodwana abantwaba akhenge bangilalele.”’”
17 “Yeke ngilokhu uJehova, uZimu wamabutho, uZimu ka-Israyeli akutjhoko: ‘Ngilethela uJuda nazo zoke izakhamuzi zeJerusalema yoke ihlekelele engabayelelisa ngayo,+ ngombana ngikhulumile kodwana akhenge bangilalele, bengisolo ngibabiza kodwana akhenge baphendule.’”+
18 UJoromiya wathi endlini yamaRekabi: “Ngilokhu uJehova wamabutho, uZimu ka-Israyeli akutjhoko, ‘Ngombana ulalele umyalo kakhokhwakho uJonadaba waragela phambili wenza koke akuyale ngakho, wenza njengombana akuyalile,
19 ngilokhu uJehova wamabutho, uZimu ka-Israyeli akutjhoko: “Isizukulwana sakaJonadaba indodana kaRekabi sizokuhlala sikhona silotjha phambi kwami.”’”
Imitlolo Ephasi
^ Namkha “lamaKasidi.”
